Kōņaan eo an Anij ej n̄an Boktok Eok n̄an Kapijuknen
Aolepen karōk eo an Jemed kar kōm̧anm̧an n̄an boktok aolep ajri ro Nejin rejitōnbōro n̄an kapijuknen.
Ikōņaan kwaļo̧k aō kam̧m̧oolol kōn jar ko ami ke ikar jino kaimineneik eō ilo kūr in, jān Būreejtōn Nelson, n̄an jerbal āinwōt juon Rijilōk an Irooj Jisōs Kraist. Emaron̄ bōlen pidodo am̧ ļōmņake ewi jon̄an ettā eo im jemaron̄ en̄jake ilo men in, im ear juon iien oktak eļap im juon iien n̄e juon armej ej bōk koņaan ilo m̧akūtkūt ko aer reļļap im kejōkļo̧kjeņ. Em̧ool, ijoke, ilo m̧ool juon utiej n̄an jerbal n̄an Rilo̧mo̧o̧r, ilo jabdewōt jon̄ak ko, im maron̄ bōk koņaan ippemi ilo kajedeed nuuj ko rem̧m̧an kōn gospel eo An ilo kōjatdikdik.
Ilōn̄inļo̧k menin, em̧ōj kar ba bwe ilikin aolep rijilōk ro rekāāl ej jutak kōrā ro jinen limaro ippān rijilōk ro im eļap an ļokjeņaer. Ijjab jeļā eļan̄n̄e em̧ōj kar ba menin, ak ilo iien in, elukkuun jejjet. Im ij kōtmāne bwe m̧ool eo bwe kōrā in jinen kōrā in paleeō ejako an pād ippem im ejjeļo̧k juon men enaaj kadikļo̧k an ļo̧kjenan.
Jet allõñ ko remootļok, ke kom̧ro kar kõrā eo pāleeō kar loļo̧k bar juon laļ ikijjien jet jerbal ko an Kabun̄ in, iar rujtok juon jibbon̄ ilo aō mejki wõt im reinabõjļo̧k ilo wūntō in ruum̧ eo am̧ro ilo hotel eo. Ijo laļ ilo iaļ eo elukkuun poub, iar loe bwe em̧ōj kiili iaļ eo im juon bwilijmāāņ ear pād epaake ijo n̄an kero̧o̧l aolep wa ko rej epaake ijo em̧õj kiili. Kar jinoin, ear wõr jet wõt wa ko rekar ettõrļo̧k iaļ eo ļo̧k im kar karo̧o̧li. Ak ālkin jet iien tokālik ke ear aetokļo̧k ikiteltel in wa ko, ear jino lõn̄ļo̧k wa ko im aetokļok an wa ko ļain.
Jān wūntõ eo ilõn̄, iar alooje bwilijmāāņ eo an āinwõt ebun̄ buruōn kõn maron̄ eo ippān ilo an kõtõbalbal ikiteltel in wa ko wõj im karo̧o̧l armej ro. Ilo m̧ool, ekar einwõt n̄e ej tin kabbun̄ten ilo an jorjor, einwõt n̄e ej tin jino eb dikdik, ilo an kajjojo wa ko epaaketok ijo em̧õj kiili. Ilo an rittõr ro kwaļo̧k aer abōņõņõ kake an kilōk iaļ eo, bwilijmāāņ ear jab kwaļo̧k an jipan̄ ak tūriam̧o. Ear baj kōm̧ajidjidi wõt bõran im jitõn̄ļo̧k ijo rājet.
Ro m̧õtta, rikaļoor ro m̧õtta ilo iaļ in an mour wabanban in, karōk eo an Jemed eaiboojoj, men̄e “ejejjõt” karōk eo An, eaar kōm̧anm̧ane n̄an kōjepļaak eok n̄an kapijuknen, ejjab n̄an depij eo itulik. Ejeļo̧k ear kilōke iaļ eo ak likit juon ijeņ bwe en kōjeere eok im karoole eok. Ilo m̧ool, ej okōtan menin. Anij ej kajjieon̄ aolep iien n̄an kōtōbrak eok. E “ekōņaan bwe aolep ajri ro Nejin ren kālet n̄an ro̧o̧l Ippān,” im Ekõjerbal aolep wāween ko emaron̄i n̄an kōjepļaakļo̧k eok.
Jemed eo eļap iakwe ippen eaar loe m̧okta Kōm̧anm̧an eo an laļin kōn unleplep in bwe en letok juon iien em̧m̧an n̄an kwe im n̄a bwe jen kadapakpakļo̧k im kōkm̧anm̧anļo̧k mour in wabanban ko ad, iien n̄an ad kōjerbal anemkwoj in kālet ko ad bwe jen kālet E , n̄an ekkatak, im eddōkļo̧k, n̄an kōm̧m̧an bōd, ukweļo̧k, im iakwe Anij im ro riturid, im n̄an juon raan jepļaakļo̧k ippen n̄an kapijuknen.
