Tampeļ ko, Ṃōko Im̧ōn Irooj rej Ekkal Peļaakin Laļin

Jān Elder Neil L. Andersen

Jān Doulul eo an Jon̄oulruo Rijilōk ro

Ilo am̧ erreo im itok im jar n̄an m̧weo ekwojarjar Im̧ōn, kwonaaj pālpel kōn kajoor eo An.

Ejjab ke em̧m̧an naan ko raiboojoj ej kab m̧ōj ad al kake? “Inaj bed wōt ilo aō jiban̄ kom, inaj kakajurlok kom, inaj kakajurlok kom, … Inaj kakajurlok im kajutak kom.” Irooj ej kōkajoor Armej ro Rekwojarjar An jān aolep epepen ilo aer itok n̄an m̧weo Im̧ōn ekweojarjar. Jān Kinshasa n̄an Zollikofen n̄an Fukuoka n̄an Oakland, jodikdik ro make rej kobrak jikin peptaij ko ilo tampeļ. Ilo kar m̧okta, eitōn armij kar rijerbal in kain̄i ro raar uwaan—bōtaap ejako kiiō. Mijinede ro kar kūr er, mijinede ro rej jerbal in jipan̄, im mijinede ro rej jepļaaktok repād ilo aolep kona ko. Aolepen peļaakin laļ in ewōr juon eddōkļo̧k in en̄jaake ej kepaak tok kōj n̄an m̧weeo im̧ōn Irooj.

Juon iiō emootļo̧k, juon m̧ōttan baam̧le ejitōnbōro, 95 an iiō, eaar jokwe ilo likiej in parijet in United States, mijinede ro rekar katakini 70 iiō, ekar jiron̄ leddik eo nejin, “Ikōņaan etal n̄an tampeļ ippam̧.”

Leddik eo nejin eaar uwaak, “Ekwe, Mam̧a, kwoj aikuj mokta peptaij.”

“Em̧m̧an,” lio ekar uwaak, “Innām ikōņaan peptaij.” Liin eaar peptaij. Jejjo raan tokālik, eaar kautiej ilo an deļo̧n̄ ilo jikin peptaij eo ilo tampeļ eo. Ālkin juon allōn̄ emootļo̧k, eaar bōk menin letok kwojarjar eo an make im kar liāp. “Ļoļātāāt im kajoor an Anij rej Depakpakļo̧k; rōn̄ōl eo ej pinej laļ ej jino peļo̧k.”

Kwonan̄in ke kar ļōmņak etke Irooj emaron̄ tōl rikanaan eo An kiiō n̄an kobrak laļin kōn tampeļ ko An rekwojarjar? Etke E emaron̄, ilo iien in ejejjet leļo̧k jeraam̧m̧an eo emennin aikuj n̄an armej in bujen ro An bwe jān juon m̧ōttan jon̄oul ko aer, bukwe iaan m̧ōko im̧ōn Irooj remaron̄ ekkal?

Jibbon̄ in, Būreejtōn Dallin H. Oaks ekar kwaļo̧k juon pija eaiboojoj an tampeļ ko rej pād ilo jerbal in ekkaļ ipeļaakin laļ in. Jidik iien em̧ootļo̧k komro Kathy kar pād ilo Philippines. Ļōmņak kōn kabwilōn̄lōn̄ in: Manila Tampeļ kar ajeļo̧ke ilo 1984. Enaaj kar 26 iiō tokālik tampeļ eo kein karuo ilo Cebu City, ekar dedeļo̧k ilo 2010. Kiiō, 14 iiō tokālik, 11 tampeļ rej ekkal wōt, ejaaki, ak keppopo n̄an aje. Jān ean̄ n̄an rak: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, and Davao. Eaiboojoj n̄an kalimjek jerbal ko rekabwilōn̄lōn̄ an Anij!

Ipeļaakin aolepen laļ in, m̧ōko im̧ōn Irooj rej epaak tok kōj. Etke ilo tōre in ad?

