Savali Faaleautaitai i le Eria
O le FMT e Mafai ona Tu mo le Pepa Faataga o le Malumalu o loo Aoga
O le taulai ia Keriso ma le avea faapei o Ia e matuā taua tele i lo tatou alualu i luma faaleagaga. O le aai ma feinu i le faamanatuga ma le auai i le malumalu o ni auala se lua e taulai ai ia te Ia. O feagaiga tatou te osia pe a tatou fetagofi i le faamanatuga ma feagaiga tatou te osia i le malumalu o ni auala matuā taua lava e faaali ai lo tatou alolofa ma le taulai i le Faaola.
I le asō ou te fia faasoa atu e uiga i le paia ma le mana o le malumalu i o tatou olaga. O le FMT e tu mo le Filifili Mea Tonu, ma e tu foi mo le Pepa Faataga o le Malumalu o loo Aoga. O le valaaulia mo i tatou uma mai i le tausaga e 11, o le umia lea o le pepa faataga o le malumalu o loo aoga.
Aisea e matua taua ai ia i tatou uma le umia o le pepa faataga o le malumalu o loo aoga? O le faaali atu lea i le Alii o loo tatou i ai i luga o le ala o feagaiga, ma o loo faaali ai i le Alii o loo tatou tutumau ai i luga o le ala o feagaiga.
Na saunoa mai Peresitene Russell M. Nelson i le Konafesi Aoao o Oketopa 2022 e uiga i feagaiga:
“O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua.”1
E te ono fesili poo a na feagaiga. I le Tusitaulima Aoao o Faatonuga 27:2 i lalo o le ulutala, O le Faaeega Paia, o loo faapea mai:
“I le faaeega paia, e valaaulia ai tagata o le Ekalesia ia osia feagaiga paia e:
-
“Ola i le tulafono o le usiusitai ma taumafai malosi e tausia poloaiga a le Tama Faalelagi.
-
“Usitai i le tulafono o le taulaga, o lona uiga o le ositaulaga lea ma lagolago le galuega a le Alii ma se loto momomo ma le agaga salamo.
-
“Usitai i le tulafono o le talalelei a Iesu Keriso, o le Tulafono maualuga atu lea na Ia a’oa’o mai a o i ai o Ia i le lalolagi.
-
“Tausia le tulafono o le ola mama, o lona uiga ia leai ni faiga faalefeusuai sei vagana ai ma i latou ua latou faaipoipo i ai faaletulafono e tusa ai ma le Tulafono a le Atua.
-
“Tausi le tulafono o le faapaiaga, tuuto atu o o latou taimi, taleni, ma mea uma ua faamanuiaina ai i latou e le Alii e fausia ai le Ekalesia a Iesu Keriso i le lalolagi.”2
O loo i ai faamanuiaga sili ma matagofie o loo faatalitali mai mo e ulufale atu i le maota paia o le Alii.
O Elder Dale G. Renlund o le Korama a Aposetolo e Toasefululua na faasoa maia nisi o faamanuiaga matagofie o loo i ai mo lo tatou mauaina pe a tatou auai i le galuega laveai mo o tatou tuaa:
-
Fesoasoaniga e foia ai ni loto atuatuvale, nutimomoia pe popole;
-
le agavaa e le toe lagona ai le tuua toatasi;
-
Faateleina le alofa mo isi, ae maise lava tagata o lou aiga o loo soifua ma ua maliliu;
-
le mana e iloatino ai;
-
Uunaiga sili atu a le Agaga Paia e lagona ai le taitaiga i lou olaga;
-
Faateleina le gafatia e salamo ai ma maua le puipuiga mai faaosoosoga;
-
le faamamaina ma le faapaiaina o se loto o se tasi;
-
Faateleina faamanuiaga faaleaiga, e tusa lava poo le a le tulaga o le aiga i le taimi lenei, ua tuanai, po o le lumanai pe faapefea foi le le atoatoa o se gafa o aiga o se tasi;
-
le liua loloto ma le tumau i le Faaola e ala i le faatuatua faateleina ia te Ia ma se malamalamaaga sili atu i Lana Togiola;
-
Olioli faateleina e ala i le gafatia faateleina e lagona le alofa o le Alii.3
O le saunoaga faaiu a Peresitene Nelson i le Konafesi Aoao o Oketopa 2022 sa faaulutalaina, “Taulai atu i le Malumalu”.4
I le Faaaliga 7 fuaiupu 13–17 ua faitauina faapea:
“Ona fai mai lea o le tasi o le au toeaina, ua faapea mai ia te au, O i latou ia e ua oofu i ofu sisina, o ai ea i latou, po o fea foi na latou o mai ai?
“Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai Mamoe.
“O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou.
“Latou te le toe fia aai, e le toe fia inu foi e le ogotia i latou i le la, po o se tasi vevela.
“Auā o le Tamai mamoe o loo i luma o le nofoālii na te fafaga ia i latou, ma ta’ita’i ia te i latou i puna o vai ola; e sōloieseina foi e le Atua o loimata uma nai o latou mata.”
Ia tatou, i upu a Peresitene Nelson, “Saili ia maua le malologa mai le mau gasu, lē mautonu, ma tiga o lenei lalolagi e ala i le manumalo i le lalolagi e ala ia tatou feagaiga ma le Atua.”5
Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai