Pene 12
E Mahana Mo‘a te Sabati
Ua faauehia tatou ia haamana‘o i te mahana Sabati ia haamo‘ahia ïa.1
No Roto mai i te Oraraa o John Taylor
Mai tei faaitehia’tu i roto i te pene i mua nei, i te pae hopea o te ava‘e Tiunu matahiti 1847, ua aratai o Elder John Taylor raua o Parley P. Pratt i te hoê pŭpŭ taata i te rahiraa e hau atu i te 1,500 Feia Mo‘a, mai Winter Quarters haere ti‘a’tu i Roto Miti. Teie te mau parau ta Elder B. H. Roberts i papa‘i no ni‘a i te omuaraa o taua tere ra:
“Ua taere roa i taua matahiti ra no te haamata i hoê tere mai teie te huru. Ua taere roa no te tanu i te maa i taua matahiti ra, noa’tu e, e faafaaearii ratou no te tahi maa taime i Rocky Mountains. Ua tano noa ta ratou rahiraa maa no te hoê matahi e te afa te maoro, e mai te mea e, eita ta ratou mau huero matamua e tupu, e pohe poia ïa to muri mai, i te mea e, e toe ïa e 1600 e tae atu i te 2400 kirometera e tae atu ai ratou i te vahi fatata a‘e i reira e roaa ai te maa. …
“Ua pûpû ratou i ta ratou mau tao‘a atoa, tae roa’tu i ta ratou vahine e ta ratou mau tamarii, tei faaoromai atoa i to ratou ati e to ratou hopearaa. Aita ratou i ite e, te haere nei ratou i hea, e riro ratou i te fifi roa, aita ïa e otoheraa faahou i reira. Mai te mea e, aita e itehia ia ratou te hoê vahi tano maitai no te tanu i te maa i te matahiti matamua, aita ïa ta ratou e maa, e aita atoa ho‘i ta ratou e rave‘a no te haere e tii i te maa. Ia manuia mau ratou e ti-‘a‘i, aita ana‘e ra, e pohe ïa ratou i roto i to ratou tere tei haamatahia e ratou i roto i te medebara.”
Taa‘e noa’tu teie mau fifi e te titauraa ia tapae i te afaa no Roto Miti hou a haamata ai te tau to‘eto‘e, ua faaea te tereraa i te mau Sabati atoa no te faatura i te mahana Sabati. Te parau ra â o Elder Roberts e, “Ua haapa‘ohia te Sabati ei mahana faaearaa, i reira ho-‘i e faatupuhia ai te pureraa i roto i te mau ti‘ahapa atoa, e ua ore te maniania ore o te medebara rahi o te pae tooa o te râ, na roto i te himeneraa te Feia mo‘a i te mau himene no Ziona.” I te 5 no Atopa 1847, ua tapae atura te pŭpŭ a Taylor raua o Pratt i Roto Miti ma te pe‘apea ore, e ua haamata a‘era ratou i te faaineine ia ratou no te tau to‘eto‘e.2
No te Peresideni John Taylor, ua riro te Sabati ei mahana haamoriraa, ei mahana faaearaa, e ei mahana haamana‘oraa. Ua faaitoito oia i te Feia mo‘a “Ia haamo‘a i te mahana Sabati, ia faataa i te reira mahana ei mahana faaearaa, ei mahana farereiraa amui no te rave i ta outou mau oro‘a e no te faaroo i te parau ora, e ia itehia to outou haapa‘o i te mau faaueraa, e ia faaite outou i te hi‘oraa maitai i mua i ta outou mau tamarii.” 3
Te mau Haapiiraa a John Taylor
Te Sabati, e mahana haamoriraa ïa i te Atua ma to tatou aau atoa.
