Pene 3

“E Aroha’tu Oe i To Taata-Tupu mai To Aroha ia Oe iho na”

I te mau taime atoa, e mea ti‘a ia tatou ia rave i te mau mea atoa e au i te oraraa a muri a‘e, ma te î i te hamani maitai, te here, te aroha, e te haamahuraa roa i te mau taata atoa.¹

No Roto mai i te Oraraa o John Taylor

Ua haapii pinepine te Peresideni John Taylor i te Feia Mo‘a i te faufaa eiaha i te ti‘aturi noa, te faaohipa-atoa-raa râ i te parau taparu a te Faaora ia aroha’tu i to tatou taata-tupu. “E aroha outou ia outou iho,” ta’na ïa faaitoitoraa, “e a rave i te ohipa parau ti‘a, e a aupuru i te mau taata atoa, e a faatupu i te oaoa i roto i te mau taata atoa. Ta te Atua ïa e rave nei.” ² E ti‘aturi rahi to’na i roto i te Varua no te faatupu i roto ia tatou i te here ia vetahi ê. Ua haapii oia e, “ia roaa ia outou te Varua o te Atua, e î outou i te hamani maitai, te aroha, te haamahuraa roa, i reira te hinaaro e tupu ai i roto ia outou, i te roaraa o te mahana, ia horo‘a’tu i te mau taata atoa i te mau mea ta outou iho e titau ra. E hinaaro outou i te taatoaraa o te mahana, e rave i ni‘a i te mau taata atoa i te mau mea o ta outou e hinaaro ia na reira atoa mai ratou i ni‘a ia outou.”³

Mai to’na bapetizoraahia i te matahiti 1836 e tae roa’tu i to’na poheraa i te matahiti 1887, ua ite o John Taylor i te mau hamani- ino-raa e rave rahi, e te tahi mau raveraa ti‘a ore i ravehia i ni‘a i te Feia Mo‘a. Ua ite oia i te mau pŭpŭ taata iino i te ti‘avaruraa i te mau melo o te Ekalesia i rapae au i to ratou mau ti‘ahapa; ua ite mata oia i te pohe maratiri o Iosepha raua o Hairamu Semita (e ua pepe ino roa atoa oia i roto i taua aroraa ra); e tei rotopu atoa oia i te Feia Mo‘a i Utaha a tamau noa ai ratou i te hamani-ino-hia. Noa’tu râ i te reira, ua faaitoito tamau noa oia i te mau melo o te Ekalesia ia here i te mau taata atoa. I roto i te hoê a‘oraa na’na i Utaha i te tau a ti‘a ai oia ei Peresideni no te Pŭpŭ Tino Ahuru e Ma Piti, ua parau oia e:

“Ua ani o Davida i te Atua ia taora oioi atu Oia i to’na mau enemi i raro i hade ra [a hi‘o Salamo 55:15]. I to Iesu faatatauro-raahia, i roto i te mamae rahi o te pohe, na ô a‘era oia, ‘E tau Metua, e faaore mai i ta ratou hara, aore ho‘i ratou i ite i ta ratou e rave nei.‘ [Luka 23:34]. E mea au roa a‘e na‘u teie pure i te tahi atu. … Teie te huru mana‘o e ti‘a ia vai i roto ia tatou. Ia vai te reira huru mana‘o te tahi i te tahi e ti‘a ai, e ia hamani maitai tatou te tahi i te tahi, eiaha râ e faatupu i te riri u‘ana. … Te faaroo nei au i te hoê taata ia parau i te tahi mau taime e, ‘Mea riri roa na‘u tera taata.‘ No te aha, aita vau i ite i te hoê taata ta‘u e riri nei i roto i te ao nei. Te faaueraa, maori râ, e here outou ia outou iho.” ⁴

Te mau Haapiiraa a John Taylor

E faaite tatou i te here te tahi e te tahi ei mau taeae e ei mau tuahine

O te Atua to tatou Metua, o tatou Ta’na mau tamarii, e e mau taeae ana‘e tatou; e feruri tatou e e haa tatou ei mau taeae, e ia faaitoito ho‘i tatou i te tavini i te Fatu to tatou Atua ma to tatou aau atoa, to tatou mana‘o atoa, to tatou varua atoa e to tatou puai atoa, e ti‘a atoa ia tatou i taua taime ra, ia aroha’tu i to tatou taata- tupu mai ia tatou iho nei; e feruri tatou i to’na maitai, to’na oaoa e to’na ora, e i te mau mea atoa e nehenehe e haamaitai ia’na i te pae tino e i te pae varua.⁵

