Pene 16

Haapaari i to Tatou Auraa e te Atua

E mea au na‘u ia faahoa i te Atua i te faahoa i te tahi atu mau faaururaa e te tahi atu mau mana e ere i to te Atua.¹

No Roto mai i te Oraraa o John Taylor

E here hohonu to John Taylor i to tatou Metua i te Ao ra. Ua parau oia no ni‘a Ia’na e “to tatou metua, to tatou hoa e to tatou taata tauturu.” Ua parau oia e, “E ti‘aturi tatou i to’na rima, e ua ite tatou e, e aratai oia ia tatou, e haapii, e faauru e e faatere i te mau ohipa a to’na mau taata, no reira tatou e ti‘aturi ai ia’na.” ²

I to’na faaiteraa i to’na iteraa papu no ni‘a i te here e te mana-‘o o te Atua no Ta’na mau tamarii, ua parau te Peresideni Taylor e: “Aita hoê taata i ni‘a i te fenua nei tei tuu i to’na ti‘aturiraa i te Atua, aita vau e hi‘o e, no tei hea fenua oia, o te nehenehe e parau e, aita oia i faorahia e te Atua. Ua ite au e, ua tupu te reira i ni‘a ia‘u. Te faaea ra vau i te fenua atea, e i reira, aita hoê taata ta-‘u e nehenehe e fariu atu maori râ, te Manahope, e ua oaoa roa vau i te mea e, tei pihaiiho oia ia‘u, e ua ite au e, ua pahono oia i ta‘u mau pure.” ³

Ua ite-maitai-hia taua ti‘aturiraa ra i roto i te Atua i te matahiti 1839, i te taime a reva ai o Elder Taylor raua o Elder Woodruff i te fenua Peretane no te hoê misioni. Ua roohia Elder Taylor i te hoê ma‘i rahi i te taime a tere ai oia mai Nauvoo haere ti‘a’tu i Niu Iota, i reira ho‘i raua e fano atu ai i Peretane na ni‘a i te hoê pahi. O Elder Woodruff tei reva na mua i Niu Iota, i reira oia e ti‘ai ai ia Elder Taylor, tei taere i to’na tere no to’na ma‘i.

Ia tae atu o Elder Taylor i Niu Iota, ua hinaaro roa o Elder Woodruff ia reva raua e ua roaa oioi mai ta’na titeti no te reva i Peretane. Area râ, noa’tu e, aita ta Elder Taylor e moni, ua parau atu oia ia Elder Woodruff e, “E te taeae Woodruff, mai te mea e, te feruri ra oe e, e mea maitai ia reva atoa vau, na reira ïa, e pee ïa vau ia oe.” Ua feruri a‘era o Elder Woodruff nahea e roaa ai te moni a Elder Taylor no te aufau i to’na tere, ua pahono atura râ o Elder Taylor e: “Oh, e ere te reira i te fifi. Haere oe a rave mai i te titeti na‘u i ni‘a i to oe pahi, e na‘u e horo‘a atu i te rave‘a ia oe.”

Te faaroo ra te Taeae Theodore Turley i te paraparauraa a Elder Taylor raua o Elder Woodruff, no reira, ua faaite atura oia i to’na hinaaro ia apee atoa na muri iho i na Aposetolo i roto i to raua tere ma te parau atu e, o oia ïa to ratou taata tunu maa, noa-’tu e, aita atoa ta’na hoê a‘e moni. No te pahono i te hinaaro o te Taeae Turley ia amui atoa mai oia i roto i ta raua ohipa, ua parau atura o Elder Taylor ia Elder Woodruff ia hoo atoa mai i te hoê titeti na te Taeae Turley.

