Pene 22

Ia Maitai roa na roto i te mau Tamataraa

Mai te mea e na roto tatou i te tahi mau tamataraa i te haere, te tahi nau tamataraa, e te tahi nau mauiuiraa e ia farerei tatou i te tahi mau faa‘ereraa, te vaira i roto i reira te tahi tamâraa i te metara, te tamâraa, e ia faaineine i te reira no te faaohiparaa a te Fatu.¹

No Roto mai i te Oraraa o John Taylor

Ua farerei o John Taylor i te mau tamataraa e rave rahi i roto i to’na oraraa. Penei a‘e paha te hoê o te mau tamataraa rahi roa a‘e, o te ohipa ïa tei tupu i ni‘a ia’na i te fare tapearaa no Tarateti. I roto i te aroraa tei tupu a taparahi-pohe-hia’tu ai te Peropheta Iosepha e to’na taeae o Hairamu, e rave rahi ofa‘i pupuhi tei puta i ni‘a ia Elder Taylor. Ua pepe ino roa oia, e aita e ti‘a faahou ia’na ia tere i Nauvoo, no reira, ua faaea noa oia i Tarateti no te tahi tau mahana rii. I taua taime ra, ua haere maira te hoê taote no te iriti i te hoê ofa‘i pupuhi i roto i to’na avae. No te ino rahi te puta ofa‘i o Elder Taylor, “ua haere ta’na vahine i roto i te tahi atu piha no te pure no’na ia noaa ia’na te puai no te faaoromai e ia farerei faahou oia ia’na e i to’na utuafare.” Ua ani te taote ia Elder Taylor e hinaaro anei oia ia taamuhia oia i te taime no te tapuraa, ua pahono atu o Elder Taylor, eiaha. No reira, ua ravehia te tapuraa ma te tapeape‘a ore e ma te faata‘oto-ore-hia oia.²

I te taeraa mai te tahi mau melo e rave rahi o te Ekalesia i Tarateti no te faaho‘i ia Elder Taylor i Nauvoo, e mea ino roa oia, i te mea e, ua tahe noa to’na toto e e mea fifi roa no’na ia muhumuhu. E no te mea eita ta’na e nehenehe ia tere na ni‘a i te pereoo puaahorofenua, ua amohia oia na ni‘a i te hoê paepae no te haere i Nauvoo. Tera râ, “no te hautiuti te paepae i roto i te taime amoraa, i te pae hopea, ua mauiui roa oia. Ua imihia te hoê pereoo faahee hiona e ua taamuhia te reira i muri i te hoê pereoo puaahorofenua. Ua hamanihia te hoê ro‘i i ni‘a i te pereoo faahee hiona, e ua parahi te Tuahine Taylor i pihaiiho ia’na no te faararirari noa i to’na puta i te pape to‘eto‘e,” e ua hee marû noa te pereoo faahee na ni‘a i te aihere me‘ume‘u e tae roa’tu i Nauvoo.³

Ua tamau noa to ratou ati i Nauvoo i te taime a faaineine ai o Elder Taylor e e rave rahi hanere Feia mo‘a i te faaru‘e i te oire i te ava‘e Fepuare 1846 no te horo ê atu i te hamani-ino-raa e rahi noa ra. Te faati‘a ra te aamu i to ratou ati rahi a puhapa ai ratou i te tahi pae o te anavai pape i Nauvoo: “Ua faaea ratou i reira, i roto i te to‘eto‘e e te vero, area i te tahi noa’tu pae–fatata e itehia’tu ia hi‘o mata—to ratou ïa mau fare au maitai, to ratou oire nehenehe e to ratou ho‘i hiero haviti mau! No ratou noa ra ho‘i taua mau fare ra ta ratou i faaru‘e atu, e taua oire ra, i te mea e, i roto i to ratou rû rahi no te horo ê atu, aita i nahonaho ia ratou ia hoo i ta ratou mau faufaa.”⁴

