Pene 23

Te Parau Mau Mure ore

Ia‘u nei, aita e mea hau atu i te faufaa i te mau parau mau mure ore.¹

No Roto mai i te Oraraa o John Taylor

Te hoê o te mau maitai faahiahia o John Taylor to’na ia haapa-‘o i te parau mau, noa’tu eaha te feruriraa o te tahi atu mau taata. Teie te parau ta Elder B. H. Roberts i papa‘i “E mea iti roa te mana o te mana‘o haapoupou e e aore râ, te mana pato‘i o te taata i ni‘a i te mana‘o o John Taylor no ni‘a i te parau mau. Rahi noa’tu ta te taata vahavaharaa i [te parau mau], rahi-noa-to‘a’tu to’na haapa‘o.”² Ua riro te mau ohipa tei tupu i te taime a faafariuhia mai ai o John Taylor i roto i te evanelia ei hoê o te mau faahi‘oraa matamua no to’na here i te parau mau.

Na Parley P. Pratt i faaite i te evanelia ia John Taylor i te fenua Canada. Ua faatupu te mau haapiiraa a Elder Pratt i te oaoa rahi i roto ia John Taylor e i roto ho‘i i to’na mau hoa faaroo, inaha, mai te reira atoa to ratou ti‘aturiraa i roto i te parau no te tahi mau oro‘a mai te bapetizoraa utuhi e te tuuraa rima no te horo‘araa o te Varua Maitai. Ia parau râ Elder Pratt ia ratou i te parau no Iosepha Semita e no te Buka a Moromona, e rave rahi mau hoa to John Taylor tei otohetohe ia farii i te tahi atu â mau ite, e ua pato‘i roa te tahi pae ia tuatapapa i te Buka a Moromona e te mau haapiiraa i roto ra. Area râ, ma te itoito rahi, ua paraparau atu o John Taylor i to’na mau taata i te na ôraa e:

“Te mana‘o nei au e, tei ô nei tatou no te imi i te parau mau. Tae mai i teie taime, ua tuatapapa haere tatou i tera ti‘aturiraa e tera parau haapiiraa, e ua ite tatou e, ua hape ana‘e te reira. Eaha te tumu e taiâ ai tatou i te tuatapapa i te parau no te Momoni? Ua hopoi mai teie taata, o Paraita tane, ia tatou nei, e rave rahi mau parau haapiiraa tei tu‘ati atoa i ni‘a i to tatou ti‘aturiraa. … Ua ani tatou i te Atua ia tono mai i te hoê ve‘a i rotopu ia tatou, mai te mea e, te vai ra Ta’na Ekalesia mau i ni‘a i te fenua nei. Teie o Paraita tane i rotopu ia tatou … ma te farii moni ore e te pute ore, mai te mau aposetolo i tahito ra i ratere haere ra; e aita roa hoê o tatou e ti‘a ia pato‘i, na roto i te papa‘iraa mo‘a e aore râ, na roto i te faahororaa mana‘o, i ta’na parau haapiiraa. Te hinaaro nei au e tuatapapa i ta’na mau parau haapiiraa e ta’na titauraa i te mana. … Ia ite au e ua ti‘a ta’na haapa‘oraa, e farii ïa vau i te reira, noa’tu eaha te ohipa e tupu mai i muri a‘e ra.” Na roto i te tuatapaparaa tuutuu ore a John Taylor, ua bapetizohia a‘era oia i te 9 no Me 1836. I muri a‘era na ô ihora oia e, “Mai taua taime mai ra, aita to‘u mana‘o i feaa noa a‘e i te mau parau tumu atoa no ni‘a i te Momoni.”³

I roto i to’na ti‘araa ei melo e ei faatere no te Ekalesia, ua ti‘a ia John Taylor ia ti‘aturi tamau noa i te Ekalesia no te haapii e no te paruru i te parau mau. “Ua porohaere oia i te evanelia i roto i te mau fenua e rave rahi; e ua vai ineine noa oia mai te hoê aito no te parau mau, no te farerei i te feia atoa e aro mai i te reira; noa’tu e, e farerei oia i te mau taata pato‘i i roto i te mau paraparauraa huiraatira, e aore râ, i mua i te hoê naho‘a rahi tei î i te mana‘o pato‘itoi ia’na, e aore râ, i roto i te mau ve‘a, hoê â huru to’na manuiaraa i te aroraa ia ratou na roto i ta’na mau faahitiraa parau puai no ni‘a i te parau mau.”⁴

Te mau Haapiiraa a John Taylor

Te Feia tei Here i te Parau Mau e Noaa ia Ratou te Ite e te Mana.