I roto i te hoê taime poto roa, ua horo‘a mai te Fatu i te hoê rave‘a no taua tere ra. Teie ta Elder B. H. Roberts no te Pŭpŭ Hitu Ahuru, i papa‘i: “I te taime a tupu ai teie mau faaafarofaroraa, aita ta Elder Taylor e moni, tera râ, ua muhumuhu mai te varua ia’na e, e tae mai te rave‘a, e aita taua reo iti ha‘iha‘i ra i faaru‘e ia’na! Ua ti‘aturi maite oia i te reira, e aita i faufaa ore ta’na ti‘aturiraa. Noa’tu e, aita oia i ani i te hoê toata i te hoê noa a‘e taata, ua nava‘i râ te moni i noaa ia’na, ta te mau taata e rave rahi i horo‘a mai, no te aufau i ta’na titeti e ta te Taeae Turley, tirara atu ai.” ⁴

Te mau Haapiiraa a John Taylor

E Metua te Atua no tatou e te aupuru nei Oia ia tatou mai te hoê metua te huru.

Aita … ta tatou haapa‘oraa e faariro nei i te Atua mai te hoê taata etaeta, eita tatou e nehenehe e haafatata atu ia’na, te faaite mai nei râ e, e Metua oia no tatou, e e tamarii tatou na’na, e e aau here metua to roto ia’na no tatou; e ua ite tatou i te parau no te mana‘o e vaira i rotopu i te metua tane e te tamaiti, te metua vahine e te tamahine, te mau metua e te mau tamarii.⁵

Eaha te mana‘o o te Atua no te fetii taata nei? Te feruri nei oia e, e mau tamarii ratou na’na. Te taatoaraa? E, te uouo, te ereere, te uteute, te ati Iuda, te etene, te feia iino e te Keretetiano, e te mau huru taata atoa. Te tau‘a nei oia i te mau taata atoa. Ua na reira oia mai mutaa mai, e e tamau noa oia i te na reira e tae noa’tu i te hopea ra. E rave oia i te mau mea atoa i roto i to’na mana no te maitai, no te haamaitai e no te faateitei i te fetii taata, i teie oraraa e a muri noa’tu.⁶

E mau tamarii paatoa tatou na te Atua. O oia to tatou Metua, e e ti‘araa to’na no te aratai ia tatou, eiaha râ tatou ana‘e, e ti‘araa râ to’na no te aratai e no te faatere i te mau ohipa a te mau fetii taata atoa e parahi nei i ni‘a i te tino o te fenua nei, i te mea e, e mau tamarii ana‘e ratou na’na.⁷

Te hinaaro o te Atua, o te haamaitai ïa i te taata nei ia au i To’na ra mana. I te tahi taime, te parau ra tatou no te faaha‘uti i te ra‘i e te fenua nei, tera râ, ua faaha‘uti te Atua i te ra‘i e te fe-nua no te faatupu i taua titauraa ra. … Te hinaaro nei te Atua i to tatou maitai, e ua haamau Oia i te ture no taua opuaraa ra. Ua tuu mai Oia i te Evanelia mure ore no taua opuaraa ra; e ua faaho‘i faahou mai Oia i te Autahu‘araa Mo‘a i vai na i tahito ra, ma te apitihia mai i te mau parau tumu atoa, te mau haamaitairaa atoa, te mau mana atoa, te mau peu atoa, te mau oro‘a atoa, e te mau haamaitairaa atoa i vai na i te fenua nei mai te omuaraa mai o te tau.⁸

Mai te mea e, te maramarama ra tatou i to tatou nei huru, e hi-‘o ïa tatou ia tatou iho ei mau taata mure ore, e e hi‘o tatou i te Atua ei Metua no tatou, i te mea e, ua haapiihia tatou ia parau, a pure ai tatou e, “To matou Metua, i te ao ra, ia raa to oe i‘oa.”[A hi‘o Mataio 6:9]. “E e metua ho‘i to tatou to te tino nei, e te faatura nei tatou ia ratou, ia rahi atu ïa to tatou auraro i te Metua o te Varua, e ia ora’tu.” [A hi‘o Hebera 12:9]. Aita vau e titau i te hoê noa a‘e haapapuraa no teie parau, i te mea e, e mea maramarama maitai no te feia mo‘a e, o te Atua te metua no to tatou varua, e ia ho‘i faahou atu tatou i mua ia’na ra, e ite tatou ia’na, mai ia tatou i ite i to tatou metua i te tino nei. Ua haapiihia tatou ia haafatata atu ia’na mai ta tatou e na reira i te hoê metua i te tino nei, no te ani ia’na i te mau haamaitairaa ta tatou e hinaaro; e ua parau oia e “O vai ïa i roto ia outou i te taata nei e hopoi i te ofa‘i na ta’na tamaiti ia ani mai oia i te pane? E ia ani i te i‘a e hopoi atu i te ophi na’na? E te ti‘a na ia outou, ino noa ai, ia horo‘a i te mea maitai na ta outou mau tamarii, a tae ai ho‘i i to outou Metua i te ao ra i te horo‘a i to’na Varua Maitai i te feia i ani atu ia’na ra.” [Mataio 7:9–11].⁹

