“Jerbal in kwaļo̧k eo an Būreejtōnji eo Kein Kajuon,” Liaona, Māe 2024.
Nuuj ko an Kabun̄ in
Jerbal in kwaļo̧k eo an Būreejtōnji eo Kein Kajuon
Ilo juon ennaan ilo social media ekar kōm̧m̧an ilo Pāpode 14, 2024, Būreejtōn Russell M. Nelson ekar karuwaineneik aolep n̄an kōjerbale Raan in Valentine āinwōt juon kakeememej n̄an kallimur n̄an iakwe ro riturier. Būreejtōn Nelson ekar ba raan eo ej juon eo im armej ro ipeļaakin laļ in rej kōjeraam̧m̧an iakwe. Ilo iien in me iakwe emaron̄ ilo elōn̄ iien erom̧ wūt ko, chocolate, im menin leļo̧k ko, “kien eo kein karuo eļap ej katakin kōn juon kain iakwe eoktak—eo me ejjab bōjrak iakwe ro riturid.”
Ilo Pāpode 15, Būreejtōn Nelson im rikakpilōklōk ro an rekar karuwaineneiki Navajo Nation būreejtōn Dr. Buu Nygren im kōrā eo pāleen, First Lady Jasmine Blackwater-Nygren, n̄an Temple Square. Dr. Nygren ej kallim̧ur n̄an bōktok menin aikuj ko raorōk āinwōt dān, jarom, im iaļ ko rem̧m̧an n̄an aolep kapijuknen an Navajo. Ilo iiō ko rej kab jem̧ļo̧kļo̧k, Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar jipan̄ bōkļo̧k jet iaan men kein n̄an laļ eo an Navajo.
Ilo iien kadiwōjļo̧k eo ņaetan Friend to Friend ilo Maaj 9, Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, im kōrā eo pāleen, Kristen, rekar kōnono ippān jiljilimjuon iaan ajri ro jibuer ro rej pād ilo iiō in Būraimere kōn wāween n̄an ron̄jake Jetōb Kwojarjar eo im ta eo Jetōb Kwojarjar eo ej kōm̧m̧ane—kakkōļ, kaenōm̧m̧an, kam̧ool, tōl, katakin, im ebar ļōn̄.
“Rikaļoor ro an Jisōs Kraist rej ron̄jake Jisōs Kraist,” Būreejtōn Oaks ekar ba. “Jet iien E ej letok n̄an kōj juon en̄jake, jet iien juon ļōmņak. Jet iien jej ron̄jake Ainikien. Būreejtōn Nelson, rikanaan eo ad, ekar kajjitōk ippād n̄an ron̄jake Rilo̧mo̧o̧r eo im ron̄jake E.”
Ālkin 61 iiō in m̧are, Būreejtōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon, leļo̧k juon kōjeraam̧m̧an in iakiakwe kōrā eo pāleen, Kathleen, eo ekar jako ilo Oktoba 15, 2023. Būreejtōn Eyring ekar ba, “Kathleen ekar aolep iien armej eo me ekar kōņaan bwe in lukkuun juon eo em̧m̧antata imaron̄ in erom̧.”
Ilo Maaj 24, Būreejtōn Eyring ekar aje Red Cliffs Utah Temple ilo St. George, Utah, USA. “Kwonaaj loe juon lan̄lōn̄ ilo jerbal eo am̧ ijin eo epojak ilo ejjeļo̧k bar wāween,” ekar ba ilo iien aje eo.