Mai te mea e, e tamata tatou i te taviri i to tatou taeae, nahea ïa te Atua i te tauturu mai ia tatou, no te mea, e tamarii atoa ho‘i oia na to tatou Metua i te Ao ra mai ia tatou atoa nei. E no te mea ho‘i e, e tamarii atoa taua taeae ra Na’na, te feruri atoa ra Oia i to’na maitai, e mai te mea e, e imi tatou i to tatou maitai i ni‘a i te tua o te hoê tamarii a te Fatu, e mauruuru anei Oia ia tatou? … Te hinaaro nei tatou ia riro tatou ei feia parau ti‘a e te maitai te tahi e te tahi. “E e hinaaro oe i to Atua ia Iehova ma to aau atoa, e ma to varua atoa, e ma to mana‘o atoa, e ma to puai atoa.” E ua parauhia ia tatou e, o te ture matamua teie. E mai te reira atoa ho‘i te piti, oia ho‘i, “E aroha’tu oe i to taata-tupu mai to aroha ia oe iho na.” [Mareko 12:30-31.] Te na reira ra anei tatou? Mai te mea e, te na reira nei tatou, aue ïa tatou i te oaoa ia ti‘a’tu tatou i mua i te Fatuu. …

… E ora tatou i te hoê oraraa e nehenehe ai to tatou here te tahi i te tahi ia tupu i te rahi i te mau mahana atoa, eiaha râ ia haere i te iti, e ia vai te aroha i roto i to tatou aau ia nehenehe ia tatou ia tauturu te tahi i te tahi i te faaoromairaa i te mau ma‘i, ia feruri e, e mau tamarii tatou na te Atua i te tautooraa ia haapa‘o i ta’na parau, to’na hinaaro e ta’na ture. I reira, a hamani maitai ai i te mau taata atoa.⁶

Ia î tatou i te aroha, te aroha taeae e te marû e te here te tahi i te tahi, e ia here i te mau taata atoa. Ei mana‘o to tatou mai to tatou Metua i te ra‘i ra.⁷

A imi i te maitai o te tahi e te tahi, mai te au i tei papa‘ihia: “Ei atiraa aroha mau to outou ia outou iho, i te aroha taeae ra; i te faaturaraa’tu te tahi i te tahi;” [A hi‘o Roma 12:10] Te parau nei outou e, e mea teimaha ïa; oia ïa, tera râ, e mea ti‘a ia outou ia na reira. Ua faauehia ia tatou ia aroha’tu i to tatou taata-tupu mai to tatou aroha ia tatou iho. Mai te mea e, e nehenehe ta tatou ia na reira, e ia hau atu to tatou au i to tatou taata-tupu ia tatou iho, e mai te mea e, te vaira te tahi maitai iti, a vaiiho atu no ratou, aita ïa tatou e faati‘a ra i te ture e te mau peropheta ana‘e ra, i te evanelia atoa râ. E aupuru ana‘e i te varua here e te hamani maitai, e e faaore i te mau mea au ore.⁸

E tauturu te evanelia ia tatou ia aupuru i te here e te aau hoê.

Na te haapa‘oraa ta tatou i farii, e haaparaparau nei ia tatou te tahi e te tahi, e e tauturu nei ia tatou ia here te tahi e te tahi, e te hinaaro nei au ia vai te tahi maa vahi iti o te reira huru i rotopu ia tatou, e ia maitai rii atu â ta tatou hereraa te tahi e te tahi, e ia rahi rii atu â ta tatou imiraa i te maitai o te tahi e te tahi. Te hinaaro nei au ia matau maitai tatou i to tatou mau taeae, e ia î i te hamani maitai e te marû te tahi e te tahi. Te hinaaro nei au ia vai tamau noa taua aroha taeae ra, e ia parare, e ia tupu i te rahi, ia tahe, mai roto mai i te tumu o te ora—no ô mai i te Atua ra, mai roto mai i tera aau e tera aau, a niniihia ai te hinu mai tera uaua e tera uaua, e ia hoê te au maite, te maitai, te hamani maitai e te here i rotopu ia tatou. Tera ïa ta te evanelia e rave no tatou mai te mea e, e vaiiho tatou ia’na ia rave.⁹

I roto i te hoê amuiraa [na te Ekalesia] i te tahi tau taime i mairi a‘e nei, ua tae mai e piti ahuru ma pae hau. Ua vai anei te feruriraa taa‘e i rotopu i teie mau taata rau? Aita.

