មេរៀនទី ១២
ព្រះគម្ពីរបន្ថែមទៀតនៅក្នុងសម័យយើងនេះ
សេចក្ដីផ្ដើម
ព្រះអម្ចាស់បន្តប្រទានការណែនាំដ៏ទេវភាពដល់យើងតាមរយៈការបើកសម្តែងព្រះបន្ទូល និង ព្រះឆន្ទៈរបស់ទ្រង់ដល់អ្នកបម្រើទ្រង់តាមរយៈព្រះវិញ្ញាណបរិសុទ្ធ ។ ដោយសារព្រះបន្តមានព្រះបន្ទូលដល់ព្យាការីសម័យទំនើប នោះការប្រមូលផ្តុំនៃបទគម្ពីរនៅតែបន្តមានបន្ថែមទៀត ។ ព្រះគម្ពីរបន្ថែមទៀតបាននាំចេញមកនៅក្នុងជំនាន់របស់យើងនេះ—ដូចជាការបកប្រែរបស់ យ៉ូសែប ស្ម៊ីធ ពីព្រះគម្ពីរបរិសុទ្ធ និង គម្ពីរអ័ប្រាហាំ—ដែលបញ្ជាក់ បំភ្លឺ និង ពង្រីកនូវការយល់ដឹងរបស់យើងអំពីដំណឹងល្អ ។
ការអានពីសាវតា
-
ជែហ្រ្វី អ័រ ហូឡែន « My Words … Never Cease » Ensign ឬ Liahona, ខែ ឧសភា ឆ្នាំ ២០០៨ ទំព័រ ៩១–៩៤ ។
-
« Translation and Historicity of the Book of Abraham » ប្រធានបទដំណឹងល្អ lds.org/topics ។
-
អេលីស្សាប៊ែត ម៉ាគី « Joseph Smith’s Bible Translation: D&C 45, 76, 77, 86, 91 » វិវរណៈនៅ ក្នុងបរិបទដែលមានជាបន្តបន្ទាប់ ថ្ងៃទី ២០ ខែ មិនា ឆ្នាំ ២០១៣ history.lds.org ។
យោបល់សម្រាប់ការបង្រៀន
ព្រះគម្ពីរនានានៅថ្ងៃចុងក្រោយ
សូមឲ្យសិស្សស្រមៃថា មានមិត្តម្នាក់បានសួរដោយស្មោះថា « ហេតុអ្វីបានជាពួកមរមនមានទាំងព្រះគម្ពីរបរិសុទ្ធ ហើយថែមទាំងមានព្រះគម្ពីរផ្សេងៗទៀតដូច្នេះ ? ខ្ញុំបានគិតថាព្រះគម្ពីរបរិសុទ្ធ មានព្រះបន្ទូលរបស់ព្រះពេញលេញនៅក្នុងនោះហើយ » ។ សូមឲ្យសិស្សលើកដៃឡើង បើសិនពួកគេត្រូវបានគេសួរសំណួរមួយដូចនេះ ។ សូមឲ្យសិស្សពីរបីនាក់ចែកចាយ របៀបដែលពួកគេឆ្លើយសំណួរនេះ និង របៀបដែលពួកគេទទួលអារម្មណ៍នៅពេលពួកគេថ្លែងទីបន្ទាល់អំពីព្រះគម្ពីរដល់អ្នកដទៃទៀតនោះ ។
សូមសរសេរពាក្យ ការប្រមូលផ្តុំ នៅលើក្ដារខៀន ។ សូមបង្ហាញសេចក្ដីថ្លែងការណ៍ខាងក្រោមដោយ អែលឌើរ ជែហ្វ្រី អ័រ ហូឡិន និង ដាល្លិន អេក អូក នៃកូរ៉ុមនៃពួកសាវកដប់ពីរនាក់ ហើយសូមឲ្យសិស្សពីរនាក់ឆ្លាស់វេនគ្នាអានវាឮៗ ៖ សូមឲ្យសិស្សក្នុងថ្នាក់ស្ដាប់ពីអត្ថន័យនៃពាក្យ ការប្រមូលផ្តុំ នៅ ក្នុងបរិបទនៃសេចក្តីថ្លែងការណ៍ទាំងនេះ ។
