Pene 24

Te Basileia o te Atua

Te haamau nei tatou i te niu no te hoê basileia e ti‘a i te vairaa e a muri noa’tu; –o te oteo i teie oraraa nei e a ua‘a ai i roto i te ora mure ore ra. Tei roto tatou i te hoê ohipa tei hau roa i te rahi i te mau ohipa atoa tei faaarepurepu i te feruriraa o te taata nei.¹

No Roto mai i te Oraraa o John Taylor

Ua ti‘aturi tuutuu ore o John Taylor e, e faati‘a-faahou-mau-hia te basileia o te Atua i ni‘a i te fenua nei. Ua maramarama oia e, e ere teie ohipa na te Peropheta Iosepha Semita, e aore râ, na te tahi atu taata, na te Fatu râ i faaue mai i te reira. E ua ineine oia i te horo‘a i to’na ora no te paruru i taua ohipa ra.

I te matahiti 1838, i muri noa mai i to’na pii-raa-hia i roto i te Pŭpŭ Tino Ahuru Ma Piti, ua tere atu o John Taylor i Far West, Missouri, no te amui atu i rotopu i te Feia Mo‘a. I roto i to’na tere, ua tabulahia e paraparau oia i te hoê pŭpŭ taata e ere i te mea atea roa i Columbus, Ohio. Na mua rii noa a‘e i te taime i faataahia no te farereiraa, ua faatae mai te tahi mau taeae i te parau apî e, ua tairuru te tahi mau taata i te vahi i faataahia no te putuputuraa, ma te opua e parai ratou i te ta e te huruhuru manu i ni‘a ia Elder Taylor. E ua faaara te mau taeae ia’na ia faaore i taua putuputuraa ra, i te mea e, eita e ti‘a ia ratou ia paruru ia’na, no to ratou iti. Area râ, ua ononono o Elder Taylor ia haere e poro mai tei faanahohia, e e na reira mau oia noa’tu e, o oia ana‘e te haere.

Ia tae atu oia i rotopu i te naho‘a rahi tei tairuru mai no te faaroo ia’na, ua haamata oia na roto i te parauraa i te parau no ni‘a i te mau fenua faatereraa huiarii ta’na i faaru‘e atu aita i maoro a‘e nei. Ua parau oia ia ratou i te feruriraa hanahana i roto ia’na i te ti‘araa i ni‘a i te hoê fenua ti‘amâ. No ni‘a i te parau no te roa‘araa mai taua ti‘amâraa ra, te na ô ra oia e: “E homa, te ti‘a nei au i teie taime i rotopu i te mau taata e metua to ratou tei aro tuutuu ore e ua noaa ia ratou te hoê o te mau haamaitairaa rahi roa aitâ i horo‘ahia a‘e nei i te fetii taata nei—oia te ti‘araa ia feruri, ia parau, ia papa‘i; te ti‘araa ia faaite e, na vai ratou e faatere, e te ti‘araa ia haamori i te Atua ia au i te mana‘o o to ratou aau—e mau ti‘araa mo‘a ana‘e te reira e hope roa, e mau ti‘araa no te taata nei, e ua paruruhia ho‘i i teie nei e te Pàpà Ture a te Fenua Marite. Te ite nei au ati ti‘a a‘e ia‘u nei, i te mau tamaiti a te mau taata hanahana, tei ore i haapa‘o i te faaueraa a te hoê faatere haavî, ua pûpû râ ratou i to ratou ora, ta ratou mau tao‘a e to ratou hanahana mo‘a no te haamou i taua mau haafifiraa ra, no te fana‘o i te ti‘amâraa, no te horo‘a ho‘i i te reira i to ratou ra hua‘ai, e aita ra, e pohe ïa.”

E te parau faahou ra o Elder Taylor e: “Te hinaaro atoa nei au e parau ia outou e, ua faaitehia mai ia‘u e, te opua nei outou e parai i te ta e te huruhuru manu i ni‘a ia‘u, no to‘u mau mana‘o no te pae haapa‘oraa faaroo. Te reira anei te maitai ta to outou huimetua i vaiiho mai na outou? Te reira anei te haamaitairaa tei hoohia e ratou i to ratou toto—oia ho‘i to outou ti‘amâraa? Mai te mea e, o te reira, teie ïa ta outou taata haapohe, e noaa ïa ta tatou tusia i te Atua o te ti‘amâraa.”