E haamaitai to tatou Metua i te Ao ra ia tatou ia ti‘aoro tatou ia’na na roto i te pure haehaa.

Ia ite tatou e, o te Atua to tatou metua, e e tamarii tatou na’na, e ua fafau oia e faaroo oia i ta tatou mau pure, e ua titauhia ia tatou ia haapa‘o i to’na hinaaro e ia rave i ta’na ohipa. E ia hinaaro tatou ia riro ta tatou mau pure ei mau pure faufaa, e mea ti‘a ia tatou ia rave i te mau ohipa i faauehia ia tatou, mai tei faaitehia’tu na, e e mea ti‘a ia tatou ia riro ei feia paieti e te tura i roto i ta tatou mau ohipa te tahi e te tahi. Mai te mea e, e tamata tatou i te taviri i to tatou taeae, nahea ïa te Atua i te tauturu mai ia tatou, no te mea, e tamarii atoa ho‘i [to tatou taeae] na to tatou Metua i te Ao ra mai ia tatou atoa nei…Te feruri atoa ra Oia i to’na maitai, e mai te mea e, e imi tatou i to tatou maitai i ni‘a i te tua o te tamarii a te Fatu, i to outou mana‘oraa, e mauruuru anei Oia ia tatou.¹⁰

Te haamana‘o nei au i to‘u tamariiraa. I taua tau apîraa to‘u haapiiraa i te haafatata ia‘u i te Atua. E rave rahi taime to‘u haereraa i te hoê vahi, e ma te tapuni i muri mai i te hoê pu aihere, i reira vau e tipapa ai i mua i te Fatu e a ti‘aoro ai Ia’na ia aratai mai ia‘u. E ua faaroo Oia i ta‘u pure. I te tahi mau taime e ani au i te tahi atu mau tamaroa ia apee atoa mai ia‘u. Eita outou e fifi, te mau tamaroa e te mau tamahine, ia ti‘aoro i te Fatu i roto i to outou mau vahi mo‘emo‘e, mai ta‘u i na reira. Tera ïa te huru o te varua i roto ia‘u a vai tamarii ai au. E ua aratai te Atua ia‘u i te tahi mea e i te tahi mea. … Ua parahi-tamau-maite au i pihaiiho i te Atua; e te na reira noa nei â vau e tae roa mai i teie nei.¹¹

E faaite atu vau ia outou i te ohipa matamua ta‘u e rave ia haere au e poro, i te hoê vahi [apî] ihoa râ ta‘u e haere—oia ho-‘i, e haere au i te hoê vahi, te huru o te vahi e itehia ia‘u, i roto anei i te faaapu, i te fare vairaa maa animala, i roto anei i te uru raau, e aore râ, i roto anei i to‘u vahi haumitiraa, i reira vau e ani ai i te Atua ia haamaitai mai ia‘u e ia horo‘a mai i te paari ia‘u no te ti‘a i mua i te mau mea atoa o te tupu mai; e ua horo‘a mai te Fatu i te paari i titauhia e au, e ua paturu mai oia ia‘u. Mai te mea e, teie atoa to outou huru haere‘a, e haamaitai atoa oia ia outou. Eiaha e ti‘aturi i ni‘a ia outou iho, a imi râ i roto i te mau buka maitai—te Bibilia e te Buka a Moromona—e a haaputuputu i te mau haamaramaramaraa atoa e noaa ia outou, e i reira outou e ati atu ai i te Atua ra ma te faati‘amâ ia outou i te mau huru ino atoa, i reira ho‘i e noaa ai ia outou te mau haamaitairaa a tei Teitei roa ra.¹²

