Te Oraraa e te Tau Faatereraa a John Taylor

E68 matahiti to John Taylor a pohe ai o Brigham Young i te 29 no Atete 1877. I roto i na matahiti e toru i muri mai, na te Peresideni John Taylor i aratai i te Ekalesia i roto i te ti‘araa Peresideni no te Pŭpŭ Tino Ahuru Ma Piti Aposetolo. I roto i te hoê amuiraa rahi i te 10 no Atopa 1880, ua paturuhia oia ei peropheta, ei hi‘o, e ei heheu parau, e ei Peresideni no Te Ekalesia a Iesu Mesia i te Feia Mo‘a i te mau Mahana Hopea nei, ti‘araa o tei mauhia e a’na e tae roa’tu i to’na poheraa i te 25 no Tiurai 1887. I roto i te tau a Peresideni ai oia i te Ekalesia, e i roto atoa ho‘i i te tau a tavini ai oia ei Aposetolo, ua vai ineine noa o John Taylor no te haapii e no te paruru i te parau mau. I roto i te mau tau fifi mau i roto i te parau no te Ekalesia, ua riro oia ei pu no te puai rahi e no te aratairaa o te Feia Mo‘a.

Te Huru o te Peresideni John Taylor

Te parauhia ra e, e taata hi‘oraa maitai o te Peresideni Taylor, e ono avae [¹,83m] i te roa, e au to’na huru i to te melahi. E au to’na rouru mai te hiona te uouo, area to’na iri ra, e mea ravarava ïa. Ta’na mau peu, e mau peu tura ïa, no reira, “e ere ïa oia i te hoê taata e nehenehe noa te hoê hoa e tupa‘i atu i ni‘a i te tua, noa’tu e, e hoa rahi roa no’na, e aore râ, ia aroha rima ia’na ma te taviri haere i te rima; ua faito noa te au ore o te reira mau huru peu i mua ia’na i te au ore o te reira mau huru peu i mua i te hoê arii.” ¹ Noa’tu râ i te reira, e ere oia i te taata faateitei, e taata maitai râ, e te peu maitai, e te hoa i te mau taata atoa. “Te mau taata atoa o tei ti‘a tino roa’tu i mua ia’na, e aore râ, i ite atu ia’na i roto i te naho‘a taata, ua faaite te hoê mea i roto ia ratou e, tei mua ratou i te hoê taata faahiahia, te hoê taata hanahana e te faufaa.” ²

Teie te parau a Richard Burton, te hoê taata papa‘i buka Peretane, e e taata ratere atoa na te ao nei, i muri a‘e i to’na farereiraa i te Peresideni Taylor, “e taata itoito, e te hi‘oraa maitai, e taata ruau, e te mata rehu, te hoho‘a mata nehenehe, e te hoê rae aano.” ³ Ua papa‘i atoa te tahi atu taata papa‘i aamu e, “I to‘u farereiraa ia’na i te matahiti 1884, e 77 matahiti to Taylor tane i taua taime ra, ua ti‘a maira te hoê taata rouru uouo, e taata hi‘oraa maitai, ua tanotano noa te rahi, e te tino nehenehe, te hoho‘a mata ovaovao, te mata rehu, poopoo e te hi‘o hohonu, te hoê rae tuea e te aano, e na utu piri papu, e taata hi‘oraa pautuutu, e te huru oto rii, mai te itehia i ni‘a i te hoê taata o tei farerei i te mau ati e rave rahi.” ⁴

To’na apîraa

Ua fanauhia oia i te matahiti 1808 i Westmoreland i te pae apatoa-apatoerau no te fenua Peretane, e na metua haehaa to’na, e te maitai, e te here ho‘i, o tei haapii ia’na i te tai‘o e i te ti‘aturi i te Bibilia, i te ti‘aturi i te Atua, e i te ti‘a‘i i te Mesia. O James raua o Agnes Taylor to’na na metua, o tei bapetizo ia’na i roto i te Ekalesia no Peretane i muri noa a‘e i to’na fanauraahia mai. Na roto i te mau mea i haapiihia ia’na i roto i te Ekalesia Peretane, ua tupu i roto ia’na te hoê au rahi i te mau parau e te pehe mo‘a, i te haapiiraa bibilia e te pure omo‘e e i mua i te taata. Mai to’na tamariiraa mai â to John Taylor aupuru-maite-raa i te parau no te haamori e no te here i te Atua. “I te apîraa to‘u haapiiraa i te haafatata ia‘u i te Atua,” ta’na ïa parau i te Feia Mo‘a i te mau Mahana Hopea nei i to’na riroraa ei Peresideni no te Ekalesia. “E rave rahi taime to‘u haereraa i te hoê vahi, e ma te tapuni i muri mai i te hoê pu aihere, i reira vau e tipapa ai i mua i te Fatu e a ti‘aoro ai Ia’na ia aratai mai ia‘u. E ua faaroo Oia i ta‘u pure. … Tera ïa te huru o te varua i roto ia‘u a vai tamarii ai au. … Ua parahitamau-maite au i pihaiiho i te Atua; e te na reira noa nei â vau e tae roa mai i teie nei.” ⁵

I to’na tamariiraa, ua ite oia “i roto i te hoê orama, i te hoê melahi i ni‘a i te ra‘i, e te hoê pu i to’na ra vaha, i te faaotoraa i te hoê poro‘i i to te mau nunaa ra.” Noa’tu to’na taa ore i te parau tohu i roto i taua orama ra e tae roa’tu i to’na paariraa, ua parahi-tamaumaite oia i pihaiiho i te Atua i te roaraa o to’na tau apîraa. Ua papa‘i oia e, “I te tahi mau taime, o vau ana‘e anei, e aore râ, tei rotopu anei au i te taata, e mea pinepine au i te faaroo i te hoê pehe nehenehe, te marû, e te navenave, mai te huru ra e, na te mau melahi, e aore râ, na te mau tino taaê no te ra‘i e hauti ra.” ⁶

I te 16raa o to’na matahiti, ua faaru‘e oia i te Ekalesia no Peretane e ua tomo i roto i te faaroo Metoti. Hoê matahiti i muri iho, ua maitihia oia ei taata faaitoito, e aore râ, ei orometua, i roto i taua ekalesia ra—e mea varavara roa teie huru hopoi‘a i te horo‘ahia na te hoê taurearea. Ua riro to’na oraraa ei faaiteraa i to’na mata‘u ore i te mea e, ua niuhia te reira i ni‘a i te hoê ti‘aturiraa— ua niuhia taua ti‘aturiraa ra i ni‘a i to’na iho mau iteraa. I roto atoa i taua area taime ra o to’na oraraa, ua tupu te hoê mana‘o puai i roto ia’na e, ua pii te Atua ia’na ia poro i te evanelia i te hoê mahana i te Fenua Marite.

