Pene 15
Te Ti‘amâraa e te Ti‘aauraa
Tei ia tatou te maitiraa i to tatou faateiteiraa e aore râ, to tatou haaviiviiraa; tei ia tatou te maitiraa i to tatou oaoa e aore râ, to tatou ati i roto i te ao a muri a‘e.1
No Roto mai i te Oraraa o John Taylor
“I te tahi taime te paraparau nei tatou no ni‘a i to tatou iho hinaaro,” te na reira ra te Peresideni John Taylor. “E parau tumu ti‘a anei te reira? E. E i vai tamau noa na te reira parau tumu, e no ô mai ïa i te Atua ra, to tatou Metua i te Ao ra.”2 Ua poihere maite te Peresideni Taylor i te parau tumu o te ti‘amâraa i te pae morare—te mana ta te Metua i te Ao ra i horo‘a mai i Ta’na mau tamarii no te maiti i te maitai e aore râ, i te ino e ia rave ratou i tei au i to ratou iho hinaaro. Tera râ, ua haapii atoa oia e, e faaite te taata tataitahi i te ti‘aauraa no ta ratou iho mau ohipa i te Atua ra. Te na ô ra oia e, “Eita roa’tu te Atua e horo‘a i te taata nei i te faatereraa oti‘a ore i te mau ohipa o teie nei ao; e paraparau tamau râ oia i te taata i raro a‘e i ta’na aratairaa, o te parahi i roto i to’na fenua, e tei riro ei ti‘aau i mua ia’na no ta’na mau ohipa.” 3
No te haapapu i te tu‘atiraa i rotopu i te ti‘amâraa e te ti‘aauraa, teie te hoê faaauraa ta te Peresideni Taylor i faaite mai. “E ô vine e aore râ, e fare faaapu ta te hoê taata, e te taata e haapa‘o ra i te reira, ua horo‘ahia ïa i roto i to’na rima te tahi ti‘aauraa e te tahi mana no te rave mai ta’na e hinaaro, tera râ, tei raro a‘e noa â oia i te tahi mau faatureraa tei titauhia mai e te fatu o taua fenua ra. Mai te reira atoa te faaauraa ta te Atua i faaau ia Noa, ia Aberahama, i te mau Tamarii a Iseraela, e i te feia mo‘a i tahito ra. E piti pae i roto i te hoê faaauraa: i roto i teie faaauraa, o te Atua i te hoê pae e te taata i te tahi. Ia haapa‘o te taata i ta ratou fafauraa, ua ruuruuhia ïa te Atua ia haapa‘o atoa i ta’na; ia ofati râ te taata i ta’na fafauraa, aita ïa te Fatu i ruuruuhia no te haapa‘o i ta’na fafauraa. … I reira te taata e rave ai i ta’na ti‘aauraa, no te faananea atu â i te mau haamaitairaa ta te Atua i tuu mai i roto i to’na mana, e aore ra, aita, mai ta’na e hinaaro.” 4
I te tau o te Peresideni Taylor, ua parau te tahi mau taata e, ua faataahia te evanelia e te autahu‘araa “no te faatiti i te taata e aore râ, no te haavî i te feruriraa o te taata.” Ua pato‘i papu oia i teie nei mana‘o, ma te parau e, te titauraa o te evanelia “no te faati‘amâ ïa i te mau taata atoa mai te Atua ho‘i i ti‘amâ ra; ia ti‘a ho‘i ia ratou ia inu i te pape ‘e faaoaoa i te oire o te Atua‘; [Salamo 46:4] ia faateiteihia ho‘i ratou eiaha râ ia faahaehaahia; ia tamâhia ho‘i ratou eiaha râ ia haaviiviihia; ia ite ho‘i ratou i te ture o te oraraa nei e ia haapa‘o i te reira, eiaha râ e haere na te e‘a o te ino e tae atu ai i raro i te pohe ra.” 5
Te mau Haapiiraa a John Taylor
I te omuaraa ra to te Atua horo‘araa mai i te ti‘amâraa ia tatou nei.
