Leo o Sui Usufono
E To‘atolu Fafine Ausetalia e le‘i vaai atu i se tulaga faatapulaa o o latou tausaga mo le Fa’amalosia o o Latou Nu‘u
O Pam Mamouney, Jane Furey, ma Margaret Lenan Ellis, ua faaalia lo latou malolosi pea ina ua mavae ona malolo litaea, ua tuuto atu e faauō i tagata o soo se faatuatuaga ma tuufaatasia o latou nuu i Ausetalia.
I le avea ai ma tagata o Le Ekalesia a Iesu Keriso o le Au Paia o Aso e Gata Ai, latou te taumafai e ola i poloaiga sili e lua o le alofa i le Atua ma tuaoi, ma faaali atu le ala e aumaia ai e le ola ai i le olaga atoa i lenei tautinoga le malamalama ma le olioli ia i latou lava, ma le lalolagi o siomia ai i latou.
O Pam, o lē e atoa i le tausaga lenei le 89 o ona tausaga, ua silia ma le 30 tausaga talu ona avea ma sui o le Aufono o Ekalesia Soofaatasi i Dandenong. I le avea ai ma se sui na faavaeina ma se peresitene o le Fesootaiga o Ekalesia Soofaatasi i Casey Vitoria, na ia faavaeina le faatulagaina o “maimoaga i nofoaga o tapuaiga” mo aoga, sui faaupufai, ma tagata lautele ina ia aogā i le atiina ae o le malamalamaga soofaatasi o ekalesia.
Ina ua tetee tagata i le fausiaina o se maota tapua‘i i le lotoifale, sa faaalia e Pam lana lagolago i se polokalama televise a le SBS. “E toʻatele aʻu uō Mosalemi,” o le tala lea a Pam. “Ou te fiafia e auai i taumafataga o le afiafi, aemaise lava i fale o o latou aiga.”
O le alofagia o ia i lana taitaiga musuia i le faalauiloaina o le malamalama i le va o tapuaiga ma aganuu, na tuuina atu ai ia Pam se faailoga taualoa e ta‘ua o le Order of Australia mo lona nuu, aufono, ma le faaaofiaina ai o ia i tulaga faalelotu.
Fai mai a ia, “O lo‘u sao silisili i Le Ekalesia a Iesu Keriso o le fesoasoani lea i la‘u fanau uma e toalima e auauna atu i ni misiona a o avea a‘u ma se tina nofofua.”
O le auaunaga fa‘alaua‘itele a Pam e sili ona fiafia i ai o lana tautua lea i le Iunivesite e ta‘ua o le University of the Third Age, lea e faia‘oga ai i vaiaso ta‘itasi i le vasega o Mataupu Faalotoifale. Na te fa‘amaopoopoina fo‘i se vaega e taaalo i le ta‘aloga pelē e ta‘ua o le card game 500 i vaiaso ta‘itasi ma sa i ai i le komiti o gaoioiga i lona nu‘u o tagata malolō litaea, e fesoasoani i le fa‘atulagaina o pesepesega i aoauli ma sa‘iliga tupe.
Ua alu nei le fa tausaga o auauna Jane Furey mai lona fale o se Faifeautalai o Fesootaiga a le Ekalesia. “E lei umi ae avea ma vaega sili o lo‘u olaga,” o lana tala lea.
E i ai se meaalofa a Jane mo le fesoʻotaʻi ai ma tagata i le lalolagi atoa. Na te manatua lona fiafia i talafou a o iva tausaga lona matua. Mulimuli ane, a o malaga o ia i Asia ma ona matua ma talanoa i ituaiga uma o tamaitai i luga o ala femalagaa‘i faitele, sa ia faalogoina o fesili lona tamā i lona tinā, “E faapefea ona ia iloaina le tamaitai le la? . . . O ai o loo talanoa atu nei i ai?”
Na tusi foi Jane i le Tupu Tamaitai o Elisapeta II, ma faamalō atu ia te ia i le fanau mai o Perenise Edward, ma sa ia maua ai se tali i se tusi.