« ពួកគ្រីស្ទានមួយចំនួន ដោយសារតែសេចក្តីស្រឡាញ់ដ៏ស្មោះដែលខ្លួនមានចំពោះព្រះគម្ពីរបរិសុទ្ធ នោះបានប្រកាសថា គ្មានព្រះគម្ពីរណាទៀតដែលអនុញ្ញាត្តឲ្យមានទៀតក្រៅពីព្រះគម្ពីរបរិសុទ្ធឡើយ ។ ហេតុនោះហើយការប្រកាសពីការប្រមូលផ្តុំនៃវិវរណៈត្រូវបានបិទ មិត្តភក្ដិមួយចំនួននៅក្នុងសេចក្តីជំនឿផ្សេងបានបិទទ្វារលើការបង្ហាញដ៏ទេវភាពដែលយើងមាននៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៖ គឺព្រះគម្ពីរមរមន គោលលទ្ធិ និង សេចក្ដីសញ្ញា មុក្តាដ៏មានតម្លៃមហិមា និង ការណែនាំបន្តបន្ទាប់ទៀតតាមរយៈព្យាការី និង សាវករបស់ព្រះដែលបានរើសតាំងឡើង » ( ជែហ្វ្រី អ័រ ហូឡិន « My Words … Never Cease » Ensign ឬ Liahona, ខែ ឧសភា ឆ្នាំ ២០០៨ ទំព័រ ៩១ ) ។
« ពួកគ្រីស្ទានភាគច្រើនជឿថា មិនយូរប៉ុន្មានបន្ទាប់ពីការសុគតរបស់ព្រះគ្រីស្ទ នោះព្រះបានបិទការប្រមូលផ្តុំនៃព្រះគម្ពីរ—គឺការប្រមូលផ្តុំដែលមានសិទ្ធិអំណាចនៃសៀវភៅពិសិដ្ឋៗដែលប្រើជាព្រះគម្ពីរ—ហើយគ្មានវិវរណៈដូចគ្នានេះត្រូវបានប្រទានឲ្យចាប់តាំងពីពេលនោះមក ។ យ៉ូសែប ស៊្មីធ បានបង្រៀន និង បង្ហាញថាការប្រមូលផ្តុំនៃព្រះគម្ពីរត្រូវបានបើកបង្ហាញ [ សូមមើល ការបង្រៀនរបស់ប្រធានសាសនាចក្រ ៖យ៉ូសែប ស៊្មីធ ( ឆ្នាំ ២០០៧ ) ទំព័រ ១៩៥] ។ …
« …យ៉ូសែប ស៊្មីធបានបង្រៀនថាព្រះនឹងដឹកនាំកូនចៅរបស់ទ្រង់តាមរយៈការប្រទាននូវការប្រមូលផ្តុំនូវព្រះគម្ពីរបន្ថែមថ្មីបន្ថែមទៀត ។ ព្រះគម្ពីរមរមនគឺជាការបន្ថែមមួយនៃការប្រមូលផ្តុំនោះ ។ ក៏ដូចជាវិវរណៈនៅក្នុងគោលលទ្ធិ និងសេចក្ដីសញ្ញា និងមុក្តាដ៏មានតម្លៃមហិមាផងដែរ » ( ដាល្លិន អេក អូក « Fundamental to Our Faith » Ensign, ខែ មករា ឆ្នាំ ២០១១ ទំព័រ ២៩ ) ។
-
តើឃ្លាថា « ការប្រមូលផ្តុំនៃព្រះគម្ពីរ » មានន័យយ៉ាងដូចម្តេច ? ( វាគឺជា « ការប្រមូលផ្តុំនៃសៀវភៅពិសិដ្ឋៗដែលបានទទួលស្គាល់ហើយមានសិទ្ធិអំណាច ។ នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ការប្រមូលផ្តុំនៃព្រះគម្ពីរគឺត្រូវបានហៅថាបទដ្ឋានព្រះគម្ពីរ » [ សេចក្តីណែនាំដល់បទគម្ពីរទាំងឡាយ ] “Canon,” scriptures.lds.org] ) ។
-
តើវាមានន័យយ៉ាងណា ដែលថាពួកបរិសុទ្ធថ្ងៃចុងក្រោយជឿលើការបើកសម្តែងនៃការប្រមូលផ្តុំនេះ ? ( ទោះបីជាពួកគេអាចប្រើពាក្យផ្សេងៗគ្នាក្តី សូមប្រាកដថាសិស្សយល់ពីសេចក្តីពិតដូចខាងក្រោមនេះ ៖ ព្រះបន្ទូលរបស់ព្រះដែលមានសិទ្ធិអំណាចគឺមិនគ្រាន់តែមាននៅក្នុងព្រះគម្ពីរបរិសុទ្ធតែឯងនោះឡើយ [ សូមមើល មាត្រានៃសេចក្តីជំនឿ ១:៩] ) ។
-
តើមានការផ្លាស់ប្តូរអ្វីខ្លះ ដើម្បីជឿថាព្រះអម្ចាស់នៅតែបើកសម្តែងព្រះគម្ពីរដល់ព្យាការីថ្ងៃចុងក្រោយនេះ ?
