Ekkapit ilo Mour eo M̧okta n̄an Jerbal
Kōņaan eo an Jemedwōj Ilan̄ ej n̄an kwaļo̧k n̄an eok ekapit eo am̧ ejenoļo̧k, im E enaaj kōm̧m̧ane menin eļan̄n̄e kwonaaj make pukōte im ļoor Ankilaan.
Joteenin, ikōnaan kōnono n̄an jodikdik ro ilo Kabun̄ in, eppepen eo ej waanlōn̄tak an likao ro im jiron̄ ro, ro im rej kotak kakōļļe eo n̄an eppepen eo tokālik.
Ilo Oktoba 2013, rikanaan eo ad ejitōnbōro, Būreejtōn Russell M. Nelson ar kean̄: “Jemedwōj Ilan̄ eaar jeļā kōn kom̧ ilo juon tōre eaetok. Kom̧, āinwōt ļaddik im leddik ro Nejin, kar kālet jen E n̄an itok n̄an laļ in ilo tōre in n̄an erom̧ ritōl ro An ilo jerbal in eļap ioon laļ in.”
Ruo iiō remootļo̧k, Būreejtōn Nelson eaar wōnm̧aanļo̧k im ba:
“Rainin ij bar kapene im kōkajoorļo̧k bwe Irooj ekar kajjitōk ippān aolep likao ro rerreo, ekeke ānbwinnier n̄an maanjabpopo n̄an etal im mijen. N̄an likao ro me rej Armej ro Rekwojarjar ilo Raan Ko Āliktata, jerbal in mijenede ej juon eddo an priesthood. Kom̧ likao raņ, em̧ōj kōjparok kom̧ n̄an iien in me kallim̧ur in n̄an aiintok Israel ej bōk jikin. …
“N̄an kom̧ jiron̄ ro raņ rekeke ānbwinnier, mijen ej barāinwōt juon kajoor, bōtaab am kāālet in, n̄an juon iien em̧m̧an. … Jar bwe kom̧win jeļā eļan̄n̄e Irooj enaaj kōņaan bwe kom̧win jerbal in mijinede, im Jetōb Kwojarjar enaaj uwaak ilo būruōm̧ im ļōmņak ne am̧.”
N̄e rikanaan eo ad ej kōnono kōn an Irooj kōjparok jodikdik ro n̄an raan kein n̄an aiintok Israel im kūr eo an im jar n̄an jeļā ta eo Irooj eo ekōņaan bwe kwon kōm̧m̧ane, meļeļein, ej kōnono kōn mour e kwar mour kake im kōjeraam̧m̧an ko kwar bōki jān Anij m̧okta jān am̧ lo̧tak ioon laļ in. Aolep kōj kajjojo me jekar lo̧tak tok n̄an ioon laļin jaar aolep mour ippān Jemedwōj Ilan̄ āinwōt ajri in jetōb ro Nejin. Irooj ar kwaļo̧k n̄an Moses, “Bwe N̄a, Irooj Anij, Iaar kōm̧anm̧an aolep men otemjeļo̧k … ilo jetōb, m̧okta jān aer kar pād ioon mejān laļ ilo lukkuun bitokier.”
Ke Ekar kōm̧anm̧an kom̧ ilo jetōb, Ekar iakwe kom̧ āinwōt ajri in jetōb ro Nejin im Ej pād ippāmi kajjojo ilo biktok eo ekajoor im ilo an ejjeļo̧k jemļo̧kin.
Ilo kar mour eo am̧ ilo laļ eo m̧okta, “kwar ejaake kadkadim im kōļapļo̧k jeļā ko [am̧] ilo jetōb.” Kwojeraam̧m̧an kōn menin letok in anemkwoj in kālet, n̄an am̧ maron̄ kāālet n̄an kwe make, im kwaar kāālet ļōmņak ko raorōk, āinwōt ļōmņak eo n̄an ļoor karōk an Jemed Ilan̄ n̄an m̧ōņōņō, eo im ej n̄an “bōk juon ānbwinin kanniōk im mour ioon laļ in n̄an jelm̧ae mour in eddōkļo̧k n̄an aer wāppen … im āliktata kile ke [am̧] jemļo̧k ekwojarjar āinwōt rijolete mour indeeo.” Kāālet in ejelōt mour eo am̧ kar iien eo, ilo mour eo m̧okta, im enaaj wōnm̧aanļok wōt im jelōt mour in am̧ kiiō. Āinwōt juon nejin Anij ekar mour ilo mour eo m̧okta, kwaar “rittoļo̧k ilo kapeel im kwar ekkatak n̄an iakwe m̧ool eo.”
