Pene 11

Te Imiraa i te Oaoa i roto i te Oraraa

E titau [te Feia Mo‘a] ia noaa ia ratou te mau mea maitai atoa, no te faatupu i te oaoa o te fetii taata nei.¹

No Roto mai i te Oraraa o John Taylor

I te pae hopea o te ava‘e Tiunu matahiti 1847, e pŭpŭ taata rahi feia mo‘a, arataihia e Elder John Taylor raua o Elder Parley P. Pratt, tei faaru‘e mai i Winter Quarter no te tere atu i te pae tooa o te râ. I te ava‘e Setepa 1847 ua tapae ratou i te pae hiti‘a o te râ o te mau Mou‘a Ofa‘i (Rocky Mountains), i roto i te area e 300 e e 400 maire i te atea i te afaa no Roto Miti. I roto i te hepetoma matamua no te ava‘e Setepa, ua topa te hiona e rave rahi initi i te me‘ume‘u, e ua haamata te tahi mau melo i te topa te morare. I taua taime atoa ra, o te Peresideni Brigham Young e te tahi mau melo no te Pŭpŭ no te Tino Ahuru Ma Piti, te ho‘i atoa ra i Winter Quarter na Roto Miti mai, e ua farerei ana‘e ratou i te pŭpŭ taata e arataihia ra e Elder Taylor. I roto i te hiona e i te mana‘o pe-‘apea o te feia e haere ti‘a ra i Roto miti, ua faaitoito o Elder Taylor i te mau taata tataitahi ia faaite tamau noa i te mata anaanatae, e ua putuputu oia e te Peresideni Young, te mau melo o te Tino Ahuru e Mapiti tei apee atoa mai, e te tahi atu mau taeae faatere i roto i taua pŭpŭ ra.

Te putuputu ra te mau taeae, area te mau ata ra, te pee ê atura ïa, e aita i maoro, ua tahe ihora te hiona i raro a‘e i te mahana. E rave rahi mau tuahine tei haere atu i te hoê vahi aihere e te taata ore, haatihia e te tahi mau tumu rii raau, ma te faaiteite ore i te tahi atu mau taata o te pŭpŭ. I reira, ua faaineine ratou i te tahi mau amuraa mana‘o-ore-hia ma te tapo‘ihia i te mau ahu tapo‘i uouo e te nehenehe ho‘i. Te faati‘a ra te aamu e, “ua tupa‘ihia te kafa faaamu; ua rahi te animala e te i‘a tei faaineinehia; ua tatarahia mai te mau hotu, te mau monamona e te mau mea huru rau, tei faataahia no te mau tamaaraa taa‘e, e ua riro mau ei tamaaraa faahiahia.”

Ia hope a‘era te apooraa, ua arataihia’tura te mau taeae o te apooraa e te tahi atu mau melo o te pŭpŭ hau atu i te 100, i te vahi i faanahohia te ohipa mana‘o-ore-hia, i reira ratou i te tamaa-maitai-raa. Te faati‘a ra â te aamu e: “Ia hope te tamaaraa e ia oti te mau mea atoa i te faateateahia, ua faaineinehia a‘era te hoê oriraa, e ua faaroohia te ta‘i navenave o te phira i te anoiraa i te mau ataraa e te tau‘araa parau oaoa. … Te ori ra i te tahi taime, te himene ra i te tahi taime e te tai‘o ra i te pehepehe i te tahi atu taime. Ua papa‘i o Elder Taylor e, ‘Ua faateiteihia e ua haamaitaihia matou te tahi e te tahi, ua arue matou i te Fatu e ua haamaitai i te tahi e te tahi.‘ ” ²

