Ang Pinagpala at Maligayang Kalagayan

Larawan

pamilyang magkakasamang nagdarasal

Mahal na mga Magulang,

Nagturo si Haring Benjamin tungkol sa kagalakang nadarama natin kapag ipinamumuhay natin ang ebanghelyo. Pinayuhan niya ang kanyang mga tao na “isaalang-alang ang pinagpala at maligayang kalagayan ng mga yaong sumusunod sa mga kautusan ng Diyos” (Mosias 2:41).

Maaari ninyong rebyuhin ang sumusunod na mga artikulo bilang pamilya at pagnilayan kung paano naghatid ng kaligayahan at mga pagpapala sa inyong buhay ang pamumuhay ayon sa mga alituntuning ito.

Mga Talakayan Tungkol sa Ebanghelyo

Busugin ang Inyong Kaluluwa sa Madalas na Pagdarasal

Tulad ng sinasabi sa atin ng gutom na kailangan nating busugin ang ating katawan, may paraan ang ating espiritu sa pagpapaalam sa atin na kailangan nating busugin ang ating espiritu. Magbahagi ng ilang sipi mula sa artikulo ni Elder Ulisses Soares tungkol sa panalangin (pahina 4) at anyayahan ang inyong mga kapamilya na magbahagi ng isang pagkakataon na nadama nila na binusog ng panalangin ang kanilang kaluluwa.

Sulit Itong Pagsikapan

Madaling isipin kung gumagawa ng kaibhan ang mga pagsisikap ninyong turuan ang inyong mga anak. Sa kanyang artikulo sa pahina 12, ibinahagi ni Elder Hugo E. Martinez ang sarili niyang karanasan sa pagtuturo ng ebanghelyo sa kanyang mga anak. Habang nagbabasa ka, pagnilayan ang maliliit na hakbang na magagawa mo para lumikha ng isang tahanan na mas nakasentro kay Cristo—na palaging sulit na pagsikapan.

Paglikha ng Isang Matibay na Saligan

Ipinapahayag ng “Ang Mag-anak: Isang Pagpapahayag sa Mundo” ang mahahalagang katotohanan at pamantayan ng ebanghelyo. Basahin ang artikulo sa pahina 16 para malaman ang tatlong paraan ng paggamit ng pagpapahayag tungkol sa mag-anak para matulungan ang inyong mga anak na lumikha ng matibay na espirituwal na saligan at maghandang ipagtanggol ang kanilang mga paniniwala.

Katuwaan ng Pamilya sa Pumarito Ka, Sumunod Ka sa Akin

Masigasig na Saliksikin ang mga Banal na Kasulatan

Mga Salita ni Mormon 1:11

Sa buong kasaysayan, nagsikap nang husto ang mga propeta na mapangalagaan ang talaan ng kanilang mga turo upang magkaroon tayo ng kaalaman tungkol sa ebanghelyo. Matapos matanggap ang mga laminang ginto, isinulat ni Mormon: “Ako, si Mormon, ay nananalangin sa Diyos na mapangalagaan ang mga ito mula sa panahong ito. At nalalaman kong mapangangalagaan ang mga ito; sapagkat may mga dakilang bagay na nasusulat sa mga ito” (Mga Salita ni Mormon 1:11).

Maipapakita natin ang ating pasasalamat para sa mga talaang ito at mapapalakas ang ating pananampalataya sa Panginoon sa masigasig na pagsasaliksik ng mga banal na kasulatan. Bilang pamilya, maaari kayong magkaroon ng scripture race:

Isulat ang ilang kataga ng ebanghelyo tulad ng Tagapagligtas, pananampalataya, pagsisisi, binyag, at Espiritu Santo sa iba’t ibang piraso ng papel.
Papiliin ng isang piraso ng papel ang isang kapamilya at ipabasa sa kanya ang salita.
Mag-uunahan ang mga miyembro ng pamilya na hanapin ang salita sa Aklat ni Mormon. Ang unang makahanap ng isang talata na naroon ang salitang iyon ay maaaring ibahagi ang talatang iyon sa pamilya.

Mula sa Magasing Kaibigan

Mga Kuwento sa Aklat ni Mormon

Gamitin ang mga tulong sa pag-aaral sa bahaging Pumarito Ka, Sumunod Ka sa Akin sa buwang ito para ituro sa inyong mga anak ang talinghaga ng mga punong olibo at ang kuwento ni Enos.

Ang Kapangyarihan ng Panalangin

Maghanap ng mga kuwento, aktibidad, at mensahe mula sa propeta para tulungang matuto ang inyong mga anak tungkol sa panalangin.

“Kaya Nating Lutasin Ito”

Turuan ang inyong mga anak na maging mga tagapamayapa sa pamamagitan ng pagbasa sa isang kuwento tungkol sa dalawang magkapatid na lalaki na natutong lutasin ang mga hindi nila pagkakasundo sa halip na mag-away.

Paglaking Katulad ni Jesus

Sa Bahaging para sa Nakatatandang mga Bata, alamin kung paano nagtakda ng mga mithiin sina Isabela at David para magkaroon ng mga talento at makagawa ng kaibhan.