NGAAHI PEESI FAKALOTOFONUÁ
Ko ha Fakanonga Pau
ʻI hoku taʻu 10, naʻe hoko ʻeku faʻeé ko ha faiako ʻi he toʻu tupú ʻi he Siteiki ʻOkalani Kalefōnia, Uooti ʻOkalani 8. ʻI ha efiafi ʻe taha, naʻa mau ʻi homau ʻapisiasí ai ki he ngaahi ʻekitivitī ʻa e uōtí. Naʻe ʻosi vave ʻemau ʻekitivitī Palaimelí, ko ia naʻá ku nofo ʻi he holó mo ha niʻihi ne u tokoua ʻaki mo e ngaahi kaungāmeʻá, ʻo talitali ki heʻeku faʻeé, ʻa ia naʻe tokoni ʻi he Pō ʻa e Toʻu Tupú.
Naʻa mau vaʻinga taufetuli mo langatoi, ka ne mau fuʻu tokolahi pea naʻe fonu ʻa e holó. Naʻe fie ʻalu e tamaiki lalahi angé ki tuʻa ʻo vaʻinga ai he naʻe ʻataʻatā ange ia, pea koeʻuhí foki naʻe fakapoʻuli ange ʻa tuʻa ia ʻi he holó (ko e ʻosi ia e 7:00 pm).
Naʻá ku taʻepauʻia he ʻai ke muimui ʻiate kinautolú. Naʻá ku kole ange pe te mau lava pē ʻo vaʻinga ʻi loto, ka naʻe pehē mai ʻe hoku ngaahi kaungāmeʻá, “[Te tau] sai pē ʻi tuʻa. ʻOku tau tokolahi. ʻE sai pē ia.” Ka naʻe ʻikai ke u loto ke tauteaʻi au, ko ia ne u fakakaukau ke u poaki ki heʻeku faʻeé ke u ʻalu ʻo vaʻinga ʻi tuʻa.
Naʻe tali mai ʻe heʻeku faʻeé “ʻIkai.” Neongo naʻá ku taʻefiemālie he ʻai ke muimui ʻi hoku ngaahi kaungāmeʻá, ka naʻá ku kei loto-mamahi pē ʻi he ʻikai fakangofua ke u ʻalu ki tuʻá. Naʻe fakalata ʻaupito ʻemau vaʻingá. “Ko e hā ʻoku ʻikai ke u lava ai ʻo ʻalú?” Ko ʻeku fehuʻí ange ia. Ko e ʻuhinga pē ʻa e fineʻeikí ke ʻoua naʻá ku ʻalu ʻo vaʻinga ʻi he fakapoʻulí ʻi ha feituʻu he ʻikai lava ʻo sio mai ai kiate au.
ʻI heʻeku momou mo talaange ki hoku ngaahi kaungāmeʻá ke nau ʻalu pē kinautolú, naʻe ongo totonu ia. Ne hangē ia naʻe fakapapauʻi mai ʻe he Laumālié ʻa e fakatokanga ʻa ʻeku faʻeé . . . ka naʻe muimui ai he momeniti ko iá ha vaivaiʻanga ʻe taha. Naʻe faingataʻa ke u sio ki he lele hoku ngaahi kaungāmeʻá ki tuʻa he matapaá, ko ia ne u puna ki ʻolunga ʻo lele mo kinautolu, mo ʻeku fakapapauʻi te u talangataʻa ki heʻeku faʻeé.
ʻI heʻeku aʻu pē ki he matapā ki tuʻa ʻi he falelotú, ne u ongoʻi hangē ne ʻi ai ha nima naʻá ne taʻofi aú. Naʻá ku tuʻu ʻo tafoki ki mui, ka naʻe ʻikai ke ʻi ai ha taha ia ai ke ne puke hoku nimá. ʻI heʻeku ʻohovalé, ne u tuku ai hoku ngaahi kaungāmeʻá ke nau ʻalu, peá u foki leva ʻo tangutu toko taha ʻi tuʻa ʻi he loki ako naʻe ʻi ai ʻeku faʻeé.
ʻI he miniti ʻe 10 pe 15 naʻá ku tatali ai ke ʻosi e Pō ʻa e Toʻu Tupú, naʻá ku toe fakakaukau ki he meʻa ne toki hokó. Naʻá ku kei loto-mamahi pē ʻi he ʻikai ke u vaʻinga ʻi tuʻa mo hoku ngaahi kaungāmeʻá, ka naʻá ku fakakaukau ki he ongo taʻefakafiemālie ko ia ne u maʻu talu mei hono ʻuluaki fokotuʻu hake ke mau hū ki tuʻa mei he falelotú, pea mo e fakahinohino ʻeku faʻeé ke u nofo ʻi lotó, pea mo e ʻnimaʼ foki ko ia naʻá ne puke aú.
Naʻá ku manatuʻi ʻeku kiʻi ongoʻi nonga taimi nounou ʻi heʻeku ʻuluaki fakakaukau ke talangofua ki heʻeku faʻeé, peá u fakatokangaʻi ʻi heʻeku tatali ki aí, ʻoku ou toe lava ʻo ongoʻi e Laumālié, ʻi heʻene fakahā mai ke u ʻilo naʻá ku fakahoko e fili totonú.
Aʻu mai ki he ʻahó ni, ʻoku ʻikai te u ʻilo e ʻuhinga ne mātuʻaki mahuʻinga ai ke u nofo ʻi falelotu ʻi he pō ko iá, pea ʻoku ʻikai mahuʻinga ia. ʻOku ou houngaʻia pē ki he Laumālie Māʻoniʻoní ʻokú Ne tataki mo fakafiemālieʻi kitautolu, ʻo aʻu ki he taimi ʻoku ʻikai ke mahino ai kiate kitautolú . . . pea ʻoku ou houngaʻia koeʻuhí ko ʻeku talangofuá, naʻe fakaʻatā ai ʻe he Laumālié ke ma fononga lelei ki ʻapi hili e ngaahi ʻekitivitī fakauōtí, ʻo ʻikai ha tafulu mei heʻeku faʻeé.