O le olaga o Jane ua tuuto atu i isi, mai le auina atu o meaai mo tagata matutua ma i latou e i ai manaoga faapitoa e ta‘ua o “Meals on Wheels” i le tausiaina o tamaiti aoga e 64 o se “Tina Nofofale.”
Na suia lona olaga e faavavau ina ua ala mai o ia i le Falemai o Prince Charles i Brisbane ma ni alatoto fatu se lua. I le avea ai ma tagata ma‘i, na ofo i le ola ma mafai ona auauna atu, sa fealua‘i solo o ia i le falema‘i ma asiasi atu i isi gasegase.
Fai mai Jane, “Ou te lagonaina se agaga faafetai loloto ma le tumau, ma‘eu lenei meaalofa o aso ma tausaga faaopoopo. Ua ou mauaina ni malamalamaaga taua i le tiga ma le onosai ma ua ou agaalofa i auala ou te le mautinoa pe mafai ona ou mauaina mai se isi lava aafiaga.”
E ui o tausaga ua mavae na aofia ai le avea ma tina nofofua i se fanau laiti e toalua, sa auauna atu Jane i lana faalapotopotoga o tamaitai lotu i le lotoifale ma fesoasoani i le faatulagaina o konafesi ma le 1500 tagata auai. I le asō, e na te siakiina ana uo na faia ni taotoga, fai supo moa mo i latou e maua i le fulū, ma aapa atu e le aunoa i ana uo i le lalolagi atoa. E ui ina masani ona lagona lē lavā, ae na ia faapea mai, “O se vaega masani lea o aso uma. Ua ou malamalama i le manatu atonu o la’u misiona lenei i le olaga; ua tele taimi ua faʻamalamalamaina mai ai lenei mea.”
O Margaret Lenan Ellis sa volenitia mo lana ekalesia e avea o se tagata tomai faapitoa i mataupu tau le va i fafo, ina ua tofia o ia e saili ma auai i lana faalapotopotoga faalotoifale o ekalesia soofaatasi. I le leai o se faalapotopotoga faapena i Ballarat, Vitoria, na ia faavaeina ai le Fesootaiga o Ekalesia Soofaatasi e ta‘ua o le Ballarat Interfaith Network (BIN). O lona faamoemoega o le faaalia lea o lo tatou sootaga o se vaega o le aiga o tagata, faalauteleina le malamalama ma fausia ni alalaupapa i le va o faatuatuaga, filosofia, ma vaaiga faaleagaga. I le 20 tausaga ua tuanaʻi, o gaoioiga faatino a le BIN na fausia ai faauōga, faaaloalo, filemu, alofa, ma le auauna atu i le Atua ma isi.
Sa fesoasoani Margaret i le amataina o “Savaliga Faauo” i le va o faletapuai, sunako, ma lotu Kerisiano eseese i le aai. O fono fa‘atasi ai ma sui o fa‘alapotopotoga mai fa’atuatuaga ‘ese‘ese na talanoaina atugaluga fa‘aleagaga ma faalenu‘u.
Na saunia e le BIN papakiu pe a tatala ni maota tapua‘i fou ma sa lagolagoina le fausiaina o malumalu Buddhist ma Hindu (faʻatasi ai ma se faʻamaoniga tutusa mo le faapotopotoga Sikh).
I lalo o le taitaiga a Margaret, e saunia ai e Le Ekalesia a Iesu Keriso i tausaga taʻitasi se tuufaatasiga faamanatu o pese i falesa i le lotoifale, e faʻaali ai aufaipese faʻalelotu ma aufaipese foi mai i isi faalapotopotoga. “E tumu le falesa i taimi uma, ma e tupu mai ai le lagona o le olioli ma le agalelei e matua iloga lava i le taualuga a aufaipese tuufaatasi.”
O nei tamaitai e toatolu o loo faatinoina upu o le saunoaga a Peresitene Howard W. Hunter, o le na saunoa mai, “O la tatou matafaioi o le saili e faatelē le li’o o le alofa ma le malamalama i tagata uma o le lalolagi.”