“Elder Patrick Kearon: Kar Kōpooje im Kar Kūri jān Irooj,” Liaona, Māe 2024.
Kūr ko Rekāāl
Elder Patrick Kearon: Kar Kōpooje im Kar Kūri jān Irooj
Irooj ekar kōpooj Elder Kearon ilo wāween ko rejej uwaer im kar kōjeraam̧m̧an e kōn elōn̄ menin letok ko an jetōb me renaaj kar kōm̧m̧an bwe en kōjeraam̧m̧an ro jet ilo kūr eo an ekwojarjar āinwōt juon rikam̧ool ejenolo̧k “kōn etan Kraist ilo aolepān laļ.”
Juon Jādede jejjo iiō ko ālkin kar kūri āinwōt juon Ritōl Utiej Jiljijlimjuonn̄oul, Elder Patrick Kearon im kōrā eo pāleen, Jennifer, raar deļo̧n̄e juon jikin wia ekilep ke Elder W. Rolfe Kerr im kōrā eo pāleen, Janeil, raar diwōjļo̧k. Raar bwebwenato jidik, innām Kerr ro raar jibadōkļo̧k wa eo waer.
Enan̄in ilo iien em̧ōkaj, juon em̧m̧aan ekar kaiookļo̧k Elder Kearon im kar lem̧ōņōņō ilo kajjitōk ippān, “Ejim̧we ke armej eo kwar kōnono ippān ej juon ritōl eutiej?” Elder Kearon ekar uwaak, “Aaet. Elder W. Rolfe Kerr jān Jiljilimjuonn̄oul eo.” Em̧m̧aan eo ekar em̧ajidjid, kalimjōkļo̧k Elder Kearon ilo an jab kile, im kar ba, “Kwomaron̄ aolep iien kile juon Ritōl Utiej, ejim̧we ke?” Innām em̧m̧aan eo ekar kairļo̧k.
“Em̧m̧an ippa bwebwenato in kōnke ej kwaļo̧k wāween aō en̄jake,” Elder Kearon ekar ba kōn juon ettōn̄ dikdik. “Imaron̄ bōk ejja kain en̄jake in wōt rainin, im bwe em̧m̧aan eo enaaj kar bōlen wōt jab kile eō ibwilijin juon jarlepju eļap āinwōt juon Ritōl Utiej.”
Kōjak ko make an Elder Kearon im ettā eo kōm̧m̧an bwe ren iakwe jān ro me rejeļā kajjien ak kar maron̄ wōr aer iien jerbal ippān. Kar kūri, im kar kapiti juon uwaan Doulul eo an Jon̄oulruo Rijilōk ro ilo Tijem̧ba 7, 2023, Elder Kearon ejeļā bwe kūr in an ekāāl edikļo̧k an kōn e jān an kōn jerbal in ej waanmaanļo̧k an Irooj.
“Jej aolep erom m̧ōttan jerbal eo An,” ej ba, “kajjieon̄ n̄an jipan̄ armej ro en̄jake meram eo An im iakwe eo An im kea eo An. Ta eo ej kōņaan bwe jen kōm̧m̧ane āinwōt membōr in Kabun̄ eo An ej n̄an kōjeraam̧m̧an mour ko an ro jet.”
Irooj ekar kōpooj Elder Kearon ilo wāween eo ejej uwaan im kar kōjeraam̧m̧an e kōn elōn̄ menin letok ko an jetōb me renaaj kar kōm̧m̧an bwe en kōjeraam̧m̧an ro jet ilo kūr eo an ekwojarjar āinwōt juon rikam̧ool ejenolo̧k “kōn etan Kraist ilo aolepān laļ” (Katak im Bujen Ko 107:23). Juon rioktaktok n̄an Kabun̄ in ke ej 26 iiō dettan im ekar membōr eo wōt an Kabun̄ in ibwlijin ro jein im jatin, Elder Kearon ej juon em̧m̧aan in eļap tūriam̧o me ejeļā ewi wāween ron̄jake, iiaio̧ ippān, im kaenōm̧m̧an ajri ro nejin Anij. Ewōr ippān piktok in iakwe eo an Kraist im ej lo lan̄lōn̄ ilo jerbal in jipan̄. Kar im̧we kōn en̄jake ko rem̧m̧an im jako eo kar an ro rejitōnbōro, e ej kam̧ool bwe Rilo̧mo̧o̧r Jisōs Kraist, kōn Pinmuur eo An, ej letok pein kōmour im naaj juon raan kōm̧m̧an bwe aolep men ren jim̧we.