E rave rahi matahiti i muri mai, i te matahiti 1885, ua mau papu te faaearaa o te Feia mo‘a i roto i te Peho no Roto Miti; i reira, ua farerei te Peresideni Taylor i te tamataraa o te vai otahinoa-raa e te mo‘emo‘e ho‘i. Oia ïa, i roto i to’na horo-tapuni-raa no te tauturu ia iti te hamani-ino-raa a te feia faatere o te hau i te Ekalesia, aita ïa oia e nehenehe faahou e farerei i to’na utuafare, e na reira atoa ho‘i ratou iho, te moemoe noa atoa hia ra ratou. Ua rahi roa’tu te fifiraa o to’na ora- otahi-raa i te taime a pohehia ai ta’na vahine o Sophia i te ma‘i e a pohe roa’tu ai. Inaha, aita i ti‘a ia’na ia haere e farerei i ta’na vahine e aita atoa oia i tae i to’na hunaraa, no te parururaa ia’na. Noa’tu te mamae rahi o to’na aau, “ua faaoromai maite te Peresideni Taylor i taua mau fifi ra, i roto i tera huru vî ore to’na e hope noa’tu to’na oraraa.”⁵ I roto i to’na taime tapuniraa, ua papa‘i oia i te hoê episetole i to’na utuafare; e i roto paha i taua episetole ra e ite-maitai-hia ai to’na huru i mua i te mau tamataraa: “Te feruri nei te tahi mau taata e, ua riro te mau hamani-ino-raa e te mau tamataraa ei ati; tera râ, i te tahi mau taime, e mai te mea hoa râ e, te haapa‘o nei tatou i te hinaaro o te Fatu e i Ta’na mau faaueraa, e ti‘a ia parau e, e mau haamaitairaa te reira.”⁶

Noa’tu te rahiraa o te mau tamataraa tei tupu i roto i to’na oraraa, ua vai noa o John Taylor ei tavini itoito no te Fatu e ei ti‘a faatere itoito i rotopu i te Feia Mo‘a, ei hi‘oraa tamau no te faaroo e no te vai maite i roto i te ati.

Te mau Haapiiraa a John Taylor

E mea maitai te mau tamataraa no to tatou maitai-roa-raa

E mea ti‘a te taata ia tamatahia, e ia horoihia e ia tamâhia, e ia maitai roa na roto i te mamae. Ua ite tatou i te taata i tera tau e tera tau tei farerei i te mau tamataraa e te mau ati rau, e ua haapii ratou ia tuu i to ratou faaroo i roto i te Atua, e i roto ana‘e i te Atua.⁷

E rave rahi mau mea ta tatou i haapii i roto i te mamae. Te parau nei tatou i te reira te mamae. Te parau nei râ vau e, te haapiiraa o te ite. Aita vau i haamau‘a rahi roa i to‘u upoo i te feruriraa i teie mau mea. Aita atoa vau e na reira nei i teie mahana. No te aha teie mau mea? No te aha te feia maitai e tamatahia ai? … Aita roa hoê a‘e taime i faariro vau i taua mau mea ra ei mau mea taa‘e atu i te mau mea tei riro ei tamâraa i te Feia Mo‘a a te Atua, ia riro ratou, mai tei faaitehia i roto i te mau papa‘iraa mo‘a, mai te ario i tataihituhia te tamâraa i te auahi.⁸

I te tahi mau taime, te amuamu nei tatou i to tatou mau tamataraa. E ere te mea au ia tatou ia na reira. E mea ti‘a ia vai teie mau mea ia maitai roa ho‘i tatou. I te tahi mau taime, te feruri nei tatou e, aita i tano maitai te mau mea i ravehia i ni‘a ia tatou, e te feruri nei au e, ua ti‘a te reira mana‘o to tatou no ni‘a i te tahi mau mea. Te feruri nei tatou e, ua faaineinehia te tahi mau opuaraa ino no te tairi ia tatou; te feruri nei au e, ua ti‘a roa te reira feruriraa to tatou. Tera râ, eiaha atoa tatou e hitimahuta i te reira mau mea. Eiaha tatou e maere i te mau mana‘o riri e te haapeape‘a. No te aha? No te mea, te ora nei tatou i te hoê mahana e i te hoê tau taaê mau o te ao nei; tei parau-papu-hia te mau mahana hopea nei.⁹

