Aolep Men Naaj Em̧m̧an Kōn Bujen ko an Tampeļ
Ejjeļo̧k men eļap an aorōk jān ad kautiej bujen ko kwar kōm̧m̧ani ak bolen kwonej kōm̧m̧ani ilo tempeļ.
Ro jeiū im jatū jitōn bōro, m̧wen̄an in an kweilo̧k in ear juon eo, , n̄an n̄a, juon iien eo ekwojarjar. Ij kam̧m̧oolol kōn ijjitōn eo aō n̄an kōnono n̄an milien Armej ro Rekwojarjar im ro jerar ipeļaakin laļ in. Ij iakwe kom̧, im ijeļā Irooj ej iakwe kom̧.
Elōn̄ļo̧k jān 50 iiō ko rej mootļo̧k, ikar jeraam̧m̧an n̄an jerbal āinwōt būreejtōn an Ricks College ilo Rexburg, Idaho. Ilo jibbon̄ in Juun 5, 1976, kōrā eo pāleeō, Kathy, im n̄a kar ettōr jān Rexburg n̄an Idaho Falls Idaho Temple n̄an pād ilo liāpe eo an juon m̧ōttam eo epaake kōm̧. Aaet, ippān ļaddik ro emān nejim ilo m̧weo im̧ōm̧ ilo iien in, tūreep eo am n̄an tampeļ ekar maron̄ tōprak wōt kōn jipan̄ an juon rikkaajriri eo edieo. Kōm kar likūt ajri ro nejim raiboojoj ilo kōjparok eo an im kar illo̧k, ilo iaļ eo 30 minut tukadu in ilo ettōr.
En̄jake eo am ilo tampeļ raan eo ekar lukkuun em̧m̧an, āinwōt kar aolep iien. Ijoke, ālkin an jem̧ļo̧k liāp eo ilo tampeļ eo—im ilo am kar kōppopo n̄an ro̧o̧l n̄an m̧weo—kōm̧ ar kile elōn̄ rijerbal ro an tampeļ im patron ro rekar ikūm̧kūm̧ ilo aer kōnono ilo ļabbi eo an tampeļ eo. Ilowaan wōt jejjo minit ko, juon iaan rijerbal in tampeļ eo ekar kepaake kōm im ba bwe jikin kakwoņ dren eo etan Teton Dam im ej kab m̧ōj kalōke ilo tuiiōn̄ in Idaho ekar wōtlo̧k! Elōn̄ļo̧k jān 80 bilien kōļan ko (300 milien cubic meter ko) in dān rekar ibweeb tok jān jikin kakwoņ dren eo im to̧o̧rļo̧k ilo 300 square mile ko (775 square km) n̄an meļļan ko iturin. Enan̄in aolepen bukwōn in Rexbury ekar pād ium̧win dān, ilo an m̧ōn jokwe ko im wa ko kar peļo̧k ilo ibweeb in dān ko. Ruo m̧ōttan in jilu in 9,000 armej ro rekkar jokwe ilo bukwōn in rekar ejjeļo̧k jūkkier.
Ilo am̧ maron̄ pijakiļo̧k, ļōmņak im inepata ko am kar m̧ōkaj er oktakļo̧k n̄an kōjparok im ājmour eo an ajri ro rejitōn bōro nejūm̧, bukwi rijikuuļ in kaļōj ro im rijerbal ro an jikuuļ, im juon jukjukin pād eo kōm̧ iakwe. Kōm ar pād enan̄in 30 mile ko etoļo̧k (50 km) jān m̧weo im̧ōm̧, im aaet ilo raan in, m̧okta jān an kar waļo̧k cell phone im message ilo cell phone, ejjeļo̧k wāween ekōnono ko remōkaj n̄an tōpar ro nejūm̧, barāinwōt kōm̧ij jab maron̄ ettōrļo̧k jān Idaho Falls n̄an Rexburg, ilo an aolep iaļ ko kar kilōk.
Kālet eo am kar wōt n̄an pād bon̄ōn̄ eo ilo juon hotel ilo Idaho Falls. Kathy im n̄a kar bukwelōlō ippān doon ilo ruum̧ jidikdik eo am̧ro ilo hotel eo im akweļap ilo ettā ippān Jemedwōj Ilan̄ kōn kōjparok eo an ajri ro nejūm̧ rejitōn bōro im kōn tuajin ro jet rekar apan̄ ilo m̧akūtkūt eo ekauwōtata ekar jelet er. Ij keememej an Kathy ito itak ilo lowaan m̧weo ilo awa ko ke ej joraanļo̧k in jibbon̄, lokjak kōn inepata im ilo an jidik ak enan̄in kar jab kiki. Mekarta inepata ko aō make, ikar maron̄ kabōjrak aō inepata im kiki.