Elder Kearon ej m̧ool in juon rikaļoor an Jisōs eo ej lōke ilo Irooj. E ej juon ritōl eo me epidodo ļoore kōnke e ej wujlepļo̧k n̄an ļoor Rilo̧mo̧o̧r eo im n̄an tōl armej ro n̄an E.
“Irooj” ej ba Būreejtōn Jeffrey R. Holland, Ripinej jenkwan Būreejtōn eo an Doulul eo an Jon̄oulruo Rijilōk ro, “ekar tōl Patrick n̄an jerbal eo ej kabwijere kiiō.”
Ro Jinen in Jemān rej Iakwe im Wujlepļo̧k
Patrick Kearon ekar ļotak ilo Carlisle, Cumbria, ilo ituiōn̄ in England ilo Juļae 18, 1961, n̄an Paddy im Patricia Kearon. Ke ro jinen im jemān raar ioon doon, raar jerbal ilo British jarin tariņae ko ilo Pata eo an Laļ kein II—jinen āinwōt juon nurse in army ilo India im Bruma im jemān ilo Royal Air Force (RAF) eo, kar pād ilo France, North Africa, Sicily, im Itay.
Elder Kearon ej keememej ro jinen im jemān, Paddy im Patricia, kōn mour in waanjon̄ak ko aer kōn wujlepļo̧k, jerbal in jipan̄, im kaarmejete.
Men̄e raar jab armej in jar, raar mour in baam̧le in wujlepļo̧k, jerbal in jipan̄, im kaarmejete me ekar door juon im̧we ilo Patrick, eo ediktata in ajri ro ļalem nejin rūtto rein. Ej keememej Pat āinwōt juon “m̧am̧a āinjuon,” ilo iakwe, meļak an tōl, eļaptata kōn waanjon̄ak, im ejjan̄in kar kōraate jabdewōt. E ekar meanwōd, jouj, im jokkun wōt juon. Im ej keememej Paddy kōn “kajoor eo an, jouj, im okmāņāņ eo an eļap, iakwe eo an kōn … āne jem̧aden ko rōm̧ōrā ilo Arabia [im] bat ko ilo England im Ireland; im ikdeelel eo an n̄an mejatoto ko, det, im lo̧jet. Emaron̄ alikkar aō kile jenok eo an ilo kōņaan eo aō make n̄an pād nam̧ōj, ilo meļan ko, ilo mejatoto im ilo det.”
Ālkin jerbal eo an ilo RAF, jemān Elder Kearon ekar etal n̄an jerbal āinwōt juon defense contractor ilo Saudi Arabia. Patrick, āinwōt juon ļaddik jiljilimjuon iiō dettan, ekar katak juon katak eaorōk ijo kōn pokake, ememļo̧kjeņ kar keememej ilo kōnono eo an kein kajuon āinwōt juon Ritōl Utiej. Kojekdo̧o̧n naan in kōmeļeļe ko an jinen im jemān n̄an kōņak juuj ko ilo juon iien kāām ilo āne jem̧aden, ekar ilo̧k n̄an lale ilo an ekkōņak “flip-flops (jodi)” im kar metak kōn an kar scorpion eo kar kūji ioon kūrūbbo̧k eo ioon neen.
Patrick Kearon āinwōt juon ļaddik ilo Saudi Arabia.
Jilu iiō tokālik, Patrick eo edik ekar lo e make ilo boarding school eo ilo England ilo an en̄jake eļap on̄ kōn jinen im jemān, juon on̄ eo ekar dikļo̧k jān leta in kōketak ko aer.