Te taata maitai roa a‘e i rotopu ia tatou nei, aita ïa i hope te maitai; e mea ti‘a ia tatou paatoa ia maitai roa’tu â, e ia rave maitai roa’tu â i te ohipa, e ia rahi atu â te fana‘oraa i te oraraa nei, e ia rahi atu te Varua o te Fatu i roto i to tatou mau ti‘ahapa e i roto i to tatou aau, e ia rave tamau â no te faatupu i te maitai o te feia atoa e farereihia e tatou. Te taviniraa i te Fatu o te hoê ïa o te mau ohipa rahi o to tatou nei oraraa; e te mauruuru nei au no te haamaitairaa rahi tei noaa ia tatou i te haamori i te Atua i te mahana Sabati. E ia putuputu tatou no te haamori i te Atua, e mea au na‘u ia ite ia tatou ia haamori ia’na ma to tatou aau atoa. Te feruri nei au e, e ere ïa i te mea tano ia paraparau te taata i te mau mea no te tahuti nei i taua taime ra; e taime teie, penei a‘e hau atu i te mau taime atoa, i reira to tatou mau feruriraa, to tatou aau e fariu atu ai i te Atua ra. Ia himene tatou ma te haamaitai i te Atua, e na reira tatou ia au i te varua i titauhia; ia pure tatou, ia na reira ïa te mau varua atoa, ma to tatou aau atoa, e na roto i to tatou tahoê, e amuihia to tatou mau varua ei hoê, ia tae ho‘i ta tatou mau pure e ta tatou haamoriraa i te Atua, e tomo to-’na Varua i roto i te mau mea atoa, e tei roto oia i te mau amuiraa o te Feia mo‘a maitai e te faaroo.
E faaite atu vau ia outou eaha to‘u huru i te po‘ipo‘i Sabati. Te ite nei au e, e mahana teie tei faataahia no te haamori i te Atua Manahope: i teie mahana e haamori au i te Atua, e e haapa‘o vau i to‘u utuafare e ia hi‘o e, te na reira atoa ra anei ratou e aore râ, aita. Ua faauehia tatou ia haamo‘a i te mahana Sabati e ia faaea i ta tatou mau ohipa atoa, mai te Atua i na reira a hamani ai oia i te fenua ta tatou e parahi nei. Ua horo‘a mai oia e ono mahana no tatou no te rave i tera ohipa e tera hopoi‘a no te oraraa nei, e mai te mea e, e fafau tatou ia haapa‘o i te Sabati, e na reira ïa tatou ma te maitai i mua i te Atua to tatou Metua, ma te horo‘a ia tatou iho ia’na ra, i tera a‘e mahana, e ma te tuu i to tatou mau feruriraa e to tatou aau i ni‘a ia’na. E horo‘a te mau Peresibutero i te mau vahi atoa, i to ratou taime i teie mahana no te tamata i te haapii i te mau parau tumu o te ora, e e mea au na‘u ia pure no ratou, e no to tatou atoa mau misionare te ratere nei i rotopu i Feia mo‘a i teie nei fenua, e no te feia e paraparau, e no te feia e a‘o i roto i te mau putuputuraa o te Feia mo‘a i teie fenua e i te tahi atu mau fenua, e, i te mea ho‘i e, e mahana teie i faataahia no te haamori i te Atua, ia vai to Iseraela taatoa i te mau vahi atoa, i raro a‘e i te faaururaa e te aratairaa o te Varua o te Atua ora, e te feia e a‘o, ia faauruhia ïa ratou e te Varua Maitai, e ia faaite ratou i te mau parau o te ora mure ore i te mau amuiraa e rave rahi.4
Te Sabati, e mahana ïa no te haapii atu e no te haapii mai na roto i te Varua.
