Elder Gregorio E. Casillas

Ritōl Eutiej an Jiljilimjuonn̄oul

Gregorio Enrique Casillas ekar ļotak ilo Tijuana, Baja California, Mexico, ilo Okwōj 26, 1975. Ekar jokwe ijeņ m̧ae ekar jerbal āinwōt juon mijenede ilo Mexico Tampico Mission.

E im Alma Angelina Obeso Gonzalez rekar liāp ilo San Diego California Temple ilo Juun 1999. Rej jinen im jemān jilu ajri ro.

Mokta jān kar m̧are, rekar jokwe 100 m̧aeļ (161 km) ettoļo̧k ilo tore eo ļōen ekar ekkatak ilo Tijuana, im liin ekar ekkatak ilo Mexicali. Ilo allōn̄ ko m̧okta jān aer kar m̧are, rekar jar im jitlo̧k n̄an jeļā ia eo n̄an jokwe ie im jino baam̧le eo aer ie. Elder Casillas ej en̄jake en̄jake eo an jān kar Jetōb Kwojarjar eo.

“Ij keememej ilo iien eo kōm̧ij jitlo̧k, ron̄jake an Irooj ba, ‘Eļan̄n̄e to̧ļ eo am̧ ej La Rumorosa [juon to̧ļ ekilep ej pād ikōtaan ruo bukwōn ko], Inaaj bōke,’” Elder Casillas ekar ba.

Ekar ba Irooj ekar kalikkar iaļ eo n̄an ripālele eo bwe ren pād ilo Mexicali ke university eo ijo ekar jab bōk āinwōt juon rijikuuļ ej itok jān bar juon jikuuļ.

Ilo Mexicali, “kōm̧ ar ioon armej ro kōm̧ij aikuj in ioon er. Im jej jerbal ilo kūr ko ijoko jej aikuj in jerbal ie,” ekar ba.

En̄jake in ej kōm̧m̧ane juon jon̄ak n̄an mour ko aer ippān doon. “N̄e jej likūt Anij im̧aan, men otemjej rej loe joko jikier,” Elder Casillas ekar ba. “Ej aikuji jidik tōmak im jidik m̧akūtkūt, innām Irooj ej erļo̧ketok Pein n̄an jipan̄ kōj.”

Elder Casillas ekar bōk juon an bachelor degree ilo civil engineering jān Universidad Autónoma de Baja California. Ekar barāinwōt bōk juon an master kōn business administration jān Xochicalco University. Ekar jerbal ilo construction project management im eo kiiō āinwōt tampeļ facilities mānija n̄an Kabun̄ in ilo Mexico Eria.

Elder Casillas ekar jerbal āinwōt juon Eria Jiljilimjuonn̄oul, mijen būreejtōn ioon Mexico Mexico City South Mission, stake būreejtōn, bisop, ko̧o̧njeļ, elder quorum būreejtōn, im būreejtōn an Doulul eo an Likao ro.