Jum̧ae ilo Men Otemjej
N̄an ad maron̄ kōjerbal anemkwoj kein ad, jej aikuj ļōm̧nak kake men ko āinjuōn.
Raan ko ļok, ilo am̧ro ettōr ilo juōn jikin ekāāl n̄an kom̧ro, eaar bōd ial eo ibōke, eo im̧ eaar bokļok kom̧ro n̄an ial leplep eo wa rejjab ettōr me eļap an aitok im jejjab maron̄ jeer im bar ro̧o̧l likļo̧k. Juōn m̧ōttam eaar kūr ļok kom̧ro n̄an m̧weo im̧ōn im̧ jekar inepata bwe kōm nej rum̧ijļok jān iien eo kar kōtmene kōm n̄an tōparļo̧k.
Ke kom̧ro ej ped iloan ial leplep eo im̧ kajjion̄ kappok ial n̄an diwōjļok, iaar ņaruō kōn aō kar jab lukkun lale men eo ej tōl ļok kom̧ro. Iien in ekōm̧m̧an bwe in ļōm̧nak ke jet iien ilo mour kein ad jej kōm̧m̧ani kālet ko rebōd im̧ ad aikuj mour kake wōnāer kōn bōro ettā im̧ kijenmej m̧ae iien eo jemaron̄ bar ukot ad ial.
Mour in ej mour n̄an kōm̧m̧an kālet. Jemedwōj Ilan̄ eaar letok n̄an kōj menin letok kwōjarjar eo an anemkwoj n̄an ad maron̄ ekatak jān kālet ko ad—jān men ko rejim̧we im̧ barāinwōt men ko rebōd. Jej kajim̧we bōd ko ad n̄e jej ukweļok. Ijo in im̧ eddōkļok ej bōk jikin. Karōk eo An Jemedwōj Ilan̄ n̄an kōj wōj ej n̄an ekkatak, eddōkļok, im̧ wōnm̧aanļok n̄an mour indeeo.
Jān iien eo kom̧ro kōrā e ippa eaar ekatak ippān mijenede ro im̧ kobatok ilo kabun in elōn̄ iiō remo̧o̧tļok, Eto aō nebar katak ko an Lehi relukkun em̧m̧an n̄an ļeo nejin Jekab ilo Bok in Mormon. Eaar katakini bwe “menin, Irooj Anij eaar leļo̧k n̄an armej bwe en aikuj akōm̧m̧an n̄an e make” im̧ bwe “emennin aikuj, n̄an an wōr jum̧ae ilo men otemjej.” N̄an ad maron̄ kōjerbal anemkwoj kein ad, jej aikuj ļōm̧nak kake men ko āinjuōn. Ilo ad kōm̧m̧ane, Bok in Mormon ej kakememej kōj bwe em̧ōj “leļo̧k n̄an e jon̄an meļeļe” im̧ bwe “Jetōb in Kraist” em̧ōj letok n̄an kōj wōj kajojo n̄an “jeḷā eṃṃan im nana.”
Ilo mour in, ekkā ad jelm̧ae elōn̄ kālet ko raorōk. N̄an waanjon̄ok:
-
Kālet eļan̄n̄e ak jaab jenaaj ļoore kien ko an Anij.
-
Kālet n̄an tōmak im kile n̄aat menin bwilōn̄ ko rej waļok ak n̄an addikdik im kōttar bwe juōn men en waļok m̧okta jān kālet n̄an tōmak ilo iien eo.
-
Kālet n̄an lōke Anij ak n̄an ped ilo mijak im̧ kōtmene ta eo enaaj waļok ilo raan eo juōn.
Ilo an kar bōd aō jeer n̄an ial leplep eo, en̄taan jān wōnāan kālet ko ad make rejjab em̧m̧an, emaron̄ lukkun kōmmetak kōnke ejjeļok bar juōn ak kōj wōt n̄an naruōn. Kōn menin, jemaron̄ kālet n̄an pukot aenōm̧m̧an ilo wāween ukweļok, kōm̧m̧an bwe men ko rebōd ren jim̧we, im ilo ad kōm̧m̧ane men in ekkatak jet katak ko n̄an kōm̧m̧an oktak.
Jet iien jemaron̄ barāinwōt ioone jelm̧ae im̧ mālijjon̄ ko jān men ko jejjab maron̄i, kain kan an:
-
Iien ājmour im̧ iien nan̄inmej.
-
Iien aenōm̧m̧an im̧ iien tariņae.
-
Awa n̄an raan im bon̄ im iien jam̧ar im̧ wintōr.
-
Iien jerbal im iien kakkije.