E mea au roa na te Feia mo‘a ia putuputu no te paraparau te tahi e te tahi, no te faaroo i te parau no te ora, no te feruri atoa i ni‘a i to ratou ti‘araa e to ratou autaatiraa i te Atua, i Ta’na Ekalesia e To’na Basileia, e no te hi‘opo‘a atoa i to ratou mau feruriraa, e, i raro a‘e i te aratairaa a te Fatu e To’na Varua Maitai, no te tamata ia ite e, eaha te autaatiraa e ti‘a ia tapea maite i rotopu ia ratou e to ratou Metua i te Ao ra, e no te ite atoa e, te rave ra anei ratou i te mau hopoi‘a e rave rahi tei tuuhia mai i ni‘a ia ratou, e te faaitoito ra anei ratou i te haapa‘o i te parau, te hinaaro e i te ture a te Atua.5
Ia putuputu ana‘e tatou… e titau tatou i te aratairaa e te mau haamaitairaa a te Atua, inaha, mai ta te parau papa‘i i faaite mai ia tatou, no roto mai ia’na “te mau mea maitatai i horo‘ahia mai;” e ua faaite-atoa-hia mai ia tatou e, na roto Ia’na, “aore roa e hirohirouri ia’na ra, aore ho‘i e huru-ê- raa e vahi iti noa‘e.” [A hi‘o Iakobo 1:17]. I roto i ta tatou mau amuiraa, te feia e parau e te feia e faaroo, ei raro a‘e ïa ratou i te aratairaa e te faatereraa a te Fatu e ti‘a ai, oia te Pihaa no te maramarama. I roto i te mau taata atoa i raro a‘e i teie nei ra‘i, tatou te Feia Mo‘a i te mau Mahana Hopea nei, ia ite tamau noa tatou i te faufaa no te titauraa i te ite no ni‘a i te Atua; no te mea, te feruri nei au, e ere i te maramarama te parau, e ere atoa i te aravihi te a‘oraa e te maitai te mau mana‘o e vauvauhia, mai te mea e, aita te mau taata o te faaroo i te reira i arataihia e i faauruhia i te varua o te Atua, faufaa ore ïa taua mau parau ra no ratou.6
Aita e taata e ora nei, e aitâ e taata i ora a‘e nei, o tei nehenehe ta’na e haapii i te mau mea na te Atua maori râ, ua haapiihia oia, ua haamaramaramahia, e ua arataihia oia e te varua o te heheuraa no roto mai i te Manahope. E aita e taata aravihi no te farii i te ite mau e no te faatupu i te mana‘o ti‘a no ni‘a i te mau parau tumu mo‘a o te ora mure ore, maori râ, ua faauruhia ratou e taua varua ra, e na roto i te reira, te feia parau e te feia o te faaroo, tei roto paatoa ïa ratou i te rima o te Manahope.7
Te putuputu amui nei tatou, ei mau taata ite, e te hinaaro ia haro‘aro‘a i te tahi mea no ni‘a i te vahi no reira mai tatou paatoa, no ni‘a ho‘i i teie nei oraraa to tatou, e no ni‘a i to tatou oraraa a muri a‘e. Te putuputu nei tatou no te imi i te hoê mea no ni‘a i to tatou Metua i te Ao ra, no ni‘a ho‘i i ta’na mau ohipa e rave i te utuafare taata nei, no ni‘a ho‘i i ta’na ture e ta’na faanahonahoraa no tatou nei, e no ni‘a ho‘i i te tumu i hamanihia ai tatou; e no te ite i te hoê mea, mai te mea e ti‘a, no ni‘a i taua ao ra e tarava ra i ô atu i te mau ohipa e tupu i teie nei. Teie ïa te tahi mau mea, i rotopu i te mau mea e rave rahi, ta tatou e hinaaro nei ia ite, ia haro‘aro‘a, ia imi, mai te peu e, e nehenehe.8
