Meda Qoroi Karisito kei na Nona Kosipeli
Me vakalevutaka mada ga na noda kurabui ena solibula veisorovaki ni iVakabula na noda nanuma tiko na veika sa raica na matada, ka vakila na yaloda.
E dua tiko noqu itokani vinaka, tamata vuku, e parofesa vakacegu ni univesiti, dauvolaivola vuavuai vinaka, ka dua na tisaipeli yalodina i Jisu Karisito. E sa sikova oti vakavicavata na Vanua Tabu me vakaitavi ena koniferedi eso, caka vakadidike vakavuli, ka liutaki saravanua. Me vaka na nona vosa, na veigauna kece e sikova kina na vanua a taubaletaka o Jisu, e dau qoroqoro baleta e dau vulica vakaidina e dua na ka vou, veivakurabuitaki, ka vakasakiti me baleta na iVakabula, Nona veiqaravi e vuravura, kei na Nona vanua lomani. Na qoroqoro e dau vakaraitaka noqu itokani ni talanoataka me baleta na ka kece e vulica ena Vanua Tabu e veidewavi; ka sa mai yavu tu ni nona rawa-ka cecere kei na sasaga vakavuli eso ena nona bula na veivakurabuitaki oqo.
Ni’u vakarogoca na veika sotava o koya ka vakila nona maqusa, au vakananuma se vakacava beka na levu cake ni veivakurabuitaki vakayalo, meu kaya mada, e rawa ka dodonu meda vakila me baleta na kosipeli i Jisu Karisito kei na duidui e rawa ni cakava ena noda bula vakatisaipeli kei na noda ilakolako ki na bula tawamudu. Na veivakurabuitaki au kaya qo sa ikoya na vakilai ni lomadra, kidacala, se qoroqoro e dau yaco matau vei ira kece era vakatabakiduataka nodra bula ena yalodina kivua na iVakabula kei na Nona ivakavuvuli ka ra vakila ena yalomalumalumu na Nona sa tiko ena nodra bula. Na veivakurabuitaki vakaoqori, vakauqeti mai na veivakayarayarataki ni Yalo Tabu, e yavalata na gagadre me ra bulataka ena reki na ivunau i Karisito.1
E tu ena ivolanikalou e vica na ivakaraitaki eso ni sala e rawa ni vakatakilai mai kina na veika vakilai oqo. Me ivakaraitaki, na parofita o Aisea, a vakaraitaka na titobu ni nona vakavinavinaka kivua na Turaga ena nona rekitaki Koya.2 O ira era a rogoci Jisu ni vunau voli ena valenilotu e Kapenaumi era a kurabui ena Nona ivunau kei na kaukauwa a vakavulica kina o Koya.3 Sa ikoya na veika vakilai vata ga oqori a curuma na tiki kece sara ni yalo i gonetagane o Josefa Simici ni wilika o koya ena iVolatabu na imatai ni wase i Jemesa, ka a muataki koya me vakasaqara na vuku ni Kalou.4
Kemuni na taciqu kei na ganequ lomani, ni da sa qoroi Jisu Karisito dina sara kei na Nona kosipeli, eda sa mamarau cake, eda sa maqusa cake ena cakacaka ni Kalou, ka da vakila na liga ni Turaga ena veika kecega. Kena ikuri, na noda vulica na vosa ni Kalou e vakaibalebale cake; noda masu, e vakainaki cake; noda sokalou, e vakarokoroko cake; noda veiqaravi ena matanitu ni Kalou, e gumatua cake. Na veika kece oqo era cau ki na veivakauqeti wasoma cake ni Yalo Tabu ena noda bula.5 O koya gona, na noda ivakadinadina ni iVakabula kei na Nona kosipeli ena vaqaqacotaki, eda na vakabulai Karisito tikoga e lomada,6 ka da na bula tiko ni da sa “tauyavutaki ka tara cake vua, ka vakataudeitaki ena [noda] vakabauta, … [me da] uasivi cake kina ka vakavinavinaka.”7 Ni da bula ena sala oqo, eda yaco me tudei cake vakayalo ka taqomaki tu mai na sikalutu ki na dai ni vakawelewele vakayalo.