Aita i maoro a‘e nei, i to‘u paraparauraa i te hoê taata no ni‘a i te tahi mau fifi e tupu ra i rotopu i te nunaa Peretane e te nuna Irirane, ua parau vau ia’na e, e mea hairiiri mau taua mau huru feruriraa ra. Ua parau atoa vau ia’na e, oia mau, e piti opu taata ratou, e eita ratou e nehenehe e amui, e Irirane te tahi e Peretane te tahi, e aita e tu‘ati to ratou au e to ratou feruriraa te tahi e te tahi. E mea taa‘e to ratou mau mana‘o e to ratou mau feruriraa, e mea taa‘e atoa ta ratou mau peu e to ratou huru. E parau mau roa te reira e tae roa mai i teie nei. Tera râ, e o tatou nei? Ua haaputuputuhia tatou i teie vahi na roto i te faaururaa a te Varua Maitai, e mai ta‘u i parau na, na te reira e faatupu i te feruriraa e te varua hoê, te tahoêraa e te au maite o te ore ho‘i e iteahia i te ao nei, e ua parau Iesu, “O te mea teie e ite ai te taata atoa e, e pipi outou na‘u, ia aroha outou ia outou iho.” (Ioane 13:35). …

Eaha to outou mana‘o e te mau taeae? E nunaa Suede anei tatou; e Peretane anei; e nunaa Etoti‘a anei, e Swiss anei e aore râ, e Horane? Aita; Te Varua o te Atua ta tatou i farii na roto i to tatou haapa‘oraa i te mau faaueraa o te evanelia, ma te fanau-faahou- hia i te pape e te Varua, na’na i faariro ia tatou ei hoê mana ‘o, hoê faaroo, hoê bapetizo; aita to tatou e ti‘araa hau e aore râ, e tatuhaaraa i rotopu ia tatou.¹⁰

Aita tatou i aifaito. E mea taaê to tatou mau hoho‘a mata, e mea taaê ta tatou mau peu, noa’tu e, hoê â materia i hamanihia ai tatou, e hoê a ho‘i huru faanahonahoraa ta tatou. No te taaê rahi tatou te tahi e te tahi, aita e nehenehe ia ite e piti taata aifaito maitai. Aita vau e hinaaro nei ia feruri te mau taata atoa mai ta‘u e feruri nei, te vaiiho nei au i te taata tataitahi ia feruri i teie mau mea mai ta ratou e hinaaro; te hinaaro nei râ vau ia ite i te mau taata atoa ia rave i te maitai e ia ati atu i te Atua ra. Area i te tahi atu mau ohipa rii na‘ina‘i e rave rahi ra, aita ïa vau e tau‘a rahi roa i te reira.¹¹

E faaite tatou i te here na roto i te aupuru-itoitoraa ia vetahi ê.

Mai te mea e, te imi nei te mau taata maitai i te mau mea e titauhia no te oraraa, te parau ra te mau papa‘iraa mo‘a e, “O te taata râ tei ia’na te tao‘a o teie nei ao, e ite atura oia i ta’na taeae i te atiraa, pipiri atura to’na aau ia’na, teihea te hinaaro i te Atua i te parahiraa i roto ia’na?” [A hi‘o 1 Ioane 3:17.] E mea ti‘a ia tatou ia imi i te rave‘a ia fana‘o te mau taata atoa i teie mau meau. … Eiaha tatou e faariro ia ratou ei feia veve; e faariro râ tatou ia ratou ei mau taeae e ei mau tuahine, ei mau tane e ei mau vahine maitai e te hi‘oraa maitai; e hi‘o tatou e, te vaira anei te mau mea e titauhia no ratou.