Ua ti‘aturi tamau maite te Feia Mo‘a i te mau Mahana Hopea nei i te parau no te imiraa i te oaoa i roto i te oraraa nei, na roto anei i te fana‘oraa i te nehenehe e te auhune o te natura, na roto anei i te mau faaoaoaraa maitai, e aore râ, na roto anei i te feruri-maite-raa i ni‘a i te mau parau mau o te evanelia. Ua haapii o John Taylor e, “Te ohipa e ti‘a ia vai tamau noa i roto i te feruriraa o te feia maramarama atoa, ‘o te parau ïa no te oraraa e te titauraa i te oaoa‘ “ Ua ti‘aturi oia e, e noaa te oaoa rahi ia tatou i roto i teie nei oraraa, ua haapii atoa râ oia e, “te oaoa rahi a‘e e taeahia e tatou, maori râ, te fariiraa tatou i te parau faati‘a a to tatou Metua i te Ao ra, te mata‘uraa tatou i te Atua, te iteraa tatou i ta’na mau ture—ta’na mau parau tumu no te parau mau mure ore, e te mau mea atoa ta tatou e ti‘aturi nei e, e haamaitai te reira eiaha i to tatou oaoa tahuti noa nei, i to tatou oaoa mure ore atoa râ.” ³

Te mau Haapiiraa a John Taylor

Ua hinaaro te Atua ia oaoa tatou i roto i te oraraa nei.

E mea au na tatou te arearea i roto i teie ao. Ua ti‘a te reira. Ua faanaho te Atua ia oaoa tatou. Aita vau e ti‘aturi i te hoê haapa‘oraa o te faatupu i te pe‘apea, te mihi, te ati e te oaoa ore i roto i te taata. … Aita vau e mana‘o nei e, te vai ra te hoê ohipa nehenehe e te maitai i roto i te reira, inaha ho‘i, te mau mea atoa e haati nei ia tatou, te mau tumu raau, te mau manu, te mau ti‘are e te mau aua matie, e mea nehenehe ïa, tae noa’tu i te ta‘i e te ma‘uehaere-raa a te mau manumanu e te mau manu pati‘a, e te mau arenio i te horo-haere-raa e te hauti-haere-raa. Te oaoa nei te mau mea atoa, no te aha aita tatou e oaoa atoa? Te hinaaro nei râ tatou ia rave i te reira ma te ti‘a eiaha râ na roto i te faainoraa i te mau parau tumu atoa ta te Atua i tuu i roto i te utuafare taata nei.⁴

E ino anei to roto i te ohipa ta te Atua i hamani? Ia hi‘o tatou i tera vahi e tera vahi, e au maite, e nehenehe, e oaoa, e e purotu ta tatou e ite.

No te taata nei te mau haamaitairaa a te Atua, e te oaoa atoa; ua faataahia oia ei faatere i ni‘a i te mau mea atoa i hamanihia. No’na i auhune ai te fenua nei; te mau huero, te mau hotu monamona, te mau vine maitai; no’na te mau aihere, e te mau ti-‘are i faa‘una‘una ai i te fenua nei, i puhara ai i to ratou hau‘a noanoa e i faaite ai i to ratou purotu; … No’na te uru raau rii e te vine i oteo ai e i ua‘a ai, e i ahu ai te natura i to’na ahu nehenehe roa; no’na te pape arepurepu, te pihaa mâ e te anavai pape ateate i tahe ai, te natura taatoa teie e hohora nei i to’na nehenehe faito ore no te ani manihini ia’na ia farii i to’na oaoa, to’na purotu, e to’na hapa ore, e ia haamori i to’na Atua.

No te feia e parau e, e mihi to roto i te mata‘u i te Atua, e i roto i ta’na ohipa! O te ino ïa o te ao nei, tei faatupu i te oaoa ore i roto i te taata; e o te ino atoa o te haapa‘oraa tei faaino i te ao: na te taata teie mau ino i faatupu, e ere na te mau haamaitairaa a te Atua. No ni‘a i te ino! E ino anei to roto i te himene a te mau manu, i roto ho‘i i te horo a te puaahorofenua, i roto ho‘i i te oaoa o te arenio, e aore râ, o te tamarii; i roto ho‘i i te una‘una o te mau ti‘are, i roto ho‘i i te mau huru mea una‘una atoa o te natura, e aore râ, i roto i te Atua, tei hamani i te reira mau mea atoa, e aore râ, i roto i ta’na ohipa?⁵

E tano te faaoaoaraa o te oraraa i ni‘a i te haapa‘oraa mau.