Eiaha e haamo‘e i te ti‘aoro i te Fatu i roto i to outou utuafare, ma te horo‘a ia outou iho e te mau mea atoa na outou na i te Atua ra, i te mau mahana atoa o to outou oraraa; e a rave tamau noa i te ohipa maitai, e a faatupu i te varua tahoê e te here, i reira te hau e te haamaitairaa a te Atua ora e noaa ai ia outou, i reira Oia e aratai ai ia tatou na te e‘a titi‘aifaro; e na te mau melahi mo‘a atoa o te Atua e te mau patereareha e te mau taata o te Atua e paturu ia tatou, e rairai roa te paruru e faataaê ra ia tatou i to tatou Atua, i reira tatou e fatata roa’tu ai ia’na ra, i reira to tatou varua e faaite ai ia Iehova Sabaota ra.¹³

Ia ti‘aturi e ia faaroo tatou i te Atua e ti‘a‘i.

Aita vau e ti‘aturi i te haapa‘oraa o te ore e auhia e au, tera râ, e ora vau e aore râ, e pohe au no te haapa‘oraa o ta‘u e hinaaro i te ti‘aturi. Aita vau e parau nei i te mau mea ta‘u e ore e taa; ua aro vau i te pohe, e ua ite au i te hinaaro o te diabolo ia haamou ia‘u, e aita vau i tau‘a i te reira. Ia ore taua ti‘aturiraa ra i roto ia‘u, faufaa ore ïa to‘u mau ti‘aturiraa faaroo paatoa. … Tei ia tatou te faaohiparaa i te parau tumu ta tatou i haamata; ia ti‘aturi e ia faaroo i te Atua; ia faauru te reira ia tatou i roto i ta tatou mau ohipa te tahi e te tahi.¹⁴

Ia rave tatou i ta tatou tuhaa, eita te Fatu e mairi i te rave i Ta’na. Eita ta tatou e nehenehe e pee i te ohipa maamaa a te tahi mau taata. Te parau nei tatou e, o te Ziona o te Atua tatou, tei mâ te aau. Te parau nei tatou e, e mau tane e e mau vahine paieti tatou, e te faaroo e te viivii ore, e faaroo to tatou i te Atua. Eiaha teie ia riro ei parau noa, ei ohipa atoa râ; e rave e e faatupu tatou i te parau, i te hinaaro e i te ture a te Atua.¹⁵

E mea pohe ho‘i te faaroo ohipa ore [a hi‘o Iakobo 2:17, 26], no reira, e mea papu maitai e, te faaroo ora e te faaroo ta te Atua i farii, e ere ïa i te ti‘aturi-noa-raa i te Atua, ia rave atoa râ i te ohipa. E ere i te tumu noa o te ohipa, na mea atoa râ e piti, te tumu e te ohipa. E nehenehe atoa ia parau e, no te ohipa i ti‘a roa‘i te faaroo, e aore râ, te ti‘aturiraa.¹⁶

E mea ti‘a ia tatou ia ti‘aturi i te Atua, ia vaiiho i te mau ohipa ia tupu mai tei titauhia. E ia na reira tatou, e ia haapa‘o tamau noa tatou i te mau fafauraa mo‘a ta tatou i rave i mua ia’na e i mua i te tahi atu, e upooti‘a o Ziona. …