Aita vau i ite i te tahi atu rave‘a e nehenehe ai tatou ia hapiihia, ia haamaramaramahia, e ia faaharo‘aro‘ahia i to tatou ti‘araa mau, maori râ, na roto i te faaururaa a te Varua o te Atua ora. Paraparau noa â te hoê taata na roto i te Varua o te Atua, titauatoahia râ te hoê tuhaa no taua Varua ra ia vai i roto i te feia o te faaroo, ia ti‘a ia ratou ia haro‘aro‘a papu i te faufaa o te mau mea e vauvauhia’tu nei i mua ia ratou, o te tumu ïa e taupupu ai te Fatu e to’na feia mo‘a no te haamaramarama i te taata i te mau mea i faataahia no ratou ra. Ua tu‘ati to tatou mana‘o e, ahani e nehenehe tatou paatoa ia haapiihia no ni‘a i te Atua, e mea maitai roa ïa. Te feruri nei au e, e parau atoa to te atoa nei e, e haamaitairaa rahi ïa te reira. I reira te uiraa e hiti mai ai i roto i to ratou feruriraa e, no ô mai anei i te Atua ra te mau haapiiraa i noaa ia ratou e aore râ, e ere. Nahea ratou e ite ai i te reira? Aita e rave‘a ê atu ta‘u no te iteraa i te reira maori râ te rave‘a tei faaitehia i roto i te mau papa‘iraa mo‘a, “E varua râ tei roto i te taata nei: e na te uru a te Puaihope ra i noaa‘i ia’na te ite.” (Ioba 32:8) E i roto i te Faufaa Apî, ua parau-faahou-hia ia tatou e, “Aore roa te hoê i ite, maori râ o te Varua o te Atua.” [A hi‘o 1Korineti‘a 2:11]. E mea faufaa ore te paari, te ite, te feruri maite, te philosopho e te mau parau atoa o te nehenehe e tuu i roto i te feruriraa o te taata mai te mea e, aita to’na feruriraa i ineine no te farii i teie mau haapiiraa—tei faaineinehia e te Varua o te Fatu, taua Varua ra ho‘i o te horo‘a i te ite.9
Te rave nei tatou i te oro‘a mo‘a i te Sabati ei haamana‘oraa ia Iesu Mesia.
To te Faaora haereraa mai i te ao nei, to’na mauiuiraa, to’na poheraa, to’na ti‘afaahou-raa, e to’na pa‘umaraa i ni‘a i te parahiraa ta’na e parahi nei i roto i te ao mure ore i mua i to’na Metua i te Ao ra, mai te mea ra e, ua faatumuhia ïa to tatou parau e to tatou oa-oa i ni‘a i te reira; no reira mai ïa teie haamana‘oraa tamau ta tatou e rave nei i te mau Sabati atoa. Ua riro teie oro‘a mo‘a ei faatupuraa i te titauraa a Iesu Mesia i ta’na mau pipi. “Ua amu ana‘e outou i teie nei pane, e ua inu ana‘e i teie nei a‘ua, ua faaite â ïa outou i te pohe o te Fatu, e tae noa mai oia ra.” (1 Korineti‘a 11: 26). Mai te mea e, e faaroo to outou i roto i teie nei oro‘a, e tapa‘o faaite te reira e, e faaroo atoa to outou ia Iesu Mesia, e o Oia ana‘e te Tamaiti Fanau Tahi a te Metua, e mai te ra‘i mai ua haere mai oia i ni‘a i te fenua nei no te faatupu i te tahi mau opuaraa ta te Atua i faataa—no te faatupu i te faaoraraa e te faateiteiraa o te utuafare taata nei. Tei roto i teie mau mea atoa te parau no to tatou maitai e to tatou oaoa i ô nei e a muri atu. Eita te pohe o Iesu Mesia e tupu ahiri e, aita te reira i titauhia. I haamauhia ai teie nei oro‘a no te tapea maite i teie nei ohipa i mua i te feruriraa o to’na mau taata, ei faaiteraa i to’na faufaa rahi.10