Raan ko Āliktata

Irooj ekar kakkōl bwe ilo raan ko āliktata, enaaj lōn̄ liaajlōļ ilubwiljin laļ ko, armej renaj “yokwe er make,” aolep menotemjeļo̧k renaaj poktak,” tarpok enaaj waļo̧k, im “būruōn armej raņ renaaj likjab.” Kōm eaar lukkuun loe an būruōn m̧aan im kōrā ro likjab: an laļ in kōm̧m̧an kareel armej n̄an jero̧wiwi, kamad ko an anikien rekajoor, kōjekdoon kijen jetōb, m̧ōk jān kūr ko an mour in juon rikaļoor. Bōlen kwar būrom̧ōj ilo am kar loe an juon eo kwoj iakwe, eo ilo juon iien kar m̧ool in kōnono kōn tōmak eo an ilo Jisōs Kraist, kwaļo̧k kam̧ool kōn Bok in Mormon eo, im kar kōņaan jipan̄ kalek aelōn̄ in Anij, ejjab to em̧m̧akūt jān, ilo bolen m̧okta, tōmak ko an im jakutkut an kobatok ilo Kabun̄ in. Kapilōk eo aō n̄an kom̧ ej jab ebbeer! Aolep men naj emman. N̄an ippān Anij, ejjeļo̧k men epen.

Kōn poktak in kar kannaan kake im jab tōmak ilo laļ in, Irooj ekar kallim̧ur bwe enaaj wōr juon armej in bujen, juon armej in kijerjer ilo kōttare jepļaaktok eo An, juon armej me jutak ilo jikin ko rekwojarjar im jab em̧m̧akūt jen ijo jikier. E ekar kōnono kōn armej ro ewāppen raar jum̧ae aujiid ko an rikapo, dāpdāp ilo tōmak eo aer, ļōmņak kōn selestial, im lukkuun lōke ilo Rilo̧mo̧o̧r Jisōs Kraist.

Etke Irooj ej kiiō bōktok bukwi tampeļ ko An n̄an kōj? Juon wun ej bwe ilubwilijin jorrāān im kapo ko an laļ in, Ekar kallim̧ur n̄an kōkajoorļo̧k im kōjeraam̧m̧an Rikwojarjar bujen ro An, im kallim̧ur ko An rej kūrm̧ool!

Kallim̧ur jān Kirtland Tampeļ

Ewi wāween an m̧ōkein rekwojarjar kakkajoorļo̧k, kaenōm̧m̧an, im kōjeparoke kōj? Jenaaj loe juon uwaak ilo kajjitōk ko an Rikanaan eo Josep Smith ilo aje eo an Kirtland Tampeļ. Eaar ilo tampeļ in ke armej ro rekwojarjar raar al, “Jitob An Anij Ej Einwōt Kijeek.” Rilo̧mo̧o̧r eo make ekar bar waļo̧k ļo̧k, im rikanaan ro etto raar bar jepļaaktok, leļo̧k kii ko an priesthood eo n̄an gospel eo emōj bar kōjepļaaktok.

Ilo iien kwojarjar eo ilo Kirtland Tampeļ, ikanaan eo ekar jar bwe ilo m̧wiin im̧ōn Irooj, ro Rekwojarjar ren pālpel kōn kajoor eo an Anij, bwe etan Jisōs Kraist en maron̄ pād ioer, bwe enjeļ ro An en wōr aer eddo ioer, im bwe ren eddōkļo̧k ilo Irooj im bōk juon tarlep in Jetōb Kwojarjar.” Kajjitōk kein rekajoor rej kūrm̧ool ilo mour ko ad ilo ad niknik kabun̄jar ilo m̧weo im̧ōn Irooj.

Kar Pojak kōn Kajoor

Ilo m̧iin Im̧ōn, jej lukkuun bōk kwojarjar ippen kajoor an lan̄. Ad tōmak ilo Jisōs Kraist im ad iakwe n̄an E rej kapene im ko̧kwojarjar. Em̧ōj jiron̄ kōj ilo jetōb kōn wōn eo kōj im wūnin mour in. Ilo ad tiljek, jej jeraam̧m̧an kōn kōjparok jān māllijon̄ ko im abwilōn̄lōn̄ ko. Jej en̄jaake iakwe eo an adwōj Rilo̧mo̧o̧r ilo an ļōn̄aj kōj jen men ko ad reppen im būrom̧ōj ko ad. Jenaaj pālpel kōn kajoor eo an Anij.

Et eo Etan Iood

Ilo m̧wiin Im̧ōn ekwojarjar, jej m̧ōņōņō in bōk iood Etan. N̄e jej peptaij tok jej kwaļo̧k ad tōmak ilo E im ad m̧ōņōņō in kōjeparok kien ko An. Ilo tampeļ eo, jej kallim̧ur ilo ekwojarjar, jān bujen ko ad, n̄an ļoor E n̄an indeeo.