I ni‘a i to’na tahu‘a rahi, ma te ahuhia i te ahu o te parau mau, e ma te faaroo, te hi‘o nei te taata o te Atua i roto i te tau i muri nei, e ua iriti i te paruru o te ao mure, e te miterio o te ra‘i ra, e na roto i te aamu o te fenua nei, ua hi‘o oia i te mau opuaraa a Elohima rahi, i te haereraa i mua ma te nehenehe e te mana e te hanahana. I roto i te hoê oraraa poto, e ma te hi‘o i te tau i tahito ra, i teie mahana, e a muri a‘e, te ite nei oia ia’na mai te hoê taata mure ore i te titauraa i te huru o te Atua, ei tamaiti na te Atua, tei roto atoa ia’na te huru o te Atua. Te hi‘o mai nei oia i teie ao e i te taata nei, i roto i to ratou mau huru atoa, ma te ite i to’na mau maitai, e to’na maramarama no ô mai i to’na Metua i te ra‘i ra, ma te haro‘aro‘a e nohea mai ratou e eaha to ratou hopearaa. …

To’na maramarama ta te Atua i horo‘a mai, e tupu ïa i te rahi e ati a‘e te ao nei, e te reva atoa; ta’na ture, o te ture ïa o te here; ta’na aratairaa, o te aratairaa ïa o te paieti. E here to’na i to’na taata tupu, e te hamani maitai ia’na; E here to’na i to’na Atua e ua haamori ia’na; te hi‘o nei oia i te mana o te parau mau, o te parare na roto i te reva mai te maramarama o te Atua, e o te haamaramarama i to te ao atoa nei, e o te tae i te vahi tei reira te taata e aore râ, te mau melahi, te Atua e aore râ, te mau paraneta; ua tapea maite oia i te reira. Te parau mau to’na ïa taupoo, to’na tapo‘i e to’na paruru, to’na pàpà e to’na faati‘a; mai teie e a muri noa’tu. E pii te taata ia’na e maamaa i te mea e, eita e roaa ia ratou ia faatere ia’na no to ratou ra maamaa, eita ho‘i e roaa ia faahaere ia’na ia au i to ratou huru tauiui noa e te ino i te pae varua e te pae morare. Te tapea ra ratou i ni‘a i te mau mea itea-orehia, area oia ra, ua tapea ïa i te mau mea e faufaa to reira. Te oaoa ra ratou i te hoê haapa‘oraa faaroo papu ore e te puai ore, tei purapura i te hoê taime, eita râ e ti‘a i te vairaa e a muri noa’tu, e ua taataahi atoa ho‘i ratou i te mau parau tumu teitei e te hanahana a te taata, area oia ra, ua imi ïa i te ite i te Atua; e no to’na ite i te Atua, ua faaroo ihora ia’na e ua faaite i taua faaroo ra ta te Atua i horo‘a ia’na ra. Ua tapea oia i te mau parau mau atoa, ta te taata e ta te Atua. Aita to’na e mau mana‘o tumu. I roto i taua tuatapaparaa na’na ra, hoê noa mea te erehia e a’na, maori râ, to’na hape, e hoê noa ho‘i mea e roaa ia’na maori râ, te parau mau. Ua paheru oia, ua haa e ua imi i te parau mau mai te hoê tao‘a rahi tei hunahia; te oaoa ra vera i te taamu aihere, area oia ra, ua tapea oia i te maa mau, i te rito, i te pae rahi o te mau mea maitai atoa ra, e ua tapea ho‘i i te mau mea atoa e faahanahana e e faateitei i te fetii taata nei. …