To’na Imiraa i te Basileia o te Atua

I te matahiti 1830, ua reva na metua o John Taylor e te tahi atu mau melo no te utuafare i Toronto, i te fenua Canada, area oia ra, ua faaea noa mai ïa i te fenua Peretane no te hoo i te fare faaapu a te utuafare, e no te faaoti maitai i te tahi atu mau ohipa a te utuafare. Ia oti te reira, ua faaru‘e atu oia i te fenua Peretane na ni‘a i te hoê pahi e fano ti‘a ra i te Oire no Niu Iota. I roto i to ratou tere, ua û ratou i te hoê vero rahi, e e rave rahi mau pahi o tei ino roa. Ua ti‘aturi te tapena e te feia faatere o te pahi e, e tomo ratou, tera râ, ua faaite maira te reo o te varua ia John Taylor e, “E haere oe i Amerita, i reira oe e poro ai i te evanelia.” Te faati‘a ra te Peresideni Taylor e: “No to‘u ti‘aturi papu i te fâ o to‘u oraraa, haere atura vau i rapae i te pahi i te maororaa pô, e, noa’tu te u‘ana rahi o te vero, ua vai te hoê hau rahi i roto ia‘u mai te huru ra e, tei te fare au i roto i te piha faafaaearaa i te parahiraa. Ua ite ihora vau e, e tae au i Amerita no te rave i ta‘u ohipa.” ⁷ Ua tae maite oia i Niu Iota, e i te tahi tau ava‘e i muri mai, ua tae roa oia i pihaiiho i to’na na metua i Toronto, i reira oia i te tamau-â-raa i te rave i te ohipa i roto i te faaroo Metoti, e ua haamata ihora i te poro. I roto i taua area taime ra to’na matauraa ia Leonora Cannon, e vahine haapa‘o atoa i roto i te faaroo Metoti, tei ratere atoa mai i Canada, aita i maoro a‘e nei, mai te fenua Peretane mai. Ua tuea noa to raua mau mana‘o hohonu no ni‘a i te parau no te faaroo, no ni‘a ho‘i i te parau no te titauraa i te ite, e i te parau no te iho tumu, faaipoipo ihora raua i te 28 no Tenuare 1833 i Toronto.

A parahi ai oia i Canada, ua amui atu oia i roto i te hoê pŭpŭ hoa no te tuatapapa hohonu i te Bibilia, ia rahi atu to’na iteraa i te parau mau. I roto i taua taime maimiraa tuutuu ore ra i tonohia ai o Elder Parley P. Pratt, melo no te Pŭpŭ Tino Ahuru Ma Piti Aposetolo, ia haere i Toronto no te hoê tau misionare.

Ia tae oia i Toronto, ua ani oia i te mau orometua e rave rahi e tae noa’tu i te mau ti‘a faatere o te hau, ia horo‘a mai i te hoê vahi pororaa na’na. Tera râ, ua pato‘ihia mai ta’na mau aniraa. Tae roa’tu ia John Taylor, inaha, ua faarooroo oia i te parau no te Ekalesia, e aita oia i farii ia Elder Pratt i te haamataraa. No te hi‘oraa o Elder Pratt e, aita e manuia ra ta’na ohipa, faaoti a‘era oia e, e faaru‘e oia i Toronto, e ua tapea atura i te fare o Taylor no te aroha ia’na hou a reva atu ai. No te mana‘o puai i roto ia ratou e, e taata no te Atua o Elder Pratt, titau ihora te mau veutupu o John Taylor ia faatamaa e ia haaparahi ia Elder Pratt i o ratou, e ia faati‘a ia’na ia faatupu i te mau rururaa. Ua faarii ihora o Elder Pratt i taua titauraa ra, e aita i maoro i muri iho, ua farerei oia i te mau hoa o John Taylor o tei putuputu tamau noa na no te imi i te parau mau.

I reira to John Taylor haamataraa i te tuatapapa maite i te mau parau haapiiraa a te Ekalesia. Te parau ra oia e, “e toru hepetoma i te maoro to‘u rave papuraa i te reira, ma te haere na muri iho i te Taeae Parley i tera vahi e i tera vahi.” Ua papa‘i roa oia i te mau a‘oraa a Elder Pratt, e ua tuatapapa maite i te reira, e ua faaau maite i te reira i ni‘a i te mau papa‘iraa mo‘a. I te tahi tau taime i muri mai, ua faaite ihora te Varua Mo‘a i te ti‘araa mau o te parau a Elder Pratt, e ua bapetizohia ihora o John e o Leonora Taylor i te 9 no Me 1836. I muri a‘e, ua faaite papu oia e, “mai taua taime mai ra, aita roa’tu to’na mana‘o i feaa noa a‘e i te hoê parau tumu no ni‘a i te Momoni.” ⁸

Te Hoê Melo Apî e te Faatere Haapa‘o

I muri noa iho i to’na tomoraa i roto i te Ekalesia, ua piihia o John Taylor ei ti‘a faatere no te Ekalesia i Canada, ti‘araa tei mauhia e a’na hoê matahiti hau i te maoro. Ua titauhia ia’na ia ratere tamau i tera vahi e tera vahi no te rave i te mau ohipa o to’na ti‘araa, aita râ oia i rohirohi i te porohaereraa i te evanelia, e na roto i te reira, ua ti‘a ia’na ia ite mata e rave rahi mau ohipa pae varua e no te pae tino atoa nei, no ni‘a i te Ekalesia i taua vahi ra. I roto i taua area taime ra te tupuraa i roto ia’na te hoê o to’na mau hiaai rahi roa, oia ho‘i, te farereiraa i te Peropheta Iosepha Semita. I te ava‘e Mati 1837, ua tere atu oia i Keterani, Ohio, i reira to’na fariiraahia i roto i te ti‘ahapa o te Peropheta. Te faaite ra oia e, ua ite oia “i te hoê otu‘iraa, e au i te otu‘iraa uira” i to’na tapearaa i te rima o te Peropheta no te aroha ia’na.⁹ I roto i te ti‘ahapa o Semita, ua haapii te Peropheta ia’na i te tahi atu â mau parau mau no ni‘a i te ohipa o te anotau hopea nei. Aita i maoro, ua tupu te hoê taura taamu no te auhoaraa e no te ti‘aturiraa i rotopu i na taata nei, o te ore roa e mutu faahou.

