Naan in Kam̧ool kōn Jisōs Kraist
Kūr eo aō ej n̄an jerbal kiiō n̄an dāpij ijo jikūm̧ āinwōt juon eo me ej peran ilo naan in kam̧ool kōn Jisōs.
Ilo 1832 eo, Josep Smith im Sidney Rigdon kar bōk juon visōn kabwilōn̄lōn̄ kōn mejān kajjik indeeo eo an ajri ro nejin Anij. Revelesōn in ekar kōnono kōn jilu aelōn̄ in kiin̄ ko ilan̄. Būreejtōn Dallin H. Oaks ekar kōnono kōn “aiboojoj an laļ ko” Oktoba eo ļo̧k, kakeememej bwe “kōn anjo̧ im aiboojoj eo an Lamb eo,” aolep bōtaab jejjo wōt armej ro rej ilo jemļo̧kin lo̧mo̧o̧r n̄an juon iaan aelōn̄ in kiin̄ kein, “ekkar n̄an ikdeelel ko rej waļo̧k kōn kāālet ko aer.” Karōk in lo̧mo̧o̧r eo an Anij ej ejake juon iien em̧m̧an an aolep n̄an aolep ajri ro Nejin, jabddwōt iien im jabdewōt jidik rej maron̄ kar mour ie ioon laļ in.
Ilo an aiboojoj eo an jekdo̧o̧ņ eo edik iaan aelōn̄ in kiin̄ ko jilu, telestial, “eļļāļo̧k jān aolep jeļā,” kōjatdikdik eo an Jemādwōj Ilan̄ ej bwe jenaaj aolep kāālet—im, kōn jouj eo an Nejin, karbōb n̄an—eo eutiej tata im aiboojoj tata iaan aelōn̄ in kiin̄ kein, selestial, ijo jemaron̄ lem̧ōņōņō kōn mour indeeo āinwōt “ri jolōt ippān Kraist.” Būreejtōn Russell M. Nelson ekar libijōrjōre kōj n̄an “ļōmņak kōn selestial,” kōm̧m̧an bwe aelōn̄ in kiin̄ an selsetail en ad kōttōpar indeeo innām “ļōmņak kōn ia eo kāālet ko [ad] ioon laļ in renaaj likūt [kōj] ilo laļ eo ej itok.”
Ro ilo aelōn̄ in kiin̄ an selestial rej “er rej erro rekar bōk naan in kam̧ool kōn Jisōs, … rej ro armej rejim̧we kōweeppān er kōn Jisōs rijojomar eo an bujen eo ekāāl.” Rijolet ro an eo kein karuo, ak terrestrail, aelōn̄ in kiin̄ eo rej kōmeļeļeik rem̧m̧an, ekoba “ro armej rem̧m̧an in laļ, ro rekar pilo jān m̧oņ an armej raņ.” Iminene in jabwe ekkatak ej bwe “rej jab kajoor ilo naan in kam̧ool kōn Jisōs..” Ilo keidi, ro ilo ijo ettāļo̧k, aelōn̄ in kiin̄ an telestial rej ro me “raar bōk gospel eo, ak jab naan in kam̧ool eo an Jisōs.”
Jeļā bwe m̧wil eo jenolo̧k kake n̄an rijolet ro an kajjojo aelōn̄ in kiin̄ ej ekōjkan aer ekkejel n̄an “naan in kam̧ool kōn Jisōs,” kōtaan eo jān (1) wujpeļo̧k in bōro em̧ool (2) ejjab peran (3) lukkuun jab bōk. Indeeo eo an kajjojo armej ej pedped ioon wāween an kōm̧m̧an.
I.
Ta in naan in kam̧ool kōn Jisōs?