Ua putuputu tatou no te rave i te oro‘a mo‘a no te tamaaraa a te Fatu, e no reira, e faaitoito tatou ia fariu ê to tatou mana‘o i te mau mea o te ao nei. No te mea, ia rave tatou i te oro‘a mo‘a, e ere te pohe e te mauiui ana‘e o to tatou Fatu e te Faaora o Iesu Mesia ta tatou e haamana‘o nei, te hi‘o atoa nei râ tatou i te mahana e tae faahou mai ai oia e a putuputu ai tatou e o’na no te amu i te pane i roto i te basileia o te Atua [a hi‘o Luka 14:15; Mataio 26:29]. No reira, ia putuputu tatou, e nehenehe tatou e farii i te aratairaa e te mau haamaitairaa no ô mai i te Atua ra.11
Ma te aau tei î i te faaururaa, ua ti‘a‘i te mau taata o te Atua i tahito ra i taua ohipa mo‘e ore ra, oia ho‘i, te taime te Arenio i taparahihia hou te faatumuraahia teie nei ao e pûpû ai ia’na iho ei tusia, e te haamana‘o atoa nei tatou i te reira. Te vavahi nei e te amu nei tatou i te pane, e te inu nei i te pape i mua i te tahi e te tahi, i te mau mahana Sabati atoa, e te na reira nei tatou ei haamana‘oraa i te tino i hamani-ino-hia e i te toto i haamaniihia o to tatou Fatu e to tatou Faaora o Iesu Mesia; e e tamau noa tatou i te rave i te reira e ho‘i noa mai oia. Ia ho‘i mai oia, te ti‘aturi nei te Feia Mo‘a i te mau Mahana Hopea Nei e, tei rotopu ratou i taua pŭpŭ taata haamaitaihia ra o te amu e o te inu e o o’na i ni‘a i ta’na ra amuraa maa i roto i te basileia o to tatou Metua. Te ti‘aturi nei au i te reira mai ta‘u e ti‘aturi nei e amu vau i te maa i teie pô.12
E ara eiaha tatou ia amu i teie mau tapa‘o [o te oro‘a mo‘a] ei pohe no tatou. Ua pe‘apea anei outou e to outou mau taeae, e aore râ, ua faatupu anei outou i te mana‘o riri no te tahi taata, e ua faahiti paha outou i te parau teimaha te tahi e te tahi, e ua rave anei outou i te ohipa ti‘a ore, e ua putuputu outou ma te faaooo i te Atua e ua amu i te pohe no to outou varua? E mata na tatou i te haapa‘o maitai i teie mau mea; e no reira, e mea ti‘a ia tatou ia ite e, ia hopoi tatou i ta tatou tao‘a horo‘a i te fata ra, e i reira, haamana‘o ihora tatou e, e hara ta to tatou taeae ia tatou, e mata na tatou i te haere na mua e faahau ia’na ra, e a haere mai a pûpû ai i ta tatou tao‘a horo‘a [a hi‘o Mataio 5:23–24]. Eiaha e haere ma te aau haavarevare, e haere râ ma te rima mâ e te aau maitai, e ma te parau e, “E te Atua a imi mai na e a tamata mai na ia‘u, e ia iteahia te ino i roto ia‘u nei, a faaru‘e ê atu i te reira, e ia riro ho‘i au ei ti‘a mau no oe i ni‘a i te fenua nei, e ia noaa ia‘u te varua i roto i te Mesia, e ia fana‘o vau i te reira i ni‘a i te fenua nei; e ia ho‘i mai ho‘i oia ra, ia farerei ïa vau e to‘u mau taeae ia-’na ma te rima mâ e te aau maitai.” 13
No te farii i te mau haamaitairaa a te Atua, eiaha tatou e ti‘aturi noa i ni‘a i te haere-noa- raa i ta tatou mau pureraa e te rave-noa-raa i te oro‘a mo‘a.