“Harry Potter ilo m̧ool n̄an keidi ekar pidodo n̄an e ilo Hogwart. Ekar pen,” ekar ba kōn boarding school eo. “Ikar ro̧o̧l n̄an m̧weeo wōt ilo Kūrijm̧ōj, Ijtō, im jōm̧ar. Ikar kōm̧m̧ani kōļōnta jiddik ko ioon jiit in peba ko, likūt juon ļain ilo kajjojo raan, būni raan ko m̧ae iien eo imaron̄ bar jepļaakļo̧k n̄an baam̧le eo aō.”
Jejjo iiō tokālik, ke Patrick ekar pād ilo boarding school eo an kein karuo ilo England, juon ļan̄ ekajoor ekar to̧o̧rļo̧k jān Lom̧aļo in Irish. Tōprak eo an ļan̄ eo ekajoor ekar kaibwijleplep 5,000 m̧ōko ipeļaakin eria eo. Patrick im rijikuuļ ro mōttan kar kūr n̄an er n̄an jipan̄ ilo karreo eo eļap.
“Ij keememej wōt eddo eo an karpet ko rōtutu im bwin nana eo an,” ej ba. “Bōtaab ij keememej kōmaatļo̧k aō n̄an e im kōm̧m̧an bwe jerbal eo en dedeļo̧k ippān rijikuuļ ro m̧ōtta. Im ij keememej armej ro im aer kam̧m̧oolol.”
Bōlen en̄jake jab in ekar ijjino eo kein kajuon an Patrick n̄an kōjeraam̧m̧an ko an ruo n̄an leļo̧k im bōk jerbal in jipan̄ eo. Tokālik, ekar kile bwe en̄jake ko an āinwōt juon jodikdik raar jab lōke n̄an likūti ippān “ke ikar bōk kuņaō ilo kijejeto in eļap n̄an jipan̄ ro rūturūm̧.”
Ālkin high school, Patrick ekar bar ro̧o̧lļo̧k n̄an Saudi Arabia, ijo ekar jino kaminene in menija eo ippān juon mutinational food im drink conglomerate. En̄jake jab in ekar bwilik m̧aan jerbal eo an ilo jejjo industry ko, āliktata kōjjem̧ļo̧k ilo communications consultancy ilo England ippān Sister Kearon.
“Ekar Nana Aō Mour”
Ke Patrick ekar 19, ekar jako jemān im ļeo ippān jijtōr eo an ilo juon itaak in wa ilo Saudi Arabia. “Ikar lukkuun būromōj kōn jako eo aer,” ej ba. Pein tōl eo an jemān, kōketak eo em̧m̧an, im lan̄lōn̄ eo kōn watōk lale in kar jako. Jakoļo̧k ilo en̄jake ko ilo būrom̧ōj im waan ium̧win juon iien, Patrick ekar ro̧o̧l n̄an m̧weo n̄an England ippān jinen bōtaab āliktata kar bar ro̧o̧lļo̧k in jerbal ilo Saudi Arabia.
“Ekar wōr ippa aolep iien ko rem̧m̧an raorōk n̄an katak im eddōkļo̧k im lo ekōjkan an pejnej ko jerbal,” ej ba. Ekar ļap tata an kam̧m̧oolol kōn “juon bo̧o̧j eo em̧m̧an me ekar katakin im tōl e im ekar erom juon m̧ōttan jitōnbōro. Ekar juon iaan jejjo ro raar āinwōt baba ikar jeraam̧m̧an kake jān jako eo an jema.”
Tokālik, ke kar bar jerbal ilo London, Patrick ekar iioon jet memebōr ro an Kabun̄ in.
“Raar waanjon̄ak ko rem̧m̧an kōn tōmak in ad,” e ej keememej. “Juon iaer ekar jān California, im ikar etal im jokwe ippān baam̧le jab in ke ikar jerbal ijōņ.”
En̄jake jab in ekar leļo̧k n̄an Patrick juon pedped em̧m̧an kōn meļeļe Kabun̄ in. Ekar im̧we kōn lan̄lōn̄ eo baam̧le eo ekar loe ilo jerbal in jipan̄, bōtaab ekar lōn̄ an kajjitōk ko kōn katak im tōmak ko an Kabun̄ in. Ilo England ruo iiō ko tokālik, mekarta, ekar iioon jet “mijenede ro rekabwilōn̄lōn̄” ilo iaļ ko ilo London. Ālkin ekōnono kōn gospel eo ippāer ium̧win jejjo allōn̄ ko im kar jiron̄ e ekar jab eddōkļo̧k n̄an peptaij, raar kajjitōk ippān eļan̄n̄e ekōņaan juon kōjeraam̧m̧an.