Eaha te tahi mau taata i feruri ai e, e mauhaa upaupa te fira na te diabolo, e e ere ïa i te mea ti‘a ia hauti i te reira. Aita vau e mana‘o nei mai te reira, te feruri nei râ vau e, e mea faahiahia roa ia hauti i te reira no te ori. Te feruri atoa nei te tahi mau taata e, eia ha tatou e ori. Oia, e oaoa tatou na roto i te mau huru rave‘a atoa. Te pato‘i nei te tahi mau taata i te pehe. No te aha, e tuhaa rahi to te pehe i ni‘a i te ra‘i, e i rotopu i te mau manu! Ua faaî te Atua ia ratou i te pehe. Aita ïa e ohipa hau atu i te mauruuru e te oaoa maoti te haereraa i roto i te uru raau, e aore râ, i roto i te mau pû aihere i te po‘ipo‘i roa e ia faaroo i te himene e te pehe nehenehe a te mau manu, e e mea au ihoa na tatou te reira mau huru mea.

Aita tatou i ite i te faahiahia o te upaupa e faaroohia e tatou i te ra‘i ra. E ti‘a ia parau i te reira, mai ta te hoê o te mau Aposetolo i parau ra no ni‘a i te tahi atu mea— “O te mau mea aore i hi‘ohia e te mata ra, aore i faaroohia e te tari‘a ra, aore ho‘i i ô i roto i te aau o te taata ra, o ta te Atua ïa i vaiiho no te feia i hinaaro [e i mata‘u] ia’na ra.” [A hi‘o 1 Korineti‘a 2:9]. Aita tatou i ite i te faahiahia, te nehenehe, te au e te navenave o te upaupa i te ra‘i ra.

E titau tatou i te mau mea maitai atoa e ia tapea i te reira, e ia faaru‘e i te mau mea ino atoa. Te hoê tumu e pato‘i ai te feia faaroo o te ao nei i te upaupa e te teata taata ora, no te ino ïa tei anoihia’tu i roto i taua mau mea ra. Te ati atu nei te feia iino i taua mau mea ra, e ua viivii a‘era ratou; area râ, e tumu anei te reira no te oreraa te Feia mo‘a e oaoa i te mau horo‘a a te Atua? E parau tano anei te reira? E ere roa’tu ïa? Na ratou e titau ia noaa ia ratou te mau mea maitai atoa, no te faatupu i te oaoa o te fetii taata nei. …

I roto i ta tatou mau faaoaoaraa atoa, e ara tatou ia rave-aumaitai-hia te mau mea atoa, e eiaha roa’tu ho‘i tatou e haamo‘e ia riro ei feia peu maitai, e ia haapae i te haapa‘o ore e te faatura ore ia vetahi ê, e ia here, ia auraro e ia faatura i te mau taata atoa.⁶

E ere i te mea au ore te faaoaoa e te arearea no te peu maitai e no te haapa‘oraa mau. Eiaha e opani haamou roa i te mau hautiraa teata taata ora, e ti‘a râ i te Feia Mo‘a i te mau Mahana Hopea nei ia faatere au maite i te reira e ia paruru eiaha te reira ia raveino-hia, e ia paruru i te reira vahi ia vai noa ei vahi i reira te mau taata atoa e haaputuputu ai no te rave i te faaoaoaraa mâ. I haere ai to tatou mau ti‘a faatere i taua mau vahi ra no te paruru eiaha ia ravehia te mau peu e te mau hinaaro o te haafifi i te feia apî e i te u‘i e paari maira. Aita e rahi roa te parau no te parururaa eiaha te ti‘amâraa ia huri ti‘a i roto i te ohipa faufau, e eiaha ho‘i te mau mea o te faatupu i te oaoa e te anaanatae ia faarirohia ei rave‘a faatupuraa i te oaoa ti‘a ore, e aore râ, i te mau peu iino i te pae morare. … E titauhia i te feia faatere ia hi‘opo‘a ia orihia te mau ori atoa ma te haehaa, e te au maitai, e eiaha e faati‘a i te mau peu iino, e aore râ, i te mau peu auraa ore i te pae morare e i te pae varua.⁷

E noaa te oaoa ia tatou ia hoê tatou i roto i te evanelia.