Jodikdik ro an Kabun̄ in relukkuun kōppaļpaļ. Ilo juon laļ eo eppen, rej bōk ioer make et eo etan Kraist. Ilo Heber City, Utah, juon kweilo̧k ilo̧bwilej eaar kōm̧m̧an n̄an kōnono kōn tipdik in meļeļe ko an juon tampeļ kar peeke n̄an kaleke. Jilu buki jodikdik rekar kobrak juon paak n̄an kwaļo̧k aer rie tampeļ eo kar elmakote. Juon likao em̧m̧an dettan, eaar kōnono n̄an ritel ro an kien ilo juon iien kar kōppeļo̧k, peran ilo an kar kōmeļeļeiki, “Ij kōjātdikdik n̄an maron̄ m̧are ilo tampeļ in. [Tampeļ eo enaaj jipan̄] dāpij n̄a bwe in erreo im kwojarjar.” Juon bar likao ekar kōmeļeļeik tampeļ āinwōt juon kakōļļe in meram im kōjātdikdik. Likao im jiron̄ ro an Kabun̄ in ipeļaakin laļ in rej kaktibtibi etan Jisōs Kraist.

Enjeļ ro rej pād Ipped

Ilo Kirtland Tampeļ, Rikanaan eo Josep ekar jar bwe “enjeļ [romaron̄] wōr aer eddo ioon [ro Rekwojarjar].” Aolep iien kōm̧m̧ani kain̄i ko n̄an rūtto ro jibūd im jim̧aad ilo tampeļ ko ej bōktok juon kapen eppen im em̧m̧an bwe mour ej wōnmaanļo̧k ālkin rōn̄ōl eo.

Mekarta elōn̄ iaan en̄jaake ko ad ilo m̧weo im̧ōn Irooj relukkuun ekwojarjar n̄an kwaļo̧ki ilo̧bwilej, jet jemaron̄ kwaļo̧k. En̄oul iiō remootļo̧k, ke kar jokwe ilo Florida, Komro Kathy kar etal n̄an tampeļ eo ilo Atlanta, Georgia. Ilo joteenin Wōnje, Māe 9, 1984, ilo ad kar kadedeļo̧k juon m̧wen̄an ilo tampeļ eo, juon em̧m̧aan rijerbal in tampeļ ekar kepaak eō im kajjitōk eļan̄n̄e ekar wōr aō iien n̄an kōm̧m̧ane juon iien kepopo in kōjeraam̧m̧an an kaini. Etan armej eo ikar pinejeņkwan ekar oktak. Etan ekar Eleazer Cercy.

Raan eo tok juon, tampeļ eo eaar obrak kōn ro Rekwojarjar. Ke ikar pojak n̄an kōm̧m̧ane bōk kwojarjar eo aō kein karuo an raan eo, ikar bōk etan armej eo inaaj kar pinejeņkwan. Kabwilōn̄lōn̄, ejja āt eo etan armej eo wōt jān bon̄en eo mokta, Eleazer Cercy. Ikar en̄jaake Jetōb eo an Irooj ke bōk kwojarjar eo ekar dedeļo̧k. Tokālik ilo joteen eo ilowaan wōt tampeļ eo, Kathy eaar loe juon eo erūtto jeran baam̧le in, Sister Dolly Fernandez, eo me ej kiiō jokwe ilo Atlanta. Kōn an ejjeļo̧k em̧m̧aan in uwaan baam̧le eo an, lio ekar kajjitōk eļan̄n̄e imaron̄ jipan̄ ilo liāp eo an jemān n̄an ro jinen im jemān. Aaet ikar m̧ōņōņō.

Ke ikar bukwelōlō ilo rejet in lokatok eo n̄an kain̄i in ekwojarjar, ikar ron̄ bar juon alen āt eo kiiō ikemeemej, eo ej jemen kōrā eo, Eleazer Cercy. Iaar lukkuun tōmak bwe ālkin mour in, inaaj ioone im atbo̧kwōje juon em̧m̧aan ebun̄bun̄ ilo tōreān mour eo an āinwōt Eleazer Cercy.

