N̄an Jipan̄ Diktakin Epepen in
Jem̧jerā ko ilo mour ko an jodikdik ro me eļapļo̧k an jelet kāālet ko aer.
Ilo aō kar keppopo n̄an kōnono n̄an kom̧, iaar emļo̧ketok bwebwenato in Hilamōn im likao ro rem̧m̧an ded nejin armej ro an Ammōn. Ikar en̄jake kajoor eo an rikanaan ro ilo Bok in Mormon ilo aer katakin jinen im jemān ajri ro, bisop ro, im membōr ro an ward eo ilo katak kōn bwebwenato in.
Hilamōn ekar juon em̧m̧aan im ļaddik armej in Ammōn ro rekar lōke. Ekar jipan̄ er eddōkļo̧k im rūttoļo̧k ilo mour jim̧we. Rekar jeļā kajjeen im iakwe e im “raar kōņaan bwe [e] en aer ritōl.”
Hilamōn ekar iakwe likao rein āinwōt ļaddik ro nejin im ekar lo aorōk ko aer. Elder Dale G. Renlund ekar katakin bwe “n̄an wājepdik in jerbal n̄an ro jet jej aikuj lo er … jān loļo̧kjeņ eo imejān Jemedwōj Ilan̄. Wāween eo wōt im jemaron̄ meļeļe m̧ool in ej aorōk eo an juon jetōb. Jān wōt menin jemaron̄ meļeļe kōn iakwe eo an Jemedwōj Ilan̄ n̄an aolep … ajri ro Nejin.” Bisop ro rainin rej jeraam̧m̧an n̄an kile kadkad eo ekwojarjar an jodikdik ro ilo kōjparok eo aer.
Hilamōn ekar “bwine” likao ro rem̧m̧an ded ilo kōjparok eo an. Ekar likūt im̧aantata n̄an kalōk jem̧jerā ko rekajoor ippāer.
Ilo juon iien eo epen im mour ak mej rej epaaktok, Hilamōn im ritariņae ro an reddik rekar meļo̧kļo̧k jarin tariņae eo ej jibadõkļo̧k er. Hilamōn ekar kōnono ippān jodikdik ro:
“Lo, jej jab jeļā eļan̄n̄e raar bōjrak kōn un in bwe jen ilo̧k ņae er. …
“Kōn menin ta eo kom̧ij ba, ro nejū m̧aan … ?”
Likao rein retiljek im rem̧m̧an ded rekar uwaak, “Jemām, lo ad Anij ej pād ipped, im E jamin kōtļo̧k bwe jen wōtlo̧k; innām jān wōnm̧aanļo̧k.” Raan eo raar anjo̧, ke Hilamōn ekar jipan̄ likao rein rem̧m̧an ded n̄an ņamejļan m̧akūtkūt eo.
Armej in Ammōn rein rem̧m̧an ded ekar wōr ippāer juon un eļap im rekar peran ilo “an armej ro rejetake er.” “Jarin tariņae jidikdik in,” kar tōl jān Hilamōn, rekar kajedeed “eļap kōjatdikdik im eļap m̧ōņōņō.” ilo būruwōn jarin tariņae ko an riNipai ro ewōr aer imminene. Bisop ro rainin remaron̄ tōl jodikdik ro rejeņolo̧k kōn kapāāl ko aer n̄an kōjeraam̧m̧an ward eo n̄an aiintok Israel. Būreejtōn Russell M.Nelson ekar katakin bwe en̄iin ej “mijen eo me kar jilkintok [er] n̄an laļ in.”
Āinwōt armej in Ammōn rein rem̧m̧an ded ro rekar “m̧ool iien otemjej ilo jabdewōt men kar door ilo aer kōjparok.,” Hilamōn ekar tiljek ilo an ļoor ritōl ro an. Jekdo̧o̧n ta apan̄ ko ak jorrāān ko, Hilamōn ekar aolep iien pād wōt ilo an “kar jek kōn juon kōttōpar” n̄an wōnm̧aanļo̧k kōn kōttōpar eo aer. Ke ekar bōk kapilōk n̄an “wōnm̧anļo̧kļo̧k ippān likao em̧m̧an ded ro [nejin],” ekar pokake.
