“Elder Jonathan S. Schmitt,” Liaona, Me 2022.
Elder Jonathan S. Schmitt
Vitusagavulu Vakaitutu Raraba
E kaya o Elder Jonathan S. Schmitt na “soli keda” sai koya na ka e kauta mai ki na nona veikacivi vaka Vakaitutu Raraba tokoni vou ena Vitusagavulu.
“Sai koya ga oqori na ka e tu vei keda,” a kaya. “Na ibalebale ni yalo raramusumusu kei na yalo bibivoro oya mo biuta ga na yalomu ena icabocabo ni soro ka vakatara na Turaga me cakava na Lomana mai kea.”
E kuria o Elder Schmitt, “Na Turaga e rawa ni solia vei keda na kaukauwa, na taledi, kei na isolisoli eda gadreva me da vakacavara kina na Nona cakacaka. Ia kevaka eda sega ni soli keda Vua, eda sa qai digitaki keda ga ka sega ni solia Vua na madigi me vakalougatataki keda ena noda sasaga meda qaravi Koya.”
A sucu o Jonathan Stephen Schmitt ena 16 ni Epereli, 1973, mai Mesa, Arizona, Amerika, vei rau o Robert Edward kei Dianne Lyda Schmitt. A tubucake o koya mai Yuma, e Arizona. Ena 21 ni Julai, 1995, a vakamau kei Alexis Swain Udall ena Valetabu e Mesa Arizona. Erau itubutubu ni lewe va na gone.
A rawata o Elder Schmitt e dua na koroi ni bejila ni vakadidike ena iteitei kei na ivurevure vakailavo ena 1997 kei na dua na koroi ni vuniwai ni jurisi ena 2000, mai na Univesiti e Arizona.
Ni oti na nona veiqaravi vakavunivola vakalawa ni Mataveilewai e Cake e Arizona, a cakacaka vaka loya ena fomu ni lawa raraba ni Akin Gump Strauss Hauer & Feld LLP. E muri a qai cakacaka vaka loya ka daunivakasala veilewaitaki vei Baker Hughes Incorporated. Me kena ikuri, a cakacaka vaka ivukevuke ni peresitedi ena Arizona State University.
A veiqaravi voli vaka-Vitusagavulu ni iWasewase o Elder Schmitt ena iWasewase na North America Southwest ena gauna a kacivi kina me Vitusagavulu Vakaitutu Raraba. Na nona veikacivi taumada e oka kina na veiqaravi vakaperesiteki ni Tabana ni Kaulotu na California San Diego mai na 2014 ki na 2017, peresitedi ni iteki, bisopi, daunivakasala ena mataveiliutaki ni iteki, lewe ni matabose e cake, peresitedi ni kuoramu ni italatala qase, sekeriteri liu ni tabanalevu, daunivakasala ena mataveiliutaki ni Cauravou ena iteki, iliuliu ni ilawalawa ni bete levu, qasenivuli ni vakavakarau ki na kaulotu ena iteki, ka daukaulotu tudei ena Tabana ni Kaulotu e California Fresno.