Talafaasolopito o aiga
O se Talanoaga e uiga i Tala Tāua
Elder Soares: I le tele o aiga Amerika Latina, e faatupuina manatuaga a o siomia le laulau ai—ma na faapena ona faia e lo’u aiga. Sa faaaoga soo se avanoa e faatasitasi ai, kuka, ma aai ni meaai maoae. O aso fanau, aso malolo, ma oo lava i Aso Sa sa faaalu faatasi o se aiga. O se tu masani sa tuufaasolo mai; ma e oo lava ina ua amata le ma’ua lava aiga ma le ma fanau e toatolu, sa matou asiasi atu i lo’u aiga i Aso Sa uma lava—sa matou kuka faatasi, faasoa faatasi se ‘aiga, ma faatasitasi ai mo le tele o itula i le alofa ma le lagolago o le tasi i le isi.
Tuafafine Soares: O nei tala ma tu masani faaleaiga o ni vaega o ai i tatou. O nisi o nei tala ma tu masani ua tuufaasolo mai ma o nisi o i latou ua maua. A o tatou punouai e faia talafaasolopito o aiga ma maua isi faamatalaga e uiga ia i latou na muamua atu ia i tatou, e mafai ona tatou mauaina le mana i lena sailiga—mana e mafai ona taitaia i tatou e malamalama sili atu po o ai i tatou ma po o fea tatou te auai.
Elder Soares: O a ni tala faaleaiga e te maua mai ai le malosiaga? O a tu masani e te tausisi pea i ai ia ola?
Tala a o Tamaitiiti
Elder Soares: Sa i ai so’u uso e lua tausaga e matua atu ai ia te au lea sa i ai sona faafitauli i lana faalogo. Sa tele ina faigata ai fesootaiga, ma ou te manatuaina le auala na manaomia ai le avea o au ma ana soa, i le fesoasoani lea ia te ia e fai soo se mea ma fesootai ma tagata. Sa tatau ai ona ou aoaoina le talanoa e faaaoga ai faailoga i lima i le lotu. Mo se faataitaiga, sa i ai se taimi na maua ai sona tofiga e faia se lauga i le lotu. Ae peitai, sa le mafai ona tautala o ia. Ae sa ma nonofo faatasi, ma ou talanoa ia te ia e ala i faailoga, ma fesoasoani ia te ia e tusi se lauga. I le lotu faamanatuga, na tu o ia i o’u tafatafa i le pulelaa a o ou faitauina lana lauga sa ia saunia.
Tala i le Fatuina o se Aiga
Elder Soares: Sa ou feiloai ia Tuafafine Soares i se siva a le lotu i le ono masina talu ona maea la’u misiona. Sa faapena foi ona faatoa foi mai o ia mai se misiona.
Tuafafine Soares: Sa ou iloa atu na e vaai mai ia te au, ma sa faapena foi ona oso ni lagona i totonu ia te au. Ma na uma loa le pese, e sau loa ma fai mai ia te au ta te sisiva.
Elder Soares: Sa faaauau ona avea i maua ma uo, ae o lena po na tatala ai o ma mata. Sa ma taufai vaai i leisi o se talavou faatuatua o le Au Paia o Aso e Gata Ai ma le agavaa ai mo se sootaga. Ma i le lua vaiaso mulimuli ane na amata ai ona ma feoai faamasani. O le 41 lena o tausaga talu ai.
Fanau a le Atua ma le Malumalu
Elder Soares: O le manatua o a tatou aganuu, tupuaga ma tu masani e taua. Faatasi ai ma aafiaga e aofia i lo tatou tala o le olaga, e fesoasoani i lo tatou malamalamaaga po o ai i tatou. Ae e le mafai ona e malamalama atoatoa i le lautele po o ai oe e aunoa ma lou malamalama po o ai oe!
Tuafafine Soares: O le malaga atu i le malumalu e mafai ona fesoasoani ia i tatou taitoatasi e toe fesootai ma o tatou a’a faaleagaga. O iina le nofoaga e mafai ai ona e aoaoina ma toe aoaoina le fuafuaga a le Atua mo i tatou. O iina le nofoaga tatou te maua ai le avanoa e fesoasoani ai i le mafuaaga silisili o le faapotopotoina mo i latou o i o tatou aiga o e e le i mauaina lava se avanoa e maua ai sauniga paia i o latou olaga.