I to John Taylor faaearaa i Keterani, ua faaroo oia e rave rahi mau faainoraa no ni‘a i te Peropheta Iosepha Semita. E mea pinepine te feia taiva i te faatupu i te mau rururaa i reira ratou e faaino ai i te Peropheta. I te pae hopea o te hoê o te reira huru rururaa i roto i te Hiero no Keterani, ua titau ihora o Elder Taylor i te parau faati‘a no te faaite i to’na mana‘o, e ua paruru oia i te Peropheta ma te mata‘u ore. “Na Iosepha Semita, i raro a‘e i te Manahope, i haapii mai i te mau parau tumu matamua,” te na reira ra oia, “e ei ia’na ra tatou e haere ai e rave mai i te tahi atu â mau haapiiraa. Mai te mea e, eita tera varua i roto ia’na e horo‘a mai i te mau haamaitairaa, te taiâ nei ïa vau i te ore tera varua i roto i te feia o tei paraparau iho nei, e paruru ia ratou. I mutaa ra, i muri a‘e i to te tamarii a Iseraela iteraa i te puai o te Atua i rotopu ia ratou, ua orurehau ratou e ua haamori i te idolo, e te fifi rahi maori râ, o te na reira atoa tatou nei.” ¹⁰ Ua tamau noa e rave rahi feia taiva i ta ratou faainoraa, area te Feia Mo‘a haapa‘o ra, ua tupu ïa te itoito i roto ia ratou na roto i te parau ti‘a e te ite papu o Elder Taylor.

To’na Piiraa e Ta’na Taviniraa ei Aposetolo

I te tau haapoheraa raau o te matahiti 1837, ua titau o Iosepha Semita ia John Taylor ia reva atu oia i Far West, Missouri, no te mono i te hoê ti‘araa e vata ra i roto i te Pŭpŭ Tino Ahuru Ma Piti Aposetolo (ua faatoro‘ahia oia i te ava‘e Ditema 1838). No ni‘a i te parau no te titorotororaa ia tavini oia ei Aposetolo, te parau ra o John Taylor e: “E mea faahiahia te ohipa, area te raveraa ra, e mea teimaha ïa e te titau i te ti‘aauraa. Ua ite a‘era vau i to‘u ino e to‘u faufaa ore; tera râ, ua tupu te hinaaro papu i roto ia‘u, na roto i te tauturu a te Fatu, ia faaitoito i te amoraa i te reira.” ¹¹ Te haehaa i mua i te Atua e te faaotiraa i te mana‘o ia titau i Ta’na aratairaa, o te huru ïa o te ohipa taviniraa a Elder Taylor. I to’na riroraa ei Peresideni no te Ekalesia, teie ta’na parau i to te Feia Mo‘a: “Aita to‘u e mana‘o, na te Atua râ te reira e horo‘a mai ia‘u nei; mai te reira atoa outou. E mea puai roa te tahi mau taata i te imi i ta ratou iho huru raveraa, e i te poro i ta ratou iho mau haapiiraa. Aita vau e feruri nei mai te reira te huru, to‘u râ hinaaro, mai te mea e, aita hoê mea e hiti mai, o te titau ïa ia ite i te hinaaro o te Atua, e ia rave i te reira.” ¹²

Ei Ite no te Pohe Maratiri

Ei Aposetolo, ua riro o Elder Taylor ei hoa papu e te ti‘aturihia no te Peropheta Iosepha Semita. Teie ta Elder Franklin D. Richards, no te Tino Ahuru Ma Piti, i parau no ni‘a i te auhoaraa o Elder Taylor raua o te Peropheta Iosepha Semita, “Mea iti roa te taata o tei roaa ia ratou taua autaatiraa mahanaha ra mai tei roaa ia’na, e o ta’na i tapea maite i rotopu ia raua o te Peropheta Iosepha Semita e tae noa’tu i to’na poheraa, e na te ofa‘i pŭpŭhi i faatae roa i taua auhoaraa rahi ra i te hopea, na roto i te pŭpŭhiraahia oia e tae noa’tu i te Peropheta, i roto i te fare auri no Tarateti.”¹³

Te hoê o te mau ohipa teimaha roa tei tupu i roto i te oraraa o Elder Taylor, o te pohe maratiri ïa o te Peropheta Iosepha Semita. Ua haere roa’tu o Elder Taylor i te Fare Tapearaa no Tarateti, tei reira ho‘i te tapea-ti‘a-ore-raa-hia te Peropheta e to’na taeae o Hairamu, i te 25 no Tiunu 1844. Ua papu maitai a‘era e, eita te naho‘a taata iino no Tarateti e tuu ia raua i rapae i te fare tapearaa, e no reira, e fifi raua. I te 27 no Tiunu, ua tae mai i Tarateti, te tahi mau melo no te Ekalesia na Nauvoo mai, e ua imi ratou i te mau rave‘a no te faatiti‘aifaro i taua fifi ra. I te avatea, ua toe noa mai o Elder Taylor e to’na hoa Aposetolo o Willard Richards i roto i te fare tapearaa i pihaiiho ia Iosepha raua o Hairamu. No te hoê opuaraa ia haaputuputu i te mau taeae i Nauvoo no te faaora i te Peropheta, na ô atura o Elder Taylor, “Te taeae Iosepha, mai te mea e, e ti‘a ia oe, e i to oe reo, i roto e pae hora, tei rapae oe ia‘u i teie fare auri, mai te mea e, e haruru te fare auri i raro.”¹⁴ Ua pato‘i râ o Iosepha i te reira huru raveraa.

