“Kareel eo Ekajoor an Kōrā ro,” Liaona, Māe 2024.
Jān Nokon eo an Doulul eo an Kōrā ro Ipeļaakin Laļ in
Maaj 17, 2024
Kareel eo Ekajoor an Kōrā ro
Jab kōjoole kajoor ejej uwaan ilo kwe n̄an kareel ro jet n̄an em̧m̧an.
Ro jeiū im jatū rejitōn bōro jān Doulul eo an Kōrā ro, ij m̧ōņōņō bwe imaron̄ kōnono n̄an kom̧ rainin. Komij iien otemjej pād ilo kōļmenļo̧kjeņ eo aō. Ij lukkuun kam̧m̧ool kōn kom̧ im en̄jake aō mūri n̄an kom̧. Eļap ijoko rem̧m̧an Kabun̄ in em̧ōj an kōttōbraki—im eļap ijoko rem̧m̧an rej waļo̧k ilo laļ in—rej bōk jikier kōnke kom̧! Kom̧ em̧ool kōn wūjlepļo̧k ko ami n̄an Irooj barāinwōt kijejeto ko am n̄an kōmaron̄e ro jet. Ijeļā ewi jon̄an an Irooj iakwe kom̧ im pedped ioomi.
Ij bwilōn̄ kōn tōmak im karbab n̄an men ko an Jetōb. Ij im̧we jān tiljek, tōl eo em̧m̧an, im ami maron̄ lo juon aikuj im tōpare. Mekarta eļan̄n̄e ej jeje, jabwe ōōn̄, n̄ūrbōktak ko ilo ājmour in kōmālij, ak raan n̄an raan aikuj ko an ro jet, kom̧ij jum̧ae apan̄ ko kōn kobain kapāāl ko rejeja, tūriam̧o, loļo̧kjeņ, im iakwe. Aolep mijen eo an Kabun̄ eo an Irooj ej kōkajoorļo̧k jān kom̧.
Sister raņ, ewōr juon ami mennin letok kwojarjar me ej kōtļo̧k ami lukkuun ukōt mour ko! Menin elukkuun m̧ool ilo ad kōņaan bōk koņaad ilo aiintok Israel eo ekwojarjar. Jabdewōt iien jej jipan̄ jabdewōt loe iaļen bujen eo im pād wōt ie, jej jipan̄ aiintok Israel. Ejjeļo̧k juon em̧m̧anļo̧k an kōm̧m̧ane jān ami kōm̧m̧ane—āinwōt m̧am̧a ro, ritōl ro, rūkaki ro, sister ro, im m̧ōttā ro. Kom̧ij kōpooje epepen ko ilju im jekļaj an Kabun̄ eo an Irooj im laļ in.
Ej kab m̧ōj ad ekkatak kōn juon leddik jilu an iiō eo ekar rujtok jān an kiki. N̄an kakkureiki, ļaddik eo jein ekar bōktok juon menin mour kein ikkure ālkin bar juon. Ak ta eo āliktata ekar bōktok an kaenōm̧m̧an im lan̄lōn̄? Lukkuun kape in Bok in Mormon eo an. Leddik jidikdik eo ej alooje an jinen riit jān Bok in Mormon eo aolep raan. Ekar kōņaan bwe en erom̧ āinwōt jinen!
Ejjab baj pidodo n̄an bwine kareel in kōkōm̧anm̧anļo̧k mour in bujen an kōrā ro an Anij. Ij iakwe Em̧m̧aan ro rejitōn bōro, im kaorōke jeraam̧m̧an eo ej itok jān jerbal ippāer. Ijoke, ruo armej ro ioon laļ in ro rekar kareel eō eļaptata rej kōrā eo pāleeō Dantzel, jinen ajri ro 10 nejūm̧, eo ejidimkij an jako ke ej 78 an iiō, im, ium̧win 18 iiō ko, kōrā eo em̧m̧an pāleeō Wendy.
Ilo tōre eo kiiō ikar mour tak jān juon wōtlo̧k, Wendy ekar kea kōn n̄a jim̧or ilo kanniōk im jetōb. Ekar kōm̧m̧ane ilo wāween eo me ejjeļo̧k juon emaron̄ kar kōm̧m̧ane. Kareel eo ekajoor me Dantzel im Wendy ej pād ippāer n̄an n̄a ijjab maron̄ kwaļo̧k. Rekar ukōt mour eo aō. Rekar kōm̧m̧an bwe mour eo aō en likio.