Ia hope a‘era ta’na parau, tatara ihora oia i to’na pereue e na ô atura: “E homa, haere mai e ta outou ta e te huruhuru manu, ua ineine to outou taata haapohe; e te mau varua o te huitupuna e, a hi‘o mai na i te mau ohipa a ta outou mau tamarii iino! Haere mai e homa! Haere mai, te parau atu nei au ia outou e, ua ineine au!” Faaea a‘era Elder Taylor i te parau no te tahi tau minuti te maoro, aita râ hoê noa a‘e taata i hauti noa a‘e, aita atoa i parau noa a‘e. Ua parau faahou a‘era oia i ta’na mau parau e ua poro atura i te naho‘a taata ma te itoito e te mana rahi i roto i te roaraa e toru hora.²

Teie te parau a Elder Matthias F. Cowley no roto i te Pŭpŭ Tino Ahuru Ma Piti, e rave rahi matahiti i muri a‘e i te poheraa o te Peresideni Taylor, “Ua ora oia, ua haa e ua pohe mai te au i te parau here-roa-hia e a’na tei na ô e, ‘Te Basileia o te Atua e aore râ, aore roa’tu.’ ”³

Te mau Haapiiraa a John Taylor

Na te Fatu te fenua e Oia te faatere, te haava, e te arii no te reira.

Na vai i hamani i teie fenua? Na te Fatu. Na vai i turu i te rei-ra? Na te Fatu. Na vai e faaamu nei e e faaahu nei i te rahiraa mi-lioni taata o te fetii taata e parahi nei i ni‘a i te fenua, tei Mo‘a e tei hara? Na te Fatu. Na vai e tapea nei i te mau mea atoa i roto i te reva? Na te Fatu. … Na vai i horo‘a i te ite i te taata? Na te Fatu. Na vai i horo‘a i te etene i te ite hohonu o te taata, te toro‘a haapa‘o pitopito, e te vai atura, te mau tuhaa atoa o te maramarama tei roaa ia ratou no ni‘a i te niuniu paraparau, te matini auauahi tei faaohipahia ei maitai no te fetii taata nei e te mau huru maimiraa atoa tei iteahia i roto i te mau tenetere i mairi a‘e nei? Na te Fatu. … Tei ia vai te ti‘araa no te faatere i te mau nunaa, no te ti‘aau i te mau basileia e no te faatere i te mau taata atoa i ni‘a i te fenua nei?⁴

Ua riro teie fenua ei parahiraa e ei faufaa ai‘a no te Feia Mo‘a. No Iesu Mesia te fenua nei, no reira, no to’na atoa ïa mau tavini e te mau taata tei pee ia’na, i te mea e, ua parauhia mai ia tatou e, “No Iehova te fenua e te î atoa i ni‘a iho,” [Salamo 24:1] e ia vai ho‘i te mau mea atoa i to ratou ra vairaa, “o te Feia Mo‘a râ no Tei Teitei ra te rave i taua basileia nei, e no ratou roa’tu te basileia, e te rahi atoa o te basileia i raro a‘e i te ra‘i atoa nei, o te horo‘ahia ïa i te mau taata ra, i te feia mo‘a o Tei Teitei.” [Daniela 7:18, 27]. O ta ratou ïa faufaa ai‘a te reira.⁵

Te faaite nei te mau papa‘iraa mo‘a e … o te Mesia te taata faufaa i haamanahia, e oia te fatu ai‘a o teie ao; te faaite atoa ra te mau papa‘iraa e, i haere mai na oia ei taraehara no te hara a to te ao nei; e ho‘i faahou mai râ oia ei faatere, ei haava, e ei arii no to te ao nei.⁶

Ua riro te Ekalesia ei haamauraa no te basileia o te Atua i ni‘a i te fenua nei.