M̧okta jān am̧ kar lo̧tak, Anij ar jitōn̄ kom̧ kajjojo n̄an kakūrm̧ool mijen ko kajjojo ilo mour eo m̧okta ioon laļ in. Eļan̄n̄e kwonaaj erreo wōt, kōjeraam̧m̧an ko jān kar mour eo m̧okta renaaj kōm̧m̧an bwe kwon maron̄ bōk elōn̄ men rem̧m̧an ilo mour in am̧, ekoba iien ko rem̧m̧an n̄an am̧ jerbal ilo Kabun̄ in im kobaļo̧k ilo jerbal ko raorōk me rej bōk jikier ilo laļ in rainin: aiintok eo an Israel. Kallim̧ur ko jān kar mour eo m̧okta im kōjeraam̧m̧an kein rej ņa etaer ekappit m̧okta. “Katak eo kōn ekkapit ilo mour eo m̧okta rej n̄an aolep ro rej uwaan Kabuñ in.” Ekkapit in me ejeņoļo̧k ejjab meļeļein ke kwonaaj kajju bōk jet kain kūr im eddo ko. Kōjeraam̧m̧an kein im men kein rem̧m̧an jej būki ilo mour kein ad rej tokjen ami kōjerbale anemkwoj in kālet in ilo jim̧we, āinwōt an ekkapit eo am̧ ilo mour eo m̧okta kar itok āinwōt juon tōprak in mour jim̧we. Ilo am̧ kwaļo̧k ke kwoj erreo im wōnm̧aanļo̧k ilo iaļ in bujen eo, kwonaaj bōk iien ko rem̧m̧an n̄an am̧ jerbal ippān kilaaj eo an Jiron̄ ro ak Doulul eo an priesthood. Kwonaaj jeraam̧m̧an ilo jerbal ilo tampeļ eo, n̄an erom̧ juon eo ej jerbal in karejar n̄an ro jeid im jatid, im n̄an jerbal in mijen āinwōt juon rikaļo̧o̧ran Jisōs Kraist.
Etke eaorōk bwe jen kappukot jeļā im meļeļe kōn ekkapit in ilo kar mour eo m̧okta? Ilo juon raan eo me eobrak kōn kajjitōk ko, n̄e elōn̄ renaaj kappukot wōn lukkuun er, m̧ool eo ke Anij ejeļā im Eaar kōjeraam̧m̧an kōj kajjojo m̧okta jen ad kar lo̧tak ilo laļ in “m̧wil [ko] remenin aikuj jān … kadkadid im jibadbad an mour eo m̧okta, mour in, im mour indeeo” ej bōktok aenōm̧m̧an em̧m̧an im kam̧ool n̄an ļōmņak ko ad im buruōd. Jeļā kōn wōn kwe ej ijjino ilo am̧ meļeļe kōn kōjeraam̧m̧an ko Anij ekar kōjeņoļo̧k me em̧ōj likūti ioom̧ m̧okta jān am̧ kar ļotak tok ioon laļ in. Kōņaan eo an Jemedwōj Ilan̄ ej n̄an kwaļo̧k n̄an eok ekappit eo am̧ ejenoļo̧k, im E enaaj kōm̧m̧ane mennin eļan̄n̄e kwonaaj make pukōte im ļoor Ankilaan.