Mekarta jejjab maron̄ kōm̧m̧an kālet jān jekjek kein kōnke rej make waļok, janemkwoj n̄an kālet ilo wāween kōm̧m̧an ko ad. Jemaron̄ kōm̧m̧ane men in ilo ikdeelel ako n̄e jaab ilo makoko. Jemaron̄ pukot n̄an katak jān iien in im kajjitōk jipan̄ im̧ rie eo an ad Irooj, ak n̄e jaab jemaron̄ ļōm̧nak bwe jemake ilo mālijjon̄ in im jej aikuj en̄taan ippād make. Jemaron̄ kajim̧we wōjļā kein ad kōn juōn ikdeelel, ak n̄e jaab jemaron̄ kālet n̄an jab kōm̧m̧an oktak. Ilo marok in bon̄, jemaron̄ kajo̧e meram ko ad. Ilo iien m̧ōlo ilo wintōr, jej aikuj kālet n̄an ekaņōk nuknuk māneen. Ilo iien nan̄inmej, jemaron̄ loļo̧k takto ro im jipan̄ an jetōb. Jet kāleti wāween kōm̧m̧an ko ad ilo jekjek kein.
kōkarōkrōk, ekkatak, pukōt, im kālet aolepeer rej action verbs. Keememej bwe kōj jej ļo̧o̧r ta ko rejim̧we im ejjab ko rebōd. Jen jab meļokļok bwe Jisōs eaar kallim̧ur n̄an “bōk Ioon m̧ōjņo̧ ko aer im nan̄inmej ko an armej ro An … bwe En maron̄ … jipan̄” ako jipan̄ kōj jepļaak n̄an Ippān. Jemaron̄ kālet n̄an kalōk ejm̧aan eo ad ioon dekā eo me ej Jisōs Kraist, bwe n̄e aer in mejatoto ej itok “enaaj ejjeļo̧k an kajoor [iood].” Eaar kallim̧ur bwe “eļan̄n̄e kom̧ naaj itok n̄an [E], e [Enaaj] bōk, im em̧ōņōņō ro rej itok n̄an [E].”
Kio, ewōr juōn bar pedped in tōmak me elukkuun aorōk. Liai eaar ba bwe “emennin aikuj … n̄an an wōr jum̧ae ilo men otemjej Meļeļein bwe oktakin men kein jān doon reban jepeļļok jān doon. Rekkar n̄an doon. Jeban maron̄ kar jeļā m̧ōņōņō eļan̄n̄e jekar jab ioon burom̧ōj ilo juōn tore. En̄jake kwōle jet iien ejipan̄ kōj jeļā kam̧m̧o̧o̧lo̧l n̄e ebwe ippād n̄an m̧ōn̄ā. Jeban kar maron̄ jeļā kile m̧ool eo eļan̄n̄e jekar jab ioon riab jet iien.
Oktakin men kein jān doon rej āinwōt jait ko ruo ilo jāān deka eo. Aolepen jait kein renej baj jade wōt. Charles Dickens eaar kwaļok juōn jon̄ak kōn wāween in ilo an kar jeiki “eaar juōn iien eo ellukkun kar em̧m̧an, eaar juōn iien eo ellukkun kar nana. “
N̄ain lewaj juōn waanjon̄ak jān mour eo am make. M̧ōrā, im̧ ejaake baam̧le eo am, im̧ kiotak ajri ro eaar boktok iien ko eļap m̧ōņōņō n̄an kōm im̧ jej kab iooni ilo mour ko am, ako eaar barāinwōt boktok iien ko eļap metak, en̄taan, im̧ burom̧ōj n̄e juōn men enana ej waļok n̄an juōn iaamean̄. M̧ōņōņō eo ejjeļok jem̧ļokin im̧ lan̄lōn̄ eo ippān ro nejim̧ jet iien eaar wōr nan̄inmej, iien ped aujpitōl, im bon̄ ko jejjab kiki im reobrak kōn inepata, barāinwōt pukot aenōm̧m̧an ilo jar ko im̧ kōjeram̧m̧an ko an Priesthood eo. Men kein reoktak jān doon im̧ jekar iooni rej katakin kōj bwe jejjab make ilo iien en̄taan ko, im̧ rej barāiwōt kwaļok n̄an kōj jon̄an eo jemaron̄ ineeke ilo kōketak im̧ jipan̄ eo an Irooj. Men kein jej iooni rej jipan̄ ļōme kōj ilo wāween ko rem̧m̧an, im̧ elukkuun wōr tokjen. Ejjab ke un eo in jekar itok kake?
Ilo jeje ko rekwojarjar jej barāiwōt lo jet waan jon̄ak ko kareilok kōj.