Te basileia o te Atua o te faatereraa hau ïa a te Atua. Oia ho‘i, te puai, te mana, te ture, te mana faatere, e te hoê nunaa no te faatere. Eita râ te reira parau e tupu, eita ho‘i e nehenehe e faa-tupu- hope-roa i te reira mai tei parauhia i roto i te mau papa‘iraa mo‘a ra, e tae roa’tu i te taime e riro ai te mau basileia o teie nei ao ei mau basileia no to tatou Fatu e no to’na Mesia, e ia faatere ho‘i oia ia ratou [a hi‘o Apokalupo 11:15], e ia tuu te mau turi atoa i raro i mua ia’na, e ia fa‘i te mau reo atoa e, oia te Mesia [a hi‘o PH&PF 88:104], no te hanahana o te Atua, te Metua. Aitâ te reira taime i tae mai, ua tupu râ te tahi mau parau no ni‘a i te reira; oia ho‘i, te haamauraa o taua basileia ra, e hoê noa taata e ti‘a ia haamau i taua basileia ra, maori râ, te Arii e te Faatere, e te Upoo faatere o taua hau ra, na roto i te faaiteraa mai i to’na mau mana‘o, ta’na mau parau, ta’na mau ture, e ta’na faatereraa hau i te taata. Ia ore ana‘e te reira, eita ïa tatou e ite i ta’na mau ture.⁷

Eaha te ohipa matamua e titauhia no te haamau i to’na basileia? Te maitiraa ïa i te hoê peropheta e ia titau ia’na ia faaite i te hinaaro o te Atua; i muri iho, te faati‘araa ïa i te hoê nunaa e haapa‘o i te rima o te Fatu na roto i taua peropheta ra. Ia ore teie na mea e roaa ia outou, e ore roa ïa e ti‘a ia outou ia haamau i te basileia o te Atua i ni‘a i te fenua nei.⁸

E hinaaro rahi to te Atua ia haamau i to’na basileia i ni‘a i te fenua nei, e no te haamataraa, e titauhia ia’na ia faanaho i ta’na ekalesia, ia faanaho i te nunaa ta’na i haapurara i rotopu i te mau nunaa atoa, e ia haaputuputu faahou ia ratou, ia riro ratou ei hoê nana e hoê ti‘aai [a hi‘o Ioane 10:16], e hoê Fatu, hoê faaroo, hoê bapetizo, e hoê Atua, o te taata atoa ra, e tei ni‘a iho ho‘i i te taata atoa, e tei pihai iho i te taata atoa [a hi‘o Ephesia 4:5–6], e na roto ho‘i i te reira e faaterehia ai te mau mea atoa. No te faaohieraa i taua opuaraa ra, ua faanahonaho oia i ta’na autahu‘araa mo‘a mai te au i to te ra‘i ra.⁹

I te tahi mau taime, te paraparau nei tatou no ni‘a i te ekalesia a te Atua, e no te aha? Te paraparau nei tatou no ni‘a i te basileia o te Atua, e no te aha? No te mea ïa e, ia vai te ekalesia a te Atua na mua hou a vai ai te basileia o te Atua, e no reira, e titauhia ia poro i te mau parau tumu matamua o te evanelia i te mau taata atoa, mai tei ravehia i mutaa ihora a fâ mai ai te Fatu Iesu Mesia e te tahi atu mau taata i te fenua nei. E no te aha mai te reira ai? No te mea eita e nehenehe e faaite i te ture a te Atua i te feia o te ore e farii ia arataihia ratou e te varua o te heheuraa.¹⁰

Eita ta te Atua e nehenehe e patu i te hoê basileia i ni‘a i te fenua nei maori râ, e ekalesia ta’na e vai nei, e te taata atoa tei fa-rii i ta’na ture e ua hinaaro ia auraro i te reira; e na roto i te reira huru faanahonahoraa i te taata, tei haaputuputuhia mai roto mai i te mau taata atoa o te fenua nei i raro a‘e i te aratairaa a te hoê taata tei faauruhia e te Atua, oia te auvaha parau o Iehova i to’na ra mau taata; Te parau nei au e, na roto i te hoê faanahonahoraa mai te reira te huru, e nehenehe te Fatu te Atua e faaite mai ia’na, e nehenehe te mau ture o te oraraa ia faaitehia mai, e nehenehe ta te Atua e haamau i te mau parau tumu o te ra‘i i ni‘a i te fenua nei, e ia haapa‘ohia te hinaaro o te Atua i ni‘a i te fenua nei mai tei te ra‘i atoa ra.¹¹

E faati‘a hope roa Iesu Mesia i To’na basileia e e faatere Oia i ni‘a i te fenua nei.

