“Elder D. Martin Goury,” Liaona, Māe 2024.
Elder D. Martin Goury
Ritōl Eutiej an Jiljilimjuonn̄oul
Rūttoļo̧k ilo juon bukwōn edik ilo Côte d’Ivoire, Elder D. Martin Goury ekar ettōņake an juon em̧m̧aan in kabun̄ im jerbal n̄an ro jet.
Ilo Oktoba 1992, ke ej pād ilo London, England, ekkatak kajin English im bōk juon jeļāļo̧kjeņ, ekar ioon mijenede ro rej Armej ro Rekwojarjar ilo Raan Ko Āliktata. Mijenede ro, juon iaan ro ekar e wōt mijenede ej kōnono kajin French ilo London, ekar leļo̧k n̄an Elder Goury juon kape in Bok in Mormon ilo kajin French.
Ekar jino riiti bok eo im ejjab etto ekar bōk juon kam̧ool kōn m̧ool ko an. Ke bar ruo mijenede ro rekāāl rekar itok n̄an apartment eo an jejjo allōn̄ tokālik, ekar kobatok ilo Kabun̄ in. “Ij keememej aō lukkuun m̧ōņōņō,” ekar ba.
Lan̄lōn̄ eo an ekar ļapļo̧k ke mijenede ro rekar katakin e kōn priesthood eo. “Rekar kōmeļeļeiki meļeļein priesthood eo im ewi wāween imaron̄ kōjerbale n̄an jerbal n̄an armej ro jet. N̄an n̄a, en̄ņe ekar ettōņak ekar kūrm̧ool,” Elder Goury ekar ba. “Ikar laudin̄din̄.”
Dalébé Martin Goury ekar ļotak ilo Jānwōde 30, 1964, n̄an Yoro Goury Maurice im Bame Gaby Odette. Ekar rūttoļo̧k ilo juon bukwōn ņaetan Lehipa im ilo bukwōn ko ilo Oume im Gagnoa. Ekar m̧areiki Ruth Simone Kennington ilo London England Temple ilo Eprōļ 8, 1995. Rekar jokwe ilo Abidjan, Côte d’Ivoire, im wōr emān ajri ro.
Elder Goury ekar bōk bachelor degrees ilo katakin jān CAFOP (Animation im Educational Training Centers) de Man ilo 1988 im mechanical engineering jān London South Bank University ilo 1997. Ekar jerbal āinwōt juon rūkaki ilo jikuuļ an ajri ro, design engineer, senior project manager im deputy project director n̄an Cameron, general manager an Nigeria operations n̄an OneSubsea Services, im country operations manager n̄an Schlumberger. Jidik iien emootļo̧k, Elder Goury ekar jerbal n̄an Kabun̄ in āinwōt juon ritōl im member support coordinator.
Ekar jerbal āinwōt juon Eria Jiljilimjuonn̄oul ilo Africa West Area ilo iien eo kar kūri ilo kūr in. Ekar jerbal m̧oktaļo̧k āinwōt būreejtōn eo an Benin Cotonou Mission, bisop, rikakpilōklōk ilo bisoprik, branch būreejtōn, im elders quorum būreejtōn.