A ohu noa ai te hora i taua avatea ra no te 27 no Tiunu, ua haamata a‘e ra te oto rahi i te tupu i roto i na taata e maha nei. E no te mea e, e taata reo navenave roa o Elder Taylor, ua anihia ia’na ia himene e piti taime “A Poor, Wayfaring Man of Grief” no te faaitoito i to ratou varua. Aita i maoro i muri a‘e i te hoperaa ta’na himene no te piti o te taime, ua tauma mai te tahi mau taata iino e te mata huna na ni‘a i te e‘a o te fare auri. Ua horo oioi atura o Hairamu Semita raua o Willard Richards e turu‘i i ni‘a i te opani ia ore ia matara mai. Ua pŭpŭhi maira te mau taata iino i ni‘a i te opani, ua pepe pohe roa o Hairamu. Ua tamau noa ratou i te pŭpŭhi e ua haamata i te pati‘a mai i ta ratou pŭpŭhi na roto i te opani i matara rii. Ua rave a‘era o Elder Taylor i te hoê turutootoo paari, e ua ti‘a i pihaiiho i te opani e ua tamata i te haafefe i te mau auaha pŭpŭhi e toro mai nei i roto i te piha. Ua papa‘i o Elder Taylor e, “E mea ri‘ari‘a mau. Te purapura auahi pŭpŭhi mai to‘u ra rima te rahi, na pihaiiho noa ïa ia‘u te ama, e, … e pohe mau te hopearaa. Te haamana‘o ra vau i te hoê taime ua feruri au e, ua tae i te taime e pohe ai au, tera râ, i roto i te mau fifi atoa i farereihia e au, aitâ vau i ite a‘e nei ia‘u i te vai-hau-raa, mai taua taime ra te huru, to‘u horuhoru-ore-raa, to‘u itoitoraa, e to‘u rave-vitivitiraa i te hoê faaotiraa.” ¹⁵

I roto i taua taime ahoaho ra, ua tamata atoa te Peropheta Iosepha i te paruru ia’na i te mau taata iino, e ua parau atura oia ia Elder Taylor, “Ua ti‘a te reira, e te Taeae Taylor, faaitoito i te tapearaa.” ¹⁶ Tera ïa te mau parau hopea o ta’na i faaroo i te Peropheta i te parauraa i ni‘a i te fenua nei. ¹⁷ No to’na ite e, eita e mau ia ratou ia tapea maoro i muri mai i taua opani ra, ua ou‘a o Elder Taylor i ni‘a i te haaramarama. I te taime a haamata ai oia i te ou‘a i rapae, ua puta oia i te hoê ofa‘i o tei pŭpŭhihia mai na roto mai i te fare auri i ni‘a i te huha avae aui. Ua tarere noa oia i ni‘a i te hiti haaramarama ma te hauti ore no te tahi maa taime iti, e e topa mau â oia i rapae, tera râ, ua pŭpŭhihia mai ra na rapae, e ua tano te hoê ofa‘i i ni‘a i ta’na uati i roto i to’na pute ahu, e na te reira i tura‘i faahou mai ia’na i roto i te piha. I reira, ua tamata o Elder Taylor i te nee i raro a‘e i te hoê ro‘i e vaira i roto i te piha. Ua puta faahou oia i te ofa‘i pŭpŭhi e toru taime. Hoê ofa‘i o tei tano i raro noa’tu i to’na turi avae aui, e aita roa’tu i noaa i te iritihia. Ua puta atu te tahi i roto i to’na apu rima aui. E te toru o te ofa‘i, ua tano ïa i ni‘a i te vahi i‘o o to’na aoao aui, e ua mutu ê te tahi tuhaa i‘o o te iri. Noa’tu râ to’na pepe ino e to’na mauiui rahi, ua ora mai o Elder Taylor i roto i teie aroraa, e i muri a‘e ra, ua faaho‘ihia’tu oia i to’na fare i Nauvoo na te Feia Mo‘a e rave rahi.

I te tahi tau taime i muri a‘e i to Elder Taylor peperaa i te ofa‘i pŭpŭhi, ua tamata atoa te Peropheta Iosepha i te ou‘a i rapae na roto i te haaramarama o te fare auri, tera râ, ua puta oia i te ofa‘i pŭpŭhi i taua taime ra ihoa, e ua topa oia i rapae mai i ni‘a i te repo. I muri a‘e, ua papa‘i o Elder Taylor e, i to’na iteraa i te ohipa i tupu i ni‘a i te Peropheta, ua tupu i roto ia’na “te mana‘o anaanatae ore, te mo‘mo‘e, e te au ore rahi.” ¹⁸

Tei roto i te tuhaa 135 o Te Parau Haapiiraa e te mau Parau Fafau [Buka Fafau] te hoê aamu no te Pohe Maratiri o tei papa‘ihia e Elder Taylor. Aita i tatara hu‘ahu‘ahia te parau no taua ohipa ra i roto i te reira tuhaa, ua riro râ ei faaiteraa papu puai no ni‘a i te Peropheta Iosepha: “Ua rahi a‘e ta Iosepha, te Peropheta e te Hi‘o a te Fatu, i rave, maori râ ia Iesu ana‘e, no te faaoraraa i te taata nei i roto i teie nei ao, i tei ravehia e te hoê taata ê atu o tei ora na i ni‘a iho i te reira. … Ua ora hanahana oia, e ua pohe hanahana ho‘i oia i roto i te mata o te Atua e ta’na atoa ra mau taata; e mai te au i te pae rahi o ta te Fatu feia i faatahinuhia i tahito ra, ua taati atura oia i to’na toro‘a e ta’na ohipa ho‘i i to’na iho ra toto.” ¹⁹