Ej juon kam̧ool jān Jetōb Kwojarjar eo bwe E ej Nejin Anij ekwojarjar, Messaia im Ripinmuur. Ej naan in kam̧ool eo an Jon bwe Jisōs ekar ilo jinoin ippān Anij, bwe E ej Rikōm̧anm̧an an lan̄ im laļ, im bwe “ilo e ekar gospel eo, im gospel eo ar mour eo, im mour eo ekar meram eo an armej raņ.” Ej “naan in kam̧ool eo an Rijjilōk ro im Rikanaan ro, … bwe E ekar mej, kar kallib, im jerkak bar juon alen ilo raan eo kein kajilu, im walōn̄ļo̧k n̄an lan̄.” Ej jeļā eo bwe “ejjeļo̧k bar juon āt letok eo lo̧mo̧o̧r ej itok.” Ej “naan in kam̧ool eo, āliktata in aolep, ” kar letok jān Rikanaan Josep Smith, “bwe e emour! … Bwe e ej eo Nejin Emake Keotak in Jemān—bwe jān e, im ilo e, laļ ko rej im rekar ejaak, im ro rej pād ie rej m̧aan im kōrā ro nejin keotak n̄an Anij.”
II.
Ilo kakkobaba n̄an naan in kam̧ool in ej kajjitōk eo: Ta eo jej kōm̧m̧ane n̄an e?
Rijolet ro an aelōn̄ in kiin̄ an selestial rej “bōk” naan in kam̧ool kōn Jisōs ilo likio in kōn peptaij, bōk Jetōb Kwojarjar eo, im anjo̧ kōn tōmak. Pedped in katak ko im m̧ool ko an gospel eo an Jisōs Kraist rej peek kōttōpar ko raorōk tata aer im kāālet ko. Naan in kam̧o̧ol kōn Jisōs ej waļo̧k ilo ta eo rej im ta eo rej erom. Ikdeelel eo aer ej iakwe-em̧ool, “iakwe eo erreo an Kraist.” Jibadbbad eo aer ej ilo kappukot “jon̄an rūttoun an Kraist obrak.”
Jet iaan ro me naaj lo er ilo aelōn̄ in kiin̄ an terrestrial rej barāinwōt bōk naan in kam̧ool kōn Jisōs, bōtaab rej kile er kōn ta eo rej jab kōm̧m̧ane jabdewōt n̄ane. Jab peran ilo kam̧ool kōn Rilo̧mo̧o̧r eo ej elmakote juon dettan jab itok limo ak bajjōk—“māāņāņ jidik”— ijello̧kin āinwōt armej ro an Amōn ilo Bok in Mormon, n̄an waanjon̄ak, ro raar “bar jenolo̧k kōn aer kijejeto n̄an Anij.”
Rijolet ro an aelōn̄ in kiin̄ an telestial rej ro me raar kowaan naan in kam̧ool kōn Jisōs koba gospel eo An, bujen ko An, im rikanaan ro An. Er kar kōmeļeļeik jān Abanadai āinwōt “raar ilo̧k ekkar n̄an ankilaer make im aer kōņaan ekkar n̄an kanniōk; im raar jan̄in kūr ioon Irooj ke pein tūriam̧okake raar erļo̧kļo̧k n̄an er, bwe pein tūriam̧okake raar erļo̧kļo̧k n̄an er, im rekar abin.”
III.
Ta meļeļe in n̄an peran ilo naan in kam̧ool kōn Jisōs?