Em̧m̧an ippa riiti post ko an Būreejtōn Nelson ilo Instagram. Juon iaan men ko rem̧m̧an tata ippa ar waļo̧k ilo Juļae 20, 2022 eo. Ekar je:
“Ij tōmak bwe eļan̄n̄e Irooj eaar kajju kōnono n̄an eok, men eo m̧oktata E enkar kōm̧m̧an bwe kwōn meļeļe ej kajeem̧ make. Ro m̧ōtta jitōnbōro, kom̧ lukkuun ajri in jetōb ro nejin Anij. …
“… Jab kabōd menin: Maron̄ eo am̧ ekwojarjar. Ilo am̧ tiljek ilo kappukot, Anij enaaj kwaļo̧k jidik in wōn eo kwonaaj erom̧.”
Imaron̄ ke kwaļo̧k n̄an kom̧ elmen an kar jema ilo laļ in katakin eō pukōte wōn lukkuun n̄a im karōk ko an Anij ilo mour in aō?
Juon jibbon̄nin Jādede ke ekar 13 aō iiō, ikar m̧wijit ujooj ko āinwōt ke ej juon iaan jerbal ko aō kajjojo wiik. Ke ekar mōj, iaar ron̄ ainikien an kōjem eo lik kilōk ilo m̧weo im̧ōm im ikar reiļo̧k im lo an jema kūr eō bwe in etal ippān. Iaar etal n̄an ettōnnaak eo ilikin m̧weo, im ar kūr eō bwe in jijjet ippān ilo jikinwe ko. Ekar juon jibbon̄ eaibojooj. Ij keememej an lukkuun kar epaake tok n̄a ke kom̧ro ej jijjet jon̄an aeramro raar ittaak. Eaar jino ilo an ba tok n̄an n̄a ke ej iakwe eō. Ekar kajjitōk ippa ta kōttōpar ko aō ilo mour in. Im ikar ļōmņak, “Ekwe, elukkuun pidodo menin.” Ikar lukkuun jeļā ruo men: Ikōņaan bwe in aetokļo̧k, im ikōņaan bwe en ikutkutlok aō etal im kāām. Ikar juon jetōb eo epidodo kam̧ōņōņōiki. Ekar ettōn̄dikdik, bōjrak jidik, im ba: “Steve, ikōņaan kwaļo̧k juon men n̄an kwe me elukkuun aorōk n̄an n̄a. Ikar jar bwe Jemedwōj Ilan̄ en kōm̧m̧an bwe ta eo ij tōn ba kiiō ren lukkuun ben im ban jako jān kōļmenļo̧kjeņ ne am̧ im jān buruōm̧ bwe kwon jab meloklok.”
Jema ar maron̄ kōm̧m̧an bwe in lukkuun ron̄jake iien eo. Ekar jaļtok im kalimjōk meja im ba, “Nejū, kōjpārok e iien ko am̧ make ilo mour ne am̧.” Ar aetok an bōjrak jidik bwe ar kōtļo̧k bwe en wōr iien an meļeļe in delon̄ ilo tum̧wilaļ in būruō.
Innām e eaar wōnm̧aanļo̧k wōt, “Kojeļā, iien kane me kwoj make iaam̧ im ejjeļo̧k en ejeļā ta eo kwoj kōm̧m̧ane? Iien kane me kwoj ļōmņak, ‘Jabdewōt men eo ij kōm̧m̧ane kiiō eban jelete jabdewōt, ak n̄a wōt’?”
Innem eaar ba, “Eļapļo̧k jān aolep iien ko jet ilo mour ne am̧, ta eo kwoj kōm̧m̧ane ilo iien ko am̧ make ilo mour ne am̧ enaaj jelete wāween am̧ naaj jelm̧ae men ko reppen im men ko renaaj rubwe būruōm̧ me kwonaaj jelm̧ae; im ta eo kwonaaj kōm̧m̧ane ilo iien ko am̧ make ilo mour ne am̧ enaaj barāinwōt ļap an jelete elmen am̧ naaj jelm̧ae tōprak ko im m̧ōņōņō ko renaaj waļo̧k ilo bar jet iien ko ilo mour ne am̧.”
Jema ar bōke kōņaan eo an būruōn. Ainkien im peļo̧kin naan ko an, im iakwe eo iaar en̄jake ilo naan ko an, raar lukkkun ben im ļōļō ilo kōļmenļo̧kjeņ e aō im ilo būruō raan ne.