គោលលទ្ធិ និង សេចក្តីសញ្ញា ៤២:៥៦; ៤៥:៦០–៦២; ៧៦:១៥–១៩; ៩៣:៥៣; ៩៤:១០
ការបកប្រែព្រះគម្ពីរបរិសុទ្ធរបស់យ៉ូសែប ស៊្មីធ
សូមសរសេរសេចក្តីពិតនេះនៅលើ ក្ដារខៀន ៖
តាមរយៈព្យាការី យ៉ូសែប ស៊្មីធ ព្រះអម្ចាស់បានបើកសម្តែងព្រះគម្ពីរបន្ថែមទៀតដែលបញ្ជាក់ បំភ្លឺ និង ពង្រីកចំណេះដឹងរបស់យើងអំពីសេចក្តីពិត ។
សូមឲ្យសិស្សម្នាក់អាន ក្បាលកណ្ឌនៃគោលលទ្ធិ និង សេចក្ដីសញ្ញា ៣៥ឲ្យឮៗ ។ សូមឲ្យសិស្សផ្ទៀងតាម ហើយរកមើលនូវអ្វីដែលព្យាការី យ៉ូសែប ស៊្មីធ និង ស៊ីដនី រិកដុន កំពុងធ្វើនៅពេលពួកគេទទួលបានវិវរណៈនេះដែលមាននៅក្នុងកណ្ឌនេះ ។
-
តើយ៉ូសែប ស្ម៊ីធនិង ស៊ីដនី បានធ្វើកិច្ចការអ្វីខ្លះនៅពេលពួកលោកទទួលវិវរណៈនេះ ?
ដើម្បីជួយពន្យល់អំពី ការបកប្រែព្រះគម្ពីរបរិសុទ្ធរបស់យ៉ូសែប ស៊្មីធ ថាជាអ្វីនោះ សូមឲ្យសិស្សម្នាក់អានកថាខណ្ឌពីរខាងក្រោមនេះឲ្យឮៗ ៖
នៅអំឡុងពេលនៃរដូវក្តៅ ឆ្នាំ ១៨៣០ ព្រះអម្ចាស់បានបញ្ជាយ៉ូសែប ស៊្មីធ ឲ្យបកប្រែព្រះគម្ពីរបរិសុទ្ធ ។ យ៉ូសែប ស៊្មីធពុំបានបកប្រែព្រះគម្ពីរបរិសុទ្ធចេញពីភាសាមួយទៅភាសាមួយទៀតនោះទេ ហើយលោកក៏ពុំមានឯកសារសរសេរដោយដៃនៃព្រះគម្ពីរបរិសុទ្ធដើមមកធ្វើការបកប្រែដែរ ។ ផ្ទុយទៅវិញ យ៉ូសែបបានអាន ហើយសិក្សាវគ្គបទគម្ពីរចេញមកពីកំណែថ្មីនៃព្រះគម្ពីរបរិសុទ្ធរបស់ស្តេចជេមស៍ ហើយបានធ្វើកំណែ និង បន្ថែមទៅតាមការបំផុសគំនិតពីព្រះវិញ្ញាណបរិសុទ្ធ ។ ដូច្នេះ ការបកប្រែកំណែថ្មីនោះគឺកាន់តែមានការបំផុសគំនិតខ្លាំងជាងការបកប្រែមុន ។