Ua ite a‘e nei au i te tahi mau taata te tuu nei i te turi i raro a pure ai i te Atua, ma to ratou aau atoa, ia faaamu Oia i tei veve e tei vai tahaa noa. Ia‘u nei, eita roa’tu vau e ani i te Fatu ia rave i te hoê mea eita vau iho e rave. Mai te mea e, te ite ra tatou i te taata veve e tei vai tahaa noa, e haere ana‘e tatou e tauturu ia ratou. … E mai te mea e, te vaira te taata i roto i te fifi, a imi ia ratou e a horo‘a’tu ia ratou i te mau mea e titauhia no to ratou maitai e to ratou oraraa oaoa. E haamaitai te Atua ia tatou ia na reira tatou.

E mea maitai a‘e paha ia rave outou i te hoê pute faraoa ota, te tahi i‘o puatoro, … te tihota, te pata e te “fromage”, te ahu, te mori arahu, e te mau mea atoa e au no te oraraa, i reira e tamata ai i te faaoaoa i te taata, eiaha râ ta outou mau pure e rave rahi i te Fatu ra no te aniraa i te reira; e ite atoa mai oia i te reira. Tera to’na raveraa mau. Ia hinaaro tatou ia farii i te haamaitairaa, a tamata i te opere i te reira, i reira te Atua e haamaitai mai ai, e e aratai mai ai ia tatou na te e‘a hau.¹²

I te hoê mahana, haere maira te hoê taata ia Iesu ra e ui maira ia’na, teihea te parau rahi i roto i te ture. Pahono atura te Faaora ia’na: “Hinaaro oe i to Atua ia Iehova ma to aau atoa, e ma to varua atoa, e ma to mana‘o atoa. O te ture matamua teie e te hau i te rahi. E mai te reira atoa te piti; E aroha’tu oe i to taatatupu mai to aroha ia oe iho na.” [Mataio 22:37–39.] E nehenehe anei ta tatou e na reira? E mea teimaha roa i te tahi taime, e ere anei? Pinepine tatou i te feruri e tuu e piti tara i roto i to tatou pute, i te tuu hoê i roto i te pute o to tatou taata-tupu, e ere anei? E hinaaro anei tatou e piti e aore râ, e toru puatoro na tatou, i te horo‘a hoê na to tatou taata-tupu? …

A poihere i te mau taata atoa, e a rave i te ohipa tano i ni‘a i te mau taata atoa, e a faatupu i te varua hamani maitai i ni‘a i te mau taata atoa. E ia ite atu outou i ta te tahi taata animala i roto i te faaapu maa a te tahi taata, a haamana‘o i te maitai o te reira taata, e a haere a ume mai i te reira animala i rapae i te faaapu; e a tamata ia haafaufaa i te maitai o to outou mau taata tupu e a imi i te rave ‘a ia oaoa atoa ratou mai ia outou na; i reira te Atua e haamaitai mai ai ia tatou, e i reira tatou e haamaitai ai te tahi e te tahi.¹³

E faaite tatou i te here na roto i te faaoreraa i te hapa a vetahi ê, e na roto ho‘i i te titauraa i ta ratou faaoreraa hapa.

A aupuru te tahi e te tahi. Ua hara anei outou te tahi i te tahi? A haere atu a faaafaro i te reira. Ua taviri anei outou te tahi i te tahi? A haere atu a faatiti‘aifaro i te reira. Ua parau anei outou i te parau tano ore i to outou taeae e aore râ, i to outou tuahine? A haere atu a faaite i to oe hape, e a ani ia faaore mai oia i ta oe hapa, ma te fafau e, eita oe e na reira faahou. I reira oia e parau mai ai e, “Oia mau, ua parau, atoa vau i tera e tera parau i te tahi a‘e nei mahana ra, e nehenehe anei ta oe e faaore mai i ta‘u hapa?” Aue ïa huru raveraa i te faahiahia e te maitai rahi no to tatou ti‘araa ei feia mo‘a no te Atua, i te haaputu noa i te reira mau mana ‘o iino i roto i te aau.¹⁴

