Ukook an Kajin ko n̄an Kweilo̧k eo Eļap

Juon awa ilo kajjojo m̧wen̄an ko an kweilo̧k eo eļap, bukwi ritijōm̧ļo̧k ro an kajin ko rej aiintok doon ilo juon ruum̧ ekilep n̄an likūti kōm̧anm̧an eo āliktata ioon kōnono ko an kweilo̧k eo, eo ekar ukook im naaj ukook n̄an juon jān 103 kajin ko.

N̄e kweilo̧k eo ej ijjino, rej bōk juon wōt kōttan. Ej aikuj em̧m̧an, im ej aikuj in em̧m̧an n̄an iien eo kein kajuon. Ukook eo ewājabdik ej aikuj in wanlōn̄ wanlaļ ainikien, wanlōn̄ wanlaļ toņ in ainikien eo, alikkar, wājabdik, ilo an leļo̧k en̄jake im kōttōbar eo an rikōnono eo ilo pulpit eo ilo ejja jetōb eo me ennaan eo ekar kōm̧m̧an.

Elōn̄ ļo̧k jān 800 rikōnono ro an kajin ko im mijenede ro em̧ōj aer mijenede rekar ukōte m̧ōttan ko an kweilo̧k eo eļap. Enan̄in jimettan ennaan ko jān kar kōm̧m̧ani jān Salt Lake City, Utah, USA, ilo ejja iien eo wōt jimettan eo juon ekar kōm̧m̧an ukook ko aer jān laļ ko aer make. Jet rekar barāinwōt bōk koņaer ilo ukook an kōnono ko an kweilo̧k eo ilo wiik ko m̧oktaļo̧k jān kweilo̧k eo eļap.

Ilo kadiwōjļo̧k eo, rukook ro, ekkā aer jerbal ilo tiim ko emān uwaer n̄an jiljino ilo juon mwen̄an, rej riit kajjojo ennaan ilo juon booth ilo Church Office Building ak ilo jikin ko em̧ōj kōjenolo̧ki ipeļaakin laļ in. Kōjerbali headset ko n̄an ron̄jake kōnono ko ilo kajin English, rukook ro rej alooje juon monitor n̄an ļoore awa in ukook eo ippān rikōnono eo. Rukook ro rej aikuj dāpij ruo ainikien ekkōnono ko—ilo kajin ko roktak—rej itok ilo juon wōt iien ilo kōļmenļo̧kjeņ ko aer.

Rukook Jonas Prasad ej ba membōr ro rej kajin Hindi ilo Fiji rej kōņaan ron̄jake rikanaan ro ilo kajin eo aer. Juon sister ej kōmeļeļeiki, ekar ba, “Ium̧win elōn̄ iiō ko, kweilo̧k ko wōt an Kabun̄ rekar pojak n̄an e ilo kajin English. Kōn menin, ekar jab kwaļo̧k juon naan, ekar itok jijet n̄an baj en̄jake jetōb eo. Kiiō e ej m̧ōņōņō in ron̄jake gospel eo ilo kajin eo an.”