យ៉ូសែប ស៊្មីធ បានបកប្រែចំនួន ៣០០០ ខគម្ពីរ នៅក្នុងកំណែថ្មីនៃព្រះគម្ពីរបរិសុទ្ធរបស់ស្តេចជេមស៍ ។ ភាពខុសគ្នាទាំងនេះ មានរួមទាំង ការបន្ថែមនានា ( ដើម្បីបញ្ជាក់ពីអត្ថន័យ ឬ បរិបទ ឬ ស្តារនូវការសរសេររបស់ព្យាការី ដូចជាគម្ពីរម៉ូសេ ) ការលុបចោល ការរៀបចំខគម្ពីរឡើងវិញ និងការរៀបចំរចនាសម្ព័ន្ធនៃជំពូកជាក់លាក់ឲ្យបានពេញលេញ ។ សម្រាប់ព័ត៌មានបន្ថែមអំពីការបកប្រែរបស់យ៉ូសែប ស្ម៊ីធ សូមមើល Bible Dictionary ឬ សេចក្តីណែនាំដល់បទគម្ពីរទាំងឡាយ « ការបកប្រែរបស់យ៉ូសែប ស្ម៊ីធ ( ក.យ.ស ) » ។
សូមចម្លងតារាងខាងក្រោមដាក់លើ ក្ដារខៀន ៖
|
គោលលទ្ធិ និង សេចក្ដីសញ្ញា ៤៥:៦០-៦២ គោលលទ្ធិ និង សេចក្តីសញ្ញា ៤២:៥៦លេខយោង ក |
ក្បាលកណ្ឌសម្រាប់ គោលលទ្ធិ និង សេចក្តីសញ្ញា ៣៥; ៧៦; ៧៧; ៨៦; ៩១ |
សូមបែងចែកសិស្សក្នុងថ្នាក់ជាពីរក្រុម ។ សូមឲ្យក្រុមនិមួយៗឲ្យសិក្សាឯកសារដែលមាននៅក្នុងជួរឈរមួយ ដោយរកមើលព័ត៌មានអំពីការបកប្រែព្រះគម្ពីរបរិសុទ្ធរបស់យ៉ូសែប ស៊្មីធ ។ បន្ទាប់ពីទុកពេលគ្រប់គ្រាន់ហើយនោះ សូមឲ្យសិស្សចែកចាយពីអ្វីដែលពួកគេបានរៀន ។ បន្ទាប់មក សួរសំណួរដូចខាងក្រោមនេះ ៖
-
តើអ្នកគិតថា កិច្ចការបកប្រែនេះមានឥទ្ធិពលយ៉ាងណាខ្លះទៅលើការអប់រំខាងវិញ្ញាណរបស់យ៉ូសែប ស្ម៊ីធ និង ទៅលើការស្ដារសេចក្តីពិតនៃដំណឹងល្អឡើងវិញ ?