Ua poupou anei te taata o te Atua i tahito ra i roto i te parau mau? Te na reira nei tatou. I farii na anei ratou i te heheuraa e te orama? Te na reira nei tatou. I tohu na anei ratou? Te na reira nei tatou. I paraparau na anei te Atua ia ratou? Te na reira nei oia ia tatou. I tohu na anei ratou i te “faati‘araa o te mau mea atoa?” [A hi‘o Ohipa 3:21]. Tei ia tatou nei ïa te reira. I tohu na anei ratou no te hoê basileia o te Atua? Te tauturu nei tatou i te paturaa i te reira. I faarii na anei ratou i te utuuturaa a te mau melahi? Ua farii tatou i te reira. I noaa na anei ia ratou te peropheta, te aposetolo, te orometua, te haapii e te poro evanelia? Ua noaa to tatou. I noaa na anei ia ratou te varua tohu e te heheu parau? Ua noaa te reira ia tatou. I ti‘ai na anei ratou i te piti o te haereraa hanahana mai o to tatou Fatu e to tatou Faaora o Iesu Mesia? Te na reira nei tatou. Ua ite anei ratou e, e tamâ te Atua i te fenua nei i te feia iino ma te faati‘a i te hoê hau parau ti‘a? Ua ite tatou i te reira. Ua ite anei ratou e, e faatere Iesu i ni‘a i te fenua nei? Ua ite tatou i te reira. E ti‘a ia parau e, te ti‘ai nei tatou i te mau mea atoa ta ratou i ti‘ai atoa na; te imi nei tatou i te mau mea atoa i iteahia ia ratou, e te faatupu nei tatou i te mau mea atoa i tohuhia na e ratou, e ua riro te parau no te faati‘araa o te mau mea atoa nei, ei ohipa rahi tei faaotihia; e nehenehe ho‘i ta te taata e haavare, e faaino; eita râ ta ratou e nehenehe e haamou i te opuaraa a te Atua, eita atoa ho‘i e nehenehe e tapea i te hoê noa a‘e taime, te haereraa i mua o te parau mau mure ore—e haere oia i mua, I MUA, I MUA, ma te tau‘a ore i te pato‘iraa. …

E vai te puai hope o te parau mau mure ore ma te ino ore i mua i te nuu, e e ite to te mau fenua atoa e, te Atua te faatere i te ra‘i ra.⁵

Te parau mau, oia ho‘i te parau mau mure ore, te niu ïa o te ti‘aturiraa o te Keretetiano: te pàpà papu i reira oia e patu ai. Ia faaru‘e oia i te reira no te turu i to’na mana‘o, i reira oia e topa ai i roto i te mau haere‘a o te haapa‘o ore, te mana‘o tapitapi, te hape, e te maere, oia te e‘a aano e tae atu ai i te pohe ra. E tauturu tamau maite te mana o te Atua i te feia e here i te parau mau e o te tapea maite i te reira.⁶

E Aratai te Evanelia ia Tatou i tera Parau Mau e tera Parau Mau.

Ua faataahia te evanelia no te aratai ia tatou i tera parau mau e tera parau mau e i tera maramarama e tera maramarama, e ti‘a roa’tu ai te parau i papa‘ihia ra e, e hi‘o tatou mai ia tatou ho‘i e hi‘ohia mai, e ite tatou mai ia tatou e itehia mai [a hi‘o PH&PF 76:94], e tae atu i te taime e ore ai te hoê e parau i te tahi e, ua ite anei oe i te Fatu, e ite râ to te taatoaraa Ia’na, tei iti e tei rahi [a hi‘o Ieremia 31:34], e tae noa’tu i te taime e anaana mai ai te maramarama e te ite o te Atua i ni‘a i te mau taata atoa, i reira ho-‘i te mau taata atoa e fana‘o ai i te anaana o te parau mau mure ore.⁷

No ni‘a i ta tatou haapa‘oraa faaroo, te parau nei au e, tei roto ïa ia’na te mau parau mau atoa e te maramarama no ni‘a ia tatou nei, oia ho‘i, to tatou huru i te pae morare, te pae no te ite, e ei mau taata tahuti e te tahuti ore ho‘i, no teie ao e no te ao a muri a‘e. Te farii nei tatou i te mau huru parau mau atoa, aita e hi‘oraa e, eaha te taime i tae mai ai te reira, nohea mai, e o vai te ti‘aturi nei i te reira. Te parau mau, mai te mea e, e apitihia mai te mau parau ra “te mau parau mau atoa,” tei roto ïa te parau no te mau mea atoa i vai na, e o te vai a muri a‘e, e o te itehia e te taata atoa i teie oraraa e i roto ho‘i i te mau tau e a muri noa’tu. E e hopoi-‘a ïa na te mau taata maramarama atoa e te haapa‘o maitai i mua i te Atua e o te faautuahia no ta ratou mau ohipa, ia imi i te parau mau, e ia vaiiho i te reira ia faauru ia ratou e ia faauru ho‘i i ta ratou mau ohipa e i to ratou haere‘a tumu i roto i te oraraa nei.