Ou te iloa e toatele latou o loo faatalitali i le Alii mo le avanoa e faatasia ai o se ulugalii pe faamauina i o latou matua po o fanau mo le taimi nei ma le faavavau.
O le malamalama po o ai i tatou, mai fea pe mai ia te ai na tatou tupuga mai ai, e mafai ona aumaia i o tatou olaga le lagona silisili o le filemu, vaaiga, ma le faamoemoega.
Elder Soares: O totonu o le malumalu lea e mafai ona e iloaina ai e le gata po o ai oe ma o ai e ana oe ae faapea foi po o ai e tatau ona avea ai oe.
Tuafafine Soares: O mea ua mauaina ia tatou te talanoa i ai e mafai ona maua ai se aafiaga mamana ma tumau e le gata i o tatou olaga taitoatasi ae faapena foi i olaga o i latou ia tatou te tupuaga faatasi.
O le Tala Sili Ona Tāua
Elder Soares: E tutusa lava le tāua, a leai e sili atu ona tāua nai lo le tuufaasolo atu o aganuu ma tupuaga, o le tuufaasolo atu lea o a tatou molimau o le talalelei a Iesu Keriso ma a tatou molimau ia te Ia ma Lana Togiola. O lena talatuu o le faatuatua sa tuufaasolo mai i lea tupulaga i lea tupulaga o le tupuaga tofi e mafai ona tatou tuufaasolo atu i tupulaga o lumanai.
Maualuga lava i luga o le Mauga o Kokovato (Corcovado) o loo tu ai le Keriso le Togiola (Cristo Redentor). O lenei faatagata mamalu o loo faaalia ai le Faaola ma ona aao o loo faaloaloa mai ma ua avea ma se tasi o ata sili ona iloagofie i Pasila.
E i ai aso e mafai ai ona e vaai manino lava i lenei maafaamanatu maualuga i luga o le aai, ae e i ai taimi e oo mai ai ao, ma punitia ai le faatagata mai le vaai. I na taimi, e manaomia ai le tulai maualuga a’e. Ina ia mafai ona vaai e manaomia ai ona a’e i luga o le a’ega. E maeu le moni o lenei mea e uiga i lo tatou Faaola, o Iesu Keriso. Ina ia iloa o Ia, ina ia iloa po o ai o Ia, e manaomia tatou taitoatasi e tulai maualuga a’e ma a’e i lena a’ega agai i luga.
E mafai ona e mauaina, a o amata ona e iloa o Ia, o loo i ai le mana ma le nofoaga i le aiga o le Atua o loo avanoa mo oe. O le a Ia aveina oe i le tulaga lava o i ai oe i le taimi lenei, ma a o e sau ia te Ia ma aoao e uiga ia te Ia, e mafai ma o le a avea atili oe faapei o Ia.
O le vaega o lena avea ai faapei o Ia e aofia ai le auai i le faamoemoe o le faapotopotoga i itu uma o le veli, a o e fesoasoani i le Alii e “aumaia le tino ola pea ma le ola e faavavau o le tagata” (Mose 1:39), ua aoao mai tusitusiga paia o le a avea moni lava i tatou ma faaola i le Mauga o Siona (tagai i le Opetaia 1:21). Ae o le a le uiga o lena mea? E pei lava ona ositaulagaina e le Faaola Lona soifua mo tagata ola uma, e avea foi i tatou i se vaega itiiti o ni faaola ia i latou o e e leai se auala e maua ai sauniga o le faaolataga ma le faaeaga e aunoa ma se fesoasoani mai ia i tatou iinei i le lalolagi. O lona uiga, o loo tatou auai i lenei galuega e fesoasoani ia i tatou i la tatou sailiga ia avea atili faapei o Iesu Keriso.
Ou te folafola atu a o e auai faatasi ma Ia i le faataunuuina o le galuega a lo tatou Tama, i le fesoasoani lea ia i latou e lei maua lava le avanoa e talia ai o Ia ina ia latou faia laasaga i luga o le ala o feagaiga, o le a amata ona e vaai ia te Ia e pei ona i ai o Ia. O le a avea oe faapei o Ia, ma o le a e iloaina ai po o ai oe ma le tulaga ese e mafai ona avea ai oe!