Wase 12

Na Siga ni Vakacecegu Me Vakatabui

Eda sa vakaroti me da nanuma na siga ni vakacecegu ka vakatabuya.¹

Na Bula nei John Taylor

Me vaka e sa tukuni oti e na iwase ni ivola sa sivi yani, vakatekivu mai ni vakarau dromu na June ni yabaki 1847, erau a liutaka o Elder John Taylor kei Elder Parley P. Pratt e dua na ilawalawa Yalododonu sivia na 1,500 mai Winter Quarters ki Salt Lake Valley. E vakamacalataka na itekitekivu ni ilakolako qoka o Elder B. H. Roberts, ena nona a vola:

“Me tekivutaki e dua na ilakaolako vakainaki e sa bera toka e dua na yabaki. E sa rui bera vakalevu me teivaki na itei ni gauna o ya, kevaka mada ga me ra na cegu e na tokalau kei Rocky Mountains. Na veika e vakarautaki me na tauri ira e na loma ni dua veimama na yabaki e takiveiyaga, kevaka me qai leqa tale na imatai ni iteitei, sa na muri ga mai na walokai, na vanua ga e rawa ni kau mai kina na kakana e rauta ni 1600 ki na 2400 na kilomita na kena yawa mai na vanua era tiko kina. …

“Era solibulataka na veika taucoko, oka kina na watidra kei na luvedra, ka dodonu me ra wasea na veika dredre era sotava kei na icavacava ni nodra ilakolako. Era sega tu ni kila na vanua era na tavutu kina, mai na duabulu ga na sasaga era sa sega ni taqayataka e dua na ka mai na nodra vakadeitaka ni na sega na suka imuri. Kevaka era sa na sega ni kunea rawa e dua na vanua e ganita me ra vakitikotiko kina ka teivaki na iateitei e na imatai ni iwasewase, e sa na sega na ka me vakarautaki vei ira, se o ira me ra vakarautaka. E dodonu me ra rawata nodra inaki, se era na mai mate tu e na lekutu e na vanua ka tekivutaki kina nodra ilakolako.”

Dina ga ni tu na veika rerevaki e so kei na gagadre me ra yaco ki Salt Lake Valley ni bera ni tekivu na vula ibatabata, e dau vakarokorokotaki ga na siga ni Vakacecegu ka cegu na lako e na veiSigatabu kece. E tomana o Elder Roberts, “Na Sigatabu e vakarokorokotaki me siga ni vakacegu, veiqaravi vakalotu e vakayacori e na veikeba yadua, kei na sere kei Saioni era dau lagata na Yalododonu e dau botea na vakadirorogo ni loma ni veikau vakaitamera e na ra.” E na i ka 5 ni Okotova 1874, na ilawalawa qiqi yava iva nei Taylor kei Pratt era sa yaco bula yani ki Salt Lake Valley ka sa tekivutaki sara na vakavakarau e gadrevi me baleta na vula ibatabata. ²

Vei Peresitedi John Taylor, na siga ni Vakacecegu e dau nona siga ni qaravi Kalou, vakacegu, vakalesui tale mai na veivakanananu. E vakauqeti ira na Yalododonu me ra “maroroya na siga ni Vakacecegu ka vakatabuya, biuta vakatikitiki ka me siga ni vakacegu, na siga ni soqoni vata me vakayacori na sakaramede ka rogoca na veivosa ni bula, ka me laurai noda maroroya na veivakaro, ka ivakaraitaki vei ira na luveda.”³

iVakavuvuli nei John Taylor

Na siga ni Vakacecegu sa ikoya na siga ni qaravi Kalou e na vu ni yaloda taucoko.