E mea rahi roa i rotopu ia tatou te pee nei i te huru o to te ao nei. E horo‘a mai anei to te ao nei i te maramarama tei noaa ia outou, e te evanelia e te ti‘aturi i te ra‘i tei noaa ia outou, e te autahu‘araa tei noaa ia outou? E hoo anei outou i teie mau mea no te hoê au‘a maa, e ia parau i te mau parau faufau, ia taviri, ia rave i te hara e te ino rahi e vai nei i roto i te ao nei? Eaha te tumu i tae mai ai tatou i ô nei? No te haamori i te Atua e no te haapa‘o i ta’na mau faaueraa. E eaha te huru o te rahiraa o tatou? No te rahiraa o tatou, te mo‘ehia nei ia tatou te ti‘aturiraa hanahana o to tatou nei piiraa, e te rave nei tatou i te ohipa maamaa, e te ohipa ino, e te hara, e te faaterehia nei tatou e te nounou, te taero ava, te ofati i te Sabati, e ua rau te mau ino atoa. Te ite nei au i te tahi mau taime i te mau Peresibutero no Iseraela i te ohiraa i te vahie, te haaputuraa i te maa puaatoro i te mahana Sabati. No te aha te reira i riro ai ei ohipa haamâ rahi i mua i te aro o te Atua, te mau melahi mo‘a, e te tahi atu mau taata maramarama atoa. … Eaha to outou mana‘o i te hoê Peresibutero haavare, i te hoê Tahu‘a Rahi parau faufau, i te hoê Hitu Ahuru haapa‘o ore i te Sabati, e i te hoê melo nounou no te Ekalesia? E mea ti‘a i te varua o taua mau huru taata ra ia faauruhia e te maramarama o te heheuraa, e e mea ti‘a ia ratou ia riro ei mau hi‘oraa no te mau taata atoa! I to outou mana‘oraa, e nehenehe anei ta outou e ora i ta outou haapa‘oraa, ia farii i te Varua o te Atua e ia noaa te ora mure ore, e ia haapa‘o i teie mau mea? Te parau atu nei au ia outou e, aita.14
E ohipa matauhia e te taata i roto i te ao nei no reira mai ho‘i tatou, ia paraparau i te mau mea no te pae varua i te Sabati, i roto i to ratou mau ahu no te Sabati e i roto i te pureraa, e i te Monire, i reira ratou e tuu ai i ta ratou haapa‘oraa e to ratou mau ahu i roto i te afata, e aita e haapa‘o faahou i te reira e tae roa’tu i te Sabati i muri iho. … Aue te maamaa o te taata e, i te oreraa e ite i te Atua i roto i te mau mea atoa, e i te tuuraa i te Atua e i ta’na haapa‘oraa i te hiti, e i te ti‘aturiraa i roto i to ratou iho mana‘o e to ratou maramarama.15
Te vai nei te hoê mea hau atu i te mea ta tatou e feruri nei i te tahi taime; oia ho‘i, ia parau tatou e, e mau pipi tatou na te Fatu, ia parau tatou e, tei ia tatou te Evanelia e na te reira evanelia e faatere nei ia tatou, e parau faufaa ore ïa te reira mai te mea e, aita tatou e horoi i to tatou ahu e ia teatea, i te toto o te Arenio. Eita e ravai i te apiti-noa-raa’tu tatou i te Ziona o te Atua, i te mea e, te Ziona o te Atua, o te taata ïa tei mâ te aau e te oraraa mâ e te porao ore i mua i te Atua, teie ho‘i ta tatou titauraa hopea. Aitâ tatou i tae atura i te reira faito, tera râ, e mea ti‘a ia tae tatou i te reira faito hou a noaa ai ia tatou te hanahana e te faateiteiraa; no reira, e titauhia te hoê hoho‘a paieti no te mea, te taata tei ite i te hinaaro o te fatu e aore i haapa‘o i te reira, e papa‘ihia ïa i te tairiraa e rave rahi [a hi‘o Luka 12:47]. E ere ho‘i “ te feia e parau mai ia‘u ra e, E te Fatu, e te Fatu, e hope paatoa i te tae i te basileia ra o te ao: o te taata râ i haapa‘o i te hinaaro o ta‘u Metua i te ao ra.” [Mataio 7:21] O te parau haapiiraa teie no te Evanelia ta‘u i ite. E aita i navai te faarii- noa-raa tatou i te Evanelia e i te