Ua haamau … te Metua i te hoê parau mana … oia ho‘i, ia farii te mau taata o te ra‘i ra e to te fenua nei i to ratou ti‘amâraa. Ua pato‘i o Lucifero i te reira ma te orure i te hau; eita ta’na e nehenehene e orurehau i te hoê faanahoraa e aore râ, te hoê faaueraa tei ore i horo‘ahia; no te mea, te orurehau, o te ofatiraa ïa i te ture, te faaueraa, e aore râ, te tura; e ua ti‘avaruhia oia i raro i te ra‘i no taua orurehauraa ra. Eita taua orurehauraa ra e tupu mai te mea e, aita e ti‘amâraa; no te mea, mai te mea e aita e ti‘amâraa, e titauhia ïa ia ratou paatoa ia haapa‘o i te hinaaro o te Metua. No te mea râ e ti‘amâraa to ratou, ua faaohipa ihora ratou i te reira; e ua ti‘avaruhia’tura o Lucifero e hoê i ni‘a i te toru o te mau melahi, i rapae no to ratou orurehau e no to ratou faaohiparaa i taua ti‘amâraa ra no te pato‘i i to ratou Metua i te ao ra. E ere atoa no to ratou noa orurehauraa, no te mea atoa râ, “ua titau [ratou] ia haamou i te ti‘amâraa o te taata;” [a hi‘o Mose 4:3] e ua faaohipa ratou i to ratou ti‘amâraa no te pato‘i i te maitai, i te oaoa e i te faateiteiraa mure ore o te taata nei, tei titauhia ia faatupu na roto i te taraehara e te faaoraraa a Iesu Mesia.6
Ua horo‘a mai te [Atua ] ia tatou nei i te ti‘araa no te maiti i te maitai e no te pato‘i i te ino. E nehenehe ta tatou e rave i te parau ino e aore râ, i te parau ti‘a, mai tei au i to tatou hinaaro; e ua imi te Diabolo i te maitai no’na i roto i te reira, e ua tamata oia i te ruri ê i te mana‘o o te taata no te haamou ia ratou, ia ti‘a ia’na ia aratai titi ia ratou ia au i to’na ra hinaaro. Aita te Fatu i ruuruu ia ratou, aita atoa i haavî ia ratou; area te hopearaa o ta ratou mau ohipa, na’na ïa te reira e tapea ra, a riro ai te reira mau ohipa ei faainoraa i to’na mau taata.
E vaiiho te Fatu … i te taata nei ia imi i te oaoa mai te au i ta ratou rave‘a, e mai te au atoa ho‘i i to ratou ra hinaaro, e vaiiho oia ia ratou ia inu i te au‘a o ta ratou iho ohipa ino mai te au i ta ratou iho rave‘a. Taaê noa’tu te reira, ua faaite atoa oia i to’na maitai, e e tamau noa oia i te na reira i ni‘a i ta’na mau tamarii paatoa. Eaha ta’na i faataa ia rave? Te paturaa ïa i to’na basileia i ni‘a i te fenua nei, te faati‘araa i te parau ti‘a, te pato‘iraa i te enemi e te haamouraa ia [Satane] i ni‘a i te fenua nei, e i reira te mau taata atoa e tipapa ai i mua i te Atua e ta’na Mesia, e i reira tei maitihia ra e faatere ai i te mau oro‘a o to’na ra fare e a muri noa’tu. E opuaraa maoro teie na te Manahope.7
E aratai te Atua ia tatou, eita râ Oia e faahepo i te taata nei.
Tei ia tatou nei te evanelia. Ua faahepohia anei te hoê taata ia haapa‘o i te reira? Ua itehia anei te hoê mana faahepo i ni‘a ia tatou nei? Aita roa vau i ite i te reira. O Olive Kaudere te piti o te peresibutero i roto i te ekalesia nei, ua faahepohia anei oia ia farii i teie evanelia? Aita oia i faahepohia. Ua faahepohia anei o Hyrum Smith ia farii i te reira? Aita oia i faahepohia. Ua faahepohia anei te mau ite o te Buka a Moromona—o Uitima mâ e te tahi atu pueraa? Aita. E i muri a‘e i to ratou riroraa ei melo no teie ekalesia, ua faahepohia anei ratou ia parahi noa i roto ra? Aita. Ua faahepohia anei te hoê noa a‘e melo o te pŭpŭ tino ahuru ma piti, te hitu ahuru, te tahu‘a rahi, e aore râ, te mau melo o te apooraa teitei, e aore râ, te mau peresideni o te hitu ahuru, e aore râ, te tahi atu pŭpŭ taata i roto i teie ekalesia, ia mau i te ti‘araa i faautahia i ni‘a ia ratou? Aita roa vau i ite noa a‘e i te reira, e o outou? Ua ite au e, aita e mana faahepo i faaohipahia i ni‘a ia‘u hau atu i te puai o te parau mau i roto i to‘u feruriraa; aita atoa i ni‘a ia outou, hau atu i te mana o te parau mau i roto i to outou feruriraa.8
Aita vau e titau ia faatere i te feruriraa o te taata. Eita vau e faatere i te ohipa a te taata. Eita te Atua e na reira, e vaiiho râ oia ia ratou i roto i to ratou ti‘amâraa no te aro i te mau tamataraa, te mau faahemaraa, te mau ati, e te mau huru ino atoa i roto i te ao nei ta te taata nei e farerei nei, e aore râ, e nehenehe e farerei. E tuu râ oia i te tahi mau ture i mua ia ratou ia nehenehe ratou ia arataihia ia’na ra mai te mea e, a arataihia ratou. Ia ore râ, e imi ïa oia i te mea maitai roa a‘e o ta’na e nehenehe e rave no ratou.9