Jodikdik ro rainin rej jeraam̧m̧an ilo an bisop ro ļoor tōl eo an ritōl ro ad n̄an “Kapilōk ippān būreejtōnji eo an Doulul eo an Jiron̄ [ro] ilo ward eo.” Stake būreejtōn ro rej kōmeļeļeiki bisop ro im būreejtōn ro an Doulul eo an Jiron̄ ro ilo aer kakūrm̧ool eddo ko aer n̄an jodikdik ro.
Hilamōn ekar kautiej bujen ko. Ke Ammōn ekar kwaļo̧k gospel eo n̄an jinen im jemān likao ro rem̧m̧an ded, rein jineer im jemeer rekar bōke ilo būruwōn m̧ōņōņō. Rekar lukkuun tiljōk n̄an mour eo aer ekāāl āinwōt rikaļoor ro rōwāppen ro im rekar kōm̧m̧ane juon bujen n̄an “door laļ ļo̧k kein tariņae ko an ro rijum̧ae.” Men eo wōt ekar kōm̧m̧an aer ļōmņak in rube bujen in, ilo ad reilikļo̧k n̄an kilen tariņae ko aer m̧okta, kar aer lale an riNipai ro pād ilo jorrāān.
Armej in Ammōn ro rekar kōņaan jipan̄ armej rein ro rekar leļo̧k n̄an er jikin aer kōpped. Hilamōn, kobaļo̧k ippān ro jet, kar kareel er n̄an kōjparok bujen eo aer im jāmin bar ire. Ekar ļapļo̧k an lōke ilo kajoor eo bwe Anij enaaj kar leļo̧k jān kajoor eo armej in Ammōn rein remaron̄ kar leļo̧k kōn jāje ko im lippoņ ko.
Ke Hilamōn im ritariņae ro nejin rekar jelm̧ae apan̄ ko rekamijak, Hilamōn ekar peran. “A, lo, ej jab aorōk—kōmij lōke Anij enaaj lo̧mo̧o̧ren kōm.” Ilo juon iien, ilo aer kar ten mej kōn kwole, uwaak eo aer ekar n̄an “lutōkleplep [būruweer] ilo jar n̄an Anij, bwe E en kar kōkajoor [er] im lo̧mo̧o̧ren [er] … [im] Irooj … eaar lotok [er] kōn kainem̧man bwe enaaj lo̧mo̧o̧ren [er]” “kōnke an lap aer tōmak otem tōmak ilo men ko kar katakin er n̄an tōmaki.”
Jej ekkatak kōn Hilamōn bwe likao rein reddik rekar bōk jipan̄ jān jineer im jemāer. Rein jineer im jemeer retiljek rekar jeļā bwe epād ippāer eddo eo eļap n̄an katakin ajri ro nejier. Rekar katakin ajri ro nejier n̄an kōjparok kien ko n̄an “etetal jim̧we” im̧aan Anij. Ro jineer rekar katakin er “bwe eļan̄n̄e reban pere, Anij enaaj lo̧mo̧o̧ren er.” Ro jemāer rekar kōm̧m̧ane juon waanjon̄ak ekajoor n̄an kōjparok bujen eo. Ritariņae rein rekar jeļā kōn nana eo an tariņae. Rekar leļo̧k aer lōke ioon ļaddik ro rejjab imminene n̄an kōjparok eo an Hilamōn im jipan̄ er ilo aer jilkinļo̧k n̄an er “elōn̄ meinin aikuj ko.”
Hilamōn ekar jab make iaan ilo an kar jerbal n̄an jarin tariņae eo an edik. Ekar lōn̄ armej ro ipeļaakin ro im ekar oktakļo̧k n̄an er kōn jipan̄ im tōl. Ekar erreilo̧k n̄an Kaptin Moronai kōn jipan̄, im ekar itok.