Ekar jab bōk juon iien eo aetok tokālik bwe eo m̧ōtta indeeo en karuj eō im ba, “Hal, eļmen am maron̄ kiki ilo iien rot in?”
Naan kein rekar alikkar ilo aer itok n̄an būruō im ļōmņak eo aō. Ikar kwaļo̧ki n̄an kōrā eo pāleeō: “Kathy, jekdo̧o̧n ta enaaj waļo̧k, aolep men naaj em̧m̧an kōn tampeļ eo. Kōj jekkar kōm̧m̧an bujen ko ippān Anij im kar maron̄ liāp āinwōt juon baam̧le indeeo.
Ilo iien eo, ekar āinwōt eļan̄n̄e Jetōb eo an Irooj ekar kapene ilo būruōm̧ im ļōmņak ko am ta eo kōm̧ro jim̧or kar jeļā kadede ke em̧ool: kain̄i in liāp ko, ko rej pād wōt ilo m̧weo im̧ōn Irooj im kōm̧m̧ani jān kajoor in priesthood ko rekkar, kar liāpe kōm̧ ippān doon āinwōt ļeo im lio pālele, im ajri ro nejūm̧ rekar maron̄ liāp ippem. Em̧ool ekar ejjeļo̧k un n̄an aikuj mijak, im kōm̧ ar kam̧m̧oolol tokālik ke ļaddik ro nejūm̧ rekar maron̄ bōk kōjparok.
Bōlen ennaan in jān Būreejtōn Thomas S. Monson ekkar lukkunkōmeļeļeik ta eo Kathy im n̄a kar en̄jake ilo bon̄ōn̄ eo kōm̧ ar jab inem̧m̧an ie. “Ilo ad pād ilo tampeļ eo, emaron̄ itok n̄an kōj juon jon̄o̧k in jetōb im juon en̄jake in aenōm̧m̧an. … Jenaaj bōkmeļeļe eo em̧ool an naan ko an Rilo̧mo̧o̧r eo ke Ekar ba: ‘Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. … En jab pok būruemi, im en jab lōļn̄o̧n̄ [John 14:27].’”
Ikar maron̄ jeraam̧m̧an n̄an en̄jake aenōm̧m̧an in aolep iien ij deļo̧n̄e tampeļ eo ekwojarjar. Ij keememej raan eo jinointata ikar deļo̧ n̄e ļo̧k lowaan Salt Lake Temple eo. Iar juon likao.
Ikar reilōn̄ļo̧k n̄an ceiling eo emouj im utiej im kar kōm̧m̧an bwe ruum̧ eo en meram jon̄an āinwōt n̄e ekar peļļo̧k n̄an lan̄. Im ilo iien eo, ļōmņak eo ekar itok n̄an kōļmenļo̧kijeņ eo aō kōn naan kein ralikkar: “Em̧ōj aō kar pād ijin emeram m̧oktalo̧k.” Bōtaab em̧ōkaj an itok n̄an kōļmenļo̧kijeņ eo aō, ejjab ilo ainikiō make, naan kein: “Ejjab, kwojjan̄in kar pād ijin m̧oktatļo̧k. Kwoj keememej juon iien m̧okta jān am̧ kar ļotak. Kwaar pād ilo juon jikin ekwojarjar āinwōt in ijin im Irooj emaron̄ kar itok.”
Ro jeiū im jatū, ij kam̧ool ilo ettā bwe ilo ad etal n̄an tampeļ eo, jemaron̄ keememej kōn piktokin jetōb ko ad indeeo, jem̧jerā eo ad ippān Jemād im Nejin Ekwojarjar, im ikdeleel eo ad eļap n̄an ro̧o̧lļo̧k n̄an m̧weo im̧ōd ilan̄.
Ilo kar kōnono ko ilo kweilo̧k eo ej jem̧ļo̧kļo̧k, Būreejtōn Russell M. Nelson ekar katakin:
“Jikin kōjparok eo em̧m̧antata n̄an maron̄ mour ilo jetōb ej ilowaan bujen ko am̧ ilo tampeļ.”