Ikar lukkuun ekkatak ilo aolep iiō ko ke mennin kabūlōn̄lōn̄ eo eļap ekar waļo̧k ilo raan eo iaar jijjet ilo jikinuwe ko ilo m̧weo m̧ō ke iaar ajri, ilo men ko rej waļo̧k ilo iien ko aō make ilo mour in aō, imaron̄ etal ippān Anij ilo aō jar n̄an aō bōk aō revelesōn. Jema ar katakin eō kilen aō ekkatak kōn jeņoļo̧k in kōjeram̧m̧an ko an Anij. Ilo iien ko aō make, iaar katak bwe Bok in Mormon ej naan an Anij. laar katak im jeļā bwe Anij ekar kōjenoļo̧k eō n̄an etal im mijen. Iaar katak im jeļā bwe Anij ej ron̄ im uwaaki jar ko aō. Iaar katak im jeļā bwe Jisōs ej Kraist eo, ad Rilo̧mo̧o̧r im Ripinmuur.
Men̄e iaar kōm̧m̧an bwōd elōn̄ kōttan jān raan eo me iban meļo̧kļo̧k aō kar pād ippān jema, ilo aō kate kōjpārok iien kein aō make ilo mour in aō elakkar pād wōt jekdoon lan̄ ko ilo mour in aō im ekar kōm̧m̧an menin aō jeļā kappok jikin eo ejokne im jikin kōmour, kōkaajoor ilo kōjeraam̧m̧an ko jān iakwe eo an Rilo̧mo̧o̧r im pinmuur eo.
Ro jeiū im jatū, ilo ami kōjparok iien ko ami make ilo mour ko ami ilo ami pād ilo jikin ikkure ko; roñjake al ko rōm̧m̧an; riiti jeje ko rekwojarjar; kōmakijkij iien jar ko me rem̧ool; im kōm̧m̧an iien n̄an bōk im kōļmenļo̧kjeņ kōn kōjeraam̧m̧an an petriak, kwonaaj bōk am̧ revelesōn. Ilo naan ko an Būreejtōn Nelson, mejam̧ enaaj “lukkun pelļo̧k n̄an m̧ool eo me mour in ej iien eo me kwoj lale mour rot kwonaaj kōņaan bwe kwon kōņaan mour n̄an indeeo.”
Jemedwōj Ilañ enaaj uwaake jar ko am̧, eļaptata jar ko am̧ me kwoj kōmmani ilo iien ko am̧ make ilo mour ne am̧. Enaaj kwaļo̧k n̄an eok jeņoļo̧k in menin letok ko im kapeel ko am̧, im kwonaaj en̄jake iakwe eo An ej kapool eok, n̄e kwoj kajjitōk lo m̧ool im lukkun kōņaan jeļā. Ilo am̧ kōjpārok iien ko am̧ make ilo mour eo am̧, am̧ bōk ko̧ņaam̧ ilo kain̄i im bujen ko an gospel enaaj ļapļo̧k meļeļeier. Kwonaaj lukkuun liāpe ļo̧k kwe n̄an Anij ilo bujen kein kwar kōm̧m̧ani Ippān, im naaj lōn̄aj lōn̄ļo̧k eok bwe en wōr am kōjātdikdik, tōmak, im lōke ilo kallim̧ur ko E eaar kōpooji n̄an eok. Kwōkōņaan ke jeļā karōk eo an Anij n̄an eok? Ij kam̧ool ke Ekōnaan bwe kwon jeļā, im Ej im̧we rikanaan ro An n̄an laļ in n̄an kūr kōj kajjojo n̄an jar im bwe en pelļo̧k mejed bwe jen make lo em̧m̧an kein. Ij kwaļo̧k kam̧ool kōn m̧ool in im kajoor eo an Rilo̧mo̧o̧r eo ilo pinmuur eo an me ar kōm̧m̧an bwe jen maron̄ mour ekkar n̄an e im bwe jen maron̄ m̧ōņōņō kōn kōjeraam̧m̧an ko em̧ōj an Anij kōpooji, ilo etan Jisōs Kraist, amen.