Ei Paruru no te Faaroo

Ei melo no te Pŭpŭ Tino Ahuru Ma Piti, ua horo‘a o Elder Taylor i to’na taime e to’na mau taleni no te poro e no te paruru i te evanelia. Ua faaohipa oia i to’na ite i te ohipa papa‘i no te papa‘i i te ve‘a Times and Seasons, te Wasp, e te Nauvoo Neighbor, e mau ve‘a ana‘e teie no Nauvoo. I muri mai, a faatere ai oia i te Ekalesia i te pae hiti‘a o te râ o te fenua Marite, ua papa‘i oia e ua haaparare i te The Mormon, e ve‘a hepetoma teie no Niu Iota, i roto i reira te vauvauraahia te mau parau haapiiraa a te Ekalesia. I roto i te rahiraa buka ta’na i papa‘i, te vaira e piti tatararaa parau haapiiraa, The Government of God e te An Examination into and an Elucidation of the Great Principle of the Mediation and Atonement of OurLord and Savior Jesus Christ [Te Faatereraa a te Atua] e te [Hoê Hi‘opo‘araa e hoê Haamaramaramaraa no ni‘a i te Parau Tumu Rahi o te Arairaa e o te Taraehara o to Tatou Fatu e to Tatou Faaora o Iesu Mesia] (haapararehia i te tau e Peresideni oia no te Ekalesia). No te aravihi o Elder Taylor i te ohipa papa‘i e te nene‘i parau, ua riro ia’na te ti‘araa “Ei Paruru i te Faaroo” e ei “Aito no te Parau mau” i rotopu i te mau melo o te Ekalesia. Teie ta te Peresideni Brigham Young i parau no ni‘a ia Elder Taylor: “Te parau nei au e, tei roto ia’na te hoê o te mau varua puai a‘e o te mau huru taata atoa e vai nei; e taata puai oia, e taata mana oia. … O oia te hoê o te mau taata papa‘i ve‘a puai a‘e o tei papa‘i na.” ²⁰

Taaê atu te pororaa i te evanelia na roto i te papa‘iraa i te parau, ua tavini o Elder Taylor ei misionare rave tamau e maha taime: e piti taime i Peretane, hoê taime i Farani e i Puruti‘a, e hoê taime i Niu Iota. Ia amuihia te rahiraa taime o ta’na i tavini ei misionare rave tamau, ua hau atu ïa i te hitu matahiti. Noa’tu te rahiraa tusia i farereihia e a’na na roto i to’na taaêraa roa i to’na utuafare, aita i aueue to Elder Taylor ti‘aturiraa papu i te ohipa a te Fatu. I roto i te hoê rata ta’na i papa‘i i to’na utuafare, i te hoê tau a tavini ai oia ei misionare, te na ô ra oia e: “Tei roto vau i te ohipa a to‘u Fatu; e orometua vau na Iehova no te poro i To’na hinaaro i te mau nunaa. Te haere nei au e iriti i te uputa o te ora no te hoê nunaa rahi, e haaparare i rotopu i te mau taata e rave rahi milioni, i te mau parau tumu o te oraraa, o te maramarama e te parau mau, o te ite e te faaoraraa, te haere nei au e ofati i te fifi o te hara e o te ti‘aturi ore e taamu ra ia ratou, e faati‘amâ i tei hamani-ino-hia, e faaora i tei overe haere noa, e faatiti‘aifaro i to ratou mau mana‘o, e haamaitai a‘e i ta ratou mau peu, e faaora ia ratou i te ino, i te haamouraa e te oto, e e aratai ia ratou i roto i te maramarama, i te ora, i te parau mau e i te hanahana tiretiera. Aita anei to outou varua e tu‘ati ra i ni‘a i to‘u? Oia, ua ite au e, te na reira ra oia.” ²¹

Ei Tane Faaipoipo e ei Metua Tane

Noa’tu te rahiraa taime i titauhia ia’na ia horo‘a i roto i te ohipa no te Ekalesia, ua riro atoa o John Taylor ei tane faaipoipo e ei metua tane haapa‘o e te here ho‘i. Ua poihere maite oia i te mau taime a parahi ai oia i pihaiiho i to’na utuafare, e ua haafaufaa tamau oia i taua mau taime ra na roto i te faaiteraa i to’na oaoa i te parahiraa i pihaiiho ia ratou, e na roto ho‘i i te haapiiraa ia ratou. E no reira ïa to’na utuafare i here roa ai ia’na. E rave rahi matahiti i muri mai, ua papa‘i ta’na tamaiti o Moses W. Taylor e, “E faatura rahi to ta’na mau tamarii ia’na, i riro ai te parau no te faaoaoaraa ia’na ei hiaai tumu no ratou.” ²²

I roto i to’na autaatiraa e ta’na mau tamarii, ua riro oia ei hi‘oraa na ta’na mau tamarii i roto i te parau no te huru taata here, te marû e te maitai. Teie te hoê iteraa ta ta’na tamaiti o Ezra Oakley Taylor e faaite nei:

“I to‘u apîraa te vaira tera faanahoraa e faatupu i te mau pureraa o te Sabati avatea i roto i te Fare Menemene. Ua titauhia ia matou paatoa ia tae i te reira mau pureraa, e i muri a‘e, ia faaite e, na vai i horo‘a i te a‘oraa, eaha te parau i tuatapapahia, na vai i faaoti i te pure, e eaha te mau himene i himenehia. I te hoê Sabati, ua opua a‘era te tahi pae o matou e, eiaha e haere i te pureraa i te reira noa Sabati, e ia ani i te hoê o to matou mau hoa ia faaite mai ia matou i te mau ohipa i tupu. E ua tae a‘era i te taime no te apooraa (utuafare) e aita i hape, ua ani maira to‘u papa ia‘u no ni‘a i te a‘oraa, e na vai i horo‘a i te reira. Ua faaineine maitai au ia‘u, inaha ua faaite mai to‘u hoa e, aita i mau maitai ia’na te mau parau, e no reira ua faahiti maitai au i te mau parau atoa ta’na i parau mai, ‘Oh, na te hoê ruau paraparau rahi, aita i mau ia‘u to’na i‘oa, tera râ, mea papu maitai e, e ere roa’tu te mea faahiahia.‘ Ma te mata hoata rii, na ô maira to‘u papa e, ‘Tera ruau paraparau rahi, o to oe ïa papa‘ e ua faahaere faahou oia i ta matou apooraa i mua.” ²³

Ei Aposetolo, e i muri iho, ei Peresideni no te Ekalesia, ua faaitoito tamau te Peresideni Taylor i te Feia Mo‘a ia here e ia haapaari i to ratou utuafare. Ua faaitoito oia i te mau melo o te Ekalesia ia faataa i te hoê pô i te mau hepetoma atoa ei pô tuatapaparaa i te evanelia e te faaoaoaraa no te utuafare, e ua fafau oia ia ratou “i te hau e te here, i te viivii ore e te oaoa, o te faariro i to ratou oraraa utuafare ei mea maitai roa” mai te mea e, e haapa‘o maite ratou i te reira peu. ²⁴

Faatere i te Ekalesia

I roto i te rahiraa matahiti a aratai ai te Peresideni Taylor i te Ekalesia i ni‘a i te ti‘araa Peresideni no te Pŭpŭ Tino Ahuru Ma Piti, e i muri iho, ei Peresideni no te Ekalesia, ua rave oia ma te puai e te itoito i ta’na mau tautooraa no te haamaitai i te Feia Mo‘a.