-
Liai eaar katakin eo nejin m̧aan Jekab bwe liajļōļ ko eaar en̄taan kaki ilo āne jam̧den raar jipan̄ e jeļā aiboojoj eo An Anij im̧ bwe “[Anij] Enaaj ukōti en̄taan ko [an] n̄an [an] ļapļo̧k.”
-
Ilo tōre eo eaar nana an Josep Smith ped iloan kalbuuj ilo jikin kalbuuj eo an Liberty, Anij eaar jiron̄ļok “bwe aolep men kein otemjeļo̧k renaaj lewōj n̄an [e] imminene, im naaj n̄an em̧m̧anļo̧k eo [an].”
-
N̄an kōjem̧ļoke, katok eo An Jisōs Kraist ejjeļok jem̧ļokin eaar juōn waan jon̄ak eo em̧m̧antata kōn metak im̧ en̄taan ko me jej kab iooni, im̧ barāinwōt boktok kōjeram̧m̧an ko relukkuun em̧m̧an kōn Pinmuur eo An n̄an aolep nejin Anij.
Ijo ewōr det ie, ellor ej bar ped ie. Ibwijleplep ko remaron boktok joreen, ako remaron̄ bar boktok mour. Dānnin kōm̧jaaļaļ in burom̧ōj aolep iien ej oktak n̄an dānnin kaenōm̧m̧an im̧ m̧ōņōņō. On̄ kōn em̧m̧akūt eo an ro rejitōnbōro ippād wōņāān ej itok kōn m̧ōņōņō eo n̄an bar ioon doon. Ilo iien tariņae im̧ kakure, jouj im̧ iakwe ko rellap im̧ redik rej barāinwōt waļok n̄an ro ewōr “mejaṃ in loi, im lọjilñūṃ in roñjake.”
Aolep iien laļin ad rainin ej kwaļok kadkadin jān mijak im̧ ikumļo̧k—mijak kōn ta eo ilju enaaj boktok n̄an kōj. Ak Jisōs ej katakin kōj n̄an lōke im̧ “reitok n̄an [E] ilo ļōmņak otemjeļo̧k; jab pere, jab mijak.”
En ikkutļok ad kōm̧m̧ane ijo koņaad n̄an lo jait ko ruo ilo aolep jāān deka eo em̧ōj likūt ilo mour kein ad. Mekarta n̄e jait kein ruo rejjab maron̄ m̧ōkaj aer waļok n̄an kōj jet iien, jemaron̄ jeļā im̧ lōke ke rej ped wōt ijen.
Jemaron̄ ped im̧ aenōm̧m̧an ke men ko reppen n̄an kōj, būrom̧ōj, en̄taan, im metak ko rejjab kwaļok kadkadid; ijoke, ej ilo wāween ad deploki men kein, enej jipan̄ kōj eddōkļok im̧ epaakeļok Anij. Bōklōkōt im̧ kālet ko ad alikkarļok aer kwaļok kadkadid jān men ko jej jelm̧ae.
Ilo iien ājmour, kōjparok im̧ kam̧oolol kōn aolep kajjojo iien. Ilo iien nan̄inmej, pukot kijenmej im̧ katak jān e im̧ jeļā bwe emaron̄ bar oktak ekkar n̄an An kilaan Anij. Ilo iien būrom̧ōj, tōmak bwe m̧ōņōņō ej ped im̧aan; eitin aolep iien jejjab maron̄ loe. Jeļā kilen ukōt wāween am̧ kōlmenļokjen im̧ kaetokļok ļōm̧nak am̧ n̄an men ko rem̧m̧an ilo iien ko reppen, kōnke ejjeļok kajjitōk rej bar ped ijōn̄e! Jab meļokļok in kam̧oolol. Kālet n̄an Tōmak Emaron̄ wōr aō tōmak ilo Jisōs Kraist. Jemaron̄ aolep iien lōke Anij. Kālet n̄an “Ļōmņak kōn Selestial,” āinwōt an būreejtōn Russell M. Nelson kar katakin kōj kiiō!
Jen kememej wōt karōk eo em̧m̧an An Jemedwōj ilan̄ n̄an kōj. Ej iakwe kōj im̧ eaar jilkintok nejin ejitōnbōro n̄an jipan̄ kōj ilo mālijjon̄ kien ad im̧ kōpeļļok n̄an kōj kōjem eo n̄an jepļaakļok Ippān. Jisōs Kraist ej mour im̧ aolep iien ej jutak, kōttar ad kālet n̄an kūri E n̄an jipan̄, kajoor, im̧ lo̧mo̧o̧r. Jān men kein ij kam̧ool ilo etan Jisōs Kraist, amen.