E mea au roa na te Feia mo‘a o te Atua ia feruri maite i ni‘a i te mau parau tumu o te parau mau mure ore tei haapiihia ia ratou. Mai te mea e, te vaira te hoê mea no ni‘a i te parau no te oaoa e no te taata nei, mai te mea e, te vaira te hoê mea tei faataahia no te faaaano i te feruriraa e i te mana‘o i te utuafare o te taata nei, no te faateitei i to tatou ti‘aturiraa e to tatou mau hinaaro, e no te horo‘a i te hau, te oaoa, e te ti‘aturi, o te feruriraa ïa e, ua heheu mai te Atua ia tatou nei i te mau parau mau mure ore; e ua tuu i te reira i roto i to tatou aau ma te haapapu ia tatou i te mau mea ta tatou e ti‘aturi nei, e ta tatou i ite papu.⁸

Aita e ti‘a ia‘u ia feruri i te hoê mea tei hau atu i te nehenehe e te mo‘a maoti te hoê pŭpŭ taeae tahoê, tei faanahohia ia au i te hoho‘a i faaitehia mai i roto i Te Parau Haapiiraa e te mau Parau Fafau; i reira ho‘i te taatoaraa e rave ai i te ohipa ei maitai no te taatoaraa—e no to tatou here i te Atua ma to tatou aau atoa, ua here atoa tatou i to tatou taata tupu; i reira ho‘i to tatou taime, ta tatou faufaa, to tatou mau taleni, to tatou feruriraa e to tatou tino e faaohipahia ai no te maitai o te taatoaraa; aita te hoê e haru i ta te tahi i reira; tei reira te hinaaro hoê, te faufaa hoê, te imiraa faufaa hoê; e mai tei ravehia i ni‘a i teie nei fenua, te faahitihia ra te parau no ratou e, “e ua rave te mau taata atoa ra i te mea ti‘a te tahi i te tahi,” e ua rave paatoa i te ohipa ei maitai no te taatoa, “i reira ho‘i te mau taata no te mau vahi atoa e farerei ai i te taeae e te hoa,” i reira ho‘i e itehia ai to tatou natura tauturu, te horo‘a noa e te here, e i reira te nounou, te te‘ote‘o, te riri, te aau teitei, e te mau mea iino atoa i haavîhia ai e i tuuhia ai i raro a‘e i te hinaaro e i te Varua o te Atua. E mau parau tumu nehenehe mau teie, e e riro ïa ei faaoaoaraa i te huiraatira, i te fenua iti, i te hoê tuhaa fenua, i te nunaa, e aore râ, i te ao nei.⁹

Ua oaoa vau ia Iehova, e te haamaitai nei au i te i‘oa o te Atua no Iseraela i te mea e, tei roto vau i ta’na ekalesia e i to’na basileia i ni‘a i te fenua nei. Te hinaaro nei au e poihere maite i teie nei mana‘o i roto i to‘u aau i te mau taime atoa e ia mau maite i te reira i roto i to‘u nei oraraa; e te ti‘aturi nei au e, e rave rahi hanere, e aore râ, e rave rahi tauatini, na mua’tu ia‘u nei i teie mahana, tei noaa atoa taua varua ra, taua mana‘o ra, e taua mau hinaaro ra. …