E aupuru ana‘e tatou te tahi e te tahi ma te marû, e e faatura ana‘e tatou i to te tahi roo e to te tahi roo, e e feruri tatou i te maitai o te tahi e te tahi, e a aupuru tatou i te mau taata atoa mai ia tatou e hinaaro i te Atua ia na reira ia tatou. E i reira, ia haere atu tatou i te Fatu ra, e nehenehe ta tatou e parau e, “E te Metua, e faaore mai i ta matou hara, mai ia matou atoa e faaore i tei hara ia matou nei,” [a hi‘o Mataio 6:12, 14] no te mea, ia ore tatou e faaore i te hara a to tatou taeae, nahea ïa to tatou Metua i te Ao ra e faaore atoa mai ai i ta tatou hara? Mai te mea e, ua fifi rii ra tatou e to tatou taata-tupu, e tautoo tatou no te faaafaro i te reira. A parau e, “Ta‘u taeae, e aore râ, ta‘u tuahine, te pe‘apea nei to‘u mana‘o no ni‘a i te tahi parau ta‘u i parau e aore râ, te tahi ohipa ta‘u i rave no ni‘a ia oe, e aore râ, te tahi ohipa ta‘u i rave i muri i to oe tua, e te haere mai nei au no te faaafaro i te reira, no te mea, te opua nei au ia rave i te ohipa maitai, taaê noa’tu te ohipa ta te taata e rave.”¹⁵

Mai te mea e, na roto i te hoê opuaraa ti‘a ore, ua imi te taata i te ino no tatou, e imi atoa anei tatou i te ino no ratou? Aita, e tamata râ tatou i te imi i te mau maitai atoa no ratou. E parau paha tatou e, “E ere pai mea na reira.” No reira, e taui ïa tatou i to tatou huru natura taata, e e rave i te aroha. Te parau ra Iesu e, “Ua faaroo ho‘i outou e i parauhia mai i tahito ra, E aroha’tu oe i to taata-tupu, e e riri atu i to enemi. Te parau atu nei râ vau ia outou, E aroha’tu i to outou mau enemi, e faaora’tu i tei tuhi mai ia outou, e hamani maitai atu i te feia i riri mai ia outou, e pure ho‘i i te feia i parau ino mai e tei hamani ino mai ia outou,” … [Mataio 5:43–44.] Ia hope teie mau mea atoa i te ravehia e outou e i te haapa‘o ho‘i i te mau titauraa atoa o te ture, eaha atu â ïa o te titauhia ia outou na? Aore. …

… Mai te mea e, e fifi to‘u e te tahi atu taata, e rave au i te afaraa o te hopoi‘a, oia ïa, e rave au e toru i ni‘a i te maha o te hopoi‘a, e aore râ, e rave au i te taatoaraa. E faahaehaa vau ia‘u; E parau vau e, aita vau e hinaaro i te pe‘apea, te hinaaro nei au ia riro ei taata Mo‘a. Ua opua vau ia tamâ ia‘u, e ia vai viivii ore noa, ia faaite i te autaeae, e ia haapa‘o i te mau ture a te Atua i ni‘a i te fenua nei, ia roaa te mau terono, te mau hau hui arii, e te mau mana faatere i roto i te mau ao mure ore, e eita vau e vaiiho i te mau ohipa faufaa ore ia faaapiapi i ta‘u mau tautooraa. Te titau nei au i te ora, i te ora mure ore, e i te faateiteiraa mure ore i roto i te basileia o te Atua.¹⁶

“E faaore mai i ta matou hara, mai ia matou atoa e faaore i tei hara ia matou nei.” Te feruri tamau ra anei outou i te reira? Te tuturi nei tatou i raro e e rave rahi o tatou o te feruri nei e, e mau taata maitai tatou; tera râ, te vaira o Mea, e ere oia i te taata afaro roa, e aita vau e paraparau rahi faahou nei ia’na, no te mea, ua rave oia i te ohipa ino i ni‘a ia‘u, e te hinaaro nei au ia faautuamaitai-hia oia, tera râ, e te Atua, e faaore anei oe i ta‘u mau hara? E na reira vau, mai te mea e, e faaore atoa oe i te hara a to taeae, tirara atu ai, te na reira maira te Fatu. “E teie nei ia hopoi oe i ta oe tao‘a horo‘a noa i te fata ra, e ua mana‘o ihora oe i reira, e e hara ta to taeae ia oe na; e vaiiho atu i to tao‘a i mua i te fata ra, e mata na i te haere e faite i to taeae, e haere a hopoi ai i ta oe tao‘a.” [Mataio 5:23–24.] Ia oti teie ture i te haapa‘ohia, i reira tatou e parau ai e, e faaore mai i ta matou hara, mai ia matou atoa e faaore i tei hara ia matou nei.