Tatou te Feia Mo‘a i te mau Mahana Hopea nei, te ti‘aturi nei tatou na mua roa, i te evanelia, e e mea ti‘a roa te reira parau, no te mea, tei roto i te evanelia te mau parau tumu o te titau i te hohonuraa, o te parare atea, e o te haere i te rahiraa hau atu i te mau mea atoa. Te haapii nei te evanelia ia tatou i te mau ateributi o te Atua. Te haapii atoa mai nei ho‘i te reira ia tatou i to tatou auraa i taua Atua ra, e i ta tatou rahiraa hopoi‘a i mua ia’na ei mau tamarii na’na. Te haapii mai nei ho‘i te reira i ta tatou rahiraa ohipa e te hopoi‘a no to tatou utuafare e to tatou mau hoa, e te oraraa toti‘are, e no te feia ora e tei pohe. Te faaite mai nei te reira ia tatou i te mau parau no ni‘a i te oraraa a muri a‘e. E ia au ho‘i i te parau a te hoê o te mau pipi i tahito ra, “ua faaite papu mai [te reira] i te [ora e] te ora mure ore” [a hi‘o 2 Timoteo 1:10], ua faatupu i te autaatiraa i rotopu ia tatou e te Atua, e ua faaineine ia tatou no te faateiteiraa i roto i te ao mure ore.⁸

Ua heheu mai te Atua ia tatou i te mau parau mau faahiahia e te hanahana, e ua ineine oia no te heheu mai â i te reira, mai te mea e, e farii tatou ia aratai Oia ia tatou. E mata na tatou i te haapa‘o i te parau tumu ta Iesu i haapii tamau mai ia tatou—oia ho‘i, ia haapa-‘o i te hinaaro o to tatou Metua i te ao ra, tei na ô mai ho‘i e, “Aita ho‘i au i imi i to‘u iho hinaaro, o te hinaaro râ o te Metua o tei tono mai ia‘u nei ra.”[Ioane 5:30]. Tei ô nei tatou mai ia’na i vai na i ô nei, e tei raro a‘e tatou i te faaueraa, mai Ia’na atoa ra, ia haa-pa‘o i te hinaaro o to tatou Metua i te Ao ra. E mea ti‘a ia tatou ia haapa‘o i te ture a te Atua, te parau a te Atua, e te hinaaro o te Atua.⁹

Eiaha tatou e mata‘u ia faatusia ia tatou ia ora ho‘i te parau mau.

Ua pato‘i tamau te tamarii a te taata nei i te parau mau, te feia aau ino e te ohipa ti‘a ore. Ua hamani-ino-tamau-hia te mau peropheta; eaha te tumu? No te mea aita ratou i mata‘u i te faaite i te parau a te Fatu i te taata. Teie te parau a Setephano no ni‘a i taua mau mea ra, “O vai te mau peropheta ra i ore i hamani-inohia e to outou hui metua ra? E ua taparahi ratou i te feia i faaite atea mai i te haere‘a mai o taua Taata Parau-Ti‘a ra; e ua riro iho nei outou ei haavare atu ia’na, e ei feia taparahi ho‘i?” [A hi‘o Te Ohipa 7:52]. “Tera râ, i teie tau,” te na reira ra te taata, “ua ite matou e, e feia iino mau ratou, eita matou e rave i te ohipa mai te reira te huru.” Ua na reira atoa te Atiuda i te parau ia Iesu, noa’tu râ i te reira, ua faatatauro ratou ia’na. …