Kōrā ro rekar pād ilo ioļapļap in karōk eo an Jemedwōj Ilan̄ jān jinoin. Karōk in lo̧mo̧o̧r eo an Anij ekar pedped ioon m̧akūtkūt ko rebun̄bun̄ an kōrā ro reperan—Iv, “jinen aolep ro remour,” im Meri, jinen ad Irooj Jisōs Kraist.
Sister raņ, jouj im jab kōjoole kajoor ejej uwaan ilo kwe n̄an kareel ro jet n̄an em̧m̧an. Ej juon menin letok eo Jemedwōj Ilan̄ ekar letok ioon aolep kōrā in bujen. Āinwōt juon leddik in bujen nejin Anij, ewōr am̧ maron̄ in bōk Jetōb eo im juon kam̧bōj erreo me ej lewaj jon̄ak n̄an bōk revelesōn eo am̧ make im jeļā m̧ool eo jān bōd ko. Ilo ba menin, ijjab kwaļo̧k n̄an kōjo̧o̧r em̧m̧aan ro jān kalikkar jim̧we jān bōd ak jān kōm̧m̧ane jerbal eo an jetōb n̄an bōk revelesōn. Ijoke, eļan̄n̄e laļ in enej maron̄ luuji mour erreo an kōrā ro, laļ in eban maron̄ jo̧o̧r jān wāween in.
Sister raņ, jej aikuji ainikiemi ilo katakin katak ko an Krasit. Jej aikuji maron̄ eo ami āinwōt kōrā eo n̄an bōbrae aujiiid im kwaļo̧k m̧ool eo. Jej aikuji maletlet eo eim̧we ilo baam̧le eo am̧, ward, im stake ko̧o̧njeļ ko, barāinwōt ilo jikin ko jet rej kareel aolepān laļ in. Baam̧le eo am, Kabun̄ eo, im laļ in ej aikuji kom̧! Sister ran, ejjeļo̧k juon emaron̄ kōm̧m̧ane men otemjej, barāinwōt kwoj aikuj kajjieon̄. Ijoke, ijeļā ewi jon̄an aorōk in ijo koņaam̧ ilo kalōk aelōn̄ in kiin̄ an Anij.
Kōn menin, rainin, ij karuwaineneik kom̧ n̄an kōm̧m̧an bwe jeje ko rekwojarjar en Liaona eo am̧ make, tampeļ eo ej jikin kone im wāween am̧ kōm̧m̧an, im jar ko am̧ make kwoj ekkatak ijo Irooj ej aikuj am̧ erom̧ raan ņe. Elōn̄ iiō, kwonaaj bwilōn̄ kōn wāween An naaj tōl eok n̄an jejjet in ia eo komaron̄ tōl, jineet, im etetal iturin juon armej eo ej aikuji eok.
Ilo wāween in, ij kōjeraam̧m̧an eok kōn eļapļo̧k kile jetōb eo im maron̄ eo n̄an loe lan̄lōn̄ ilo leļo̧k jipan̄ n̄an ro jet. Ij kōjeraam̧m̧an eok kōn maletlet n̄an kile ta eo ej menin aikuj im jab n̄an ettōr eļapļo̧k jān jon̄an am̧ maron̄. Ij kōjeraam̧m̧an eok kōn peran n̄an tōpar kōjeraam̧m̧an ko am rekwojarjar āinwōt leddik in bujen nejin Anij. Ij kōjeraam̧m̧an eok bwe Jemedwōj Ilan̄ im Nejin, Jisōs Kraist, rejeļā kajjeem̧ im iakwe eok. Rekar jilkintok eok n̄an laļ kiiō kōnke kwoj aorōk n̄an aelōn̄ in kiin̄ an Anij kiiō! Ij kōjeraam̧m̧an eok n̄an kile bwe menin letok kwojarjar ko am̧ āinwōt leddik eo nejin Anij lewaj kajoor jab wōt n̄an ukōt mour ko ak n̄an ukōt laļ in.
Ij iakwe kom̧, sister ro jitōn bōro. Men kein rem̧ool. Jej aolep ippān doon ilo jerbal in an Irooj. Ij kam̧ool bwe Jisōs Kraist ej mour. E ej jeban Kabun̄ in. Ilo etan Jisōs Kraist, amen.