Ewōr jet tōllo̧k ko me maron̄ ļōmņak kaki ilo uwaake kajjitōk in. Inaaj kōnono kake jejjo. Peran ilo naan in kam̧ool kōn Jisōs em̧ool ekitbuuj naajdik im kōkajoorļo̧k naan in kam̧ool jab in. Rikaļoor ro m̧ool rejjab kōjekdo̧o̧n men ko me āinwōt reddik me rej rie im kōkajoorļo̧k naan in kam̧ool eo aer kōn Jisōs, ko āinwōt jar, ekkatak jeje ko rekwojarjar, kautiej Jabōt, bōk m̧ōttan kwojkwoj eo, ukweļo̧k, jerbal in karejar, im kabun̄-jar ilo m̧weo im̧ōn Irooj. Būreejtōn Nelson rej kakeememej kōj bwe “Kōn mijak ejidimikij, juon naan in kam̧ool ejjab naajdik aolep iien ‘jān naan ko rem̧m̧an an Anij’ [Moroni 6:4] remaron̄ rūb. Mekarta, … jej aikuji en̄jake kabun̄jar n̄an Irooj kajjojo raan im ekkatak gospel eo An.” Innām ekar kakobaba: “Ij akweļap ippemi bwe kom̧in kaanjo̧ik Anij ilo mour ko ami. Leļo̧k n̄an E juon ajej eo ejim̧we an iien eo ami. N̄e kom̧ naaj kōm̧m̧ane, jeļā ta eo ej waļo̧k n̄an kajoor in jetōb eo em̧m̧an ej im̧we jerbal eo ami.”
Peran ej barāinwōt elmakote peļļo̧k im jab ņojak kōn kam̧ool eo an juon. Ilo peptaij, jej kapen m̧ōņōņō eo ad “n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko [jej] maron̄ pād ie, em̧ool m̧ae mej.” Ilo tōre in Ijtō in eļaptata, jej lan̄lōn̄, ilo jikin ko, im jab idādiki ad kean̄ kōn kam̧ool eo ad kōn jerkakpeje, Kraist eo emour.
Juon m̧ōttan peran ilo naan in kam̧ool kōn Jisōs ej n̄an ron̄jake rijerbal ro An. Anij ejjab kipel kōj n̄an juon iaļ em̧m̧anļo̧k, iaļ in bujen, bōtaab E ej kean̄ rikanaan ro An n̄an kōm̧m̧an bwe jen lukkuun jeļā kōn kaje ko an kāālet ko ad. Im ejjab baj ro wōt uwaan Kabun̄ eo An. Kōn rikanaan ro im rijjilōk ro An, ilo iakwe E ej akweļap ippān aolepān laļ in n̄an ron̄jake m̧ool eo me enaaj kanemkwoj er, dāpij er jān en̄taan eo ejjeļo̧k jemļo̧kin, im bōktok er n̄an lan̄lōn̄ eo indeeo.
Peran ilo naan in kam̧ool kōn Jisōs ej meļeļe in kōketak ro jet, kōn naan im waanjon̄ak, n̄an peran barāinwōt, eļap tata ro me jān baam̧le ko ad make. Elder Neal A. Maxwell kar ba ilo juon iien “membōr ro an [Kabun̄ in] ralikkar ‘rem̧m̧an’ me em̧ōj aer waļo̧k iaijet ijello̧kin kam̧wilaļļo̧k rikaļoor eo aer im ro me rej bajjōk bōk koņaer ijello̧kin ‘lukkuun kōņaan bōk kuņan’ [Katak im Bujen Ko 76:75; 58:27].” Jeļā bwe aolep rej anemkwoj n̄an kāālet, Elder Maxwell kar būrom̧ōj an ba: “Būromōj, ak, n̄e juon ej kāālet n̄an jowan, rej kāālet n̄an ejjab er wōt, bōtaab n̄an epepen eo tok juon im eo tok bar juon. Pere ko ilo ro jinen im jemān maron̄ kwaļo̧k eļap eļļok ko ilo ajri ro nejier. Epepen ko m̧oktaļo̧k ilo juon baamle emaron̄ kar kwaļo̧k wujlepļo̧k, ilo an jet ilo epepen in kwaļo̧k pere. Ekabūrom̧ōjm̧ōj, ilo eo tok juon, jet remaron̄ kāālet jab errā āinwōt men eo ej jidik kōn jidik makunļok ej bōk jikin.