E levu sara vei keda era sega ni vinaka sara, e rawa vei keda taucoko me da vinaka cake sara, caka vinaka ka marautaka vakavinaka cake na bula, me vakalevutaki cake na Yalo ni Turaga e na noda dui lomanivale kei na lomada, ka cakava e levu na ka me toroya cake na veiqaravi vei ira taucoko era volekati kleda ka vakayarayarataki ira. Noda qarava na Kalou sa ikoya e dua na inaki uasivi duadua e na noda bula; ka’u taleitaka na itavi uasivi ni gauna donu eda marautaka noda qarava na Kalou e na siga ni Vakacecegu. Ia noda dau sota me da qaravi Kalou, au taleitaka me’u raica ni da qaravi koya e na yaloda taucoko. Au nanuma ni sa veicalati ni vuqa na gauna eda rogoca e so na tamata nodra vosataka na veika vakavuravura; oqo na gauna, me tiko duadua e cake, noda vakanananu kei na loloma e dodonu me da qarava na Kalou e na yalodina. Kevaka eda sere vei Jiova, me da vakayacora e na kena ivalavala dodonu vakayalo; kevaka eda masu, me vagolei vakatabakidua na yalo kei na yago ki na masumasu, me vakayacori vata kei na vu ni yaloda taucoko, mai na noda masumasu kei na noda veiqaravi vua na Kalou, nona Yalo Tabue teteva na veika taucoko, ka dau tiko e na veigauna ni soqoni ni Yalododonu vinaka ka yalodina.

Au na tukuna vei iko na cava au vakila e na mataka ni siga ni Vakacecegu. Au vakadeitaka ni sa ikoya oqo na siga e vagalalataki me qaravi kina na Kalou Cecere: edaidai o au vakataki au e dodonu me’u qarava na Kalou, e dodonu me’u qarava talega noqu vuvale ka vaqaqa kevaka era sa vakaitavitaki ira tiko e na veika vata oqo se sega. E baleta ni da sa vakaroti me da vakarokorokotaka na siga ni Vakacecegu ka vakacegu mai na nomu cakacaka kecega, me vaka e a vakayacora na Kalou e na Nona a bulia na vuravura eda vakaitikotiko kina oqo. E a solia vei keda e ono na siga me da cakacaka ka qarava kina na veicakacaka me baleta noda bula, ia kevaka eda [vakadeitaka] me da maroroya na siga ni Vakacecegu, me da vakayacora e na noda ciqoma na Kalou na Tamada, solia noda igu taucoko vua, e na siga oqori, ka solia noda vakanananu kei na loloma vua. Oti, o ira na iTalatala ni Isireli e na veiyasa ivuravura taucoko, era vakaitavitaki ira tiko edaidai e na nodra tovolea mme vakavulici na ivakavuvuli ni vakabulai, kei na noqu vakanananu me’u masulaki ira, kei ira talega na noda daukaulotu ka ra sa lako tu ki liu e na kedra maliwa na Yalododonu e na vanua oqo, ka masulaki ira talega era vosa, ka masulaki ira talega era dau cavuqaqa e na soqoni ni Yalododonu e na vanua oqo kei na veivanua tale e so, me vaka ni sa ikoya na siga oqo e vakagalalataki me qaravi kina na Kalou, na Isireli taucoko e veivanua e rawa me ra vakayarayarataki ka dusimaki e na Yalo ni Kalou bula, ka ni vakabibitaki o ira era dau vosa e na Lotu e rawa ni ra vakayarayarataki vakalotu mai na ivavakoso na vosa ni bula tawamudu.⁴

Na siga ni Vakacecegu sa ikoya na siga ni veivakavulici ka vuli mai na Yalotabu.

E ka taleitaki vei ira na Yalododonu nodra dau soqoni vata ka ra na veikilai vata kei ira na nodra isoqosoqo lewenilotu, me ra rogoca e na qai vakavotui mai e na kena gauna na ka me tukuni, na vakasama talega ni nodra itutu ni veimaliwai kei na Kalou, ki na Nona Lotu kei na Matanitu, vaka tale ga kina na dikevi ni nodra dui vakanananu, kei, na veidusimaki ni Turaga kei na Nona Yalo Tabu, tovolea me ra kunea na veimailwai cava era taqomaka vua na Tamada Vakalomalagi, kevaka talega era vakayacora tiko na veitavi era vakacolati kina ka ra vakasaqara tiko me ra kitaka na vosa, na lewa, kei na lawa ni Kalou.⁵

E na gauna eda … soqoni vata kina e rawa me da namaka noda ciqoma na veidusimaki kei na veivakalougatataki mai vua na Kalou, mai vua, e tukuna vei keda na iVolanikalou, “na isolisoli vinaka kecega kei na i solisoli kecega e yaga sara; mai Vua talega, e tukuni vei keda, “sa sega vua na veivukiyaki, se yaloyalo ni veigoleyaki.” [Raica Jemesa 1:17.] E na noda soqoni o ira era vosa kei ira era rogoca e dodonu me ra dusimaki ka liutaki mai vua na Turaga, na Tama ni rarama. Mai vei ira taucoko na tamata e na ruku ni lomalagi, o keda na Yalododonu Edaidai, eda tomana tiko ga noda vakasamataka na yaga ni noda vakadinata na Kalou, mai na noqu rai, veitalia na levu ni vuku ni vakatutu e veivosakitaki, e sega na betena vei ira era rogoca vakavo ga me ra dusimaki ka vakaraitaki mai na yalo ni Kalou.⁶