“Ikar errā n̄an bōk juon kōjeraam̧m̧an jān juon mijenede eritto ikar jeļā kajjier,” ej keememej. “Ekōjkan aō kar en̄jake ilo iien eo rej kōjeraam̧m̧an n̄a ekar juon iien aorōk ilo oktak eo aō. Ekar juon en̄jake eo lukkuun ban kowaane an meram im lan̄lōn̄ im aenōm̧m̧an eo me ejjeļo̧k naan ko remaron̄ kōmeļeļeik. Naan ko an kōjeraam̧m̧an eo kar kwaļo̧k im̧we eo im lukkuun in jetjet.”
En̄jake jab in, kobaļo̧k ippān “juon oran men ko jet ilo eddōkļo̧k eo aō n̄an peptaij,” kar tōlļo̧k Patrick n̄an juon naan in kam̧ool kōn Rilo̧mo̧o̧r eo im Kabun̄ eo An kar kōjepļaaktok. Jet allōn̄ tokālik, ilo raan eo m̧okta jān Kūrijm̧ōj ilo 1987, ekar peptaij juon membōr Kabun̄ eo an Jisōs Kraist im Armej ro Rekwojarjar ilo Raan-ko Āliktata.
N̄an ro me rej kappukōt juon naan in kam̧ool, Elder Kearon ej ba: “Kāālet tōmak, im uwaake kūr eo ilo Alma 32. Ļoor en̄jake in jetōb ko am̧. Renaaj tōl eok, im kwonaaj jeļā.”
“Juon Kein Jipan̄ Kōkajoor”
Ruo iiō ālkin peptaij eo an, Patrick ekar etal n̄an juon ward an rūm̧m̧an ded ro ilo London ke ekar ioon Jennifer Hulme, juon rijikuuļ in Brigham Young jān Saratoga, California. Jennifer ekar itok n̄an London n̄an jiljino allōn̄ ko n̄an ekkatak art history im English literature. Diktata iaan ajri ro ruwalitōk, liin ekar rūttoļo̧k ilo Kabun̄ in.
Ilo iien eo em̧ōkaj, liin ekar ļorak mejān ippān Patrick.
“Ke ikar mijōke an iiaio̧ ippān armej ro ilo ward eo, ikar lo wāween an kar kōm̧m̧an n̄an er,” Jennifer ej ba kōn Patrick. “Men̄e ekar juon membōr kāāl, juon membōr eo ej bar ro̧o̧ltok, juon eo me ewōr an apan̄ ko, ak juon eo me ekar juon m̧ōttan epaake, ekar kōm̧m̧an n̄an aolep kōn juon wōt kain iakwe em̧ool im itok limo. En̄in kar m̧wil eo jinointata im eļaptata me ekar kepaakļo̧k eō n̄an e. Ekar juon m̧wiļ eo ikar lo an ļapļo̧k ippān, im bwe Anij ekar kōjerbale, ilo ium̧win 33 iiō ko in am̧ro m̧are.”
Iakwe eo im jeļā ņae eo an Elder im Sister Kearon n̄an doon ej kōtļo̧k bwe erro en jerbal ippān doon ilo tōmak.
Ālkin jerā eo aerro, ripālele in ekar m̧are ilo Oakland California Tampeļ eo ilo Jānwōde in 1991 eo. Innām raar karūttoļo̧k baam̧le eo aer ilo England ium̧win 19 iiō ko m̧ae iien eo Elder Kearon kar kūri ilo 2010 eo āinwōt juon Ritōl Utiej Jiljilimjuonn̄oul eo ālkin jerbal ilo jejjo kūr ko an ritōl, ekoba āinwōt juon stake būreejtōn im Eria Jiljilimjuonn̄oul. Ekar jerbal āinwōt Senior Būreejtōn an Jiljilimjuonn̄oul eo ke eaar kūr n̄an Doulul eo an Jon̄oulruo Rijilōk ro.
