Haapotoraa Aamu

Eere teie buka i te hoê buka aamu, e haaputuraa râ no te mau parau tumu o te evanelia tei haapiihia mai e te Peresideni John Taylor. Tera râ, no te faatu‘atiraa i ta’na mau haapiiraa i ni‘a i te tereraa o te aamu, i horo‘ahia’tu ai te tabula i muri nei. I roto i teie haapotoraa, e rave rahi mau tuhaa faufaa o to’na oraraa o tei hapaehia, mai to’na mau faaipoiporaa e te fanauraa e te poheraa o ta’na mau tamarii, o ta’na ho‘i i here roa.

1808, 1 no Novema	Fanauhia i Milnthorpe, Westmoreland, i Peretane, te piti o na 10 tamarii a James e o Agnes Taylor.
1819	Ua reva’tu oia e to’na utuafare i Hale (tapiri mai ia Milnthorpe), i reira oia i te tautururaa i te raveraa ohipa i roto i te hoê fare faaapu o ta te hoê paino tane i vaiiho mai na to’na metua tane (11; te numera i roto i te paruru, o te matahiti ïa o John Taylor).
1822	Ua haapii oia i te toro‘a hamani tura i Liverpool. Hoê matahiti te maoro, ua topatari ta’na imiraa faufaa, e ua ho‘i mai oia i te fare (14).
1824	Ua faaru‘e oia i te Ekalesia no Peretane e ua riro mai ei Metoti. I roto i to’na mau taime ohipa ore, i te rahiraa o te taime, ua tai‘o oia e ua tuatapapa i te Bibilia, ua tai‘o i te mau papa‘iraa faaroo, e ua pure (16).
1825	Ua riro mai oia ei Metoti “faaitoito,” e aore râ, ei haapii evanelia. Ua tupu i roto ia’na te hoê iteraa e, e mea ti‘a ia’na ia haere i Amerita no te poro i te evanelia (17).
1830	Ua reva na metua e te toe‘a o te utuafare i Toronto, Canada, ma te vaiiho atu ia’na i Peretane no te faaoti roa i te ohipa imiraa faufaa a te utuafare (21 e aore râ, 22).
1832	Ua faaru‘e oia i te fenua Peretane no te reva’tu i te oire no Niu Iota. Ua haamata oia i te poro i Canada (23 e aore râ, 24).
1833–36	Ua tavini oia ei orometua i roto i te Ekalesia Metoti i Toronto. Ua tamau noa oia i te haapii e i te imi i te mau papa‘iraa mo‘a (24–27).
1836, tau faatupuraa raau	Ua tae mai o Elder Parley P. Pratt i Toronto no te poro i te evanelia i faaho‘i-faahou-hia mai (27). Ua piihia o Elder Pratt i roto i te Pŭpŭ Tino Ahuru Ma Piti Aposetolo i te matahiti 1835.
1836, 9 no Me	Ua bapetizohia oia e Parley P. Pratt (27).
1836–37	Ua tavini oia ei ti‘a faatere no te Ekalesia i Canada (27–28).
1837, Mati	Ua haere oia i Keterani no te farerei i te Peropheta Iosepha (28).
1838	Ua faatoro‘ahia oia ei Aposetolo i Far west, Missouri, i te 19 no Ditema, na Brigham Young raua o Heber C. Kimball, i raro a‘e i te aratairaa a Iosepha Semita tei tapeahia i te fare tapearaa no Liberty (30).
1840	Ua tae atu oia i te fenua Peretane ei misionare. O oia te misionare matamua o tei poro i te evanelia i faaho‘i-faahou-hia mai, i te fenua Irirane e i Isle of Man. Na’na i hi‘opo‘a i te faaineineraa e i te nene‘iraa o te haapurororaa matamua o te Buka a Moromona tei haapararehia i rapae i te fenua Marite; ua tauturu atoa oia i te faaineineraa i te hoê buka himene, e ua hamani atoa oia e rave rahi mau buka iti misionare (31).
1841	Ua ho‘i faahou oia i te fenua Marite e e rave rahi atu mau Aposetolo (32).
1842	Ua maitihia oia e Iosepha Semita no te papa‘i i te Times and Seasons, te hoê ve‘a na te Ekalesia. Ua papa‘i atoa oia i te Wasp (1842–43) e i te ve‘a i mono i te reira, oia ho‘i, te Nauvoo Neighbor (1843–45), e na ve‘a ana‘e teie no Nauvoo.
1842	Ua maitihia oia ei melo no te apooraa oire no Nauvoo, ei melo i roto i te tomite faatere o te Fare Haapiiraa Teitei no Nauvoo, ei Haava-Paruru i roto i te Nuu Faehau no Nauvoo (33).