E sega ni vakadua ni dua na tamata e bula tiko, me rawa ni vakavulica na veika Vakalou vakavo ga ke a vakavulici kina, vakaroti ka liutaki mai na yalo ni ivakatakila ka lako yani mai vua sa Cecere. E a sega talega na tamata yalodei me ciqoma na vuku ka bulia e dua na lewa dodonu me sala vata kei na ivakavuvuli tabu ni bula tawamudu, vakavo ga kevaka era sa vakayarayarataki e na yalo vata ga, vei ira na vosa kei ira era rogoca era tiko taucoko e na liga ikoya sa Cecere.⁷

Eda sota vata taucoko, ni da tamata vuku, gagadre ni via kila e vuqa na ka e na noda bula mai liu, noda bula tiko qo, kei na noda bula sa bera mai. Eda sota me da kunea e so na ka me sala vata kei na Tamada Vakalomalagi, me sala vata kei na nona itovo Vakalou vata kei na vuvale vakatamata, me sala vata kei na nona ituvatuva e vinaka vei keda, ka sala vata kei na inaki ni noda a buli mai; ka me da kila e so na ka, kevaka e rawa, me vinaka e na vuravura ka yawa sara mai na iyaloyalo ni cakacaka e na gauna oqo. Oqo e so ga na ka e na kedra maliwa na vuqa ka da gadreva me da kila, me da ciqoma, me da kunea, kevaka e rawa. ⁸

Au sega ni kila e dua tale na sala me rawa ni da vakavulici kina, vakaroti, ka cala me rawa ni da ciqoma noda itutu dina, e na rawa walega mai na veivakayarayarataki ni Yalo ni Kalou bula. E dua na tamata e rawa ni vosa mai na Yalo ni Kalou, ia e gadrevi kina e dua talega na iwase ni Yalo o ya vei ira era rogoca, me rawa vei ira me ra ciqoma vakadodonu na bibi ni veika e a vosataki vei ira, ka yaco kina na dredre e dau sotava na Turaga kei ira na yalododonu e na kena caka me ra ciqoma na tamata na veika era taleitaka vakalevu. Eda vakasamataka taucoko kevaka e rawa me da vakavulici mai vua na Kalou e na vinaka sara. Au kila na vuravura e rawa ni dikeva vakararaba me dua na veivakalougatataki uasivi. Ia na taro e basika mai e na nodra vakasama, kevaka e lako dina mai vua na Kalou se sega na ivakavuvuli era ciqoma. Era na kila vakacava oqori? Au sega tale ni kila e dua na sala vakatautauvatani kei na kena e cavuti e na ivolanikalou, “Ia ka sa tiko e dua na yalo e na loma ni tamata: a sa solia vei ira na vuku na icegu i Koya sa Kaukauwa.” (Jope 32:8) Ia, e tukuni tale vei keda e na Veiyalyalti Vou, ni “Sa vaka talega kina na veika ni Kalou sa sega e dua e kila, sa kila ga na Yalo ni Kalou.” [Raica 1 Koronica 2:11.] Na kila ka taucoko, na vuku taucoko, na vuna taucoko, na vakasama taucoko vakatamata kei na veiba taucoko e rawa ni kau mai me colata na vakasama vakatamata e na sega ni rawa vakavo kevaka sa vakarau na vakasama ni tamata me ciqoma na ivakavuvuli —vakarautaki mai na Yalo ni Turaga, na Yalo vata ga ka solia na vuku.⁹

Eda vakayagataka na sakaramede e na siga ni Vakacecegu me ivakananumi kei Jisu Karisito.