Na vakawelewele vakaoqori e dau kilai ena kena takali vakamalua na noda maqusa me da vakaitavi vakataucoko ena kosipeli ni Turaga. Vakararaba e dau tekivu ni da vakila ni sa rauti keda vinaka na kila-ka kei na veivakalougatataki me da marau kina ena bula oqo. Na lomawele oqo, meu kaya mada, e vakavuna me da taura vakamamada na isolisoli vakosipeli eso, ka tekivu kina, noda vavaca yani na ririko ni vakawaleni ruarua ni noda tabadromuci wasoma ena veika bibi ni kosipeli i Jisu Karisito8 kei na veiyalayalati eda sa cakava oti. Ka yaco kina, me da vakayawaki keda vakamalua mai vua na Turaga; vakamalumalumutaki noda rawa ni “rogoci Koya,”9 ka yaco me da yalowele ka sega ni kauwai ki na cecere ni Nona cakacaka. Na vakatitiqa me baleta na dina eso ni noda ivakadinadina ciqomi oti ena rawa ni curuma noda vakasama kei na yaloda, ka vakavuna noda rawai rawarawa ena veitemaki ni meca.10
O Pastor Aiden Wilson Tozer, e dua na dauvolaivola kilai ka Lotu Vakarisito yaloqaqa, a vola, “Na lomawele e sa dua na meca rerevaki ni tubu vakayalo kecega.” 11 E sega li ni ka sara ga oqo a yaco vei ira na tamata i Nifai ni oti ga na sucu i Karisito? Era “sa lailai sobu tikoga na nodra kurabuitaka na ivakatakilakila kei na ka e veivakurabuitaki mai lomalagi, … [ka tawavakabauta] na veika kece era a rogoca se raica.” Okoya sa cakava o Setani me “vakamatabokotaka na matadra ka tuberi ira tani me ra vakabauta ni sa ka wale ka vakalialia na ivakavuvuli i Karisito.”12
Kemuni na taciqu kei na ganequ, ena Nona loloma uasivi ka tawayalani kei na Nona kila na keda ituvaki vakatamata,13 na iVakabula e sa tauyavutaka tu na sala me da levea kina na sikalutu ki na dai ni vakawelewele vakayalo. Na veisureti ni iVakabula e solia vei keda e dua na rai rabailevu, ni vakasamataki vakabibi na vuravura verevereya eda bula voli kina: “Mo vuli vei au, ka muria na noqu vosa; mo bula ena yalomalua ni Yaloqu, ko na rawata kina na noqu vakacegu.”14 Ni da ciqoma na veisureti ni iVakabula, eda vakaraitaka na noda yalomalumalumu, noda gagadre meda vakatavulici vakarawarawa, kei na noda inuinui meda vakataki Koya vakalevu cake.15 Na veisureti oqo e oka talega kina na qaravi Koya kei na veiqaravi vei ira na luve ni Kalou “ena [yaloda] taucoko, igu, vakasama, kei na kaukauwa.”16 Ena uto ni noda sasaga ena ilakolako oqo sa ikoya, vakaidina, na vunau levu e rua: meda lomana na Turaga noda Kalou ka lomani ira na kai noda me vaka eda lomani keda.17
Oqo e tiki ni ivakarau vakalou i Jisu ka a laurai ena veika kecega a cakava o Koya ena Nona gauna ni veiqaravi e vuravura.18 Okoya gona, ni da cabori keda vakainaki ka vakaidina meda rai ki Vua ka vuli mai na Nona ivakaraitaki uasivi,19 eda yaco kina me kilai Koya vakavinaka cake. Eda na tubu ena nanamaki kei na gagadre me da taurivaka ki na noda bula na ivakatagedegede cecere duadua e dodonu meda bulataka, na ivakaraitaki e dodonu meda vakarautaka, kei na ivunau e dodonu meda muria. Eda na rawata talega na ikuri ni kila-ka,vuku, ivakarau vakalou, kei na loloma soliwale kivua na Kalou kei ira na wekada.20 Au rawa ni vakadeitaka vei iko ni noda rawa ni vakila na loloma kei na veivakayarayarataki ni iVakabula ena vakaqaqacotaki ena noda bula, vakalevutaka noda vakabauta, noda gagadre meda caka dodonu, kei na veivakauqeti me da qaravi Koya kei ira na tani.21 Me ikuri, na noda vakavinavinaka me baleta na veivakalougatataki kei na vei bolebole eda sotava ena bula vakavuravura ena vakadeitaki ka yaco me tiki ni noda sokalou dina.22
Kemuni na noqu itokani lomani, na veika kece oqo e vakaukauwataka noda veivakurabuitaki vakayalo ni kosipeli ka tosoi keda meda maroroya ena reki na veiyalayalati eda cakava kei na Turaga—ena maliwa sara mada ga ni veivakatovolei kei na bolebole eda sotava. E dina sara, me yaco na veika oqo, e gadrevi meda tabadromuci keda ena ivakavuvuli ni iVakabula ena vakabauta kei na yalodina,23 ka segata tiko meda taurivaka Nona itovodei eso ki na noda ivakarau ni bula.24 Me ikuri, eda gadreva me da toro voleka Vua ena noda veivutuni,25 ka vakasaqara tiko Nona veivosoti kei na Nona kaukauwa ni veivueti ena noda bula ka muria tiko na Nona ivunau. Na Turaga Vakataki Koya a yalataka ni na vakadodonutaka na noda ilakolako o Koya kevaka eda vakararavi Vua ena vu ni yaloda, vakarogotaka Vua na noda sala kecega ka kakua ni vakararavi ki na noda vakasama.26
E dua na turaga au a sotava wale tikoga qo, ka yacana o Wes, a ciqoma na veisureti i Karisito me vuli Vua kei na Nona kosipeli ka tekivu me vakila ka qoroya na Nona loloma ni oti e 27 na yabaki ni nona vakayawaki koya tu mai na salatu ni veiyalayalati. A tukuna vei au o koya ni dua na siga a veitaratara yani vua ena iVolamata e dua na daukaulotu, o Elder Jones, ka a lesi vakawawa tiko ena iwasewase nei Wes ni bera ni gole ki na nona ilesilesi ni kaulotu taumada e Panama. Ena gauna a raica kina o Elder Jones na itukutuku kei Wes, ka sega mada ga ni kila taumada ni sa lewena oti tu na Lotu o koya, a vakila na veidusimaki ni Yalo Tabu ka kila ni dodonu me veitaratara sara vakatotolo vei Wes. A cakacakataka totolo o koya na veivakauqeti oqo. A kurabui o Wes ena veitaratara tawa namaki oqo ka tekivu me vakila ni Turaga a kilai koya tu veitalia na nona yawa mai na salatu ni veiyalayalati.