ដើម្បីជួយសិស្សឲ្យមានអំណរគុណចំពោះលទ្ធផលនៃកិច្ចការបកប្រែរបស់យ៉ូសែប ស្ម៊ីធលើការបកប្រែនៃព្រះគម្ពីរបរិសុទ្ធ ដែលមានលើសាសនាចក្រនោះ សូមឲ្យសិស្សបើកទៅ « លំដាប់មាតិកាដែលរៀងតាមកាល » ( ដែលស្ថិតនៅទំព័រចាប់ផ្តើមនៃគោលលទ្ធិ និងសេចក្ដីសញ្ញា ) ហើយពន្យល់ថា ព្យាការីយ៉ូសែប ស្ម៊ីធបានបកប្រែភាគច្រើនគឺនៅចន្លោះខែ មិថុនា ឆ្នាំ ១៨៣០ និង ខែ កក្កដា ឆ្នាំ ១៨៣៣ ។ បន្ទាប់មកសូមសួរ ៖
-
តើមានកណ្ឌចំនួនប៉ុន្មាននៃគោលលទ្ធិ និង សេចក្តីសញ្ញា ត្រូវបានទទួលនៅចន្លោះខែ មិថុនា ឆ្នាំ ១៨៣០ និង ខែ កក្កដា ឆ្នាំ ១៨៣៣ ? ( ព្យាការីបានទទួលវិវរណៈចំនួន ៧៤ ដែលបានក្លាយជាផ្នែកនៃគោលលទ្ធិ និង សេចក្ដីសញ្ញា នៅក្នុងអំឡុងពេលនោះ ) ។
អ្នកអាចចង្អុលបង្ហាញថា ទាំងគម្ពីរម៉ូសេ និងយ៉ូសែប ស្ម៊ីធ--ម៉ាថាយ ដែលមាននៅក្នុងគម្ពីរមុក្តាដ៏មានតម្លៃមហិមា ក៏ជាផ្នែកនៃការបកប្រែព្រះគម្ពីរបរិសុទ្ធរបស់យ៉ូសែប ស៊្មីធ ហើយត្រូវបានទទួលវានៅអំឡុងពេលនោះផងដែរ ។ គម្ពីរម៉ូសេ គឺជាការបកប្រែរបស់យ៉ូសែប ស្ម៊ីធ សម្រាប់ជំពូកទាំងប្រាំបីដំបូងនៃគម្ពីរលោកុប្បត្តិ ។ យ៉ូសែប ស៊្មីធ បានដឹងអំពីការបាត់បង់ជាច្រើននៅក្នុងព្រះគម្ពីរបរិសុទ្ធ នៅពេលលោកបានបកប្រែខគម្ពីរទាំងឡាយដែលនិយាយអំពីហេណុក ។ ព្រះគម្ពីរបរិសុទ្ធរបស់ស្តេចជេមស៍មានតែ ១០៩ ពាក្យប៉ុណ្ណោះ ដែលនិយាយអំពីហេណុក ហើយគម្ពីរម៉ូសេ មានដល់ទៅ ៥២៤០ ពាក្យ ដែលនិយាយអំពីហេណុក ។
-
តើអំឡុងពេលនោះវិវរណៈដែលបានទទួលនេះអាចមានច្រើនប៉ុណ្ណា ដែលប្រាប់អំពីតួនាទីនៃការបកប្រែរបស់យ៉ូសែប ស៊្មីធ នៅក្នុងការស្តារឡើងវិញនោះ ?
-
នៅពេលអ្នកមើលកណ្ឌនានានៃគោលលទ្ធិ និង សេចក្ដីសញ្ញា ដែលបានទទួលអំឡុងពេលនោះ តើមានគោលលទ្ធិសំខាន់ៗណាខ្លះដែលត្រូវបានបើកសម្តែងអំឡុងពេលនោះ ? ( សូមពន្យល់ពីគោលលទ្ធិសំខាន់ៗដែលបានបើកសម្តែងអំឡុងពេលនោះដែលអាចរកឃើញនៅក្នុង កណ្ឌ ២៩, ៤២, ៤៥, ៧៦, ៨៨, និង ៩៣) ។
សូមបង្ហាញនូវសេចក្ដីថ្លែងការណ៍ខាងក្រោមហើយសូមឲ្យសិស្សម្នាក់អានវាឮៗ ៖