Eaar letok Nejin eo ejitōnbōro im Emake n̄an laļin e jerawiwi bwe en mour aolepān mour eo an āinwōt juon armej, n̄an an kōm̧m̧an juon waanjon̄o̧k n̄an aolep ajri ro Nejin n̄an ļoore, im n̄an An en̄taan im lo̧mo̧o̧r. Menin letok in en̄taan eo eļap an Kraist ej joļo̧k aolep iaļ ko rekilōk in mej ko wōj an kanniōk im jetōb me enaaj kōjenolo̧k kōj jān ad jepļaakļo̧k n̄an kapijuknen eo ad indeeo.
Aolepen karōk eo an Jemed kar kōm̧anm̧an n̄an boktok aolep ajri ro Nejin rejitōnbōro n̄an kapijuknen.
Elmen an ribokto bōktak ennaan ro an Anij, rikanaan ro An, ņa etan karōk in jepļaaktok eo ilo jeje ko rekwojarjar? Rej ņa etan Karōk in Pinmuur, karōk in jouj, karōk in lo̧mo̧o̧r eo eļap, im karōk in lo̧mo̧o̧r eo ej n̄an aolep, “kōn bōtōktōkin eo nejū Emake wōt.”
Kōttōbar eo an karōk in m̧ōņōņō eo eļap an Jemed ej n̄an ad m̧ōņōņō, ijin, kiiō, im ilo indeeo. Ejjab n̄an bōbrae ad m̧ōņōņō im kōm̧m̧an ad inepata im mijak.
Kōttōbar eo an karōk in pinmuur eo an Jemed ej ilo m̧ool n̄an ad pinmuur, n̄an ad bōk lo̧mo̧o̧r jān en̄taan im mej eo an Jisōs Kraist, rōļo̧k jān kōm̧akoko an jerawiwi im mej. Ejjab n̄an likūt kōj ijo wōt jej pād ie.
Kōttōbar eo an karōk in jouj eo ej n̄an letok eļap jouj ilo ad erreilikļo̧k n̄an E im kautiej bujen tiljek ko ad n̄an E. Ejjab n̄an kariab tūriam̧o im kōm̧m̧an ad metak im būrom̧ōj.
Kōttōbar eo an karōk in lo̧mo̧o̧r eo an Jemed ej ilo m̧ool n̄an ad lo̧mo̧o̧r ilo aiboojoj eo an laļ in selestial ilo ad bōk naan in kam̧ool kōn Jisōs” im leļo̧k aolepān ad n̄an E. Ejjab n̄an dāpij kōj itulik.
Ej ke meļeļein bwe aolep men rej pedped ioon wāween ad mour ilo mour ko ad? Bwe wāween ad kōjerbal anemkwoj in kālet ko ad ejjab aurōk? Bwe jemaron̄ bōk ak joļo̧k kien ko an Anij. Jaab, ekar āindein. Em̧ool juon iaan kūr im kajjitōk ko remakūjkūj an Jisōs ilo iien jerbal ko an lo mour in kanniōk ej bwe jej aikuj oktak im ukweļo̧k im itok n̄an E. Aorōk in katak ko An rej kwaļo̧k kōn mour ilo tiljōk im karbōb ilo m̧wil ej juon kūr n̄an wōnmanļo̧k an juon make, n̄an oktak in tōmak ilo Kraist, n̄an juon oktak ekajoor an būruo.
Anij ekōņaan juon oktak eo eļap ilo kōj jen wāween ko ad āinwōt utiej bōro im ļōmņak kōn kōj make, joļo̧k wāween ko an armej ilo biktokin, n̄an ad “etal, im jab bar jerawiwi.”
N̄e jej tōmak bwe tarlep in kōttōbar in karōk eo an Jemed ej n̄an lo̧mo̧o̧ren kōj, pinmuuri kōj, eļļo̧ke jouj eo n̄an kōj , im ejja in wōt boktok n̄an kōj m̧ōņōņō, ta eo kōttōbar eo an eo Nejin im ilo e im karōk in ear bōk jikin?
Eo Nejin ej Make jiron̄ kōj: “Bwe Iar itok jān lan̄, jab bwe In kōm̧anm̧an ankil Aō, a ankilaan Eo ear jilkintok Eō.”
Ankilaan Jisōs ej Ankilaan Jemed eo ejouj. Ekōņaan kōm̧m̧an jabdewōt wāween n̄an kajjojo iaan ajri ro nejin Jemed n̄an bōk jem̧ļo̧k in jibadbad eo an karōk eo, mour indeeo Ippāer. Ejjeļo̧k juon ej wōtlo̧k jen kōjeram̧m̧an in ekwojarjar.