Iiō ko ļo̧k, Elder John H. Groberg ekar kwalo̧k bwebwenato eo kōn juon baam̧le edik rej jokwe ilo juon branch edik ilo Hawaii ilo jinoin 1900 ko. Rekar membōr in Kabun̄ in ium̧win emaron̄ ruo iiō ko ke juon iaan leddik ro nejier ekar nan̄inmej kōn juon nan̄inmej eo jab jeļā kake im ekar pād ilo ajupitōl. Ilo jar Jabōt eo tok juon, eo jemān im ļaddik eo nejin raar kōpooj kwojkwoj eo ke āinwōt aer kōn kōm̧m̧ane enan̄n aolep wiik ko, bōtaab āinwōt juon baba eo edik ekar bukwelōlō n̄an kōjeraam̧m̧an kwojkwoj eo, branch būreejtōn eo, ekar m̧ōkaj an kile won eo ekar pād ilo tebōļ in kwojkwoj eo, jutak im ba, “Bōjrak. Kwojjab maron̄ jibwe kwojkwoj eo. Leddik eo nejūm̧ ewōr juon an nan̄inmej jab jelā kake. M̧ōkaj im em̧m̧akūt ilo bar juon kōpooj bar juon pilawe ekāāl n̄an kwojkwoj eo. Kwojjab maron̄ pād ijin. Etal.” Baba in eļo̧kjen an ekar kalimjōk branch būreejtōn ilo an kajjieon̄ in m̧eļeļe ta eo ekar waļo̧k innām kalimjōk jarlepju in rijar eo im, en̄jake eļap būrom̧ōj im jook jān menin, em̧ajidjid n̄an baam̧le eo an, im raar aolep diwōjļo̧k jān jikin jar eo.
Ejjeļo̧k juon naan kar ba āinwōt, ekabūrom̧ōjm̧ōj, baam̧le eo ekar etetalļo̧k ilo iaļ eo n̄an m̧weo im̧wer. Ijo raar jijet ilo juon doulul, im jemān ekar ba, “Jouj im ikōn̄ m̧ae iien ij pojak n̄an kōnono.” Ļaddik eo edik nejier ekar ļōmņak ta eo renaaj kar kōm̧m̧an n̄an ukōtļo̧k kōn kajookok in raar iioone; renaaj ke m̧an piik ko nejin branch būreejtōn eo, ak tile m̧weo im̧ōn, ak bar kobaļo̧k ilo juon kabun̄? Ļalem, jon̄oul, jon̄oulļalem, ron̄oul-ļalem minit ko raar eļļāļo̧k in ikōn̄.
Pā ko pein eo jemān raar jino rōļo̧kļo̧k, im kōmejāālaļ kar jino waļo̧k. Eo jinen ekar jino jan̄, im ejjab to kajjojo ajri ro raar kaimera aer jan̄. Eo jemān ekar oktakļo̧k n̄an eo pāleen im ba, “Ij iakwe eok,” innām kar āliji naan ko n̄an kajjojo ajri ro nejierro. “Ij iakwe kom̧ aolep im ikōņaan bwe jān ippān doon, n̄an indeeo, āinwōt juon baam̧le. Im wāween eo de eo me emaron̄ in n̄an kōj aolep ej n̄an membōr ro rem̧m̧an an Kabun̄ eo an Jisōs Kraist im Armej ro Rekwojarjar ilo Raan Ko Āliktata im liāp kōn priesthood eo ekwojarjar im ilo tampeļ. Ejjab an branch būreejtōn eo kabun̄ in. Ej Kabun̄ eo an Jisōs Kraist. Jejjamin naaj kōtļo̧k an jabdewōt em̧m̧aan ak jabdewōt kōmetak ak kajook ak utiej bōro n̄an kabōjrak kōj jān koba indeeo. Jabōt eo tok juon, jenaaj bar ro̧o̧l n̄an jar. Jenaaj jijet ippād make m̧ae iien nan̄inmej eo an leddik eo nejid naaj jeļā kake, bōtaab jenaaj bar ro̧o̧lļo̧k.”