putuputu-noa-raa i te fenua no Ziona nei e ia parahi i rotopu i te mau taata no te Atua, ia haere i ta tatou mau pureraa e ia rave i te Oro‘a mo‘a o te amuraa maa a te Fatu ra, e ia faaitoito ia haere i mua ma te farii ore i te mau fifi e rave rahi; no te mea, taa‘e noa’tu teie mau mea, mai te mea e, aita to tatou aau i ti‘a, mai te mea e, aita to tatou aau i mâ i mua i te Atua, mai te mea e, e ere to tatou te aau e te mana‘o mâ, e te mata‘u i te Atua e te haapa‘o i Ta’na mau faaueraa, e ia ore tatou e tatarahapa, eita ïa e noaa ia tatou teie mau haamaitairaa ta‘u i faahiti atu na, e ta te mau Peropheta i faaite papu mai.16
E ohipa na tatou te riroraa ei Feia Mo‘a. E no te riroraa mai te reira te huru, e titauhia ïa ia tatou ia haapa‘o i te parau no te viivii ore, te parau mau, te haavare ore, te mo‘a, te mâ, e te tura ia noaa ho‘i ia tatou te aroha o te Atua Puaihope i te mau taime atoa; ia vai noa ho‘i Ta’na mau haamaitairaa i ni‘a ia tatou e i roto i to tatou aau; ia parahi mai ho‘i te hau o te Atua i ni‘a iho i to tatou mau utuafare; … e ia vai ho‘i tatou te nunaa nei i raro a‘e i Ta’na parururaa hanahana.17
Te mau Mana‘o Tauturu no te Haapiiraa e te Aparauraa
-
Eaha te tahi mau haamaitairaa te noaa ia tatou na roto i to tatou haapa‘o-maite-raa i te Sabati? (A hi‘o atoa PH&PF 59:9–13). Mai te aha te huru te haamaitai-raa-hia outou iho no to outou haamo‘araa i te mahana Sabati?
-
Eaha te ti‘a ia outou ia rave no te haamori maitai roa’tu â i te Atua i te Sabati? Nahea outou i te faaineine ia outou iho ia vai fatata roa outou i te Varua Mo‘a hou a haamata ai te mau pureraa a te Ekalesia?
-
Eaha te ti‘a i te mau metua e te mau metua ruau ia rave no te faaitoito i ta ratou mau tamarii e ta ratou mau mootua ia haamo‘a i te Sabati? Nahea tatou ia faariro i te Sabati ei mahana taaê i te tahi atu mau mahana no to tatou utuafare? Nahea te haapa‘oraa i te Sabati i te haapuai i to tatou utuafare e i te paruru ia tatou i te mau mea o te ao nei?
-
No te aha e mea faufaa ia haapii mai na roto i te Varua i roto i ta tatou haamoriraa i te Sabati? Eaha te ti‘a ia outou te mau orometua e aore râ, te mau piehi, ia rave no te titau manihini i te faaururaa a te Varua Mo‘a i te Sabati?
-
Eaha te mau fafauraa ta tatou e fafau a rave ai tatou i te oro‘a mo‘a? (A hi‘o atoa Moroni 4–5 e aore râ, PH&PF 20:76–79). Eaha te tu‘atiraa o teie mau fafauraa i ta tatou mau fafauraa no te bapetizoraa? (A hi‘o atoa Mosia 18:7–10).
-
No te aha e mea faufaa ia rave tamau noa tatou i te oro‘a mo-‘a? Eaha te ti‘a ia outou ia rave no te haafatata roa’tu ia outou i te Fatu a rave ai outou i te oro‘a mo‘a?
-
Eaha te taaêraa i rotopu i te parau no te haere-noa-raa i te mau pureraa e te haamo‘a-mau-raa i te Sabati? Nahea e ti‘a ai ia outou ia mau maite noa i te varua o te Sabati i roto ia outou i roto i te roaraa o te hepetoma?
Te mau Papa‘iraa mo‘a: Exodo 20:8–11; Isaia 58:13–14; Mataio 12:10–13; 3 Nephi 18:1–12; PH&PF 27:1–14; 59:9–20
“Ia rave tatou i te oro‘a mo‘a, e ere te pohe e te mauiui ana‘e o to tatou Fatu e te Faaora o Iesu Mesia ta tatou e haamana‘o nei, te hi‘o atoa nei râ tatou i te mahana e tae faahou mai ai oia”
E hoho‘a tahito roa teie no te Paroita Pinto, te Titi no St George Utaha. Ua haapii te Peresideni Taylor e, ua riro te Sabati ei taime no te faafaaea i ta tatou mau ohipa e no te haapuai i to tatou taatiraa i te Atua.