E ti‘amâraa to te taata i te pae morare; tei raro a‘e oia i te mana o te Fatu, e na roto i te reira, e pahono atu oia i te Fatu i te ti‘aauraa no ta’na iho mau ohipa. Tera râ, e vaiiho noa anei oia ia’na ana‘e iho ma te tauturu ore ia’na no te faaoti i ta’na mau opuaraa? Aita. E hi‘o mai oia i te taata nei mai te huru i te tamaiti na’na, e ua horo‘a mai oia i tera taime e tera taime i ta’na tauturu e ta’na mau aratairaa, mai te au i te hoê metua tane. Ua horo‘a mai oia i te mau heheuraa, ua haapii e ua faara oia i to’na mau taata. Ua horo‘a mai oia i te fafauraa i te feia tei haapa‘o, e ua faaara oia i tei haapa‘o ore. Ua haapii oia i te mau arii, i te mau auvaha ture, e i te mau peropheta. Ua paruru atoa oia i te feia parau ti‘a, e ua faautua, na roto i te haavaraa, i te feia iino. Ua fafau oia e horo‘a oia ia Aberahama e ia vetahi ê atu, i te fenua e i te tao‘a. Ua horo‘a oia i te fafauraa no te ora mure ore i tei haapa‘o maite; aita roa’tu râ oia i faahepo i te taata nei.10
E faautu‘a te Atua ia tatou ia au i te huru o to tatou faatereraa i to tatou ti‘amâraa e e haamauruuru Oia ia tatou ia au i ta tatou mau opuaraa.
E ere anei o tatou iho te feia patu i to tatou haere‘a? E ere anei na tatou iho e faaoti i to tatou hopearaa? … Tei ia tatou te maitiraa i to tatou faateiteiraa e aore râ, to tatou haaviiviiraa; tei ia tatou te maitiraa i to tatou oaoa e aore râ, to tatou ati i roto i te ao a muri a‘e.11
Ia hi‘opo‘a maite tatou i te mau Papa‘iraa mo‘a, e ite tatou e, ua horo‘ahia te tahi mana iti i roto i te rima o te taata nei, ta’na ho‘i e mau ra i raro a‘e i te faatereraa e te aratairaa a te Fatu; e mai te mea e, e rave oia ma te ore te a‘o, te aratairaa, e aore râ, te haapiiraa a te Atua, ua na rapae ïa oia i te oti‘a ta te Fatu i faataa no’na, e ua hapa ïa oia i reira, mai te hoê ti‘a faatere o te hau e hapa ia na rapae oia i te oti‘a o ta’na ra mau aratairaa; e aore râ, mai te hoê taata tarahu i te hoê fare faaapu, e aore râ, te hoê ô vine, e tei haapa‘o ore i te mau titauraa o te tarahuraa, e ua faaino i te fare faaapu, e aore râ, i te ô vine; inaha, no te Fatu ho‘i te fenua, e na te Fatu i tuu i te taata i ni‘a iho ra. E ere te reira i ta te taata, na te Atua râ te reira i horo‘a ia’na ra. … Mai te mea e, ua tuuhia te taata ei ti‘aau no te Fatu, e no’na atoa iho, e a haapa‘o ore ai i te Fatu ra, e utu‘a ïa ta’na i tei Hamani ia’na ra.12
A faaho‘i na i to outou feruriraa i muri, e a haamana‘o na i te taime a rave ai outou i te hoê ohipa maitai, a haamana‘o na i te taime a rave ai outou i te hoê ohipa ino; ua vai te reira mau mea i roto i to outou roro, e e nehenehe ta outou e feruri faahou i te reira, e ia hi‘o maite i te reira i te mau taime atoa ta outou e hinaaro. … Mai te mea e, ua haapii outou i te hoê reo, e nehenehe ta outou e haamana‘o i te reira mai ta outou e hinaaro, e nehenehe ta outou e faaite ma te ohie i te taaêraa i roto i te mau tu-haa e rave rahi o te hoê a‘oraa. Mai te mea e, ua haapii outou i te ohipa hamani matini, e haere to outou feruriraa i te vahi i reira to outou iteraa i te hoê matini, e i reira outou e haere ai i te ohipa no te hamani i te hoê matini mai te reira. Mai te mea e, ua ratere outou na roto i te tahi mau oire, e nehenehe ta outou e parau eaha te huru o te mau fare, e te purumu, i roto i tera oire e tera oire ta outou i ratere, e te huru o te taata ta outou i farerei; e e nehenehe ta outou e haamana‘o faahou ia ratou, e ia feruri ia ratou i te ao e aore râ, i te pô, i te mau taime atoa ta outou e hinaaro, e ia haamana‘o faahou i te mau mea ta outou i rave e i ite. I hea outou e tai‘o ai i teie mau mea atoa? I roto i ta outou iho buka, eita outou e haere atu i roto i te buka e aore râ, te piha vairaa buka a te tahi atu taata, ua papa‘ihia râ i roto i ta outou iho mau parau, e i reira outou e tai‘o ai. I reira to outou mata e hi‘o ai e to outou tari‘a e faaroo ai, e to outou rima e tapea ai, e i reira ta outou haavaraa, mai te reira te parauraa, e ohipa ai—to outou mau mana feruri.