Ejjeļo̧k juon ej jerbal make iaan ilo aelōn̄ in kiin̄ eo an Irooj. Irooj ekar kōjeraam̧m̧an kōj kōn ward ko im stake ko. Ilo an jepļaaktok doulul ko An, ewōr ippād kein jipan̄ ko, māletlet, im im̧we n̄an ioon jabdewōt apan̄.
Bisop eo ej tōl ward eo kōn ko̧o̧njeļ ko. Ej jipan̄ ļōn̄aj intōrpiu in jerbal in karejar ko an kajjojo kuwōta innām rōjan̄ doulul eo an em̧m̧aan ro im Doulul eo an Kōrā ro n̄an kakūrm̧ool eddo ko aer n̄an jerbal in karejar n̄an baam̧le ko. Būreejtōnji rein rej bōk tōl in jipan̄ aikuj ko im kappukot uwaak ko reim̧we. Stake būreejtōn ro rej leļo̧k jipan̄ ilo aer kōmeļeļeiki būreejtōnji ro an doulul eo an em̧m̧aan ro im Doulul eo an Kōrā ro ilo eddo kein.
Tōl eo aikuji n̄an ritōl ro im jinen im jemān ajri ro ej pād ilo Gospel Library eo im Gospel Living apps eo. Ilo kein jipan̄ kein reim̧we, jemaron̄ loe jeje ko rekwojarjar, katak ko an rikanaan ro raan kein, im Bok in Bōk Meļeļe eo Eļap. Ilo Jodikdik tab eo ilo Gospel Library eo elōn̄ kein jipan̄ ko n̄an būreejtōnji ro an kūlaaj im N̄an Kōkajoorļo̧k Jodikdik ro: Juon Unin Tōl n̄an Kōm̧m̧ani Kālet ko. Ilo an aolep membōr ro an ward eo ekkatak kein jipan̄ kein reim̧we im pukot tōl eo jān Jetōb, aolep renaaj tōl jān Irooj n̄an kōkajoorļo̧k jodikdik ro.
Aolepān ward eo enaaj jeraam̧m̧an im kajoorļo̧k ilo an membōr ro mije wōt diktak in epepen in. Mekarta jab wānōk ko ad im likjab ko, Jemedwōj Ilan̄ ej karuwaineneik kōj kajjojo, kōn jem̧jerā eo an Jetōb eo An, n̄an pukotļo̧k ro jet. Ejeļā bwe jej eddōkļo̧k im kwojarjar ilo ad ļoore im̧we ko an Jetōb Kwojarjar. Ejjab aorōk n̄e kijejeto ko ad rejjab jejjet. N̄e jej m̧ōttā ippān Irooj, jej lōke bwe kijejeto ko ad renaaj erom̧ jejjet ilo karōk eo Enaaj kar kōm̧m̧ane n̄an jodikdik ro.
Ilo ad ļoor tōl eo an Jetōb Kwojarjar n̄an pukotļo̧k jodikdik ro, jej erom̧ rikam̧ool in iakwe eo an Jemedwōj Ilan̄ ilo mour ko aer. M̧akūtkūt kōn im̧we ko jān Irooj ej kalōk jem̧jerā ko an iakwe im lōke. Ej jem̧jerā eo ilo mour ko an jodikdik ro im eļap an jelet kāālet ko aer.
Jodikdik ro renaaj ekkatak jon̄ak in revelesōn eo ilo aer bōk koņaer ippād ilo jerbal in kappukot im m̧akūtkūt ioon im̧we ko n̄an jerbal n̄an ro jet. Ilo an jodikdik ro oktakļo̧k n̄an Irooj kōn tōl eo eim̧we, jem̧jerā ko aer Ippān im lōke eo ilo E enaaj m̧wilaļļo̧k.