I roto i to tatou huru i teie mahana, ahani te Fatu e pahonoraa mai na i ta tatou mau pure, e rave rahi o tatou aita e faaorehia te hara. Ia hinaaro tatou i te mau taata atoa ia riro ei feia mo ‘a maitai, ei feia mo‘a maitai atoa tatou iho e ti‘a ai. Te taata e parau atu i te tahi e, “Eiaha e eia,” eiaha atoa oia iho e eia e ti‘a ai. O outou o te haapii nei i to outou taeae eiaha e parau i te parau ino no to’na ra taata-tupu, te haapae atoa ra anei outou iho i te reira peu? …

E rohi tatou no te maitai o vetahi ê, e ia vai te au maite i rotopu i te tahi e te tahi. Ua titauhia ia tatou ia riro ei mau taeae i roto i te ekalesia e i te basileia o te Atua, ma te au-tahi-maite-hia i te mau taura paari o te evanelia mure ore, eiaha no teie noa oraraa, no te oraraa râ e a muri noa’tu. No reira, te mau ohipa atoa ta tatou e rave, ia ravehia ïa no taua hopearaa ra, ma te niuhia i ni‘a i te mau parau tumu o te parau ti‘a e te auhoaraa.¹⁷

E pee tatou i te hoho‘a o te Faaora i roto i te parau no te here.

E mea ti‘a i to tatou mau mana‘o no ni‘a i to te ao nei, ia riro atoa mai to Iesu i ni‘a ia tatou nei. Ua imi oia i to ratou maitai, e mai te reira atoa ta tatou haaraa e ti‘a ai— “Ei hau to teie nei ao, e ia ite auhia mai te taata nei.” [A hi‘o Luka 2:14]. E imi tatou i te oaoa e te maitai no te hua‘ai taatoa o Adamu, ma te hi‘o ore o vai ratou e eaha to ratou huru.¹⁸

Mai te mea e, ua rave tatou i te tahi mau ohipa ino rii, eita te Faaora e rave mai ta te taata maa, e te tahoo, i te tairiraa i te tahi atu taata. Ua î râ oia i te hamani maitai, te haamahuraa roa, e te faaoromai, e e hamani maitai rahi to’na e te auraro i te mau taata atoa. Teie te huru o te mau mana‘o e ti‘a ia vai i roto ia tatou e ia faatere ia tatou; teie te mau parau tumu, e teie ho‘i te huru varua e ti‘a ia tura‘i i te mau peresibutero atoa i Iseraela nei; e na roto atoa i te reira e faatere ai ratou i to ratou oraraa e i ta ratou mau ohipa.¹⁹

Mai te mea e, ua ti‘a ia Iesu ia faaoromai maite i te mau tahitohitoraa e te mau faahapahaparaa a te taata i ni‘a ia’na, a ora ai oia i ni‘a i te fenua nei; mai te mea e, tei roto ia tatou nei te mau haapiiraa tei haapiihia mai e A‘na ra, e nehenehe atoa ïa ta tatou e poihere i taua mau mana‘o teitei ra e te maitai tei roto i To’na aau. …

Ua haere mai Iesu i ô nei mai te au i te faanahonahoraa e te opuaraa faataahia a te Atua no te mau taata atoa nei, ei Tamaiti Fanau Tahi na te Metua, ma te î i te aroha e te parau mau. Ua haere mai Oia no te pŭpŭ Ia’na iho ei taraehara, te taata parau ti-‘a no te feia parau ti‘a ore; no te faatupu i te mau titauraa o te hoê ture i ofatihia, i te mea e, aita ho‘i i ti‘a i te taata nei ia faatupu i te reira, no te faaora ia ratou i te hi‘araa, e i te mana o te pohe tei tae mai i ni‘a ia ratou na roto i te ofatiraahia te hoê ture, e Na’na iho … i pŭpŭ ia’na, te Tamaiti a te Atua, ei tusia taraehara no te mau hara a to te ao nei. E i To’na pato‘i-raa-hia, To’na faarue-raa-hia, To’na ti‘ahi-raa-hia, To’na tutuha-raa- hia, e To’na faa-ino-raa-hia; E i To’na faa-tatauroraa-hia, … [na ô a‘era] Oia, “E ta‘u Metua, e faaore mai i ta ratou hara, aore ho‘i ratou i ite i ta ratou e rave nei.” [Luka 23:34].