Eaha te mea e poupou ai e e oaoa ai tatou i taua mau taime ra? … No te mea ïa e, te vaira te tahoêraa te mau mana‘o maitatai, te mau hinaaro e te mau ti‘aturiraa maitai, e te varua hoê i roto i te mau taata atoa, tei faatupu i te hoê amuitahiraa puai, te faaroo, e te Varua o te Fatu i roto. E roaa te maramarama i te hoê noa iho mori hinu, e e mea au ïa ia hi‘o i te reira, ia amuihia râ e rave rahi tauatini o te reira mau maramarama, e riro mai ïa ei maramarama rahi. No tatou nei, o te amuitahiraa ïa te ite, te ora, te maramarama, te Varua o te Atua ora; to tatou mau mana‘o, no te hoê ïa taata, to tatou faaroo no te hoê ïa taata, e ia amuihia te ti-‘a‘a rahi hoê ra, e riro mai ïa ei amuitahiraa paari o te ore roa e roaa i te mana o te ao e o hade. …

Tatou te hoê pŭpŭ taata, i roto i tera pŭpŭ e tera pŭpŭ o te ekalesia e o te basileia, te ti‘aturi nei tatou e, ua pûpû tatou ia tatou i roto i teie nei ohipa rahi; e no reira, ua tupu te faaroo, te tahoê, e te puai, e aore râ, te mana, te Varua o te Atua ora, tei horo‘a i te anaanatae e tei faaoraora i te mana‘o, tei haapuai i te tino, e tei faaoaoa i te varua. Te hinaaro nei tatou paatoa e rave i te reira ohipa. Tei ô nei te Fatu i roto i to’na Varua e to’na mana, e te oaoa nei to tatou aau.¹⁰

E noaa te oaoa e te poupou ia tatou ia haro‘aro‘a tatou i te mau parau tumu o te parau mau.

Ia hi‘o maitai ana‘e tatou ia tatou iho—ia taa maitai ana‘e tatou i te mau parau tumu o te parau mau—te vaira anei te hoê mea eita tatou e horo‘a e noaa ai te ora ia tatou? I to te Varua haaputapuraa i te aau o te feia Mo‘a—i to te ra‘i faaiteraa mai i te ite e te maramarama—i to te Fatu anaanaraa mai i ni‘a i te varua o te feia mo‘a i to ratou haaputuputu-raa-hia, eaha te mana‘o tei tupu i roto i to ratou aau? Ua haamaitaihia ratou e Iehova. A putuputu taa‘e ai ratou no te farii i te tahi mau haamaitairaa no roto mai i te rima o te Atua, ehia rahiraa taime to te varua heheu pouraa mai i ni‘a ia ratou, e te iriti-raa-hia mai te anotau no amuri a‘e i mua i to tatou mata ma te nehenehe, te hanahana, te auhune e te maitai rahi; e ia tamahanahana ho‘i taua varua ra i to ratou aau, aue ïa to ratou oaoa e! I reira ho‘i ratou i te feruriraa i te mau mea o teie nei ao, e i te mau mea e ti‘ai ra ia ratou a muri a‘e! I to ratou mau haamaitairaa ei feia mo‘a no te Atua Teitei; e i te hanahana e noaa ia ratou mai te mea e, e haapa‘o tamau noa ratou e tae noa’tu i te hopea ra!