« ការបកប្រែព្រះគម្ពីរប៊ីបរបស់យ៉ូសែប ស៊្មីធ គឺជាផ្នែកមួយសំខាន់នៃការអប់រំខាងវិញ្ញាណរបស់លោកផ្ទាល់ និង ការបើកបង្ហាញការស្តារសេចក្តីពិតនៃដំណឹងល្អឡើងវិញ ។ នៅពេលលោកបានកែសម្រួលព្រះគម្ពីរសញ្ញាចាស់ និង សញ្ញាថ្មី នោះជាញឹកញាប់លោកបានទទួលវិវរណៈច្បាស់លាស់ ឬ ពង្រីកការយល់ដឹងពីវគ្គខគម្ពីរនៃព្រះគម្ពីរប៊ីប ។ តាមរបៀបនេះ ព្យាការីបានទទួលគោលលទ្ធិជាច្រើនមកពីព្រះអម្ចាស់ រួមមានទាំងវិវរណៈដែលឥឡូវនេះមាននៅក្នុង គោលលទ្ធិ និង សេចក្ដីសញ្ញា ៧៤, ៧៦, ៧៧, ៨៦, និង ៩១និងនៅក្នុងផ្នែកជាច្រើននៃកណ្ឌនានានៃគោលលទ្ធិ និងសេចក្ដីសញ្ញា » (ការបង្រៀន ៖យ៉ូសែប ស៊្មីធ,ទំព័រ ២០៨) ។
សូមថ្លែងទីបន្ទាល់ថា ព្រះអម្ចាស់បានបើកសម្តែងផ្នែកដ៏សំខាន់មួយនៃគោលលទ្ធិ និង សេចក្ដីសញ្ញា ដែលជាលទ្ធផលផ្ទាល់នៃកិច្ចការបកប្រែព្រះគម្ពីរបរិសុទ្ធរបស់យ៉ូសែប ស្ម៊ីធ ។ អ្នកក៏អាចពន្យល់ផងដែរថា ផ្នែកនានានៃការបកប្រែរបស់យ៉ូសែប ស្ម៊ីធ ត្រូវបានបន្ថែមលើការបោះពុម្ពរបស់ពួកបរិសុទ្ធថ្ងៃចុងក្រោយឆ្នាំ ១៩៧៩ នៃកំណែថ្មីនៃព្រះគម្ពីរបរិសុទ្ធរបស់ស្តេចជេមស៍ បានធ្វើឲ្យវិវរណៈសំខាន់ៗទាំងនេះមានកាន់តែច្រើនដើម្បីប្រទានពរដល់សមាជិកសាសនាចក្រ ។
គម្ពីរអ័ប្រាហាំ
សូមឲ្យសិស្សមើលក្បាលជំពូកនៃគម្ពីរ អ័ប្រាហាំ ។ សូមពិភាក្សាយ៉ាងខ្លីពីមាតិកានៃគម្ពីរ អ័ប្រាហាំ ជាមួយសិស្សក្នុងថ្នាក់ ។ បន្ទាប់មកសូមពន្យល់ថា នៅក្នុងរដូវក្តៅឆ្នាំ ១៨៣៥ បុរសម្នាក់ឈ្មោះ ម៉ៃឃែល ចានលើរបាននាំយកសាកសពអេស៊ីពចំនួនបួន និង រមូរក្រដាសផ្ទាំងចារិកជាច្រើនដែលមានអក្សរអេហ្ស៊ីបបុរាណយកទៅទីក្រុង ខឺតឡង់ រដ្ឋអូហៃអូ ។ សមាជិកនៃសាសនាចក្របានទិញសាកសព និង រមូរក្រដាសផ្ទាំងចារិកទាំងនោះ ។ ទោះយ៉ាងណាវិធីសាស្ត្រដ៏ពិតប្រាកដនៃការបកប្រែគឺមិនបានស្គាល់ទេ នោះព្យាការី យ៉ូសែប ស្ម៊ីធ បានបកប្រែការសរសរមួយចំនួននៅប៉ុន្មានខែបន្ទាប់ពីបានទទួលផ្ទាំងចារិកអេហ្ស៊ីបទាំងនោះ ។ នៅដើមខែ មិនា ឆ្នាំ ១៨៤២ ផ្នែកនានានៃគម្ពីរ អ័ប្រាហាំ ត្រូវបានបោះពុម្ពនៅក្នុងព័ត៌មានសាសនាចក្រដែលបានហៅថា ពេលវេលា និង រដូវកាល ។ ក្រោយមកគម្ពីរ អ័ប្រាហាំ ត្រូវបានបោះពុម្ពនៅក្នុងមុក្ដាដ៏មានតម្លៃមហិមា ។
សូមចែកចាយការសង្ខេបខាងក្រោមនេះអំពីការនាំចេញមកនៃគម្ពីរ អ័ប្រាហាំ ។ សូមឲ្យសិស្សស្តាប់ពីអ្វី ដែលយើងបានដឹងពីដំណើរការបកប្រែនោះ ។