Enan̄in aolep en̄jake ko am ilo m̧weo imōn Irooj rej bōktok lan̄lōn̄ in aenōm̧m̧an im eļapļo̧k revelesōn jān m̧akūtkūt in drama ko. Ak lukkuun lale, enjeļ ro ewōr aer eddo iood!

Tarlep eo an Jetōb Kwojarjar.

Menin letok eo an Jetōb Kwojarjar em̧ōj letok n̄an kōj ilo ad kar kappen juon membōr in Kabun̄ in. Kajjojo wiik ilo ad erreo im bōk m̧ōttan pilawā im den eo ilo emeemej ad Rilo̧mo̧o̧r, kar kallim̧ur kōj bwe Jetōb en maron̄ pād ippād iien otemjej. Ilo ad itok kōn bōro ko rem̧ōņōņō n̄an m̧weo im̧ōn Irooj, jikin eo ekwojarjar tata ioon laļ in, jej eddōkļo̧k ilo Irooj im “bōk juon tarlep in Jetōb Kwōjarjar.” Jān kajoor eo an Jetōb Kwojarjar, jej obrak kōn aenōm̧m̧an im lan̄lōn̄ im kōjātdikdik eo jab kōnono kake. Jej bōk kajoor eo n̄an rikaļoor ro An wōt men̄e jej lo kōj make inamōj in jikin ko rekwojarjar.

Būreejtōn Russell M. Nelson ekar kwaļo̧k: “Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj loe kakōlkōl ko rekabwilōn̄lōn̄ me Anij Jemed im … Jisōs Kraist … ej tōl Kabun̄ in ilo wōj im aeboojoj.” Elōn̄ ilo peļaakin laļ in m̧ōko im̧ōn Irooj ej juon jerbal ekajoor im kakōlkōl ekabwilōn̄lōn̄.

Ro jera rejitōnbōro, n̄e jekar maron̄ im jan̄in pojak in kaļapļo̧k ad pād ilo tampeļ eo, jen kapukot elōn̄ ļo̧k iien n̄an kabun̄jar ilo m̧weo im̧ōn Irooj. Jen jar kōn tampeļ ko em̧ōj kar kōjeļā kaki, bwe m̧weiuk ko ren maron̄ wiaki, bwe kien ko renaaj kōmālimi pepe ko, rijerbal ro ewōr aer taļōn naaj loe menin letok ko aer reļļap, im aje ko rekwojarjar me renaaj bōktok mālim eo an lan̄ im lotok eo an enjeļ ran.

Kallim̧ur ko

Tampeļ eo ej lukkuun im̧weo im̧ōn Irooj. Ij kallim̧ur kom̧ ilo ami itok ilo erreo im ilo eļap jar n̄an m̧wiin Im̧ōn ekwojarjar, kom̧ naaj maron̄ pālpel kōn kajoor eo An, Etan en pād ioomi, Enjeļ ro An en wōr aer eddo ioomi, im kom̧ naaj eddōkļo̧k ilo kōjeraam̧m̧an ko an Jetōb Kwojarjar eo.

Irooj ekar kallim̧ur, “Jabdewōt armej eo ej eļļo̧k jān jero̧wiwi ko an im itok n̄an Eō, im kūr ioon Eta, im pokake Ainikiō, im kōjparok kien ko Aō, enaaj lo turin Meja im jeļā bwe N̄aij mour.” Elōn̄ wāween ko roktak n̄an loe turin mejen Kraist, im ejjeļo̧k jikin em̧m̧anļo̧k jān ilo m̧weo Im̧ōn ekwojarjar.

Ilo raan in tarpok im poktak, ij kam̧ool bwe tampeļ eo ej m̧weo Im̧ōn ekwojarjar im naaj jipan̄ kojparok kōj, oņaake kōj, im kepooj kōj n̄an raan eo eaiboojoj n̄e, ippān aolep enjeļ ro An rekwojarjar, ad Rilo̧mo̧o̧r ej bar jepļaaktok ilo botata, kajoor, im eļap aiboojoj. Ilo etan Jisōs Kraist, amen.

Kakeememej ko

1. “BedBed Eo E Bin,” Hymns, no. 5.

2. “Jitob An Anij Ej Einwōt Kijeek,” Al Ko Al in Ajri, no. 20.