Ua faaho‘i faahou mai te Fatu i te Evanelia mai tei vai na i te tau o te mau Aposetolo ra. Aita teie Evanelia e tu‘ati i ni‘a i te peu iino huru rau a te taata nei; Aita te taata i farii ma te aau parau ti‘a, i te mau parau mau tei roto i te Bibilia, o ta ratou ho‘i e parau nei e, ua ti‘aturi ratou, te tamata nei râ ratou e tapo‘ipoi i te ino o ta ratou mau peu e ta ratou mau haapiiraa, ma te paruru ia ratou i muri mai i to ratou iho huru paieti. … Tera râ, e tamau noa te parau mau i te haere i mua, e faaarahia te feia tei mâ te aau i to ratou ra ta‘oto; e haere te opuaraa a te Atua i mua; e faati‘ahia te basileia o te Atua, e. … e ti‘a mai te parau mau ma te haapeu e te etaeta, … e aita e mana e nehenehe e tapea i to’na tupuraa.¹⁰

Te hinaaro nei au i teie nei e faaite atu ia outou i te tahi mau mana‘o to‘u i te taime a tomo mai ai au i roto i teie ekalesia. E mea maoro i teie nei. I te taime matamua a faaroo ai au i te evanelia, ua ite a‘era vau e, te vaira te maitai i roto i te reira. Ua fatata vau i te ti‘aturi e, ua hape te reira. Na ô a‘era vau e, “Mai te mea e parau mau te reira, e mea ti‘a ïa ia‘u ia haapa‘o i te reira, no te mea e ere au i te taata haavare, ia ore ana‘e, aita ïa vau e ti-‘aturi faahou ia‘u iho.” I to‘u tuatapaparaa i taua tumu parau ra, e te ite-papu-raa e, e parau mau ihoa te reira, na ô a‘era vau e, “No reira vau i tae mai ai; e mea ti‘a ia‘u ia farii i te reira; e ore roa e ti‘a ia‘u ia pato‘i i te mau parau tumu o te parau mau mure ore.” E te parau atoa nei au e, aitâ vau i ite a‘e nei i roto i to‘u oraraa, i te hoê taime a faaite mai ai te hoê taata i te hoê parau e aita e tupu mai te pato‘ito‘iraa, tera râ, i taua taime ra, ua ineine au no te haapa‘o e tae roa mai i teie mahana.

Mai te mea e, e faaite mai te hoê taata no te faaroo, e aore râ, no te porotita, e aore râ, no te ite ihi, ia‘u i te hoê parau tumu mau, ua ineine au no te farii i te reira, ma te hi‘o ore e, nohea mai te reira. Te parau ra te hoê taata e, ua ti‘aturi anei oe i te Bibilia? E. Te ti‘aturi nei au i te mau mea atoa tei papa‘ihia e aore râ, tei parauhia e te Atua, te mau mea atoa i papa‘ihia, e ua ineine au no te ti‘aturi i te mau mea atoa ta’na e horo‘a mai i te fetii taata nei. Te parau nei tatou e, te ti‘aturi nei tatou i te mau parau mau atoa, e ia faaterehia tatou e te mau parau mau atoa.¹¹

I to‘u tomoraa mai i roto i teie ekalesia, ua ite au e, e hamani-inohia vau e e vahavahahia ho‘i. Ua ite au e, e hamahi-ino-hia te taata. Te ti‘aturi nei râ vau e, ua paraparau mai te Atua, ua heheuhia mai te mau parau tumu mure ore o te parau mau, e e ohipa ta te Atua e rave tei ore i tu‘ati i te mana‘o, i te hi‘oraa e i te feruriraa o te taata, e aita vau i ite tera râ, e hope to‘u oraraa taatoa hou a oti ai te reira. … Mai te mea e, ua taparahi pohe ratou ia Iesu i mutaa iho ra, eita anei te reira huru feruriraa e faatupu atoa i te ohipa mai te reira te huru i teie anotau? I te haamataraa mai au, ua hi‘opo‘a maite au i te mau mea atoa e titauhia ia‘u, e ua ineine ua no te farii i te reira.¹²

Na roto i te mau rave‘a ha‘iha‘i roa, e nehenehe te Atua e paruparu e e faaora i to’na mau taata, tera râ, e titauhia ia ratou ia ti‘aturi ia’na; e ia roohia ratou i te ati, eiaha ratou e mata‘u ia faatusia ia ratou no te paruru i te parau mau, i reira tatou e maitai ai, tei ora e aore râ, tei pohe, no teie oraraa e no te oraraa a muri a‘e.¹³

E tamau maite tatou i te imi e i te tapea i te parau mau.