“Ia tae to oe ra hau.” [Mataio 6:10]. … Ta Iesu ïa i haapii i ta’na ra mau pìpì a haere mai ai ratou ia’na ra, ma te parau mai e, a haapii mai na ia matou i te pure. … Ia tae to oe ra hau. Tei hea hau? Eaha te auraa no te parau ra “Ia tae to oe ra hau”? Te auraa ra, te aratairaa ïa a te Atua. Te ture ïa a te Atua. Te faatereraa ïa a te Atua. Te mau taata ïa tei faaroo e tei hinaaro papu i te faaroo e i te haapa‘o i te mau faaueraa a Iehova. Te vairaa ïa hoê Atua tei hinaaro ia aratai e ia faatere e ia turu i to’na mau taata. Ia tae to oe ra hau, ia faati‘ahia ho‘i ta oe faatereraa hau, e ia haapiihia ho- ‘i i te taata nei te mau parau tumu o te parau mau mure ore mai tei te ra‘i ra; e ia hope ho‘i te reira i te haapiihia i te taata nei, ia auraro ïa ratou i te reira mau ture e i te reira faatereraa hau, e ia mata‘u ho‘i ratou i te Atua, na roto i te haapa‘oraa i ta’na mau faaueraa e ia auraro i ta’na faatereraa. Ia tae to oe ra hau, ia ti‘a i te ano‘ino‘i, te ino, te ohipa ti‘a ore, te taparahi taata e te haamaniiraa toto e vai nei i roto i te taata nei, ia ti‘avaruhia, e ia parahi mai te parau mau e te parau ti‘a, te maitai, te aroha e te here i roto ia tatou nei mai tei vai i roto i te aau o te mau Atua ra.¹²

Ua faaite au e … e faati‘a-mau-hia te basileia o te Atua i ni‘a i te fenua nei. E ere ïa i te hoê moemoea mai ta te tahi mau taata ite orama e parau ra, e ohipa papu râ. Mai tei parauhia i mutaa ihora, e faati‘a-mau-hia te reira i ni‘a i te hoê fenua mau, e tane, e vahine, e e tamarii mau to roto i te reira; tei roto atoa i te reira te feia mo‘a ora o te haapa‘o i te mau faaueraa a te Atua, e te mau tino ti‘a faahou mai roto mai i to ratou mau menema ra, e a ora ai i ni‘a i te fenua nei. E riro te Fatu ei arii i ni‘a i te fenua atoa, e e ite te mau taata atoa i raro a‘e i ta’na faatereraa, e te mau nunaa atoa i raro a‘e i te ra‘i nei, i to’na mana, e e auraro ratou i ta’na sepeta ra. Te feia e tavini ia’na ma te parau ti‘a, e paraparau ratou i te Atua, e ia Iesu; e roaa ho‘i ia ratou te utuuturaa a te mau melahi, e ite ratou i to mutaa ihora, to teie tau, e to a muri a‘e; noa’tu râ i te reira, te mau taata tei ore e haapa‘o maite i ta’na mau ture, e tei ore i haapii-maite-hia i ta’na mau fafauraa, e auraro ratou i ta’na faatereraa hau e hope roa. No te mea, o te faatereraa ïa a te Atua i ni‘a i te fenua nei, e faatere-maite-hia ta’na mau ture, e e titau oia i te mau nunaa o te ao nei ia haapa‘o, inaha, e mana to’na ia na reira. Eita o Satane e vaiihohia ia faatere i te taata, i te mea e, o te Fatu te Atua te arii i ni‘a i te fenua atoa, e horo‘ahia te basileia e te teiteiraa o te basileia i raro a‘e i te ra‘i taatoa, i te feia mo‘a ra.¹³