E parau atu râ vau ia outou i te ohipa ta tatou e rave, e au mau taeae e au mau tuahine, o te Atua ta tatou e mata‘u i roto i to tatou aau; e haapae tatou i to tatou aau nounou e to tatou huru tauiui noa, to tatou mau huru hinaaro tuutuu ore atoa e te maamaa. … E faahaehaa ia tatou i mua i te Fatu, ma te tatarahapa i ta tatou mau hara, e i reira, a paruru ai i to tatou tino e to tatou varua ia vai mâ noa, ia riro ho‘i tatou ei mau faarii maitai no te Varua o te Atua ora, e ia arataihia tatou e a’na i roto i ta tatou mau ohipa atoa e rave no te feia e ora nei e no tei pohe. Ei te Atua e ta’na ra parau ti‘a to tatou mau hinaaro, e tae roa’tu i te taime e ti‘aoro ai tatou mai te hoê i tahito ra: E te Atua, e tamata hua mai ia‘u, e hi‘o mai, e mai te mea e, e haamainaina to roto ia‘u ia oe ra, a tuu atu i te reira ia reva ê atu [a hi‘o Salamo 139:23–24]. E hopoi‘a na tatou te mau metua tane e te mau metua vahine, ia haere i mua i te Fatu ma te haehaa e ia ani atu ia’na ia parahi mai teie nei hau i roto i to tatou aau; e mai te mea e, te vai ra to tatou mau vahi hapehape, ia fa‘i ïa tatou i te reira hape e ia tata‘i i te vahi e nehenehe e tata‘i; e na reira te mau tane atoa e te mau vahine atoa no Iseraela ia haamata i te faaafaro i to ratou utuafare, e ia faatupu noa i te varua o te hau, te varua o te tahoê e te here e a muri noa’tu.

E mai te mea e, e na reira te mau utuafare atoa o Iseraela e ati a‘e te fenua atoa o Ziona, i te mata‘u paatoaraa i te Atua e i te raveraa i te ohipa ma te parau ti‘a, ma te aupuru maite i te varua haehaa e te marû, ma te ti‘aturi ia’na, aita roa’tu e mana e vai nei o te nehenehe e haapeape‘a mai ia tatou.¹⁷

Te hau e horo‘a ïa na te Atua i te feia e haere na roto i To’na maramarama.

E horo‘a te hau no ô mai i te Atua ra. E hinaaro anei outou i te hau? Haere atu i te Atua ra. E hinaaro anei outou i te hau i roto i to outou utuafare? Haere atu i te Atua ra. E hinaaro anei outou i te hau no te paruru i to outou utuafare? Mai te mea e, e hinaaro outou, a haapa‘o i ta outou haapa‘oraa, i reira te hau o te Atua e parahi ai i pihaiiho ia outou, no te mea, no reira mai te hau, e eita te reira e parahi i te tahi atu vahi. … E maitai to te hau, e te parau nei au e, a imi i te reira, a poihere i te reira i roto i to outou aau, i te vahi e nohohia ra e outou, e i te mau vahi atoa ta outou e haere i rotopu i to outou mau hoa. Mai te mea e, o te reira ana‘e te hau te noaa ia tatou, oia te hau no ô mai i te Atua ra, e maitai ïa te mau mea atoa. …

Te vai ra te tahi mau taata, ia parau ratou i te parau no te tama‘i e no te mau pe‘apea, e parau ratou e, aita oe e mata‘u ra? Aita, e tavini au no te Atua, e ua ravai te reira, no te mea, te Atua te faatere. Tei ia‘u ïa te faariroraa ia‘u mai te araea i roto i te rima o te potera, ia fefe e ia haere i roto i te maramarama o te varua o te Fatu, a taa noa’tu te ohipa e tupu mai. Anapa noa’tu â te uira, haruru noa’tu â te aueueraa fenua, te Atua te faatere, e mai te mea ra e, te parau marû roa nei au, tei te Fatu ra tei te Atua Puai hope ra te hau, e e tamau noa ta’na ohipa e hope roa’tu te mau enemi atoa i te tuuhia e a’na i raro a‘e i ta’na avae, e e riro to’na basileia mai te pape mai e tae noa’tu i te mau hopea o te fenua ra.¹⁸