Te imi nei tatou i te parau mau. E haamata tatou na roto i te imiraa i te reira, e o te reira ta tatou ohipa tamau, e ia itehia ia tatou te hoê parau tumu mau tei heheuhia mai e te taata, e aore râ, na te Atua, e aore râ, na te mau melahi mo‘a, oioi roa tatou i te tapea i te reira e i te faariro i te reira ei tuhaa no to tatou mau ti‘aturiraa i te pae faaroo.¹⁴

Te taata e imi i te parau mau, aita oia e turu i te hoê faanahoraa taaê, aita atoa e paruru i te hoê haapiiraa taaê, aita atoa ho‘i e paturu i te hoê ture. E farii oia i te mau parau mau atoa, i reira taua parau mau ra e anaana ai mai te mahana e anaana i te ra-‘i ra, e e faatoro ai i to’na mau aveave anaana i ni‘a i te mau mea atoa i hamanihia ra. Ahiri te taata e faaru‘e na i to ratou huru piripae e to ratou mau mana‘o tahito, a imi itoito ai i te parau mau na roto i te pure, e iteahia te reira ia ratou i te mau huru vahi atoa ta ratou e hi‘o.¹⁵

Te hoê tumu rahi roa i hi‘a pinepine ai te taata i roto i te rahiraa o ta ratou mau tuatapaparaa i te parau mau maori râ, to ratou ïa imiraa i te reira na roto i to ratou iho paari, e te faateiteiraa i to ratou iho maramarama, aita râ i imi i te paari i roto i te Atua ra, taua paari ra tei faaî e tei faatere i te ao atoa nei, e tei faaau ho‘i i te mau mea atoa. Te hoê fifi rahi roa i roto i te mau philosopho o te ao nei, mai te itehia i teie nei, maori râ, te parauraa ïa te taata e, o o’na te tumu i itehia ai tera mea e tera mea. Ia iteahia ia’na te hoê ture apî e te hoê mana‘o apî, e parau oia e, na’na i ite i te reira, aita râ i faahanahana i te Atua.¹⁶

No‘u nei, aita e mea hau atu i te faufaa i te parau mau mure ore; oia te mau parau tumu no te ora mure; te faaoraraa mure ore, e te faateiteiraa mure ore i roto i te basileia o te Atua. Tera râ, tei ia tatou te hopoi‘a no te haro‘aro‘araa i te reira, no te mea, ia ore tatou e haro‘aro‘a i te reira, e ore te reira e riro ei maitai no tatou, noa’tu te faahiahia o te mau parau mau.¹⁷

Te farii nei tatou i te mau parau mau atoa, noa’tu te huru o te parau mau, e te hinaaro nei tatou ia noaa te reira ia tatou, ia imi maite ho‘i i te reira mai ta tatou imiraa i te mau tao‘a faufaa rahi i hunahia; e ia faaohipa i te taatoaraa o te ite ta te Atua i horo‘a mai ia tatou ia ti‘a ia noaa ia tatou te taatoaraa o te ite ta’na i horo‘a ia vetahi ê ra; e ia ani ia’na ia faaite mai i to’na hinaaro ia tatou, no ni‘a i te mau mea maitai roa a‘e, tei faataahia no te faatupu i te oaoa e te ora maitai o te taata nei.