Eita e ore e, ua ite outou i te feruriraa ta teie mau huru mana‘ona‘oraa e teie mau huru ti‘airaa e faatupu i roto i te aau o te taata. No te aha tatou i feruri ai i te tahi atu huru mana‘o i te mau taime atoa? No te mea ïa te mo‘ehia nei ia tatou ia pure e ia ti-‘aoro i te Atua, e ia horo‘a ia tatou i roto ia’na, e aore râ, no te mea tei roto tatou i te hara, te rave nei tatou i te ohipa ino, e ua mo‘e ê te Varua o te Atua, e ua haamo‘e tatou i te ti‘aturiraa hanahana o to tatou piiraa; mai te mea râ e, e ite noa tatou i te mau taime atoa i to tatou ti‘araa mau i mua i te Atua, e tamau noa ïa to tatou varua i te imi i te mau mea a te Atua, e e ti‘a ia tatou ia imi i te mahana taatoa eaha ta tatou e rave no te faatupu i te oaoa e te ora o te ao nei, eaha ta tatou e rave no te faatura i to tatou piiraa—no te faatura i te autahu‘araa o te Tamaiti a te Atua, e eaha te rave no te faatura i to tatou Atua, e no te haamaitai atu i te taime e toe nei ia tatou i ni‘a i te fenua nei, haamaitai atoa i te mau puai o to tatou tino no te faatupuraa i ta’na mau opuaraa, e no te tereraa to’na basileia i mua—no te faahaereraa i ta’na mau faanahoraa i mua, ia ti‘a ho‘i ia’na ia parau mai i te taime e ti‘a atu ai tatou i mua ia’na e, “ua ti‘a roa e teie nei tavini maitai e te haavare ore, e haere oe i roto i te oro‘a oaoaraa a to Fatu; o oe i haapa‘o maitai i tena na tao‘a iti ha‘iha‘i, e faati‘aau atu vau ia oe i ni-‘a iho i te mea rahi.” [A hi‘o Mataio 25:21].¹¹

No‘u nei, tei ô nei au no te titau i te ora mure ore, titau i te ra-‘i e i te oaoa. Te hinaaro nei au, na roto i ta‘u ohipa, e haapapu i te hau i roto i te tahi atu ao o te horo‘a mai i taua oaoa ra e te marû ta‘u e imi nei.¹²

Te mau Mana‘o Tauturu no te Haapiiraa e te Aparauraa

Ua haapii te Peresideni Taylor e, ua hamani te Atua i te fenua nei e to’na mau una‘una ei faoaoa ia tatou. Eaha te mau mea i tupu i ni‘a ia outou i reira to outou iteraa i te oaoa i roto i te una‘una o te fenua nei e tei haafatata ia outou i te Fatu ra?
Nahea te pehe maitai, te pehepehe, te teata taata ora, e te tahi atu mau huru hauti i te faatupu i te oaoa i roto ia tatou? Eaha te ti‘a ia tatou ia rave no te faatupu i te mana e te oaoa o te pehe maitai i roto i to tatou oraraa e i roto i te oraraa o te mau melo o to tatou utuafare? Nahea tatou i te paturu e i te faaitoito i te hautiraa maitai?
I to outou feruriraa, no te aha te pehe i riro ai ei tuhaa ohipa faufaa no ta tatou haamoriraa? Nahea to te mau himene a te Ekalesia tamahanahanaraa e aore râ, haapuairaa ia outou i roto i te mau taime hepohepo?
Nahea to outou auhoaraa i te tahi atu Feia mo‘a i te faatupuraa i te oaoa i roto ia outou? Eaha te ti‘a ia outou ia rave no te faarahi atu i te tahoêraa i rotopu i te mau melo o ta outou paroita e aore râ, o ta outou amaa?
Eaha te auraa no te parau ra “e oaoa ia Iehova”? Eaha te tahi mau parau haapiiraa o te evanelia o te faatupu i te oaoa i roto ia outou? Ia imi tatou i te oaoa i roto i teie oraraa nei, no te aha e mea faufaa ia feruri atoa tatou i te ora mure?
Eaha te tahi mau ohipa i roto i to outou oraraa tei faatupu i te oaoa i roto ia outou? Eaha te ti‘a ia tatou ia rave no te tapea maite i te hoê varua oaoa i roto i to tatou oraraa noa’tu to tatou mau hepohepo? Eaha te ti‘a ia tatou ia rave no te tauturu i ta tatou mau tamarii ia noaa te oaoa ia ratou i roto i to tatou oraraa?

Te mau Papa‘iraa mo‘a: Salamo 118:24; Isaia 12:2–3; Mataio 25:21; 2 Nephi 2:25; Mosia 2:41; Hiroa Faaroo 1:13

pioneers dancing — “Ua faanaho te Atua ia oaoa tatou. Aita vau e ti‘aturi i te hoê haapa‘oraa o te faatupu i te pe‘apea, te mihi, te ati e te oaoa ore i roto i te taata”