E tena na, mai te mea e, tei roto ia outou te reira huru varua e aore râ, te reira huru ite, e ti‘a ai ho‘i ia outou ia tai‘o i ta outou iho mau ohipa, eita anei outou e feruri e, te taata tei tuu i te reira varua e te reira ite i roto ia outou, tei ia’na atoa ïa te mau taviri no taua ite ra, e e nehenehe ho‘i ia’na ia tai‘o i te reira mai ta’na e hinaaro? E ere anei te reira i te feruriraa maramarama, te maitai e ei papa‘iraa mo‘a? Te feruri nei au e, oia. …
Te ta‘oto nei te taata i te ta‘oto o te pohe, area te varua ra, e ora ïa oia i te vahi tei reira te papairaahia ta’na ra mau ohipa—o te ore ho‘i e pohe—eita te reira e pohe i te taata ia taparahi, eita ho‘i e pe, e e vai oraora noa te reira, e e vai mai te haamana‘oraa o te reira hou te pohe e faataaê ai i te tino e te varua mure ore.13
E mau taata tatou no te Atua, e ua ruuruuhia oia i te mau mea atoa i faataahia no te ruuruu i te taata e aore râ, i te Atua. Ua ruuruuhia oia no te aupuru i to’na mau taata, mai te mea e, e aupuru ratou ia ratou iho; mai te mea e, e faatura ratou i to ratou piiraa e to ratou autahu‘araa; mai te mea e, e haapa‘o ratou e e faatura i te mana e te tura tei tuuhia i ni‘a ia ratou; mai te mea e, eita ratou e opa‘i ê i te mau ture ti‘a, ua ruuruuhia ïa te Atua no te faatupu i te mau mea atoa mai te au i tei titauhia ia’na; te hoê o te reira, o te horo‘araa ïa i te ora no te Feia mo‘a. … O vai tei ite a‘e nei i te Atua i te hahiê-raa i te mau ture ti‘a?… Aitâ vau i ite a‘e nei i te reira, e te oaoa nei au i te mea e, aitâ atoa outou i ite a‘e nei i te reira.14
Te mau Mana‘o Tauturu no te Haapiiraa e te Aparauraa
-
No te aha e mea faufaa rahi te ti‘amâraa no to tatou faateiteiraa? Eaha te auraa i rotopu i te ti‘amâraa e te Taraehara a Iesu Mesia?
-
E mea nahea Satane i te tamau maite i te faahema i to tatou ti‘amâraa? Nahea tatou ia pato‘i i taua mau tamataraa ra?
-
Eaha te huru aratairaa ta te Fatu e horo‘a mai ia tatou no te tauturu ia tatou ia faaohipa i to tatou ti‘amâraa ma te parau ti- ‘a ? Nahea Oia i te haamaitai ia tatou no te faaohiparaa tatou i to tatou ti‘amâraa ma te parau ti‘a?
-
No te aha e mea faufaa no te taata tataitahi ia rave ratou i ta ratou iho mau faaotiraa? Nahea e ti‘a ai ia tatou ia faatura i te ti‘amâraa o te mau melo o te utuafare, ma te faaitoito atoa ho‘i ia ratou ia rave i te mau faaotiraa tano?
-
Noa’tu e, e ti‘amâraa to tatou no te rave i te mau faaotiraa, no te aha te mau faaotiraa ti‘a ore e nehenehe ai e faaiti i to tatou ti‘amâraa? Ua ite anei outou i to outou ti‘amâraa i te tupuraa i te rahi na roto i te mau faaotiraa ti‘a?
Te mau Papa‘iraa mo‘a: Iotua 24:15; Galati‘a 6:7; 2 Nephi 2:14–16, 26–27; Helamana 14:30– 31; PH&PF 58:26–28; 101:78; Mose 4:1–4; 6:33