Elder Kearon ej ba kōrā eo pāleen ej juon rikaļoor eo etiljek me ejeļā m̧ool in kadkad eo an. “Liin ej mour juon mour em̧ōņōņō, em̧m̧an, ekkal, jipan̄, mour lan̄lōn̄, ippān Rilo̧mo̧o̧r eo ilo ioļap in men otemjeļo̧k. Liin ekar juon kein jipan̄ an kōkajoorļo̧k im juon kōjeraam̧m̧an eļap n̄an eō jān iien eo kōm kar ioon doon.”
Susannah, leddik eo kein karuo in leddik ro jilu nejin ripālele in, ej ba jinen ej iakwe in ajeļo̧k e make: “Liin eobrak kōn mour im meram im ewōr juon an itok limo kōn gospel eo.” Im āinwōt ļeo jemān, jinen ej juon “riron̄jake eo elukkuun em̧m̧an”
Susannah im sister ro an rej ba iakwe eo im jeļā ņae eo an eo jinier im jemeer n̄an doon ej kōtļo̧k bwe ren jerbal ippān doon ilo tōmak n̄an kōttōpar ko eier wōt juon. Rej ron̄jake doon im jeļā ņae im kam̧m̧oolol kōn ļōmņak ko im kōļmenļo̧kjeņ ko an doon.
Emma, leddik eo edik tata nejin ripālele in, ej ba jemjerā eo jokkun wōt juon eo an eo jinen im jemān im iakwe eo ejerwawa n̄an ajri ro nejier “ekar kōm̧m̧an n̄an juon mejatoto ilo kapijuknen en lukkuun m̧ōņōņō im koņ.”
Lizzie Kearon Staheli, eo erūtto tata, ej ba kōn eo jemān, “Jema ej lo armej ro kōn māj ko mejān Kraist. Iien otemjeje ej ellowetak n̄an kōketak im kōkajoor armej. Ej lo kōjatdikdik eo ilo aolep, jekdo̧o̧n ta jekjek ko aer.”
Emma ej kakkobaba: “E ej obrak kōn tōmak im ej iakwe lan̄lōn̄ eo gospel eo ej bōktok n̄an e. Ālkin kar lo gospel eo kar kōjepļaaktok āinwōt juon rūtto, ej kam̧m̧oolol kōn oktak eo ej kōm̧m̧an ilo mour an juon āinwōt juon kein jipan̄ an meram im lan̄lōn̄.”
Elder Kearon ej an̄inn̄in leddik ro nejin—Lizzie (pija ippān ļeo pāleen, Jonathan), Susannah, im Emma—“meram eo aiboojoj tata ilo mour ko am, menin aorōk eo am̧ eļap tata.”
Jean B. Bingham, kar Būreejtōn eo an Doulul eo an Kōrā ro, ej kōmeļeļeik Elder Kearon āinwōt meļak ilo kapan̄pan̄. Liin e keememej juon iien ke e, Elder David A. Bednar jān Doulul eo an Jon̄oulruo Rijilōk ro, Elder Kearon, im ro jet raar lo aer make pād wōt ilo jikin ko rettoļo̧k ilo juon iien an kien kōm̧m̧an jum̧ae ko. Ium̧win tōl eo an Elder Bednar, Elder Kearon ekar joļo̧k awa ko ilo satellite phone eo jerbal ippān rikien ro ijo jokwe ie im rijerbal ro an Kabun̄ n̄an pukōt juon iaļ in aer em̧m̧akūt.
“Piktok eo an elur, jerbal in kijiejeto ko, im ļōmņak ko an reim̧we kar kwaļo̧k juon uwaak me ekar kōm̧m̧an aer ilo̧k ilo ejjeļo̧k jorrāān,” Sister Bingham ekar ba.
Ilo Tijem̧ba 2021 eo, baam̧le eo ekar ilbōk n̄an jeļā ke Sister Kearon ewōr an nan̄inmej in kāānjōr in ittūt.