ការជំទាស់ភាគច្រើនចំពោះភាពពិតនៃគម្ពីរអ័ប្រាហាំគឺថាការសរសេរដោយដៃ ( ផ្ទាំងចារិក ) មិនត្រូវបានប្រាប់គ្រប់គ្រាន់ថាត្រូវបានសរសេរដោយអ័ប្រាហាំ ដែលបានរស់នៅជិត ២០០០ ឆ្នាំពីមុនព្រះយេស៊ូគ្រីស្ទឡើយ ។ យ៉ូសែប ស៊្មីធ មិនធ្លាប់ប្រកាសថា ផ្ទាំងចារិកនោះត្រូវបានសរសេរដោយអ័ប្រាហាំ ឬ វាចេញមកពីជំនាន់របស់អ័ប្រាហាំឡើយ ។ « ជាញឹកញាប់ កំណត់ត្រាបុរាណត្រូវបានប្តូរទៅជាច្បាប់ចម្លង ឬ ជាច្បាប់ចម្លងនៃច្បាប់ចម្លង ។ បញ្ជីនៃអ័ប្រាហាំ អាចត្រូវបានកែប្រែ…ដោយអ្នកនិពន្ធក្រោយគឺដូចទៅនឹងព្យាការីប្រវត្តិសាស្ត្រនៃព្រះគម្ពីរមរមនដែរ ដូចជាមរមន និងមរ៉ូណៃបានធ្វើកំណែនៃការសរសេរពីអ្នកនិពន្ទមុនៗ » (“Translation and Historicity of the Book of Abraham,” Gospel Topics, lds.org/topics) ។
ខណៈកំពុងបកប្រែ ព្យាការី យ៉ូសែប ស៊្មីធ បានបកប្រែជាមួយនឹងផ្នែកនានានៃផ្ទាំងចារិក ដែលក្រោយមកត្រូវបានបំផ្លាញចោល ។ ដូច្នេះ « វាហាក់បីដូចជាការណ៍ឥតប្រយោជន៍មួយ ដែលទៅប៉ាន់ប្រមាណអំពីសមត្ថភាពរបស់យ៉ូសែប ក្នុងការបកប្រែផ្ទាំងចារិកទាំងនោះ ដែលក្នុងពេលនេះយើងមានតែផ្នែកមួយនៃផ្ទាំងចារិកនោះដែលលោកបានមានជារបស់ខ្លួន » (« Translation and Historicity of the Book of Abraham ») ។ វាក៏អាចកើតឡើងផងដែរថា ការពិនិត្យមើលយ៉ាងយកចិត្តទុកដាក់របស់ យ៉ូសែប ស្ម៊ីធ លើការសរសរទាំងនោះ បាននាំឲ្យគាត់ទទួល « វិវរណៈអំពីព្រឹត្តិការណ៍សំខាន់ៗ និង ការបង្រៀននៅក្នុងជីវិតអ័ប្រាហាំ ច្រើនដូចវិវរណៈមួយដែលគាត់បានទទួលកាលពីមុនអំពីជីវិតរបស់ ម៉ូសេ ខណៈកំពុងសិក្សាព្រះគម្ពីរបរិសុទ្ធ » (« Translation and Historicity of the Book of Abraham ») ។ ទោះជាយើងមិនដឹងពិតប្រាកដអំពីរបៀបដែល យ៉ូសែប ស៊្មីធ បានបកប្រែគម្ពីរអ័ប្រាហាំ ក៏យើងដឹងថាការបកប្រែនោះគឺត្រូវបានធ្វើឡើង ដោយអំណោយទាន និងព្រះចេស្ដានៃព្រះ ។
-
តើមានឧទាហរណ៍ណាខ្លះ អំពីរបៀបដែលព្រះគម្ពីរបន្ថែមទៀតដែលមានតាមរយៈព្យាការីយ៉ូសែប ស្ម៊ីធ រួមចំណែកក្នុងការយល់ដឹងរបស់យើងអំពីផែនការរបស់ព្រះសម្រាប់កូនចៅរបស់ទ្រង់នោះ ?