Te Nahonaho e te Parau ti‘a i roto i te Autahu‘araa

Te hoê o ta’na mau ohipa rahi i rave i roto i to’na ti‘araa Peresideni, o te faanahonahoraa ïa i te pŭpŭ autahu‘araa e te faaitoitoraa ia ratou ia rave i ta ratou mau ohipa. Ua haapii oia i te mau episekopo ia faatupu i te pureraa autahu‘araa i te mau hepetoma atoa i roto i ta ratou mau paroita, e ua a‘o i te mau peresideni tĭtĭ ia faatupu i te pureraa autahu‘araa i te mau ava‘e atoa. Ua papa‘i o Elder B. H. Roberts e, “O vai aita e haamana‘o ra i to’na itoito e to’na puai rahi i roto i te mau amuiraa e i roto i te tahi atu mau rururaa, i te a‘o-tamau-raa i te mau Peresideni tĭtĭ e te mau episekopo o te paroita ia faanahonaho i te autahu‘araa e i te mau pŭpŭ atoa i raro a‘e i ta ratou faatereraa?” ²⁵

I roto i te hoê heheuraa i horo‘ahia i te Peresideni Taylor i te ava‘e Atopa 1882 ra, ua haapii mai te Fatu i te Feia Mo‘a, i te mau taeae ihoa râ o te autahu‘araa, ia faanahonaho ia ratou iho, e ia haere ma te mo‘a i mua Ia’na ra. No roto mai i taua heheuraa ra te iritiraahia mai teie paratarafa i muri nei:

“A tuu atoa na i te mau Peresideni Tĭtĭ ia tamâ ia ratou iho, e i te autahu‘araa, e i te mau taata o te Tĭtĭ o ta ratou e fatere nei, e ia faanahonaho i te autahu‘araa i roto i ta ratou mau tĭtĭ ia au i ta‘u ture, i roto i te mau tuhaa atoa, i roto i te mau Apooraa Teitei, i roto i te mau pŭpŭ Peresibutero, e i roto i te mau Episekopo e ta ratou mau apooraa, e i roto i te mau pŭpŭ Tahu‘a, Haapii e te Diakono, ia hope maitai te mau pŭpŭ atoa i te faanahonahohia ia au i te faanahonahoraa mau o ta‘u Ekalesia. …

“E a tuu atu i ta‘u nei autahu‘araa ia faahaehaa ia ratou i mua ia‘u nei, eiaha ho‘i ratou e titau i to ratou iho hinaaro, i to‘u râ; i te mea e, ia ore ho‘i ta‘u autahu‘araa ia ite ia‘u, inaha, o ratou ho‘i ta‘u i maiti, e i pii, e i horo‘a’tu i te varua e te mau horo‘a o to ratou mau piiraa e rave rahi, e i te mana no te reira, e ore au e ite atu ia ratou, te na reira maira te Fatu; no te mea, e faahanahana e e haapa‘o ta‘u autahu‘araa ia‘u.

“E i teie nei, te ti‘aoro nei au i ta‘u autahu‘araa, e i to‘u mau taata atoa, ia tatarahapa i ta ratou ra mau hara e i to ratou mau ino, i to ratou mau hinaaro nounou, te te‘ote‘o e te hinaaro fati ore, e i ta ratou mau peu iino atoa i hara ai ho‘i ratou ia‘u nei; e ia haapa‘o i ta‘u ture ma te aau haehaa atoa, outou ta‘u autahu‘araa, to‘u feia mo‘a e to‘u mau taata; e te ti‘aoro nei au i te mau upoo faatere o te utuafare ia faanahonaho maitai i to ratou mau ti‘ahapa ia au i te ture a te Atua, e ia rave i te mau ohipa e te mau hopoi‘a rau no te reira ti‘araa, e ia tamâ ia ratou iho i mua ia‘u nei, e ia faaru‘e i te peu iino i rapae i to ratou mau fare. E i reira vau e haamaitai ai ia outou e e parahi ai i pihaiiho ia outou, te na reira maira te Fatu, e e haaputuputu outou i roto i to outou mau vahi mo‘a na, i reira ho‘i outou e amui ai no te piihua mai ia‘u nei, e e ani mai outou ia‘u i te mau mea ti‘a, e e faaroo atu vau i ta outou mau pure, e i reira ta‘u Varua e to‘u mana e parahi ai i pihaiiho ia outou, e e vai ta‘u haamaitairaa i ni‘a ia outou, i ni‘a i to outou mau utuafare, to outou mau faaearaa e to outou mau ti‘ahapa, e i ni‘a i ta outou mau nana e ta outou mau faaapu, ta outou mau raau tupu e ta outou mau ovine, e i ni‘a i te mau mea atoa na outou na; e e riro outou ei mau taata no‘u e e riro vau ei Atua no outou.” ²⁶

Haamaitai i te Feia Mo‘a

No te faananea i te maramarama e te ite papu mau o te Feia Mo‘a i te evanelia, ua faanaho te Peresideni Taylor i te mau amuiraa tĭtĭ i te mau toru ava‘e atoa i roto i te Ekalesia taatoa. E haere atoa’tu oia i roto i teie nei mau amuiraa mai te mea e, e nehenehe ta’na. Mai te mea e, aita e nehenehe ia’na ia haere, e tono atu oia i te hoê melo no te Pŭpŭ Tino Ahuru Ma Piti. No ni‘a i te reira huru tereraa ohipa, ua papa‘i o Elder B. H. Roberts, no te Pŭpŭ Hitu Ahuru: “Ua farii te Feia Mo‘a i te mau haapiiraa e te mau aratairaa e rave rahi no roto mai i te mau Aposetolo, hau atu paha i tei fariihia e ratou i te mau huru taime atoa na mua’tu i roto i te aamu o te Ekalesia. No reira ïa i iteahia ai te hoê araraa rahi i te pae varua i rotopu i te Feia Mo‘a.” ²⁷ Te tahi atoa ohipa rahi roa o tei tupu i te mau taime matamua o ta’na faatereraa maori râ, te faati‘araahia te Paraimere i te matahiti 1878, ia ti‘a i te mau tamarii ia haapii-maitai-hia i roto i te Ekalesia. Ua tamau noa’toa te Peresideni Taylor i te haapapu i te faufaa o te ohipa misionare, e ua maraa te rahiraa orometua i tonohia no te poro i te evanelia.