E kena irairai ni nona lesutale mai vuravura na iVakabula, nona vakararawataki, mate, tucake tale kei na nona cabeta na itutu e taukena e na vuravura tawamudu e mata iTamada Vakalomalagi e vakaitamera na kena wali vata na veika eda taleitaka ka marautaka; sa ikoya na kena tomani tiko na ivakananumi oqo me da vakayagataka tiko e na veisiga ni Vakacecegu. Na sakaramede oqo sa ikoya na kena vakacegui tiko na kerekere nei Jisu Karisito vei ira nona tisaipeli. “Io,, e na gauna kecega dou sa kania kina na madrai oqo, ka gunuva na bilo oqo, dou sa vakatakila kina na nona mate na Turaga, ka yacova na nona lako mai.” (1 Koronica 11:26.) Noda vakabauta na cakacaka vakalotu oqo e na vakaraitaka na noda vakabauti Jisu Karisito, ni sa ikoya na Nona Le Duabauga na Tamada, ni nona a lako mai lomalagi ki vuravura me mai vakayacora e dua na inaki e tuva tu na Kalou—me mai rawata na vakabulai kei na bula vakalou ni vuvale vakatamata. Na veika kece oqo e vakaitamera na kena wali vata na tiko vinaka kei na marau eke kei na gauna e muri mai. Na mate nei Jisu Karisito ke a sega ni yaco kevaka me a sega ni dua na kena yaga. Na veiqaravi oqo e dodonu me vakayacori me taqomaki kina na ka sa yaco mai na nodra vakasama na nona tamata, ka vakaraitaka na kena bibi.¹⁰

Eda na sota e na noda vakayagataka na sakaramede na ivakayakavi ni Turaga, ka sa dodonu me da tovolea ka vagolea tani mai na noda vakanananu e na veika vakavuravura. E na noda vakayagataka na sakaramede e sega walega ni da vakananuma kina nona mate ka vakararawataki noda Turaga ka iVakabula o Jisu Karisito, ia eda sa vakanamata tu e na gauna eda na lesutale mai kina ka mai sota e na kana madrai vata kei koya e na matanitu ni Kalou [raica Luke 14:15; Maciu 26:29]. E na gauna eda sa soqoni vata kina, eda na namaka me da ciqoma na veidusimaki kei na veivakalougatataki mai vua na Kalou.¹¹

O ira na tamata makawa ni Kalou, na lomadra e waqa tu e na vakaraitaki ni rarama ka serau, vakanamata tu ki na gauna e dau vakananumi kina na Lami se vakamatei mai na ivakatekivu kei vuravura e na soli koya me isoro, e na noda vakananuma tiko na ka vata ga o ya. Eda dovia na madrai ka kania, ka da gunuva na wai e na noda soqoni vata e na veisiga ni Vakacecegu, ka da kitaka me vakananumi kina na lewe kei na liviraki ni dra ni noda Turaga ka iVakabula o Jisu Karisito; eda na tomana tiko noda cakava me yacova nona lesutale mai. E na nona sa lesu mai, o ira na Yalododonu Edaidai era nanamaki tu me ra maliwai ira na ilawalawa tamata taleitaki me ra na kana ka gunu vata kei koya e na nona teveli e na matanitu nei Tamada. E na levu ni noqu nanamaki tiko oqo e vaka sara ga noqu nanamaki tiko me’u kania na qau ivakayakavi e na bogi nikua.¹²

E dodonu me da qarauna noda kania ka gunuva [na sakaramede] ka sega ni doka. O sa bau veivala mada vata kei ira na tacimu tagane, se o cakava e dua na ka me vakavuna nomu besetaka e dua na tamata, ka rairai vosa kaukauwa vua e dua me baleta e dua tale, e so tale na sala o cakava kina na ka e cala, ka qai sota vata taucoko e na veibeci vakamalua e na mata ni Kalou ko koya sa kania ka gunuva ka sega ni doka? Eda vinakata me da qarauna sara vakavinaka na veika e baleta na ka oqo; o koya qoka na vuna e dodonu me da kila ni gauna eda kauta mai kina noda imadrali e na icabocabo ni isoro, a sa nanuma mai kina sa dua na ka sa beitaki iko kina na wekamu; biuta tu nomu imadrali e na mata ni icaabocabo ni isoro, ka mo lako, mo drau veivinakati mada eliu kei na wekamu, mo qai lako mai ka vakacabora nomu imadrali [raica Maciu 5:23–24]. E sega ni o lako mai e na veidabui, mo lako vata mai kei na liga savasava kei na yalosavasava, ka nanuma mo kaya “Oi kemuni na Kalou ni raici au mada ka vakatovolei au ka vakadinadinataki au mada, kevaka e tu e so noqu ivalavalaca, ni vakasavasavataki au, ka me’u nomuni talai yalodina e na vuravura, ka me’u vakayagataka na yalo ka tiko vei Karisito, ka me’u marautaka o ya e na noqu bula e vuravura; ni gauna e lesutale mai kina, o au vata kei ira na wekaqu, keimami na sota vata kaya o koya sa liga savasava ka sa yalosavasava.”¹³

