iVurevure
E Rawa mo ni Cakava Oqori!
Digia na itavi ka matanataka na veika oqo.
MARIA: Wau, e ka dina saraga qo! Au sa qai raica rawa.
O DIEGO, WATI MARIA: Na cava o kaya tiko? Na cava e cakacaka?
MARIA: Sa ra sotasota ga mai na ka. Ena tinikarua na macawa sa oti, ena noda tekivu lako ki na noda ilawalawa ni bula rawati koya, au a sega tu ni kila na levu ni kena na vukea na noda bisinisi. Na veivakadeitaki eda sa vakayacora tiko mai kina, na ka eda vulica ena noda ilawalawa ni bula rawati koya—era sa qai vakaibalebale tiko mai qo!
DIEGO: Io, au sa kunea tale tikoga ena noqu ilawalawa ni vakasaqaqara cakacaka ni bula rawati koya. Sa dua tiko noqu cakacaka vinaka e valenibula. Mai na ilavo rawati ena noqu cakacaka kei na nomu bisinisi ni yaloka, daru sa na rawa ni qarava kina na nodaru matavuvale. Sa veisotari na ka kecega.
MARIA: Diego, e sega ni noqu bisinisi walega. E nodaru bisinisi. Vinaka vakalevu na cakacaka tiko vakaukauwa ka qai vukei au ena nodaru bisinisi ni yaloka.
DIEGO: E bisinisi talega ni Turaga. E daru sa vakatabuya na noda sasaga ni bisinisi Vua, vakaraitaka noda vakabauta na iVakabula, ka masulaka na noda bisinisi.
MARIA: E gadrevi me daru raica vakavoleka sara na nodaru bisinisi ni yaloka. Keitou a vosa vei ira na neitou kasitama kei ira e so tale na itaukei ni bisinisi me keitou dikeva rawa na ka era vinakata na tamata. Nanuma tiko? Keitou a vakila mai ni dodonu me keitou volitaka na neitou sucu kei na neitou yaloka.
DIEGO: Io, ka keitou raica na vanua ka kau tiko mai kina na neitou yaloka kei na sucu. Keitou a nanuma ni sega soti ni vinaka me kau mai e dua na me, me baleta na sucu. E vinaka cake na voli sucu bulabula mai vei Pedro, ka sa tiko rawa e so na nona me.
MARIA: Keitou qai vulica kina na caka ilavo e veisiga. Au a sa raica vinaka tiko na veika keitou vakayagataka kei na ilavo era sa sauma tiko vei keitou na tamata. Keitou cakailavo vakalevu cake tale ni keitou sa tekivu veikauyaka saraga ki veivale.
DIEGO: Kau sa raica tale tikoga na levu ni ilavo keitou sa vakayagataka tiko vakakina na levu ni ilavo keitou sa rawata tiko me baleta neitou matavuvale. Keitou sa rawa ni sauma na nodra ka ni vuli na gone qo.
MARIA: A vukei keitou o Naomi me kilai na sala me volitaki kina e levu cake na ka. Keitou tekivu tarogi ira na neitou kasitama ena vuqa na taro, rogoci ira, ka vakatutu. Keitou vakauqeti ira na neitou kasitama mera volia e levu cake na yaloka ka voli sucu talega. A dua na vakasama cecere sara ga oya me vakatalai o Sophia me diliva e veivale. Keitou a kilai ira vinaka yani na neitou kasitama ka nodra itokani yani e levu vei ira.
DIEGO: Koya gona kei ira na kasitama vou kece, keitou a gadreva vakalevu cake na yaloka e veisiga, ka keitou vulica na dinau ilavo me voli kina e levu cake na toa. Au marau ni keitou a sega ni cakava na imatai ni dinau. Ke keitou a sega ni sausaumi rawa. Keitou a gadreva e dua na dinau lailai ga me voli kina e vica ga na toa.
MARIA: Raica?! E rauta talega. Qo eda sa gadreva meda raica tikoga na veisala meda vakalailaitaka kina na ilavo eda vakayagataka ka vakalevutaka na levu ni ka eda volitaka.
DIEGO: Io. E rawa mo ni cakava oqori!
Lesu tale kina tabana 224
Noqu Bisinisi ena Lima na Miniti
O dauveivakarautaki mena wilika oqo ena gauna era vakamuria tiko kina o ira na lewe ni ilawalawa tabana 187.
MARIA: Au via rere vakalailai na vakamacala, ia au sa kilai kemuni vinaka sara tiko mai. Ena sega ni dua na leqa vei au. Wase 1—A dodonu meu vakamacalataka na noqu bisinisi. Na noqu bisinisi na volitaki yaloka kei na sucu. Au a tekivu ena yaloka ga ena vica na vula sa oti. Au a vakuria ena sucu ena noqu kila ni ra vinakata talega na noqu kasitama. Sa tiko talega na noqu bisinisi ni kauyaya. Sa vinaka cake sara tiko mai na noqu bisinisi mai na gauna au tekivu lakova tiko kina na ilawalawa ni bula rawati koya oqo.
MARIA: Wase 2 e baleta na taro ni macawa. Era a vukei au kece na taro. Ia kevaka meu a digia e dua, na taro ka vakatubura vakalevu duadua na noqu bisinisi sai koya na wasea na ilavo ni bisinisi mai na ilavo ni tamata vakayadua. Ni bera oya, na ilavo au dau rawata a waki vata tu ga kei na noqu ilavo vakaiau ka dau qai vakayagataki talega. E a sega ni vinaka. Ia oqo, au sa wasei rau tiko.
MARIA: Wase 3—itukutuku vakailavo kei na vakabula ilavo. Au a rawa ni vakabula ilavo ena 9 mai na 12 na macawa. Au a maroroya na itukutuku ni ilavo me baleta taucoko na macawa 8 sa oti. Au a cakava vakina me baleta na noqu itukutuku vakai au. Au sa navuca meu na tomana tiko na vola itukutuku. Au vinakata saraga meu kila se vica au sa rawata tiko kei na levu ni ka au vakayagataka tiko. Au sa marau talega niu sa vakabulailavo rawa tiko. Au se sega vakadua ni cakava rawa oya. E vakayalovinakataki au meu kila ni tiko.
MARIA: Ia, oqo me baleta na wase 4—tomani tiko na vakavinakataka na noqu bisinisi. Au sa vulica e levu sara na ka ena 12 na macawa sa oti. Au via tomana tiko na vuli. Au na lewena na neitou ilawalawa ni itaukei ni bisinisi ni iteki.
MARIA: iOtioti ni wase. Wase 5 na takete ni bisinisi. Ena loma ni dua na yabaki, au na vinakata me sa tiko e dua na ilavo vinaka ena noqu bisinisi me rawa niu redetaka kina e dua na tikina ena vanua osooso taudua ni makete. Qori ena vukei au ena vakatuburi vakalevu tale ni noqu bisinisi.
Vinaka vakalevu, vei kemuni kece. O ni sa vukei au kece sara vakalevu ena vakatuburi ni noqu bisinisi!
Lesu kina tabana 187