អ្នកអាចនឹងចង់ថ្លែងទីបន្ទាល់ថា នៅពេលសិស្សសិក្សាគោលលទ្ធិសំខាន់នៃគម្ពីរអ័ប្រាហាំនេះ នោះព្រះវិញ្ញាណបរិសុទ្ធនឹងធ្វើទីបន្ទាល់ដល់ពួកគេអំពីសារៈសំខាន់ និង ភាពពិតរបស់គម្ពីរនេះ ។
គោលលទ្ធិ និង សេចក្តីសញ្ញា ១:៣៨; ៦៨:៣–៥
វិវរណៈមានមកជាបន្តបន្ទាប់តាមរយៈព្យាការីដែលកំពុងរស់នៅ
សូមឲ្យសិស្សម្នាក់អាន គោលលទ្ធិ និង សេចក្ដីសញ្ញា ១:៣៨ ឲ្យឮៗ ហើយឲ្យសិស្សម្នាក់ទៀតអាន គោលលទ្ធិ និង សេចក្តីសញ្ញា ៦៨:៤ ឲ្យឮៗ ។ សូមសួរសិស្សពីអ្វី ដែលពួកគេបានរៀនពីវគ្គគម្ពីរនេះ ។ ( សិស្សគួរតែរកឃើញគោលការណ៍ដូចខាងក្រោមនេះ ៖ នៅពេលអ្នកបម្រើរបស់ព្រះអម្ចាស់និយាយដោយព្រះចេស្តានៃព្រះវិញ្ញាណបរិសុទ្ធ នោះពាក្យពេចន៍របស់ពួកលោកបង្ហាញឲ្យឃើញពីព្រះឆន្ទៈរបស់ព្រះអម្ចាស់) ។
-
តើអ្នកធ្លាប់មានបទពិសោធន៍អ្វីខ្លះដែលបានជួយអ្នកឲ្យទទួលអារម្មណ៍ដឹងគុណ ដែលព្រះអម្ចាស់បន្តចាក់ស្រោចវិវរណៈនាពេលបច្ចុប្បន្ននេះ ?
សូមពន្យល់សិស្សថានៅក្នុងសាសនាចក្រ វិវរណៈជាក់លាក់ដែលផ្តល់ដល់ព្យាការីថ្ងៃចុងក្រោយត្រូវបានប្រមូលផ្តុំ ( ដែលទទួលស្គាល់ថាជាព្រះគម្ពីរ ) តាមរយៈច្បាប់នៃការយល់ព្រមទូទៅ ( សូមមើល គ និង ស ២៦:១–២) ។ សមាជិកសាសនាចក្រ ត្រូវបានស្នើឲ្យគាំទ្រព្យាការី និង សាវកនៅក្នុងការបន្ថែមវិវរណៈទៅលើព្រះគម្ពីរ ។ ឧទាហរណ៍ នៅសន្និសីទខែ តុលា ឆ្នាំ ១៩៧៨ សមាជិកសាសនាចក្របានគាំទ្រព្យាការី និង សាវកនៅក្នុងការបន្ថែម សេចក្តីប្រកាសជាផ្លូវការទី ២ដែលជាការផ្តល់បព្វជិតភាពដល់សមាជិកប្រុសៗដែលសក្តិសមទាំងអស់ទៅលើការប្រមូលផ្តុំព្រះគម្ពីរ ។
សូមឲ្យសិស្សងាកទៅសិស្សអង្គុយក្បែរខ្លួន ហើយពិភាក្សាខ្លីៗអំពីអ្វីដែលពួកគេអាចប្រាប់នរណាម្នាក់ដែលជឿថា ការប្រមូលផ្តុំព្រះគម្ពីរត្រូវបានបិទ ហើយយើងមិនអាចទទួលព្រះគម្ពីរបន្ថែមទៀតពីព្រះបានឡើយ ។
សូមបញ្ចប់ដោយការសុំឲ្យសិស្សសញ្ជឹងគិតពីអ្វី ដែលអាចធ្វើដើម្បីពង្រឹងទីបន្ទាល់ខ្លួនគេដែលថា ស្ថានសួគ៌ត្រូវបានបើក ហើយថាព្រះអម្ចាស់បន្តបើកសម្តែងព្រះបន្ទូលទ្រង់នៅជំនាន់យើងបច្ចុប្បន្ននេះ ។