Jej kwaļo̧k ad lōke jodikdik ro ilo ad leļo̧k jipan̄ im tōl ilo ad jab bōk eddo eo jān er. Ilo ad kāliktak im kōtļo̧k bwe jodikdik ro ren ekkatak ilo aer ko̧o̧njeļ ippān doon, kāālet juon kein jipan̄ eim̧we, im likūt karōk ko aer ilo jerbal, er renaaj en̄jake lan̄lōn̄ eo em̧ool im kajoorļo̧k.
Būreejtōn Henry B. Eyring ekar katakin bwe “ta eo enaaj aorōktata ej ta eo rej ekkatak jān [eok] kōn wōn lukkuun er im ta eo remaron̄ lukkuun in erom. Elmakot eo aō ej bwe eban ļap aer ekkatak kake jān katakin ko ilo kōnono ko. Renaaj bōke jān en̄jake ko kōn wōn kwe, wōn eo kwoj ļōmņak kōn er, im ta eo kwoj ļōmņak remaron̄ in erom.”
Jodikdik ro rej kabwilōn̄ kōj kōn peran eo aer, aer tōmak, im maron̄ ko aer. Ilo aer kāālet n̄an lukkuun bōk koņaer āinwōt rikaļoor ro an Jisōs Kraist, gospel eo An enaaj lōlō iburuweer. Ļoor E enaaj erom̧ juon m̧ōttan mour ko aer, jab baj ta ko rej kōm̧m̧ane.
Hilam̧ōn ekar jipan̄ armej in Ammōn rein reddik n̄an loe ewi wāween an juon rikaļoor eo peran an Jisōs Kraist mour. Jemaron̄ erom̧ waanjon̄ak ko rekajoor n̄an jodikdik ro kōn wāween an rikaļoor ro an Kraist mour rainin. Jinen im jemān ajri ro retiljek rej jar kōn waanjon̄ak ko aer ilo mour ko an ro nejier. Ejjeļo̧k būrookraam̧ emaron̄ bōk jikin im̧we in kōn iakwe, ilo an rūtto ro kōjparok bujen eo.
Ainwōt būreejtōn eo an doulul eo an pris, bisop eo emaron̄ kōm̧m̧ane juon waanjon̄ak n̄an jodikdik ro kōn wāween n̄an erom̧ juon ļeo pālele ej kautiej im baba eo ej iakwe n̄an kōjparok, kakke, im tōl ioon ilo wāween ko rejim̧we. Bisop ro, kōn juon “laser āinwōt n̄an mijōk [wōt] jodikdik ro,” naaj wōr juon kareel eo me enaaj pād ium̧win elōn̄ epepen ko.
Jodikdik ro rainin rej pād ilubwiljin jetōb ko nejin Jemedwōj Ilan̄ rem̧m̧an. Rekar pād ilubwilijin ribōbrae m̧ool im anemkwoj ro rem̧ool ilo mour eo m̧okta. Rekar lo̧tak ilo raan kein n̄an aiintok Israel kōn kajoor in kam̧ool eo aer kōn Irooj Jisōs Kraist. E ejeļā kajjojo iaer im ejeļā jibadbad eo aer eļap. E ej kijenmej ilo aer rūttoļo̧k. E enaaj pinmuur im kōjparok er. E enaaj kōmour im tōl er. E enaaj im̧we er. Kōj, ro jineer im jemāer im ritōl ro, jej pojak n̄an jipan̄ er. Epād ippād Kabun̄ eo an Rilo̧mo̧o̧r n̄an jipan̄ kōj ilo ad karūttoļo̧k diktak in epepen in.
Ij kwaļo̧k aō kam̧ool bwe Kabun̄ eo an Kraist in, ekar jepļaaktok kōn Josep Smith im ej tōl rainin jān Būreejtōn Russell M Nelson, ekar ejaake n̄an jipan̄ jodikdik ro kakūrm̧ool jibadbad eo aer eļap ilo raan kein āliktata. Ilo etan Jisōs Kraist, amen.