“Brother Gabriel W. Reid,” Liaona, Māe 2024.
Brother Gabriel W. Reid
Rikakpilōklōk eo Kein Karuo ilo Būreejtōnji eo Eutiej an Jabōt Jikuuļ
N̄an Gabriel W. Reid, juon iaan jineenjōj ko an erom̧ juon mijen ritōl ej n̄an lale an mijenede ro “kwojkwoj ioon naan ko an Kraist,” ejaake juon iakwe n̄an jeje ko rekwojarjar, im ikdeleel n̄an erom̧ āinwōt Rilo̧mo̧o̧r.
“Eļan̄n̄e kwoj loe kilen im wāween n̄an kōm̧m̧an bwe ekkatak gospel eo am̧ en ‘enno̧’ n̄an kwe, āinwōt an ba ilo jeje ko rekwojarjar [lale Alma 32:28], en̄ņe ej iien eo mour eo am̧ ej eoktak,” Brother Reid ej ba, eo ekar kajem̧ļo̧k jerbal in jipan̄ eo an āinwōt būreejtōn an Australia Sydney Mission ilo Juļae.
Brother Reid ekar ļotak ilo Pago Pago, American Samoa. Ej kōnono kajin Samoa, Spanish, im English. Ilo kajin Samoa, ekar ba, naan eo kwojkwoj ilo Bok in Mormon ej ukook āinwōt “taumamafa fiafia” im ilo kajin Spanish āinwōt “deleitar.” Ekar ba naan ko jim̧or rej meļeļein lan̄lōn̄.
Āinwōt juon rikakpilōklōk ilo Būreejtōnji eo Euteij an Jabōt Jikuuļ ekāāl, “Ij m̧ōņōņō in jipan̄ ro jet lo ewi jon̄an lan̄lōn̄ eo ej itok jān lukkuun meļeļe kake jeje ko rekwojarjar,” ekar ba.
Gabriel “Gabe” Walter Po’u Reid ekar ļotak Māe 28, 1977, n̄an Eugene im Tupu Reid im kar rūttoļo̧k ilo Leone ilo American Samoa. An iakwe n̄an Anij im ikdeleel n̄an likūt E m̧oktata ekar ijjino ilo iiō ko ke ej dik im kar rejtake e ilo an kar ikkure football n̄an Bringham Young University jān 1999 n̄an 2002 innām kar jibadōk juon jerbal ilo National Football League jān 2003 n̄an 2006.
Ilo iien in ilo mour eo an, ekar ekkatak juon katak eaorōk: “N̄e Irooj ej jiron̄ eok juon men, kwoj ‘kōm̧m̧ane aolepān.’”
Brother Reid ekar m̧areiki Heather Lynn Sasse ilo Bountiful Utah Temple ilo Juun 24, 2000. Ewōr emān nejier ajri. Eaar kadiwōjļo̧k jān BYU 2002 kōn juon bachelor degree ilo international relations. Rainin ewōr juon an kom̧pani in ekkal em̧.
Ilo kakkobaba n̄an tōl ioon Australia Sydney Mission, Brother Reid ekar jerbal āinwōt juon stake būreejtōnji rikakpilōklōk, ko̧o̧njeļ eutiej, bisop, būreejtōn an Doulul eo an Likao ro ilo ward, rijerbal in kain̄i ilo tampeļ, im kar juon mijenede ilo Chile Santiago South Mission jān 1996 to 1998.