1844, 27 no Tiunu	Ua ite mata oia i te pohe maratiri o Iosepha Semita raua o Hairamu Semita i roto i te fare tapearaa no Tarateti, e ua pepe ino roa oia i roto i taua taime aroraa ra (35).
1846	Ua tauturu oia i te faatupuraa i te Nuu Faehau Momoni i Council Bluffs. Ua reva oia i te fenua Peretane no te piti o te misioni na muri iho ia Parley P. Pratt e o Orson Hyde (37).
1847	Mai te fenua Peretane ua ho‘i atu oia i Winter Quarters. Ua aratai oia i te hoê pŭpŭ Feia Mo‘a i Utaha, e ua tae ratou i te ava‘e Atopa (38).
1850–51	Ua tavini oia ei misionare i te fenua Farani. I pihaiiho i te vahi i parauhia o Boulogne, ua pure oia no te haamaitai i te reira fenua no te pororaa o te evanelia. Ua haamau oia e ua papa‘i i te ve‘a matamua a te Ekalesia i te fenua Farani, Etoile du Deseret (Te Feti‘a no Desereta). Ua tauturu oia i te huriraa i te Buka a Moromona i roto i te reo Farani. Ua haaparare oia i te ve‘a matamua a te Ekalesia i te fenua Puruti‘a, e ve‘a taava‘e teie tei parauhia Zion‘s Panier (Te Reva o Ziona). I raro a‘e i ta’na faatereraa, ua haapararehia te Buka a Moromona no te taime matamua i te fenua Puruti‘a. Ua papa‘i oia i The Government of God [Te Faatereraa a te Atua] (41–42).
1854	Ua maitihia oia ei auvaha ture no Utaha (45).
1854–56	Ua rave oia i te hoê tau misioni i Niu Iota, i reira to’na faatereraa e te hi‘opo‘araa i te mau ohipa a te Ekalesia i roto i te mau tuhaa fenua i te pae hiti‘a o te râ. Ua papa‘i oia i te hoê ve‘a tei parauhia The Mormon (Te Momoni) (46–48).
1857	Ua ho‘i faahou oia i Utaha. Ua maitihia oia ei Ti‘a faatere no te Faatereraa Hau o Utaha, e ua parahi oia i roto i te reira ti‘araa e rave rahi matahiti te maoro—taa‘e noa’tu ta’na mau hopoi‘a i roto i te Ekalesia (49).
1868–70	Ua riro oia ei Haava Hi‘opo‘a no te tuhaa fenua no Utaha (59–61).
1877, 29 no Atete	Ua pohe o Brigham Young. Na John Taylor i aratai i te Ekalesia i roto i te maororaa e toru matahiti, i roto i te ti‘araa Peresideni no te Pŭpŭ Tino Ahuru Ma Piti (68–71).
1878	Ua faati‘ahia te pŭpŭ Paraimere (69).
1880, Atopa	Ua paturuhia oia ei Peresideni no te Ekalesia, e o George Q. Cannon raua o Joseph F. Smith ei na tauturu (71).
1882	Ua haamana te faatereraa o te Hau Marite i te ture no ni‘a i te faaipoiporaa vahine rau o tei faariro i te reira ohipa ei hapa i mua i te ture, e o tei opani i te feia e rave ra i te reira ohipa, ia haere e maiti, ia mau i te mau ti‘araa i roto i te hau, e aore râ, ia rave i te ohipa i roto i te parau no te ture (73).
1882	Ua haaparare oia i The Mediation and Atonement [Te Arai e te Taraehara] (73).
1884, Me	Ua haamaitai oia i te Hiero no Logan Utaha (75).
1885	I roto i to’na tere i Talifonia, ua tae mai te parau ia’na e, te titau ra te mau ti‘a faatere o te hau e haru ia’na no to’na raveraa i te vahine rau. Ua ho‘i atu oia i Roto Miti i te 27 no Tenuare. I te 1 no Fepuare, ua vauvau oia i ta’na a‘oraa hopea i mua i te naho‘a taata, e, ma te ti‘aturi e, e iti rii mai te hamani-ino-raa a te mau ti‘a faatere o te hau i ni‘a i te Ekalesia, ua tapuni oia (76).
1887, 25 no Tiurai	Ua pohe oia i te 78-raa o te matahiti i te ti‘ahapa o Thomas Roueché i Kaysville, Utah. I roto i ta’na tau faatereraa, ua taeahia e 150,000 rahiraa melo i roto i te Ekalesia.