Raar bar ro̧o̧lļo̧k, leddik eo nejier ekar mour, im baam̧le eo ekar liāp ilo Laie Hawaii Tampeļ ke ekar dedeļo̧k. Rainin, elōn̄ļo̧k jān 100 jetōb ko rej ān̄inn̄in eo jermāer, jim̧aer, im eo jim̧m̧a-jim̧m̧a er jeraam̧m̧an kōnke ekar kalimjōk wōt indeeo.
Juon m̧ōttan āliktata an peran ilo naan in kam̧ool kōn Jisōs me inaaj kōnono kake ej jibadbad an ekwojajar eo ad make. Jisōs Ripinmuur eo ad aorōk, im E ej akweļap, “Kiiō en̄in ej kien eo: Kom̧in ukeļo̧k, kom̧ aolep jeban ko an laļ, im itok n̄an Eō im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata.”
Rikanaan Mormon ej kōmeļeļeik juon iaan kumi in Rikwojarjar ro me kar kōjparok ilo jekjek in kōjekdo̧o̧n “n̄an aikjet kōn eļap kaen̄tanaan ko”:
“Mekarta raar jitlo̧k im jar emmakijkij, im eaar kanooj kajoorļo̧k im kajoorļo̧k ilo aer ettā, im penļo̧k im penļo̧k ilo lōke Kraist, n̄an obrak in burueer kōn m̧ōņōņō im ineem̧m̧an, aaet, em̧ool n̄an karreoik im kokwōjarjare būruweer, kokwōjarjare eo ej itok kōnke aer kōtļo̧k burueer n̄an Anij.” Ej en̄in ej oktak in bōro eo ekajoor—kōtļo̧k būruōd n̄an Anij im bar ļotak ilo jetōb kōn jouj eo an Rilo̧mo̧o̧r—me jej pukote.
Kūr eo aō ej n̄an jerbal kiiō n̄an dāpij ijo jikūm̧ āinwōt juon eo me ej peran ilo naan in kam̧ool kōn Jisōs. An ukweļo̧k maron̄ menin aikuj, “jab aepedped kōn raan in ukeļo̧k eo ami,” n̄e ab “ilo awa eo n̄e kom̧ij jab ļōmņak bwe rak enaaj eļļā, im m̧adm̧ōde eo eaar jem̧ļo̧k, im ami rekar jab bōk lo̧mo̧o̧r.” Kijejeto ilo kōjparok bujen ko am̧ ippān Anij. Kwoj jab “inepata [kōn] jejjet eo an naan eo.” “Keememej in dāpij āt eo [Kraist] in jeje iien otemjej ilo būruōmi, bwe en [maron̄] ron̄ im jeļā ainikien eo naaj ān̄inn̄in kom̧, im barāinwōt, āt eo enaaj ān̄inn̄in kom̧.” Im āliktata, “jōk ilo būruōm̧i, bwe kom̧ naaj kōm̧m̧ani men ko me [Jisōs] enaaj katakin, im kakien kom̧.”
Jemād ej kōņaan bwe aolep ajri ro Nejin me renaaj lan̄lōn̄ kōn mour indeeo Ippān ilo aelōn̄ in kiin̄ in selestail eo An. Jisōs ekar en̄taan, mej, im kar jerkakpeje n̄an kōm̧m̧an bwe en pidodo. E “eaar wanlōn̄ļo̧k ilo lan̄, im kar jijet ianbwijmaron̄ in pein Anij, n̄an bōk jān Jemān jim̧we ko an in tūriam̧okake eo kar An ioon ro nejin Armej raņ.” Ij jar bwe jen maron̄ aolep jeraam̧m̧an kōn juon naan in kam̧ool kōn Irooj Jisōs Kraist edim, lem̧ōņōņō im peran ilo naan in kam̧ool jab in, im wōnm̧aanļo̧k wōt in lem̧ōņōņō kōn leen ko an jouj eo An ilo mour ko ad. Ilo etan Jisōs Kraist, amen.