Mai te mea e, te vai ra te mau parau tumu maitai, te mau ite hohonu morare aitâ i noaa ia tatou, te hinaaro nei ïa tatou ia ite i te reira. Mai te mea e, te vai ra te hoê mea i roto i te ite ihi aitâ i haro‘aro‘ahia e tatou, te hinaaro nei ïa tatou ia matau tatou i te reira. Mai te mea e, te vai ra te hoê tuhaa no te ite hohonu o te taata e nehenehe e haamaitai i te oraraa o te taata nei, e aitâ ho‘i te reira i tae‘ahia’tura ia tatou, te hinaaro nei ïa tatou ia roaa te reira ia tatou. Mai te mea e, te vai ra te hoê mea no ni‘a i te ture e te faatereraa hau o te nunaa, oia ho‘i, te porotita, aitâ tatou i ite atura i te reira, te hinaaro nei ïa tatou ia farii i te reira. Mai te mea e, te vai ra te mau mana‘o no te pae faaroo, te mau parau mau no te haapa‘oraa faaroo, te mau huru parau tumu atoa no ni‘a i te Atua, aitâ i itehia ia tatou, te ani nei tatou i te taata, e te pure nei tatou tatou i te Atua, to tatou Metua i te Ao ra, ia haamaramarama mai i to tatou feruriraa ia ti‘a ia tatou ia maramarama i te reira, ia ite, ia farii, e ia faariro ei tuhaa no to tatou faaroo. I reira to tatou mau mana‘o e to tatou mau feruriraa e aano ai mai te aano o te ao nei, e e farii ai ho‘i i te mau mea atoa no te maramarama, no te ora, e aore râ, no teie oraraa i ni‘a i te fenua nei, e aore râ, no te oraraa a muri a‘e. … Ei reira to tatou mau mana‘o e imi ai i te maramarama o te mau Atua e parahi nei i roto i te mau ao mure ore. Ei reira to tatou mau mana‘o e apo ai i te mau mea maitai atoa e te teitei e te maitai e te oaoa tei faataahia no te haamaitai i te oraraa o te fetii taata nei.

No ni‘a i teie mau mea, aita hoê taata, aita atoa e pŭpŭ taata tei faaite mai ia tatou i te e‘a e haere. Aita e aratairaa, aita atoa e haapiiraa e vai i te ao nei, e o ta tatou e faaroo nei, maori râ, ia tamatahia te reira na roto i te mau ture o te parau mau mure ore. E tuatapapa maite tatou, e uiui, e tau‘a parau, e e hi‘opo‘a ho‘i i te mau mea atoa o ta tatou e ite, e te mau parau mau atoa ta tatou e haro‘aro‘a, e tuu tatou i te reira i roto i ta tatou faanahoraa.¹⁸

Mai te mea e, e parau mau to te ra‘i, to te fenua nei, e aore râ, to hade, te hinaaro nei au ia farii i te reira; aita vau e hi‘o e, eaha te huru o te reira, na vai te reira i horo‘a mai, e aore râ, o vai te taata e ti‘aturi nei i te reira; noa’tu e, e farii-maitai-hia te reira e te taata, e aore râ, aita, te hinaaro nei au ia haatihia vau i te parau mau, te parau mau mure ore, e ia oaoa i te reira.¹⁹

Te mau Mana‘o Tauturu no te Haapiiraa e te Aparauraa

Nohea mai ta tatou parau mau? Nahea outou i te haamaitai i te huru no ta outou pahonoraa i te mau vahi no reira mai te parau mau?
Nahea te evanelia i te aratai ia tatou “i tera parau mau e tera parau mau”? Eaha te mau tauiraa ta outou i ite i roto i to outou oraraa i to outou iteraa e to outou fariiraa i te mau parau mau apî?
Eaha te mau faatusiaraa ta outou i rave e aore râ, ta te tahi atu mau taata i rave ei maitai no te parau mau? Eaha te mau haamaitairaa tei tae mai na roto i te reira faatusiaraa?
E rave rahi mau taata o te Atua tei pohe no te parau mau. Nahea tatou ia ora i te parau mau mai taua huru faaroo ra e taua huru haapa‘o ra?
I to outou feruriraa, no teaha to te ao nei i pato‘i pinepine ai i te parau mau mure ore? Eaha te ti‘a ia tatou ia rave no te tauturu i te mau tamarii ia ite e ia farii i te parau mau mure ore? Eaha te ti‘a i to tatou utuafare ia rave no te haapuai i to tatou haapa‘o i te parau mau?
No teaha e mea faufaa ia faarahi tamau noa i to tatou haro‘aro‘a i te parau mau? Nahea tatou ia haapa‘o i te a‘o a te Peresideni Taylor ia imi tamau i te parau mau? Nahea tatou ia faataa i te parau mau i te parau hape?
Eaha te tahi mau parau mau o te evanelia ta outou i feruri e, e mau parau mau faauru e te haapuai? Ei melo no te Ekalesia, nahea outou ia tauturu ia vetahi ê ia haro‘aro‘a e ia farii i te parau mau?

Te mau Papa‘iraa mo‘a: Philipi 4:8; 1 Tesalonia 5:21; Alama 32:28–29; Moroni 10:4–5; PH&PF 45:57; 93:24; Hiroa Faaroo 1:13