Elder Sandino Roman

Ritōl Eutiej an Jiljilimjuonn̄oul

Elder Sandino Roman kar kwaļo̧k kadkadin gospel eo an Jisōs Kraist n̄an e āinwōt juon ajri. Kajjojo Jabōt juon m̧ōttan jinen ekar en̄ni im leddik eo jatin n̄an ioon 15 bar membōr ro jet an Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo Mexico. 

Ļalem iiō rūtto ekar jar aolep raan bwe baam̧le eo an enaaj oktaktok n̄an gospel in. Ruo iiō tokālik, jinen im jemān rekar peptaij. Juon iiō tokālik, jemān ekar peptaiji e. “Kōn un in, ijeļā bwe Irooj ej ron̄jake jar eo an ajri ro,” Elder Roman ekar ba.

Kaorōk gospel eo im jerbal ilo Kabun̄ in ekar juon oktak ekar jelōt baam̧le eo an. “Ikar loe jem̧ļo̧kin uwaak eo me gospel in ekar bōktok n̄an mour ko,” Elder Roman ekar ba. “Ijeļā ej bōktok lem̧ōņōņō im kōjatdikdik.”

Sandino Roman ekar ļotak ilo Okwōj 7, 1973, n̄an Lidia Corral im Prometeo Roman ilo Iguala, Guerrero, Mexico. Ke ej ikkure ilo tiim in volleyball eo an Kabun̄ in im Benemérito de las Américas high school kar lale, Roman ekar ioon Guadalupe Villanueva Rojas. Rekar liāp ilo Mexico City Mexico Temple ilo Tijem̧ba 19, 1998. Ewōr emān nejier ajri.

Elder Roman ekar bōk juon bachelor of science degree ilo computer systems jān ITESM (the Monterrey Institute of Technology and Higher Education) ilo 2000 im juon master of business administration jān Brigham Young University ilo 2006. Ekar jerbal āinwōt juon marketing manager n̄an Johnson & Johnson im n̄an Kabun̄ in āinwōt manager an Mexico Area Support Services Office.

Ilo iien kūr eo an, e im kōrā eo pāleen rekar jerbal āinwōt ritōl ro an Ecuador Quito North Mission. Elder Roman ekar barāinwōt jerbal āinwōt Eria Jiljilimjuonn̄oul, rikakpilōklōk ilo stake būreejtōnji, bisop, high ko̧o̧njeļ, im elders quorum būreejtōn.

Elder Roman ekar ba bwe lukkuun kōttōbar eo an, jabdewōt jikin ej jerbal ie, ej n̄an bōk lōke eo an Irooj. “Ij aikuji E bwe in jeļā n̄e Emaron̄ lōke eō n̄an kōm̧m̧ane jerbal in An,” ekar ba.