Ua haapii Oia e, ua papa‘ihia i roto i te ture i tahito ra e, “e mata ra, ei mata ïa hoo, e niho ra, ei niho ïa:” area râ, te na ô ra Oia e, “Te parau atu nei râ vau ia outou … E aroha’tu i to outou mau enemi, e faaora’tu i tei tuhi mai ia outou, e hamani maitai atu i te feia i riri mai ia outou, e pure ho‘i i te feia i parau ino mai e tei hamani ino mai ia outou; ia riro outou ei tamarii na to outou Metua i te ao ra: te faahiti nei ho‘i oia i to’na mahana i ni‘a i te ino e te maitai, e te haamairi mai nei oia i te ûa i ni‘a i te parau ti‘a e te parau ti‘a ore.” [A hi‘o Mataio 5:38–39, 44–45]. E mau parau tumu teie na te hoê Atua; e mau mana‘o teie mai te mea e, e poihere te taata i te reira, e huti mai te reira ia ratou mai raro roa mai i te vahi haapa‘oraa ore i reira ratou i te raveraa i te ohipa, a tuu ai ia ratou i te hoê vahi teitei a‘e, i te aparauraa i to ratou Metua i te Ao ra, e i te faaineineraa ia ratou ia riro ei apiti no te mau Atua i roto i te mau ao mure ore.²⁰

Te mau Mana‘o Tauturu no te Haapiiraa e te Aparauraa

I roto i ta tatou mau apitiraa ia vetahi ê, no te aha e mea faufaa ia haamana‘o e, e mau tamarii te mau taata na to tatou Metua i te Ao ra? Eaha te nehenehe ia tatou ia rave no te tauturu ia tatou “ia feruri mai to tatou Metua i te ra‘i ra te huru” i ni‘a ia vetahi ê? Eaha te tahi mau hi‘oraa ta outou i ite no ni- ‘a i te taata o tei “imi i te maitai no te tahi e te tahi”?
Nahea tatou ia ora ia “nehenehe i to tatou here te tahi i te tahi ia tupu i te rahi i te mau mahana atoa, eiaha ia haere i te itiraa”? Eaha te nehenehe ia tatou ia rave no te rave i te reira e to tatou utuafare?
E mea nahea to te evanelia tautururaa ia outou ia faatupu i te here ia vetahi ê?
Eaha ta outou mau rave‘a no te tauturu i te feia “ e imi nei i te mau mea e titauhia no te oraraa”? Nahea tatou e ite ai i te rave ‘a maitai a‘e no te pahono i teie mau huru?
Nahea tatou i te faatiti‘aifaro i te mau pe‘apea e o vetahi ê? Nahea e nehenehe ai ia tatou ia faarahi i to tatou here i te feia aita to ratou mana‘o e tu‘ati ra e to tatou?
No te aha e mea faufaa ia faaore i te hara a vetahi ê? Nahea te faaoreraa tatou i te hara a vetahi ê i te tauturu ia tatou ia farii i te Varua? Eaha te mea e tupu i roto ia tatou ia pato‘i tatou i te faaore i te hara a vetahi ê?
Eaha te rave‘a eiaha tatou ia faaino ia vetahi ê, e aore râ, eiaha tatou iho ia faainohia? Nahea tatou i te tapo‘i i to tatou aau teitei ia ani i te hoê taata ia faaore mai i ta tatou hara?
Eaha te mau hi‘oraa ta te Faaora i horo‘a mai no ni‘a i te here e te faaoreraa hara? E mea nahea to’na hi‘oraa i te tautururaa ia outou ia here e aore râ, ia faaore i te hara a vetahi ê?

Te mau Papa‘iraa mo‘a:Mataio 22:35–40; Ioane 13:34–35; Mosia 23:15; Moroni 7:45–48; PH&PF 12:8; 64:8–10

Savior teaching — Na roto i Ta’na mau haapiiraa e Ta’na mau ohipa i rave, ua faaite mai te Faaora ia tatou i te hoho‘a mau, e nahea ho‘i ia aroha i te tahi e te tahi.