“Men otemjej jej tōmak im aolep an Anij kallim̧ur rej kōm̧m̧an n̄an armej in bujen ro An rej itok ippān doon ilowaan tampeļ eo.”
“Kajjojo armej ro rej kōm̧m̧ani bujen ko … ilo tampeļ ko—im kōjparoki—ewōr aer maron̄ n̄an topar kajoor eo an Jisōs Kraist.”
Ekar bar katakin bwe “ ilo tōre eo jej kōm̧m̧ane juon bujen ippān Anij, jej likūt men ko an laļ in indeeo. Anij ejjamin naaj kōjerwawaiki jemjerā eo An ippān ro im rekkar kipel kain jemjerā in Ippān. Ilo m̧ool, aolep ro im kar kōm̧m̧ane juon bujen ippān Anij ewōr aer maron̄ deļo̧n̄e juon kain iakwe im tūriam̧o kake eo ejenolo̧k.”
Iumm̧in tōl eo eim̧we an Būreejtōn Nelson, Irooj em̧ōj jino m̧ōkaj an em̧m̧akūt m̧aanļo̧k, im enaaj wōnm̧aanļo̧k wōt im m̧ōkaj an em̧m̧akūt m̧aanļo̧k, kōn ekkalko an tampeļ ko ipeļaakin laļ in. Menin enaaj kōtļo̧k an aolep ajri ro nejin Anij bōk kain̄i in lo̧mo̧o̧r ko im mour ijo eutiejtata im kōm̧m̧an im kōjparok bujen ko rekwojarjar. Karbōb n̄an kōm̧m̧ani bujen ko rekwojarjar ejjab juon jerbal eo ej ej kōm̧m̧an juon wōt allen ak ej juon jon̄ak eo ej bōk aolepān ad mour. Irooj ekar ba enaaj bōk aolepān būruwōd, maron̄, ļōmņak, im kajoor.
Emakijkij in bōk koņaad ilo kain̄i ko an tampeļ eo emaron̄ ejaake juon jon̄ak in wūlepļo̧k n̄an Irooj. N̄e kwoj kōjparok bujen ko an tampeļ im keememeji, kwoj karuwaineneik jitibōn jemjerā eo an Jetōb Kwojarjar n̄an j kōkajoorļo̧k im karreoik eok.
Innām komaron̄ en̄jake juon meram im kōjatdikdik eo ej kam̧ool bwe kallim̧ur ko rej m̧ool. Kwonaaj jeļā bwe aolep bujen ko ippān Anij rej juon iien em̧m̧an n̄an kepaakļo̧k n̄an E, eo im enaaj ejaake juon ikdeleel ilo būruōm̧ n̄an kōjparok bujen ko an tampeļ.
Jekar bōk kallim̧ur, “Kōn bujen eo ad ippen Anij, E ejjamin mōk jen An naaj kajjeon̄ n̄an jipan̄ kōj, im jeban mōk kōn An kijenmej im tūriamo̧ kōn kōj.”
Ej wōt ilo liāp in bujen ko ilo tampeļ eo im jemaron̄ bōk jeļā eo ewāppen kōn ekkejel ko an baam̧le im remaron̄ wōnm̧aanļo̧k ālkin mej im n̄an indeeo. Kautiej m̧are im bujen ko an baam̧le,kar kōm̧m̧ani ilo tampeļ ko an Anij enaaj bōktok kōjparok jān nana eo an ļōmņak kōn kōj make im utiej bōro.
Jinen im jemān ajri ro, ekkeiniin eo n̄an lale im kautiej doon ikōtaan ro jem̧ jein jem jāti enaaj itok wōt kōn kijejeto eo ejjab jokwōd n̄an tōl baam̧le eo am ilo wāween eo an Irooj. Leļo̧k n̄an ajri ro iien ko rem̧m̧an n̄an jar kōn doon. Mōkaj in kile ilo jinoin an waļo̧k aetwerōk, im kile m̧akūtkūt in jerbal in jipan̄ ko rem̧m̧an, ko rejjab kibboņ, eļaptata n̄an doon. N̄e jem̧jāti ro rej jar doon im jerbal n̄an doon , bōro ko renaaj meraļo̧k im oktakļo̧k n̄an doon im n̄an ro jineer im jemāer.