Ua ite au e, te vai atoa nei to tatou mau tamataraa, to tatou mau ati, to tatou mau oto, e to tatou mau haapaeraa, mai to te tahi atu mau taata. E tupu mau te mau fifi i ni‘a ia tatou; e titauhia ia tatou ia aro i to te ao nei, i te mau mana o te poiri, i te mau ohipa pi‘o a te taata nei, e i te mau ino e rave rau; tera râ, na roto atoa i teie nei mau mea e maitai roa ai tatou. E mea ti‘a ia ite tatou ia tatou iho, ia ite i to tatou ti‘araa e to tatou huru i mua i te Atua, e ia ite i to tatou puai e i to tatou paruparu; to tatou poiri e to tatou maramarama, to tatou paari e to tatou maamaa, ia nehenehe ia tatou ia ite e, nahea ia farii maitai i te mau parau tumu mau, e ia haro‘aro‘a e ia tuu i te hoê faufaa i ni‘a i te mau mea atoa, ia hiti mai te reira i roto i to tatou feruriraa.

E mea faufaa ia ite tatou i to tatou mau paruparu, e i te paruparu o to tatou mau taata tupu; to tatou iho puai e te puai o vetahi ê; e ia maramarama maitai i to tatou ti‘araa mau i mua i te Atua, te mau melahi, e te mau taata; ia ti‘a ho‘i ia tatou ia faatura i te mau taata atoa, eiaha râ ia haafaufaa a‘e i to tatou paari e aore râ, i to tatou puai, eiaha atoa ho‘i e faariro noa i te reira ei mea ha‘iha‘i, e na reira atoa i to vetahi ê; e ti‘aturi râ tatou i te Atua ora, e ia pee ia’na, e ia ite tatou e, e mau tamarii tatou na’na, e oia to tatou Metua, e oia to tatou haapuraa, e te mau haamaitairaa atoa e roaa ia tatou, no roto mai ïa i to’na ra rima maitai.¹⁰

Te parau ra Petero no ni‘a i te mau [tamataraa]: “E au mau here e, eiaha e maere i te hamani ino u‘ana i roto ia outou ei tamataraa ia outou, mai te mea e ua roohia outou i te tahi mea ê: E oaoa râ, i te mea te rave atoa ra outou i te mau pohe o te Mesia; e ia faaitehia mai to’na hanahana, ia hiemateoa outou ma te oaoa rahi.”[1 Petero 4:12–13]. E nehenehe ho‘i ta’na e parau noa’tu ia ratou e, e tupu mau â mai te reira te huru, i te mea e, e Atua to te ra‘i ra, e e diabolo ho‘i to hade; e e mea faufaa mau ia tupu mai te reira te huru. No ni‘a i teie mau mea nei, aita hoê fifi to‘u. Eaha ïa te huru ahiri e, e roohia tatou i te ati! Ua tae mai tatou i ô nei no taua opuaraa ra; ua haere mai tatou ia tamâhia tatou; e na te reira e horo‘a mai ia tatou i te ite i te Atua, i to tatou mau paruparu e to tatou puai; to tatou mau huru pi‘o, … ia roaa ia tatou te hoê iteraa i te ora mure ore, ia ti‘a ia tatou ia upooti‘a i ni‘a i te mau ino atoa e ia faateiteihia i ni‘a i te mau terono mana e te hanahana.¹¹

Ua maramarama hope roa te Faaora i to tatou mau tamataraa.

E mea faufaa ia noaa atoa i te [Mesia] te hoê tino mai to tatou nei te huru, e ia vai oia i raro a‘e i te mau paruparu atoa o te tino nei, ia tuuhia oia i mua i te diabolo, e no te teimaha ta’na aroraa, ua faaitehia mai ia tatou e, mai te topata toto ra to’na hou i te taheraa [a hi‘o Luka 22:44]. E tae a‘era i taua mahana rahi ra a fatata ai oia i te pûpû i to’na ora, na ô a‘era oia, “E ta‘u Atua, e ta‘u Atua, eaha oe i faaru‘e mai ai ia‘u?”[Mataio 27:46]. Ua roohia oia i taua mau mea atoa ra, e ia ite mai oia ia outou ia roohia atoa i teie mau tamataraa e teie mau ati, ua ite oia eaha to’na mana‘o no ni‘a ia outou—nahea ia haafatata mai ia outou.¹²