“Ikar ļōmņak bwe kāānjōr enaaj kar jelet eō ak kōm,” Sister Kearon ej ba. Ekar ba bwe kōm̧adm̧ad eo ekar lukkuun in pen, ak Rilo̧mo̧o̧r ekar an kein kōkajoor ilo aolepen iien eo. “Ikab de oral chemotherapy, bōtaab ij kam̧m̧oolol n̄an ba bwe ejako aō kāānjōr āinwōt an taktō ro ba.”
Elder Kearon ej ba: “Jen ekab de tiljek ilo dim im kijin̄en̄e ilo aolepān men in. Kōmij kam̧m̧oolol aolep raan kōn ājmour eo an, im kōmij leļo̧k kam̧m̧oolol kōn kōjparok eo ejej uwaan kar leļo̧k n̄an e.”
Ak mālijjon̄ ko jet e im ļeo pāleen raar iooni, Sister Kearon ej ba, “Mour ej letok n̄an kōm men ko jejjab kōņaan kōm̧m̧ani. Jejjab kōņaan er. Jejjab kajjitōk kake er. Bōtaab jej aikuj jelm̧aiki wōt. Wāween eo em̧m̧antata n̄an ņa mejļa men ko elukkuun pen ej n̄an oktakļo̧k n̄an Irooj im kajjitōk kōn An kōkajoor, likūt tōmak eo ad ilo Jisōs Kraist im ilo jouj im kajoor eo An. Juon iien remootļo̧k, ikar katak eļap kōn ewi wāween an Rilo̧mo̧o̧r jipan̄ kōj ilo iien ko ad rem̧wilaļ im marok tata.”
Elder im Sister Kearon kar bōk jeļāļo̧kjeņ in ekwojarjar ālkin ļotak eo an ajri eo nejier kein kajuon, Sean.
“Ejm̧aan in Pinmuur eo an Jisōs Kraist”
Ilo iien eo Sister Kearon ej bōro̧ro, ripālele in raar jeļā jān ultrasound scan eo bwe nin̄nin̄ ļaddik eo nejier ewōr an “juon nan̄inmej in menono, juon jekjek eo ekuwōtata,” Elder Kearon ej ba. “Ilo iien eo ej bōro̧ro kōm kar joļo̧k eļap iien n̄an pukot taktō ro rem̧m̧antata, cardiologist ro, im rim̧wijm̧wij menono ro me retijem̧ļo̧k n̄an ņa mejļan jorrāān in. Kōm kar lo juon kumi etijem̧ļo̧k ilo London, im raar lōke ke remaron̄ kar kōm̧m̧ane jorrāān eo.”
Rim̧wijm̧wij ro raar kōm̧adm̧ōde Sean ke ekar 19 raan rūtto̧o̧n. M̧wijm̧wij eo ekar aitok im kōn kōkam̧anm̧an. Ālkin wōt, Elder Kearon ej ba, “Menono eo edik an Sean ekar jab maron̄ bar jerbal. Kōn menin, ekar jako jān kōm. Jako eo an ekar kanooj in kōmmetak. Menin ekar jab tōprak eo kōm kar jitlo̧k kake, jar kake, im akweļap kake, bōtaab kōm kar jeļā bwe pein lan̄ ekar pād ilo en̄jake in.”
Sister Kearon ej ba, “Anij ekar tōl kōm ilo allōn̄ in bōro̧ro ko kōn mour eo eaiboojoj, mour eo ekadu an ļaddik eo nejum̧ ilo juon wāween me, ilo jem̧ļo̧kin, kōm kar jeļā ke kōm kar kōm̧m̧ane jabdewōt men kōm kar maron̄e n̄an e. Ekar juon aenōm̧m̧an eo ekabwilōn̄lōn̄.”