Ilo m̧ōttan in, en̄in ej ta eo kar kōmeļeļe jān Malakai āinwōt ekar kanaan kake jān rikanaan Iliaja:“Enaaj kalōlō ilo būruōn ro nejier kallim̧ur ko kar kōm̧m̧ani n̄an ro jim̧m̧aer, im būruōn ro nejier renaaj oktakļo̧k n̄an ro jemāer. Eļan̄n̄e en kar jab āindein, aolepān lal naaj kanooj ko̧kkure ilo itok eo An.”
Mālijjon̄ ko, apan̄ ko im rub in bōro ko aaet renaaj itok n̄an kōj aolep. Ejjeļo̧k juon iaad rej kajoor ānbwinnier jān “kālōklōk [ilo] kanniōk.” Aaet, ilo ad etal n̄an tampeļ eo im kakeememej bujen ko ad, jemaron̄ m̧aanjabpopo n̄an ad bōk iaļen tōl ko ad make jān Irooj.
Ke Kathy im n̄a kar m̧are im liāp ilo Logan Utah Temple eo, ilo tōre eo Elder Spencer W. Kimball ekar kōm̧m̧ane liāp eo. Ilo naan ko reiet ekar ba, ekar letok kapilōk in “Hal im Kathy, mour bwe n̄e eitok kūr eo, emaron̄ pidodo am̧iro ilo̧k.”
Ilo jinoin, kōm̧ ar jab meļeļe ta meļeļein naan in kapilōk eo n̄an kōm̧, ak kōm̧ ar kōm̧m̧ane ijo em̧m̧antata n̄an mour ilo juon wāween eo me kepooj kōm n̄an jerbal n̄an Irooj n̄e kūr eo enaaj itok. Ālkin am̧ kar m̧are iturinļo̧k 10 iiō ko, juon kūr eo jab kar kōtmāne ekar itok jān Commissioner eo an ra in Jeļāļo̧kijeņ an Kabun̄, Neal A. Maxwell.
Naan in kapilōk eo em̧m̧an kar letok jān Bureejtōn Kimball n̄an maron̄ “pidodo am̧iro ilo̧k” ekar kūrm̧ool. Kathy im n̄a kar bōk juon kūr n̄an em̧m̧akūt jān ta eo ilo kalimjōkļo̧k kar juon jekjek eo ekam̧ōņōņō an baam̧le ilo California n̄an jerbal ilo juon ijjitōn̄ ilo juon jikin eo im ejjeļo̧k aō jeļā kake. Ijoke, baam̧le eo am ekar pojak n̄an em̧m̧akūt kōnke juon rikanaan, ilo juon tampeļ ekwojarjar, juon jikin revelesōn, ekar lo juon m̧akūtkūt ilju im jōkļaj eo im jenaaj kar pojak n̄ane.
Ro jeiū im jatū jitōn bōro, ij kwaļo̧k aō kam̧ool bwe ejjeļo̧k juon men eļapļo̧k an aorōkļo̧k jān kautiej bujen ko kwaar kōm̧m̧ani ak naaj kōm̧m̧ani ilo tampeļ eo. Jekdo̧o̧n ia eo kwoj pād ie ilo iaļen bujen eo, ij rōjan̄ eok n̄an am̧ karbab im maron̄ ekkar n̄an etal n̄an tampeļ eo. Etal ilo emakijkij ilo an jekjek ko am̧ kōtļo̧k eok. Kōm̧m̧an im kōjparok bujen ko ippān Anij. Imaron̄ kam̧ool n̄an eok ejja m̧ool in ikar kwaļo̧ke n̄an Kathy ilo likwōļpen bon̄ōn̄ eo enan̄in 30 iiō ko rej m̧ootļo̧k ilo juon ruum̧ jidikdik ilo hotel eo Idaho Falls: “Jekdo̧o̧n ta enaaj waļo̧k , aolep men naaj em̧m̧an kōn bujen ko ilo tampeļ.”
Ij lewaj n̄an kom̧ aō kam̧ool bwe Jisōs ej RiKraist eo. Ej mour im tōl Kabun̄ in An. Tampeļ ko rej m̧ōko im̧ōn Irooj. Būreejtōn Russell M. Nelson ej rikanaan eo an Irooj ioon laļ in rainin. Ij iakwe e, im ij iakwe kom̧ kajjojo. Ilo āt eo ekwojarjar etan Jisōs Kraist, amen.