Mai na gauna oya, ratou a tekivu veitaratara wasoma o Wes kei na daukaulotu. Erau a veiqaravi e veimacawa o Elder Jones kei na nona itokani kei na itukutuku vakayalo ka vukei Wes me vakalesuya mai na nona qoroya na iVakabula kei na Nona kosipeli. A vakacaudreva tale na yameyame ni nona ivakadinadina me baleta na dina kei na loloma ni iVakabula ena vukuna. A vakila o Wes na vakacegu e lako mai vua na Dauveivakacegui ka rawata na kaukauwa a gadreva o koya me lesu ki na lomanibai. A tukuna vei au o koya ni ka sotavi oqo a kauti koya lesu mai ki na bula vakayalo ka vakasama ka vukei koya me biuta laivi na yaloca a kumuni vata tu ena veiyabaki baleta na veika dredre a lako curuma tu o koya.
Me vaka a raica na noqu itokani parofesa raititobu tukuni oti mai liu, e dau tiko ga e dua na ka veivakurabuitaki ka vakasakiti me vulici me baleti Jisu Karisito kei na Nona kosipeli.27 Na Turaga e sa cakava na yalayala veivakurabuitaki eso ka sa soli vei ira kece, oka kina o keda, era vakasaqara me vuli vei Koya ka taurivaka Nona vosa ki na nodra bula. A kaya o Koya vei Inoki, “Raica [ena] tiko vata kei iko na Yaloqu, ia au na vakadonuya na nomu vosa kecega; ia ena dro tani mai matamu na veiulunivanua, ka vagolea tani na drodro ni uciwai; ia, ko na tu vei au, ka’u na tu vei iko.”28 Mai vua na Nona dauveiqaravi o Penijamini na Tui, a kaya o Koya, “Ko ni sa vakatokai kina mo ni luvei Karisito, na luvena tagane, ka luvena yalewa; ni raica, sa vakasucumi kemuni vakayalo ko koya ena siga oqo; ni ko ni sa kaya sa veisau na yalomuni ni ko ni sa vakabauta na yacana; o koya, sa vakasucumi kemuni kina mo ni luvena tagane ka luvena yalewa.”29
Okoya gona, ni da segata tikoga ena dina e veigauna meda vuli vua na iVakabula ka muria Nona ivakaraitaki, au yalataka vei iko, ena Yacana, ni na volai tu na Nona itovodei vakalou ena noda vakasama kei na yaloda,30 ni da na yaco me vakataki Koya vakalevu cake, ka da na lako vata kei Koya.31
Kemuni na taciqu kei na ganequ lomani, sa noqu masu ni da na dau tu tawamudu ena qoroi Jisu Karisito kei na Nona loloma e taucoko, tawayalani, ka uasivi sara. Me vakalevutaka mada ga na noda kurabui ena solibula veisorovaki ni iVakabula na noda nanuma tiko na veika sa raica na matada, ka vakila na yaloda, ka na rawa ni vakabulai keda mai na noda mavoa vakayalo kei na vakasama ka vukei keda me toro voleka Vua. Me da qoroya mada ga na yalayala cecere eso sa tu e Liga i Tamada ka sa vakarautaka tu o Koya me baleti ira era sa yalodina:
“Sa nomudou na matanitu kei na veivakalougatataki sa koto kina, ka sa nomudou na iyau ni gauna tawamudu.
Ia ko koya sa vakavinavinakataka na ka kecega sa soli vua ena vakalagilagi.”32
Sa i Jisu na Dauveivueti ni vuravura, ka sa ikoya oqo na Nona Lotu. Au wasea na noqu ivakadinadina ena dina eso oqo ena yaca veivakurabuitaki, tabu, ka cecere sara ni noda iVakabula, o Jisu Karisito, emeni.