Omuaraa
I roto i te pene tataitahi o teie nei buka, te vai ra e maha tuhaa: (1) Hoê faahitiraa parau no te faaite poto noa i te mana‘o tumu o te pene; (2) “No Roto mai i te Oraraa o John Taylor,” no te faataa i te mau parau poro‘i o te pene ma te turuhia mai te reira e te hoê aamu e aore râ, te hoê a‘oraa na te Peresideni Taylor; (3) “Te mau Haapiiraa a John Taylor,” o te hohora nei i te mau parau haapiiraa faufaa no roto mai i ta’na mau parau poro‘i e ta’na mau a‘oraa; e te (4) “Te mau Mana‘o Tauturu no te Haapiiraa e te Aparauraa,” tei riro ei tautururaa i te taata tataitahi i roto i ta’na hi‘opo‘a-faahou-raa e ta’na tuatapaparaa, tauturu atoa i te tahi atu â aparauraa, e te faaohiparaa i roto i to tatou oraraa i teie mahana na roto i te mau uiraa.
Nahea ia Faaohipa i teie Buka
No te faaohiparaa a te taata hoê e aore râ, a te utuafare. Ua faataahia teie buka no te faarava‘i i te ite o te mau melo no ni‘a i te mau parau tumu o te evanelia ta te Peresideni John Taylor i haapii mai. Ia tai‘o ana‘e te hoê melo i teie buka na roto i te pure e ia tuatapapa hohonu i te reira, e roaa ia’na te hoê faaiteraa papu no ni‘a i teie mau parau mau. E vai teie buka i roto i te apaparaa buka evanelia a te hoê melo, e e riro ïa ei rave‘a tauturu faufaa no te haapiiraa i to te utuafare.
No te aparauraa i roto i te mau pureraa i te Sabati. E buka haapiiraa teie na te pŭpŭ Autahu‘araa a Melehizedeka e na te Totaiete Tauturu i roto i ta ratou mau pureraa i te Sabati. Ua haapii mai o Elder Dallin H. Oaks e, tei roto i te mau buka Te mau Haapiiraa a te mau Peresideni o te Ekalesia “te mau parau haapiiraa e te mau parau tumu. E faufaa rahi to roto i te reira, e ua tano maitai i te mau hinaaro o to tatou nei anotau, e e mea faahiahia ho‘i no te haapiiraa e no te aparauraa.” 1E mea ti‘a i te mau orometua haapii ia faatumu i ta ratou haapiiraa i ni‘a i te mau parau e te mau papa‘iraa mo‘a i papa‘ihia i roto ra. Mai ta Elder Oaks i faataa mai, “Aita te hoê orometua i piihia no te maiti i te tumu parau o te haapiiraa, ua maitihia râ oia no te haapii e no te aparau i te mea i faataahia.”
E faaohipa te mau orometua i te mau uiraa i te pae hopea o te pene no te tauturu i te aparauraa i roto i te piha haapiiraa. Mai te mea e, e hi‘opo‘a oia i te mau uiraa hou a tai‘o ai i te mau parau a te Peresideni Taylor, e roaa ia’na te tahi atu mau mana‘o haamaramaramaraa no ta’na mau haapiiraa.
Ia riro te mau pureraa i te Sabati ei taime no te hapiiraa i te mau parau tumu o te evanelia, ei taime no te tuatapaparaa i te tahi mau hi‘oraa o te hoê taata tei riro ei haapiiraa i taua mau parau tumu ra, e ei taime no te haapapuraa i te iteraa papu i te parau mau. Mai te mea e, e titau te mau orometua i te Varua ma te aau haehaa i roto i ta ratou faaineineraa e te faatereraa i te haapiiraa, e puai te iteraa i te parau mau o te feia atoa e amui mai i roto i te haapiiraa. E ti‘a i te feia faatere e i te mau orometua atoa ia faaitoito i te mau melo o te piha haapiiraa ia tai‘o i te mau pene parau hou a tuatapapa ai te reira i roto i te pureraa i te Sabati. E ti‘a atoa ia ratou ia faahaamana‘o i te mau melo o te piha haapiiraa ia hopoi mai i ta ratou mau buka i roto i te pureraa, e ia faatura ho‘i i te faaineineraa o te mau melo o te piha haapiiraa na roto i te haapiiraa i te mau parau a te Peresideni John Taylor. Ia tai‘o ana‘e te mau melo o te piha haapiiraa i te pene na mua a‘e, e ineine ïa ratou no te haapii e no te faaitoito te tahi i te tahi.
Aita e faufaa e aore râ, aita e titauhia i te mau melo ia hoo mai i te tahi atu mau buka faaiteraa mana‘o e aore râ, i te tahi atu mau buka no te turu i te mau papa‘iraa i roto i teie buka. Te faaitoitohia nei râ ratou ia tai‘o i te mau papa‘iraa mo‘a tei faaitehia no te faananearaa i te tuatapaparaa o te parau haapiiraa.
Ua faataahia teie buka ei buka haapiiraa no te taata hoê, e ei buka haamaramaramaraa i te evanelia; no reira, e rave rahi mau pene eita e hope ia haapiihia i roto i te roaraa o te mau pureraa i te Sabati, no te rahi o te mau parau i papa‘ihia i roto ra. No reira, e mea faufaa roa ia tai‘o te taata i te reira i te utuafare ia roaa ia ratou te îraa o te mau haapiiraa a te Peresideni Taylor.
Te mau Apaparaa Parau no reira te mau Papa‘iraa i Faahitihia i Roto i teie Buka
Te mau haapiiraa a te Peresideni Taylor i papa‘ihia i roto i teie buka, e mau faahitiraa parau ïa o tei iritihia mai no roto mai i te mau papa‘iraa huru rau. Aita i tauiuihia te tomaraa, te papa‘iraa e te papa‘iraa rarahi o te reta parau i roto i te mau faahitiraa parau. No reira, e riro te feia tai‘o i teie buka i te ite i te tahi mau huru-ê-raa i roto i teie buka.
Ua faatoro‘ahia o John Taylor ei Aposetolo i te matahiti 1838 e ua turuhia oia ei toruraa o te Peresideni o te Ekalesia i te matahiti 1880.