I roto i ta’na mau a‘oraa e rave rahi, ua faaitoito tamau maite te Peresideni Taylor i te Feia Mo‘a ia haapa‘o maitai i ta ratou mau ohipa i roto i te mau huru tuhaa atoa o te oraraa nei, i roto anei i te ti‘araa ei melo no te utuafare, ei melo anei no te Ekalesia, ei mau veutupu anei, e aore râ, ei mau taata ai‘a anei. Ua haapii oia i te Feia Mo‘a mai te mea e, e haapa‘o ratou e e tuu ratou i to ratou ti‘aturiraa i ni‘a i te Fatu, e ore roa ïa ratou e mata‘u. Ua haapii oia e, “E ti‘a te Atua i te pae o Iseraela, mai te mea e, e ti‘a o Iseraela i te pae o te parau ti‘a.” ²⁸

Paruru no te Ti‘amâraa

Noa’tu eaha te puairaa o te mau iteraa o te Peresideni Taylor, ua auraro e ua paruru maite râ oia i te ti‘amâraa o te taata. I te mau matahiti a riro ai oia ei Aposetolo i Nauvoo, ua piihia oia e, “Te Aito no te Ti‘amâraa,” e i te riroraa oia ei Peresideni no te Ekalesia ua tamau noa oia i te mau i taua ti‘araa ra. I te hoê tau e Feia Mo‘a i te mau Mahana Hopea nei te rahiraa o te taata i Utaha, ua poro tuutuu ore noa te Peresideni Taylor i te parau no te ti‘amâraa o te faaroo e te ti‘amâraa o te mana‘o no te mau taata atoa. Teie ta’na i parau: “I te tahi taime, e tupu te mana‘o au ore i roto ia tatou no ni‘a i te mau taata o te ore e feruri mai ta tatou e feruri nei. E ti‘araa to ratou ia feruri mai ta ratou e hinaaro; e mai te reira atoa tatou. No reira, mai te mea e, aita te hoê taata e ti‘aturi mai ta‘u e ti‘aturi ra, e ere ïa i te ohipa na‘u. E mai te mea e, aita vau e ti‘aturi mai ta’na e ti‘aturi ra, e ere ïa i te ohipa na’na. E paruru anei outou i te hoê taata aita e ti‘aturi ra mai ta outou e ti‘aturi nei? E, e tae roa’tu i te hopea. E na reira atoa oia i ni‘a ia‘u; e e hinaaro vau ia paruruatoa-hia vau i roto i to‘u mau ti‘araa.” ²⁹

No te Peresideni Taylor, e mea faufaa atoa te parau no te ti‘amâraa i roto i te Ekalesia. I roto i te mau apooraa, ua faaitoito tamau noa oia i te mau melo ia parau ti‘amâ i to ratou mau mana‘o. Taaê noa’tu to’na ite-hope-raa i te faufaa o te parau no te tahoêraa, ua feruri râ oia e, e tupu te tahoêraa mau na roto i te ti‘amâraa.

Te Tau Tamataraa

Ua riro te huru o te Feia Mo‘a i te fenua Marite ei tamataraa no taua here ra i te ti‘amâraa. I raro a‘e i te aratairaa a te Fatu, ua rave te Feia Mo‘a i te faaipoiporaa vahine rau i roto i te Ekalesia mai te anotau mai o Iosepha Semita i Nauvoo. I roto i te mau matahiti 1860 e te mau matahiti 1870, ua maiti te faatereraa o te Hau Marite i te ture no te opani i te faaipoiporaa vahine rau, e no te faaere ia Utaha e to’na huiraatira, i te ti‘araa mana ei tuhaa fenua Marite e i te tahi atu mau ti‘araa mana. No to’na ite papu e, ua ofati teie ture i te parau no te ti‘amâraa o te faaroo o tei papa‘ihia i roto i te Ture Papa, ua faaohipa te Ekalesia i to’na puai no te titauraa ia tuuhia’tu te reira parau i mua i te aro o te Haavaraa Teitei o te Hau Marite. I te matahiti 1879, e piti noa matahiti i muri a‘e i to te Peresideni Taylor raveraa i te faatereraa o te Ekalesia, ua haapapu te Haavaraa Teitei a te Hau Marite i to’na turu i te ture pato‘i i te vahine rau o tei haamauhia i te matahiti 1862 e te faatereraa marite. I te matahiti 1882 e i te matahiti 1887, ua maiti faahou te Apooraa Iriti Ture o te Hau Marite i te tahi atu mau ture o te faati‘a i te faatereraa hau ia faaore i te ti‘araa mana o te Ekalesia e ia haru i te mau faufaa atoa a te Ekalesia tei hau te faito faufaa i te $50,000 tara marite (tei roto ïa i te reira e maha hiero e patuhia ra i taua taime ra, te Fare Menemene, te mau fare pureraa, e e rave rahi atu â mau faufaa). Ua faataahia i roto i taua ture ra e, e iritihia e rave rahi mau ti‘araa tivira tumu o te mau melo o te Ekalesia, mai te ti‘araa maiti. Na roto i teie mau tauiuiraa, ua matara atoa te mau uputa no te mau rave‘a e rave rahi no te horo i te Feia Mo‘a i te mau Mahana Hopea nei o te tamau noa i te rave i te faaipoiporaa vahine rau. Ua tamau noa te Ekalesia i te rave i te mau hororaa, ua faufaa ore râ te reira mau hororaa atoa.