Eaha te tupu mai, ia faati‘a-faahou-hia te basileia o te Mesia, e aore râ, te faatereraa a te Atua i ni‘a i te fenua nei? … E mou te tama‘i, te haamaniiraa toto, te oto, te ma‘i, e te hara, e e tae mai te hoê basileia no te hau, te paieti, te parau ti‘a, te oaoa, e te auhune. E faaho‘ihia te fenua e te taata i roto i to ratou ra hanahana tumu e i roto i to ratou maitai tumu ra; oia ho‘i, e faaho‘ihia te mau mea atoa i roto i to ratou ra huru mau mai tei parauhia mai e te mau peropheta atoa mai te omuaraa mai o te tau [a hi‘o Te mau Ohipa 3:21].¹⁴

Ua ti‘aoro te Fatu i To’na Feia Mo‘a ia tauturu i te faati‘araa i To’na basileia.

Ua haere mai te hoê taata no Farani e paraparau ia‘u, ma te ui mai e, te feruri ra anei tatou te feia mo‘a e faatupu i te hoê ohipa rahi i te ao nei? Ua parau atura vau ia’na e, ua haere mai tatou no te poro i te evanelia i to te atoa nei; e ua tae a‘e na te reira i te mau hopea o te fenua nei. E ere ïa i te hoê ohipa e rave-noahia i roto i te hoê peho iti, e ti‘a râ te reira i te vairaa e tae roa’tu i te ora mure ore. E ho‘i faahou te reira i te ao mure ore, i ni‘a i te feia tei pohe e rave rahi tauatini matahiti i mahemo ra, no te faaho‘i faahou mai ia ratou i roto i te basileia o te Atua. E ninii mai ho‘i te reira i te mau haamaitairaa i ni‘a i te mau u‘i a muri a‘e, e i te pae hopea ra, e amui te ra‘i e te fenua, e na tatou te reira e rave na roto i te i‘oa o te Atua o Iseraela. E tauturu mai te mau mana o te ra‘i ia tatou, e e amui atoa mai to tatou mau hui metua i roto i te mau ao mure ore ra ia tatou nei; no te mea, ua fafauhia mai te ora ia tatou, oia ta tatou e farii nei i teie nei, e tae noa’tu i te ora a muri a‘e.

A tahi nei tatou a haamata ai i ta tatou ohipa hanahana. I roto i te roaraa o te tau, e rave tatou i te mau mea atoa ta to tatou mau hui metua i parau ra. … E te mau taeae e, e haere tatou i mua, ma te hi‘o ore i to tatou iho hinaaro, e hi‘o râ e nahea ia faatupu i te mau ohipa hanahana a te Atua. … E haere te puai o te parau mau i mua, e tapuhia te taamu o te poiri, e patuhia te basileia o te Atua, aita ho‘i e mana e nehenehe e tapea i te reira.¹⁵

E rave rahi matahiti te parauraahia tatou no ni‘a i te ture e te faatereraa hau o te basileia o te Atua e to’na faati‘araahia i ni‘a i te fenua nei, na roto i te hau e te paieti; e no ni‘a atoa i te taime e faaroohia ai te mau mea atoa tei hamanihia i ni‘a i te ra‘i ra, e to te fenua nei, e to raro i te repo, e to te moana, e to roto ia ratou atoa ra, i te na ôraa e, “O te haamaitai, e te tura, e te hanahana, e te mana, ei ia’na ïa ei tei parahi i ni‘a iho i te terono ra, e ei te Arenio, e a muri noa’tu.”(Apokalupo 5:13). Ua parauhia teie mau mea ia tatou, tera râ, e ohipa rahi te toe nei ia rave mai teie taime e tae atu i taua taime rahi ra no a muri a‘e. E ere ïa i te faaroo noa, e titauhia râ te ohipa; e titauhia ia tatou ia horo‘a ia tatou iho, te taata tataitahi e te mau taata atoa, e faufaa rahi ho‘i to taua ohipa ra.¹⁶