A ora ai te Faaora i ni‘a i te fenua nei, e mea faufaa “ia ati atoa ho‘i oia i te mau mea atoa mai ia tatou atoa nei,” e “ia aroha mai ia tatou i to tatou mau paruparu nei,”[a hi‘o Hebera 4:15] i reira oia e ite ai i te huru o te paruparu e o te puai; te maitai roa e te ino o te taata hi‘a nei; e no te mea ua oti i te ravehia e a’na te ohipa i haere mai ai oia i te ao nei, e no te mea ua aro oia i te peu haavarevare, te ino, te paruparu e te ma‘ua o te taata nei—e no te mea ua farerei oia i te mau huru faahemaraa atoa e te mau huru tamataraa atoa, e ua upooti‘a, ua riro mai oia “Ei tahu‘a rahi parau mau” [a hi‘o Hebera 2:17] ei ti‘a no tatou i roto i te basileia mure ore o to’na ra Metua. Ua ite Oia ia faaau, e ia tuu i te hoê faito faufaa i ni‘a i te natura taata nei, no te mea, i vai atoa na ho‘i oia i roto i te mau mea atoa mai ia tatou atoa nei, i ti‘a ai ia’na ia faaoromai i to tatou paruparu e to tatou mau fifi, e ia ite maite i te hohonu, te mana e te puai o te mau ati e te mau tamataraa e farereihia e te taata i roto i teie nei ao, e na roto i te reira, ua ti‘a ia’na ia faaoromai i te reira ma te ite papu, mai te au i te hoê metua e te hoê tuaana.¹³

E haamaitaihia tatou mai te mea e, e tamau noa tatou i te faaoromai e i te haapa‘o i roto i to tatou mau tamataraa.

I roto i teie mau mea atoa e tupu nei i teie mahana, te ite nei tatou i te rima o te Atua. E tumu paari to te reira, e e faite papu mai oia i te reira ia tatou. Hoê mea papu maitai, oia ho‘i, te tamatahia nei te Feia Mo‘a i te hoê faito aitâ i iteahia a‘e nei i ô tatou nei. Te oaoa ra te feia tei faaroo e te vai papu ra ratou; area te feia tei ore i faaroo ra, te mata‘u nei ïa e te rurutaina nei ratou. Te feia e hinu to roto i ta ratou lamepa e ua aupuru maite i te reira e ua faaama noa, ua noaa ïa ta ratou lamepa no to ratou ra avae e ore ïa ratou e turori e e hi‘a; area te feia aita e mori e aita atoa e hinu, tei roto ïa ratou i te horuhoru e te feaa; aita ratou i ite eaha te ohipa e rave. E ere anei teie i te tupuraa o te parau a te Atua e te mau haapiiraa a To’na ra mau tavini? Aita anei te Feia Mo‘a no te mau Mahana Hopea nei i haapiihia i te mau taime atoa e, mai te mea e, e hinaaro ratou ia vai haapa‘o noa ratou e tae noa’tu i te hopea ra, e mea ti‘a ïa ia ratou ia ora i ta ratou haapa‘oraa faaroo na roto i te haapa‘oraa i te mau faaueraa atoa a te Atua? Aita anei ratou i faaara-tamaunoa-hia i to ratou hopearaa mai te mea e, e rave ratou i te hara? E ti‘a anei i te faaturi, te poroneio, te haavare, te eia, te taero ava, tei ofati i te Sabati, te faaino e aore râ, te feia rave hara ua rau te huru, ia itoito noa i roto i te mau tamataraa, o te titauhia i te Feia Mo‘a ia ite e ia mau? …