Te ohipa i titauhia ia tatou ia rave o te oraraa ïa i ta tatou haapa‘oraa, ia haapa‘o i te a‘o a to tatou Peresideni, ia haehaa e ia itoito e eiaha e faateitei i to tatou iho puai, e ani râ i te paari o te Atua e ia noaa to tatou hau i te Atua ra, i to tatou mau utuafare, i te tahi e te tahi, ia vai te hau i roto i to tatou aau e i rotopu i to tatou mau taata atoa.¹⁹

Ia ora tatou i ta tatou haapa‘oraa, ia haere tatou i roto i te maramarama o te Varua o te Atua, ia tamâ tatou ia tatou iho i te viivii e te ino, e ia ninii mai te muhumuhu marû o te Varua o te Fatu i te ite i roto i to tatou aau, e ia paruru ho‘i ia tatou, ma te faatupu i te hau e te oaoa i roto ia tatou, ua noaa ïa ia tatou te tahi maa ite iti no te mau mea i vaiihohia no te feia tei tamau maite i te haapa‘o, i reira tatou e feruri ai e, mai te mea ra e, tei roto tatou e te mau mea atoa na tatou, i te rima o te Fatu, e ua ineine tatou no te pŭpŭ ia tatou iho ei tusia no te faatupu i ta’na ra mau opuaraa i ni‘a i te fenua nei.²⁰

Te hau, o te hoê ïa mea hinaaro-roa-hia; e horo‘a te reira no ô mai i te Atua ra, oia te horo‘a rahi a‘e ta te Atua e nehenehe e horo‘a i to te tahuti nei. Eaha te mea hinaaro-roa-hia a‘e hau atu i te hau? Te hau i roto i te mau fenua, te hau i roto i te mau oire, te hau i roto i te mau utuafare. Mai te mata‘i Zephira (e aore râ, te mata‘i no te tooa o te râ) e puhihau mai te marû, e tamarû te hau i te pe‘apea, e tamaro i te roimata o te oto, e e faaore i te pe‘apea o te aau; e ia na reira ho‘i to te ao atoa nei, e iriti-ê-hia ïa te oto i te ao nei, e e faarirohia teie nei fenua ei paradaiso. Tera râ, e horo‘a te hau no ô mai i te Atua ra.²¹

Te mau Mana‘o Tauturu no te Haapiiraa e te Aparauraa

Eaha te tahi mau rave‘a ta te Atua no te faaite mai i To’na here metua ia tatou nei? Ia ite tatou e, e huru haapa‘o Metua to’na no tatou nei, nahea ïa te reira i te tauturu ia tatou i te mau taime e fifi tatou i te pae varua e i te pae tino nei?
No te aha tatou i te tahi taime e ore ai e pure tamau ma te aau tae mau? Eaha te ti‘a ia tatou ia rave no te faariro i ta tatou mau pure ei mau pure aau tae mau?
Eaha te haapiiraa e roaa ia tatou i roto i te ohipa tei tupu i ni-‘a ia Taylor no ni‘a i te pure? Nahea tatou ia haapii i te mau tamarii ia haafatata i te Atua i roto i te pure mai tei ravehia e te tamaiti iti ra o John Taylor?
Nahea tatou ia patu i to tatou ti‘aturiraa i te Atua? E mea nahea outou i te haamaitai-raa-hia no to outou ti‘aturiraa i te Atua?
Eaha te auraa no te hinaaro ra “ia haere tatou i roto i te maramarama o te Varua o te Atua”? Eaha te huru o te faaroo e titauhia i roto i taua huru hinaaro ra? Eaha te tahi mau mea i reira e titauhia ai ia outou ia faaohipa i to outou faaroo?
Eaha te mau iteraa tei noaa ia outou no ni‘a i te hau, te horo-‘a no ô mai i te Atua ra? Nahea taua hau ra i faatupu ai i roto ia outou i te here Ia’na?
Nahea outou ia faarahi i te hau i roto i to outou utuafare?

Te mau Papa‘iraa mo‘a: Maseli 3:5–6; Philipi 4:6–7; 2 Nephi 32:8–9; Mosia 4:9–10; PH&PF 19:23; 20:17–18; 59:23–24