ITULAU I LE LOTOIFALE
O Mata e Taulai Atu i le Malamalama o le Malumalu
I le po, e pogisa le lagi ma Queens Road, lea e agai atu i Suva, Fiti, ae faatoa malamalama lava i moli o taavale agai mai. I nisi taimi, e foliga mai e solo atoa le auala ma le pogisa o laau, ma e faigata lava ona iloa mea o i luma atu. Ona sosoo ai lea ma se pi’oga, e aliali mai ai se susulu matagofie i luga o le tamai mauga i luga ae o le auala, e pei o se faaaliga faalelagi. O le susulu mafanafana o le Malumalu o Suva, Fiti o Le Ekalesia a Iesu Keriso o le Au Paia o Aso e Gata Ai e tosina mai ai i luga le vaai a le tagata malaga ma augani atu i tagata uma e o ae ese mai le pogisa ma o atu i le malamalama.
Na faafiafiaina tagata o le Paranesi a Sigatoka e auai i le Malumalu o Suva Fiti i lena taeao ia Aokuso 2022. Mo tagata o le Ekalesia, o le malumalu o se nofoaga paia o tapuaiga, o se nofoaga o le filemu ma faaaliga, o se nofoaga e lagona ai le latalata atili atu i le Tama Faalelagi ma Iesu Keriso. O le mea e faatinoina ai sauniga paia ma faatasia ai aiga—e le faapea seia tuueseesea i latou e le oti, ae mo le faavavau.
Ia Fepuari 2022, sa valaauina ai Tuafafine Basilisa Nadreke Lotawa e le Peresitene o le Paranesi a Sigatoka (o se taitai o le ekalesia) e auauna o se taitai tomai faapitoa i le malumalu ma talafaasolopito o aiga. O le galuega a Basilisa o le uunaia o ana au paia e sii ae o latou mata faaleagaga i le malamalama o le malumalu ma ia saunia i latou lava mo tapuaiga i le malumalu. Sa manaomia foi e ia ona aoao le faiga o sailiiliga tau gafa ona ia aoao ai lea o ona uso a Au Paia i auala e iloa ai o latou tuaa ua maliliu ina ia auai e fai ma sui i sauniga o le malumalu mo i latou.
O Basilisa, o se tina talavou e toatolu lana fanau, na lūlū lona ulu ma ata. “Ou te le i iloa ma se mea e uiga i le faiga o talafaasolopito o aiga—leai ma se mea . . . ma ou te laitiiti foi ou te faia ai.” Ae, i le manao e auauna atu i le Alii, sa ia saili ai le fesoasoani a se tagata tausi gafa poto masani ma sa vave ona mafai ona ia fesoasoani i tagata o lana paranesi. Faatasi ai ma se talitonuga fou ma se naunautaiga mo talafaasolopito o aiga, sa faapea mai Basilisa, “Ua matua faamanuiaina ma faamamaluina au i lenei galuega mamalu. Ua matua ofoofogia, maoae! Ua ou vaai i vavega ma mea ofoofogia. Ua saunia e le Alii se auala mo au e faia ai le galuega ma fesoasoani i la’u paranesi.”
Faatasi ai ma le feluuluu o lana fanau, sa faaalu e Basilisa se tele o itula i le komepiuta i le falesa e fesoasoani i isi e faaopoopo lala o o latou gafa o aiga. Sa ia valaauliaina i latou—tagata matutua ma talavou—e saili tagata o aiga ua maliliu o o latou aiga o e manaomia sui papatisoga. Sa maua foi tagata o le paranesi i lona naunautaiga ma maua ai tuaa e lua selau!
I le 2:00 am i le aso 27 o Aokuso 2022, sa feosofi ai tagata o le Paranesi o Sigatoka i se pasi mo le malumalu i Suva. Sa lei faavaivaia o latou agaga i le vave tele ona amata. Sa vaaia lo latou fiafia tele a o taunuu atu i le nofoaga o le malumalu—sa saunia i latou e auai i sauniga e fai ma sui o o latou tuaa, ma isi sauniga mo i latou lava.
O se aso olioli faapitoa mo Maritiano Ratumeli, le Peresitene o le Paranesi a Sigatoka. Sa fusia faatasi ai i le malumalu o ia, lana ava ma o la atalii e toalua o se aiga faavavau, e ala i le pule lea e taua e tusitusiga paia, o le “mana faamau.” Ma ona loimata, sa faapea mai Peresitene Ratumeli: “E ese le ofoofogia o le faapea atu o au o se tasi o i latou ua faamanuiaina e faamauina i le malumalu. Ou te lei faamoemoe . . . o le a faatasi le paranesi ma au, ae sa fuafuaina e le Alii ia latou molimauina lenei mea. O la’u sini o le musuia o isi e o mai. Ua lelei ma faamanuiaina o’u faalogona ua mafai ona faatasi lo’u aiga e faavavau.” Sa maofa isi tagata o le paranesi a o latou “lagonaina le Agaga” ma “lagona le i ai iina o tagata o o latou aiga.”
Ae mo Basilisa, e leai se masalosalo o lona alofa mo le galuega faalemalumalu ma talafaasolopito o aiga—e oo lava i lenei laasaga pisi o lona olaga, o le a faaauau pea ona faamanuiaina o ia. Sa ia faapea mai: “Ou te lagonaina le olioli lava e tasi i le faia o lenei [galuega] lea sa ou lagonaina a o ou auauna ai i la’u misiona.” O lenei la o ia ma lana paranesi ua mausali le taulai atu o o latou mata i le malumalu paia.