E misioni rahi tei titauhia ia tatou ia rave—e tamata tatou i te faatere ia tatou iho mai te au i te mau ture o te basileia o te Atua, e te ite nei tatou e, o te hoê ïa o te mau ohipa fifi roa ia rave, ia haapii i te faatere ia tatou iho, i to tatou hiaai, i to tatou huru, i ta tatou mau peu, i to tatou mau mana‘o, i to tatou oraraa, to tatou varua, ta tatou hi‘oraa, e ia tuu i to tatou mau hinaaro atoa i raro a‘e i te ture o te basileia o te Atua e i raro a‘e i te varua o te parau mau. E ohipa faufaa te faaôraa ia tatou i roto i te parau no te paturaa i te basileia o te Atua—inaha, ua haamata te reira i rotopu ia tatou nei.¹⁷

E mata‘u i te Atua; a rave i te ohipa paieti; a haapa‘o i te faaroo; a haapa‘o i te mau faaueraa e a faahaehaa ia outou i mua ia- ’na; ei hoê outou, e ia hoê to te autahu‘araa mo‘a e o vetahi ê atoa, e te parau atu nei au ia outou na roto i te i‘oa o te Atua e, e ti‘a o Ziona e e anaana ho‘i, e ei ni‘a ia’na te mana o te Atua e vai ai; e e itehia to’na hanahana, e i reira tatou e oaoa ai i te îraa o te mau haamaitairaa o te evanelia o te hau; i reira ho‘i te ohipa a te Atua e haere ai i te rahi e riro mai ai te mau basileia o te ao nei ei mau basileia no to tatou Atua e ta’na Mesia [a hi‘o Apokalupo 11:15], i reira e faaroohia ai te mau mea atoa tei hamanihia i ni‘a i te ra‘i ra, to te fenua nei, to raro i te repo, i te na ôraa e, O te haamaitai, e te hanahana, e te tura e te haapoupou e te mana, te puai e te teitei e te mana faatere, ei ia’na ïa ei tei parahi i ni‘a iho i te terono ra, e ei te Arenio, e a muri noa’tu. [a hi‘o Apokalupo 5:13].¹⁸

Te mau Mana‘o Tauturu no te Haapiiraa e te Aparauraa

No te aha Iesu Mesia i riro ai ei taata faufaa ti‘a e ei faatere no te fenua nei? Eaha ta taua iteraa ra e faatupu i ni‘a i to outou auraa e O’na?
No te aha e mea titauhia ia faaho‘i faahou mai i te Ekalesia no te faati‘araa i te basileia o te Fatu i ni‘a i te fenua nei? Ei melo no te Ekalesia, eaha te ite tei noaa ia outou no ni‘a i te faaineineraa ia ora i pihaiiho i te Fatu? Nahea ta tatou taviniraa i roto i te Ekalesia i te tauturu i te paturaa i te basileia o te Fatu?
I ta oe hi‘oraa, nahea te tupuraa o te Ekalesia i te rahi i te patu-papu-raa i te basileia o te Atua i ni‘a i te fenua nei? Eaha te ti‘a ia outou tataitahi, e ia outou te utuafare, ia rave no te tauturu i te paturaa i te basileia o te Atua i ni‘a i te fenua nei?
Te parau ra te Peresideni Taylor i te mau haamaitairaa rahi e faana‘ohia e tatou ia ho‘i faahou mai te Faaora e faatere i To’na basileia i te tau Mileniuma. Eaha te huru o te oraraa i ni‘a i te fenua nei i roto i te Mileniuma? (A hi‘o atoa PH&PF 29:11; 43:29–32; 101:22–35; Hiroa Faaroo 1:10).
Te parau rahi a te Peresideni Taylor oia ho‘i, “Te basileia o te Atua, e aore râ, aore roa’tu!” O vai te mau taata ta outou i ite teie atoa to ratou mana‘o tumu? Eaha te auraa o teie parau? Mai te mea e, e faariro tatou i teie parau na tatou atoa te mau melo o te Ekalesia, eaha te ohipa e tupu mai?

Te mau Papa‘iraa mo‘a: Daniela 2:26–45; Mataio 6:33; PH&PF 45:1; 65; 104:58–59