Ahiri te mau taata atoa e parau nei e, e Feia Mo‘a ratou no te mau Mahana Hopea nei, te haapa‘o maitai nei ratou i ta to ratou Atua, i Ta’na mau fafauraa mo‘a e Ta’na mau ture, e ahiri e, te ora nei ratou mai tei titauhia i te Feia Mo‘a ia ora, eita ïa te hamaniino-raa e haapeape‘a mai ia tatou. Tera râ, e mea pe‘apea ia ite e, aita ratou e na reira nei. … Ua parau atoa Oia e, ahiri e haapa‘o To’na mau taata i Ta’na mau ture e i Ta’na mau faaueraa, e ua rave i te reira, eiaha i te parau noa, e rave roa râ, e riro ïa Oia ei paruru e ei ti‘a‘i e ei pare etaeta no ratou, e aita e taata e nehenehe e haapepe ia ratou, no te mea, Oia ïa to ratou pare ati. E riro teie mau tamataraa i to tatou faaroo e i to tatou vai-papu-raa ta tatou e ite nei, ei maitai no tatou e no to tatou hua‘ai. I te mau tau i mua nei, i reira tatou e hi‘o ai i muri, e e ite papu ai i te aroha o te Atua i ni‘a i te mau mea atoa ta tatou e ite nei i teie mahana. E imi tatou i te mau rave‘a atoa ia ora parau ti‘a i mua i te Fatu, e ia hamani-ino-hia ho‘i tatou ra, eiaha ïa no te ohipa ino, no te ohipa parau ti‘a râ.¹⁴

Aita anei outou e ite ra i te faufaa no tatou ia farii i teie mau tamataraa e teie mau ati? Na te Fatu i tuu ia tatou i roto i te mau ti‘araa tei faataa-maite-hia no te faanavai i te maitai hau a‘e o to’na mau taata. Teie ho‘i to‘u mana‘o, i te atea ê roa i teie mau mea e haati nei ia tatou i teie nei e tei haafifi ia tatou e i te basileia o te Atua, na te reira mau tamataraa e faarahi roa’tu i to tatou maitai, te maitai nei te mau mea atoa, e e maitai roa’tu ho‘i te reira mai te mea e, e haapa‘o tatou i te mau faaueraa a te Atua. No reira, eaha to tatou ti‘araa e au ai—te tane, te vahine e te tamarii? E rave i te au ia tatou ia rave i mua i te Atua ra, faatura ia’na, e maitai te mau mea atoa. No ni‘a i te mau mea e tupu, e ti‘aturi tatou i te rima o te Atua, ma te feruri e, noa’tu eaha te ohipa e tupu mai, ua ti‘a ïa te reira, e na te Atua e faatere i te mau mea atoa ei maitai no tatou e no ta’na ho‘i ekalesia e to’na basileia i ni‘a i te fenua nei. …

Mai te mea e, e tae mai te ati i ni‘a ia tatou, e mea maitai ïa. A tere noa ai te tau, ia hi‘o maitai tatou i te paari o te mau mea maramarama-ore-hia e tatou nei, noa’tu to tatou taa ore i te huru faatupuraa te Atua i ta’na mau opuaraa i ni‘a i te fenua nei, e i ta’na mau opuaraa no tatou tataitahi e no to tatou utuafare, e ite tatou e, na taua paari ra e faatere nei i te mau mea atoa, oia te paari no ô mai i te Atua ra, e ua ti‘a ho‘i te mau mea atoa e ua faataahia ho‘i no te haamaitai i te ora maitai mure ore o te mau taata atoa i mua i te Atua.¹⁵

Te parau nei matou i te Feia Mo‘a atoa no te mau Mahana Hopea nei e, teie mau ati ta tatou paatoa e farerei nei, ua riro ïa ei tamataraa i te Feia Mo‘a e i te feia atoa tei faahua pii noa ia ratou e feia Mo‘a. O ratou tei haapa‘o maite ia vai tamau noa te hinu i roto i ta ratou lamepa, e mori ïa to ratou i teie nei no te aratai ia ratou; area te feia tei ora i roto i te ohipa taparu noa i te mori, e aore râ, tei ora noa i roto i te mori a vetahi ê ra, e riro ïa ratou i te horo haere noa ma te ite ore i te e‘a e haere. Inaha, e mea ti‘a i te Feia Mo‘a ia ineine i roto i teie mau mea atoa. Ua haapii-maite- hia e ua faaara-maite-hia ratou eiaha e ti‘aturi noa i ni‘a i te taata, e aore râ, i ni‘a i to’na iho puai no te pato‘i atu i te mau mea o teie tau tamataraa. Ua haapiihia ia ratou e, “Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Mesia ra i roto ia’na.” [1 Ioane 2:15]. Ua haapiihia ia ratou e, e ore e ti‘a i te hoê taata ia tavini e piti fatu; eita ho‘i e ti‘a ia tatou ia tavini i te Atua e ia mamona [a hi‘o Luka 16:13]. Te feia tei haapa‘o i teie mau haapiiraa, e ua tamau maite ho‘i i te haapa‘o i te tahi atu mau faaueraa a te Fatu ra, e noaa ïa ia ratou te puai e te faaroo e titauhia no te faaoromai i te mau tamataraa atoa.¹⁶