A tupu noa ai i te rahi te fifi no ni‘a i te parau no te vahine rau, ua tae maira te faaararaa i te Peresideni Taylor e, te opua ra te mau ti‘a faatere o te hau e haru oioi ia’na. E no te mea ua hope te mau rave‘a mana atoa no te tamata i te haparari i taua mau ture ra, ua titauhia ia’na ia maiti, e haapa‘o anei oia i ta te Atua e aore râ, i ta te taata. I roto i ta’na a‘oraa hopea i mua i te taata, ua parau oia i te Feia Mo‘a e, “I roto i to‘u ti‘araa taata maitai, eita e ti‘a ia‘u ia faaroo ore i te Atua. … e ia taataahi i teie mau faaueraa mo‘a e te mure ore i raro a‘e i te avae, o ta te Atua i horo‘a mai ia haapa‘o vau, e o te tae i te ora mure ore ra.”³⁰ Mai te mahana a poro ai oia i teie nei a‘oraa e tae atu i te mahana o to’na poheraa, oia ho‘i, fatata e piti matahiti e te afa i muri a‘e, ua rau te mau vahi i tapunihia e a’na e ati a‘e o Utaha. E huri tua anei oia i te mau haapiiraa a te Fatu no ni‘a i te faaipoiporaa vahine rau, ua faaoti te Peresideni Taylor ia tapuni ei rave‘a no te haapa‘oraa i te parau a te Fatu, e ma te ti‘aturi e, e iti mai te hamani-ino-raa i ni‘a i te Ekalesia. Ua papa‘i o Elder B. H. Roberts e, “I to te Peresideni Taylor haamo‘eraa ia’na i te mata o te taata i te pô no te 1 no Fepuare, 1885, e ere ïa no te paruru ia’na iho, e aore râ, no to’na iho maitai, no te maitai râ o te taata atoa e ia vai maite noa te hau.” ³¹

Noa’tu e, aita oia e ite-faahou-hia e te mata taata, ua tamau noa te Peresideni Taylor i te aratai i te Ekalesia na roto i te mau episetole e na roto i te paraparau-roa-raa’tu i te mau hoa ta’na i ti‘aturi papu. Area râ, no to’na tapuni-haere-noa-raa, no te taaêraa oia i to’na utuafare e i to’na mau hoa, e no te teimaha o ta’na mau hopoi‘a, ua hamata te reira i te haapeape‘a ia’na. I te omuaraa o te matahiti 1887, ua hamata to’na ea i te fifi. Ua aro oia i to’na ma‘i e rave rahi ava‘e i te maoro ma te parau ia vetahi e, eita e maoro e maitai oia, tera râ, i te ava‘e Tiurai, ua ite-papu-hia e, e mea ino roa oia. I te pô 25 no Tiurai 1887, ua pohe te Peresideni Taylor i roto i te hau, i te ti‘ahapa o Thomas Roueché i Kaysville, Utaha.

Te mau Faateniteniraa i te Peresideni Taylor

Te tahi o te mau faaiteraa tano maitai no ni‘a i te faatereraa a John Taylor, ua horo‘ahia mai ïa te reira e te mau taata o tei tavini i pihaiiho ia’na e o tei haapiihia e a’na. I roto i ta’na paraparauraa i te taime hunaraa o te Peresideni Taylor, te parau ra o Elder Franklin D. Richards no te Pŭpŭ Tino Ahuru Ma Piti e: “E taata itoito e te taiâ ore i te parau ti‘a o te Peresideni Taylor. Aita oia i ite i te mata‘u. … A rave ai maua i ta maua misioni toopiti atoa i Europa, ua rave oia i Farani. … ua rave oia i te ohipa i reira ma te itoito; e i te hoê taime, ua tahoê te tahi mau ti‘a faatere faaroo no te tarai i te mau haapiiraa huru ê a te Momoni. I roto i tera huru taiâ ore to’na, ua farii te Peresideni Taylor ia farerei i te hoê pŭpŭ taatoa o ratou. … Ua ruru o ratou ia’na, e ua faaite oia ia ratou i te parau mau.” ³²

Teie te mau parau a Elder Daniel H. Wells, oia o tei tavini na ei tauturu no Brigham Young, no ni‘a i te Peresideni Taylor: “Ua ora oia i te hoê oraraa mata‘u ore, te teitei, e mai to te Atua ra te huru—e mata na te feia e ora nei ia imi i te rave‘a ia pee i to’na ra hoho‘a teitei. … Ua riro oia ei aito no te ti‘araa o te taata nei, ei aito no te ti‘amâraa, no te parau mau e no te ti‘amâraa. Ua ora oia i te hoê oraraa teitei e te faufaa, tei î roa i te hanahana e te maitai no’na iho e no te utuafare, ei oaoaraa na te taata, e ei hanahana no te Atua. Te oaoa nei au ia faaite i teie nei iteraa papu no ni‘a i te faaroo e te haapa‘o o te Peresideni Taylor, no ni‘a i to’na parau ti‘a i te Atua e te here i te mau melo o te Ekalesia.”³³

O Angus M. Cannon, peresideni no te Tĭtĭ no Roto Miti, te taata paraparau hopea i te hunaraa o te Peresideni Taylor, e o teie te faateniteniraa ta’na i horo‘a i te taata o tei haa e rave rahi matahiti no te faati‘a i te basileia o te Atua: “Ua faaorahia to’na mau mamae. Te ta‘otonei oia i roto i te Atua; e e ti‘a roa ia‘u ia feruri e, te ite ra vau i te uputa o te ra‘i i te matararaa e na reira ho‘i oia i te tomoraa. … Ua rave te Taeae Taylor i te iteraa papu ta Iosepha i horo‘a ia’na, ta Iesu i parau atu ia Iosepha, ta te Atua i faaue ia Iosepha ia faaroo i te reira mai roto mai i te vaha o ta’na Tamaiti here—e ua faaite oia i te reira mau parau apî i te mau fenua ê ê, e ua faarurutaina i to tatou aau na roto i te mau parau ta’na i parau ra. Te parau nei au e, te oaoa e te oaoaraa i roaahia e te Peresideni Taylor i to’na farereiraa i te mau taata tei rave i te ohipa e o’na i ô mai i te paruru, ma te haatihia e te mau aposetolo a Iesu Mesia, e oaoaraa rahi ïa.” ³⁴