Kōmour ekar itok jān juon ļapļo̧k in meļeļe kōn Pinmuur eo im Jerkakpeje eo an Rilo̧mo̧o̧r me Sister Kearon ekar bōke jān juon ekkatak em̧wilaļ ilo 1 Nipai im 2 Nipai. “Ilo būrom̧ōj kōn jako eo am, ikar en̄jake aō erolol ilo juon ro̧n̄ emārok,” kōrā in ekar ba. “Im n̄an kiiō, iien n̄an iien, wōtlo̧k jab in kar bōke kōn ejm̧aan in Pinmuur eo an Jisōs Kraist—kōnke ej m̧ool. An jouj, An lukkuun mour, ekōm̧m̧an bwe jekdo̧o̧n mej eo ekōmetak tata en pidodo ineeke im en wōr kōjatdikdik.
Kōmour ekar itok jān ļotak eo an leddik ro jilu nejin ripālele in. “Raar bōkļo̧k kōmour eo ippāerļo̧k,” Elder Kearon ej ba. “Er rej meram eo aiboojoj tata ilo mour ko am, menin aorōk ko am reļlap tata.”
Kōmour ekar itok jān naan ko an ritōl ro reim̧we an Kabun̄ in, ekoba juon kōnono ilo kweilo̧k eo eļap jān Elder Lance B. Wickman, eo me Elder Wickman ekar kwaļo̧k metak in dettan eo an eon̄ļo̧k ko an aujpitōļ eo ke ļaddik eo edik nejin make ej mejļo̧k jān juon nan̄inmej an ajri. “Elder Wickman ej katakin bwe ‘tōmak ej loe’ im bwe tōmak ej lōke ilo Irooj,” Elder Kearon ej ba. “Kōnono eo an ekar kanooj in ļap an aorōk n̄an n̄a kōnke kōn meļeļe eo an alikkar kōn kain en̄jake in. Menin ekar ļapļo̧k kōn oran iien ko ikar riiti im kar ron̄jake.”
Im kōmour ekar itok jān jerbal in karejar eo n̄an ro jet ilo jako eo aer—me rej rijojoļāār ilo Europe, kar kakkure ak jorrāān, ak ritōl eo an Kabun̄ in m̧ōtta āinwōt Elder Paul V. Johnson jān Būreejtōnji eo an Jiljilimuonn̄oul eo, eo ekar jako leddik eo nejin kōn kāānjōr ruo allōn̄ m̧okta jān an kobaļo̧k ippān Elder Kearon ilo Europe Eria Būreejtōnji eo ilo 2015 eo.
“E im Sister Kearon raar em̧m̧an ilo jipan̄ kōm ilo iien būrom̧ōj eo im kōmour eo,” Elder Johnson ej ba. “Raar lukkuun in jeļā kōn jekjek eo am. Ikar aolep iien iakwe er kōn men in.”
Ilo juon jekjek an rikaļoor. Kōmij indeek eddo ko an doon. Jej jan̄ ippān ro rej jan̄. Jej kaenōm̧m̧an ro rej aikuj kaenōm̧m̧an. Im kōmij jutak āinwōt rikam̧ool ro an Anij—im kallim̧ur eo indeeo an bar koba ko relem̧ōņōņō kar kapidodik kōn Pinmuur eo an Jisōs Kraist. (Lale Mosaia 18:8–9).)
Elder Kearon ej iak-iakwe membōr ro ilo Europe East Eria eo.
Innām, n̄e iien kajjieon̄ ko rej itok n̄an kōj, iakwe in kōmour eo im pein jerbal in karejar ko ren uwaak. Āinwōt juon Rijilōk an Irooj Jisōs Kraist, Elder Kearon ej pojak n̄an kwaļo̧k ippān aolepān laļ in ennaan in kōjatdikdik, kōmour, im aenōm̧m̧an eo an gospel eo.
“Etke mālijjon̄ ko reppen rej waļo̧k n̄an kōj?” Elder Kearon ej kajjitōk. “Kōnke jej itok n̄an laļ n̄an katak, n̄an eddōk, n̄an kōkwojarjar, im n̄an iakwe im lōke Jemedwōj Ilan̄ im ad Rilo̧mo̧o̧r. N̄an kiiō, jejjab maron̄ lo Er, im Er rejjab maron̄ jibwe kōj. Bōtaab kōjeraam̧m̧an ko an Pinmuur eo an Rilo̧mo̧o̧r eo ejjeļo̧k jem̧ļo̧kier—ejjeļo̧k jem̧ļo̧kier!”