E oaoa vau i roto i te mau ati, i te mea e, e mea titauhia te reira no te faahaehaa e no te tamata ia tatou, ia ti‘a ia tatou ia ite ia tatou iho, e ia ite i to tatou mau paruparu e to tatou mau fifi; e e tupu te oaoa i roto ia‘u ia upooti‘a ana‘e au i ni‘a i taua mau ati ra, no te mea te pahono mai nei te Atua i ta‘u mau pure; no reira, te hinaaro nei au ia oaoa noa vau i roto i te roaraa o te mahana.¹⁷

Te mau Mana‘o Tauturu no te Haapiiraa e te Aparauraa

Eaha te tahi mau tumu o te mau tamataraa? No te aha aita te ati i haapae-ê-hia i te feia parau ti‘a?
Eiaha ïa te huru o to outou oraraa ahiri e aita outou e roohia i te tamataraa e aore râ, i te ati? Eaha tei itehia ia outou no ni‘a ia outou iho e no ni‘a i te Atua na roto i te mau mea tei mauiuihia e outou?
A feruri na i te mau tamataraa e farereihia nei e outou i teie taime. Nahea to outou huru i mua i te mau tamataraa ia taui i te huru no to outou faaoromairaa e aore râ, to outou upooti‘araa i ni‘a i te reira? Nahea outou ia haamaitai i te huru no ta outou aroraa i to outou mau tamataraa?
No te aha te Faaora i ite papu ai i to tatou mauiui? (A hi‘o atoa Alama 7:11–12; PH&PF 19:16–19; 122:8). Nahea te iteraa i te mamae o te Faaora ia tauturu ia tatou ia haapa‘o tamau noa i roto i to tatou mau tamataraa?
Eaha te ti‘a ia tatou ia rave no te rave hope roa i te tamahanahana e te puai ta Iesu e horo‘a? (A hi‘o Hebera 4:16; 1 Petero 5:6–11). E mea nahea te itoito i noaa ai ia outou na roto i te tamahanahanaraa a te Faaora i roto i te mau taime tamataraa?
No te aha i te tahi taime e mea fifi ia faaoromai e ia haapa‘o ho‘i i roto i te taime fifi? Nahea e ti‘a ai ia tatou ia hi‘o i te fifi mai te au i ta te Fatu hi‘oraa?
Eaha tei ravehia e vetahi ê no te tauturu ia outou i roto i to outou mau tamataraa? Nahea outou ia tauturu ia vetahi ê i roto i to ratou mau tamataraa? Eaha ta outou i haapii mai na roto mai i te mau haapiiraa a te Peresideni Taylor e o ta outou e nehenehe e faaite atu i te tahi atu taata o te farerei ra i te mau tamataraa?

Te mau Papa‘iraa mo‘a: Salamo 34:19; 2 Korineti‘a 4:8–18; 1 Petero 4:12–13; Alama 36:3; Etera 12:6; PH&PF121:7–8

Saints leaving Nauvoo — Te faaru‘e nei te Feia Mo‘a i Nauvoo i te ava‘e Fepuare 1846. Ua haapii te Peresideni Taylor e, “ua riro te mau ati ei tamataraa i te Feia Mo‘a e i te feia atoa tei faahua pii noa ia ratou e feia Mo‘a.”

pocket watch — I ora oia i te hoê uati pute i te ofa‘i pupuhi i te matahiti 1844, e ua ora te Peresideni Taylor e rave rahi matahiti i muri a‘e e ua haapii i te Feia Mo‘a i te tumu o te mau tamataraa.