Eļan̄n̄e kwoj tin inepata me koban maron̄ jon̄e, ak bwe iakwe in pinmuur eo an Kraist me ejjeļo̧k jem̧ļo̧kin ej tūriam̧o n̄an tōpar ro jet ak ejjab kwe, innem ebōd am̧ meļeļe. Ejjeļo̧k jem̧ļo̧kin meleļein ejjeļo̧k jem̧ļo̧kin. Ejjeļo̧k jem̧ļo̧kin ej jepoole eok im ro jet kwoj iakwe er.
Nipai ear kōmeļeļeik m̧ool in aiboojoj: “E ej jab kōm̧m̧an jabdewōt eļan̄n̄e e jab n̄an jeraam̧m̧an eo an laļ; bwe E ej iakwe laļ, em̧ool jon̄an Eaar likūt mour eo An make bwe en maron̄ bōktok aolep armej n̄an E. Kōn menin, Ekar kakien ejeļo̧k juon Ej jab jiron̄ e bwe ren naj bōk An lo̧mo̧o̧r.”
Rilo̧mo̧o̧r, Rilale jip eo Em̧m̧an, ej illo̧k in kappukot jiip ko an rej jebwābwe m̧ae iien E ej loi. E “ejjab kōtļo̧k bwe jabdewōt iaad en jako.”
“Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok … e Inaaj bōk.”
“Ewōr ke ami jabdewōt rinan̄inmej ilubwiljimi? Kom̧in bōktok er ije. Ewōr ke jabdewōt iami ej akā, ak pilo, ak jipikpik, ak kinejnej, ak lōba, ak ro re mej ānbwinnier, ak ro rejarron̄ron̄, ak ro rej m̧ōjņo̧ ilo jabdewōt wāween otemjeļo̧k? Kom̧in bōktok er ije im Inaaj kōmour er, bwe ewōr Aō tūriam̧okake kom̧.”
Ear jab ubakeļo̧k kōrā eo ewōr an nan̄inmej in to̧o̧rļo̧k; Ear jab eļļo̧k jān rileba eo; Ear jab kõjekdo̦o̦n kōrā eo ekkijon̄; Ear jab kōwaan ro rekar ukweļo̧k, jekdoon ta jerawiwi ko aer. Im E eban kōwaan eok ak ro kwoj iakwe er n̄e kwoj boktok n̄an Ippen bōro ko rerub im jetōb ettā. Menin ejjab karōk eo An ak An kōm̧anm̧an, ak pepe eo An, kōttōbar, kōņaan, ak kōjatdikdik.
Ejjab, E ejjab kajutak iaļ ko rekilōk im kein bōbrae ko; Ej joļo̧ki. Ejjab dāpij eok inabōj; Ej karuwaineneik eok n̄an deļo̧n̄. Aolepen tarlepān jerbal eo an ekar juon waanjon̄ak eo emour kōn karōk in.
Innem aaet epād pinmuur in katok eo An ej makke wōt, eo ej pen ļo̧k n̄an ad meļeļe, ilon̄in ļo̧k jon̄an maron̄ ko ad n̄an meļeļe. Ak, im menin eaorōk, “bōtaab,” kōj jemeļeļe, jemaron̄ meļeļe, ekwojarjar in, karōk in lo̧mo̧o̧r eo ilo pinmuur in katok eo An.
Nuknuk eo an ear libobo kake kar potak ilo ruo m̧ōttan ko ilo iien eo Jisōs ear mej ioon dōbwāāl, kōkkaļle in bwe iaļ n̄an jepļaakļo̧k ippen Jemed em̧ōj an peļļok leplep—n̄an aolep ro im renaaj oktakļo̧k n̄an E, lōke E, likūt edodo ko aer ioon E, im bōk ioer An ine ilo juon bujen jemdo̧o̧n.
Ilo naan ko jet, karōk eo an Jemed ejjab kōn iaļ ko rekilōk. Ekar jab āindein; im ej jāmin naaj āindein. Ewōr ke men ko jej aikuj in kōm̧m̧ani, kien ko n̄an kōjparoki, jet kadkad in paaktokūd im jej aikuj in ukoti? Aaet. Ak kōn jouj eo An, men kein rej pād lubwūdin peid, im jab ettoļo̧k n̄an ad bōk.
En̄in ej nuuj eo em̧m̧an! N̄aij kam̧m̧olool eļap jen maron̄ ba kōn m̧ool kein rej allikar. Kōm̧anm̧an eo an Jemed, pepe eo An, kōttōbar eo An, karōk eo An, kōņaan eo An, im kōjatdikdik eo An rej aolep n̄an kōmour eok, aolep n̄an boktok am̧ aenōm̧m̧an, aolep n̄an boktok eok n̄an kapijuknen. Kōn menin n̄a ij juon rikam̧ool ilo etan Jisōs Kraist, Eo Nejin, amen.