3. Ewōr kiiō 182 tampeļ ko rej jerbal. Jiljino rej pād ilo aer kōkāāli. Jiljilimjuon rej kōttar aer aje ippen bar juon ej kōttar n̄an bar aje. Ewōr 45 rej kaleki im bar 94 emōj kar aer kōjjeļā kaki ak rej pād ilo būļāān ak ejaaki.

4. Lale Luk 21:10.

5. 2 Timote 3:2.

6. Katak im Bujen Ko 88:91.

7. Elder David A. Bednar eaar ba: “Pedped in katak ko an gospel eo rej n̄an n̄a im kwe ta eo juon jila ej n̄an juon tima. Pedped in katak ko rejim̧we rej kōmaron̄ kōj n̄an kappukot iaļad im n̄an jutak pen im dim, im jab m̧akūtkūt bwe jejjab ellālee im wōtļo̧k ilo ļan̄ ko remarok rekōmetak im tarpok ko ilo raan ko āliktata.” (“The Principles of My Gospel,” Liaona, Māe 2021, 126).

8. Katak im Bujen Ko 45:26.

9. “Eļan̄n̄e jabdewōt armej e kōņaan ļoor Eō, en make kaarmejjete, im bōk debwāāl eo an, im ļoor Eō” (Matu 16:24).

10. Lale Luk 1:37.

11. Lale Katak im Bujen Ko 87:8.

12. Al,, no. 2.

13. Lale Katak im Bujen Ko 110. Moktaļo̧k jān iien in, Rikanaan Josep Smith ekar bōk Priesthood eo an Aron im kii ko an jān Jon Ripeptaij, im ekar bōk Melkisedek Prieshood eo im kii ko an jān Rijilōk Piter, Jemej, im Jon (Lale Katak im Bujen Ko 13:1; 27:12–13).

14. Katak im Bujen Ko 109:15; bar lale eoon 22.

15. Būreejtōn Russell M. Nelson ekar ba, “Tampeļ eo emaron̄ jipan̄ kōj ilo jibadbad in ad. Ijōņ jej bōk menin letok kwojarjar eo kōn kajoor an Anij, ej letok n̄an kōj maron̄ eo n̄an anjo̧ ioon Setan, im rikōjerak eo an aolep aetwerōk” (“Rikaenōm̧m̧an ro Jej Aikuji,” Liaona, Māe 2023, 101).

16. Lale Russell M. Nelson, “Choices for Eternity” (worldwide devotional for young adults, May 15, 2022), Gospel Library.

17. Elder Colin Stauffer, personal correspondence, Jan. 30, 2024.

18. Katak im Bujen Ko 109:22.

19. Lale Katak im Bujen Ko 20:77, 79.

20. Katak im Bujen ko 109:15.

21. Lale Rom 15:13.

22. Russell M. Nelson, “Revelesōn n̄an Kabun̄ in, Revelesōn n̄an Mour ko ad,” Liaona, Māe 2018, 96.

23. Brigham Young ekar ba: “Ewōr wōr ad bukwi tampeļ im taujin em̧m̧aan im kōrā renaaj jerbal n̄an ro em̧ōj aer jako, ilo aer kar jab ron̄j im pokake Gospel eo” (Teachings of Presidents of the Church: Brigham Young [1997], 312). Im Ezra Taft Benson ekar ba: “Ro mokta jen kōj raar kanaan kaki tampeļ ko elōn̄ ilo peļaakin North im South America, āne ko ion Pacific, Europe, im ijoko jet. Eļan̄n̄e jerbal in lo̧mo̧o̧r in en kar dedeļo̧k ilo juon jon̄ok en kar aikuj in, buki tampeļ ko renaaj kar aikujin” (The Teachings of Ezra Taft Benson [1988], 247).

24. Katak im Bujen Ko 93:1.

25. Elder David B. Haight ekar ba:

    “Em̧ool bwe jet em̧ōj aer lo Rilo̧mo̧o̧r, ak n̄e juon enaaj lale tikjinede eo, enaaj jeļā bwe ebar wōr jet meļeļe naan eo loe, āinwōt jeļā kōn E, ļōmņak kōn E, kile E im jerbal eo An, jeļā aorōk eo An, ak jeļā kōn E.

    “Kain kōmeram in jān lan̄ im kōjeram̧m̧an ko repojak n̄an kōj kajjojo” (“Temples and Work Therein,” Ensign, Nov. 1990, 61).