Savali Faaleautaitai i le Eria
Afa, Au Paia ma Auaunaga
A o ma auauna atu ma lo‘u toalua o Naomi o ni Taitai o le Misiona a Fiti Suva, sa ma mata‘ituina vaaiga o le tau i matagi mai ia Novema e oo atu ia Aperila ina ia nofouta i soo se afā e ono aafia ai a ma faifeautalai o loo auauna atu i motu uma.
I le amataga o Aperila 2018, na oo atu ai le afā o Keni i le vaega 2 o taaviliga o matagi; i lona ala fuafuaina, o le a savalia ai pe a ma le selau kilomita i saute o le Motu o Kadavu. A o matou tulalata atu i le aso 11 o Aperila 2018, nai lo le tumau o le afā o Keni i lona alā matagi na faapea e ui mai ai, na liliu atu i matū ma faateteleina le malosi i le vaega 3, ma o matagi e agi mai i le 215 kilomita i le itulā, lea na taia ai le motu o Kadavu.
Sa auauna atu Elder Tupe ma Elder Christensen i lena motu, ma sa ou matuā popole lava mo lo la saogalemu faapea foi le faapotopotoga o le au paia iina. Faatasi ai ma le pe o le uila, sa le mafai ona maua se fesootaiga mo le tele o itula. Mulimuli ane, na mafai ai loa e alii faifeau ona valaau mai. O le mea muamua na ou faalogoina o le, “Peresitene, o loo manuia i ma‘ua,” ma oka se to’afilemu ma le olioli na faatumulia ai lo‘u loto, faatasi ai ma tatalo faamaualalo o le lotofaafetai.
Sa la‘ua faailoa mai ua faaleagaina lo la fale, ma sa la sulufa‘i i se tasi o nai fale simā laiti e i ai i le motu, o le fale lea o Uso Lal (o se fesoasoani i le au peresitene o le paranesi). Ua leiloloa le tele o a la meatotino ae sa la saili i le togavao ma toe maua mai ai ni nai ofu.
Faatasi ma lo la tulaga manuia i lo‘u mafaufau, na ou amataina ai fuafuaga e aveese mai faifeau mai le Motu. Ina ua ou valaau atu i le taeao na sosoo ai e tuu atu ia i laua nisi faamatalaga, sa fesili mai Elder Tupe ma Elder Christensen e aunoa ma se mafaufau mo o laua lava manaoga, “Peresitene, e mafai ona ma nonofo? E mana‘omia e tagata ma aiga o le motu la ma fesoasoani e toe fausia ai o latou fale.”
A o la faailoa mai lenei mana‘o, sa faatumulia lo‘u loto i le faamemelo mo nei auauna lotomaualalo a le Alii o e ua tuu ese o la lava manaoga ina ia ofoina atu le fesoasoani sili ona manaomia i isi.
I le isi lua vaiaso na sosoo ai sa la galulue ma lē le faavaivai e faamamā otaota mai fale ua faaleagaina ma lolovaia ma fesoasoani i le toe faaleleia o nisi o fale. Na faaa‘oa‘o mai e nei faifeautalai talavou le uiga o le mau: “. . . E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a‘u lea na outou faia i ai,” (Mataio 25:40).
Na toe foi atu Elder Tupe ma Elder Christensen i Suva ina ua mavae na vaiaso e lua e siitia i se isi eria seia oo ina toe fausia le nofoaga o le misiona i Kadavu. Ina ua la ulufale mai i le nofoaga o le misiona, sa ese o la foliga. Ioe, faatasi ma le leai o se masini ta lavalava po o se auli, auā sa faaleagaina uma e le afā, sa le‘i mamā o la ofu, ae sa susulu malamalama o la foliga a o la tōmanatu i le tele o o la aafiaga a o auauna atu tutusa i tagata o le ekalesia ma i latou foi e lē auai i le ekalesia.
O le la auaunaga na aumaia ai se lagona maoa‘e o le lotogatasi i tagata i Kadavu ma saunia ai le tele o loto e talia le savali o le Talalelei toefuataiina a Iesu Keriso. E moni lava, sa faataitaia e nei faifeautalai talavou le fuaiupu lenei o le mau: “Ma faauta, ua ou ta‘u atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso-a-tagata, ua na‘o lo outou auauna atu lava lea i lo outou Atua” (Mosaea 2:17).
O le a faavavau ona ou faafetai mo le faataitaiga a Elder Tupe ma Elder Christensen, a o la a‘oa‘o mai i se ala matagofie le uiga o le tausia moni o le poloaiga sili lona lua o le “E te alofa atu i le lua te tuaoi, ia pei o oe lava ia te oe,” (Mataio 22:39).