E dodonu me levu cake na ka eda cakava mai na noda lakova na noda soqoni kei na vakayagataki ni sakaramede me rawa ni da vakalougatataki kina mai vua na Kalou.

E rui levu vei keda eda dau vakamuria na ivakarau se vakasama vakavauravura. E rawa ni solia o vuravura vei iko na rarama o sa ciqoma oti, kei na kosipeli kei na vakanuinui kei lomalagi o sa ciqoma oti, kei na itutu vakamatebete o sa ciqoma oti? Ia, ko na volitaka na veika kece oqo e na dua na ivakarau veleti kakana, ka cakava na ka vakasisila, qito duka, ivalavalaca, ka tawakilikili ka vauca tu na vuravura? Na cava eda lakova mai eke? Me da qarava na Kalou ka vakamuria nona ivakaro. Ia e vakacava tiko ki na lewe levu vei keda? Eda guilecava, vakavuqa, noda vakanuinui lagilagi ni noda veikacivi cecere, ka da vakalaiva me lako mai na ivakarau vakayalowai, sega ni veiganiti, malumalumu, kei na ivalavalaca, ka sa lewai keda tu na kocokoco, daumateni, voroki ni siga ni Vakacecegu, kei na veimataqali ivalavala ca. E so na gauna au dau raici ira na italatala kei Isireli nodra vakarautaka na iusausa buka, na iusausa karasi mamaca e na siga ni Vakacecegu. Na cava na vuna, e vakamadua ka toro sobu duadua e na mata ni Kalou, agilosi savasava, kei ira taucoko na veika bula yalomatua. … Na cava nomu nanuma vua e dua na iTalatala lasulasu, Bete Levu dauvosavosa ca, Yabaki vitusagavulu dau vakacacana na siga ni Vakacecegu, kei na dua na Yalododonu kocokoco? Na yalodra na tamata vakaoqo e dodonu me vakaraitaka vata na rarama ni ivakatakila, ka dodonu me ra ivakadinadina bula, ka ra ivakaraitaki raraba vei ira na tamata me ra bula vakacava. E vakacava nomu nanuma e rawa ni o bulataka nomu vakabauta vakalotu, me tiko kei iko na Yalo ni Kalou ka rawata na bula tawamudu, ka vakamuria na veika kece oqo? Au kaya vei iko e sega.¹⁴

E sa dau nodra ivakarau na tamata e vuravura ka ra sa digitaki mai vuravura, me ra dau vosa e na Sigatabu me baleta na veika vakayalo, e na nodra sa tokara na kote ni Sigatabu ka ra tiko e na soqoni, ia e na Moniti sa maroroi e na kato nodra veika vakalotu vata kei na isulu ni Sigatabu, me yacova sara ga na Sigatabu ka tarava. … Isa, na lialia ni tamata nodra sega ni vakaraitaka na Kalou e na veika taucoko sara, na kena biu vakatikitiki toka mada na Kalou kei na nona lotu, ka vakanuinui ga e na nodra vakatulewa kei na yalomatua.¹⁵

E tiko e dua na ivakaraitaki ni toso ki liu mai na veika eda dau vakasamataka e na so na gauna; sa ikoya, noda dau vakadinadinataka ni da dau vakamuria na Turaga, noda dau vakadinadinataka noda sa ciqoma na Kosipeli me lewai keda, na ivakadinadina e na sega na betena vakavo walega kevaka eda sa sava noda isulu ka vakavulavulataka e na dra ni Lami. E sega ni rauta kevaka eda sema vata kei Saioni na koro ni Kalou, e dodonu me ra tiko e saioni na koro ni Kalou na tamata yalosavasava ka savasava nodra bula ka sa vulavula sara nodra isulu e na mata ni Kalou, ke rawa me sa ikoya sara ga na itinitini ni navunavuci. E se bera sara ni da yaco ki kea, ia e dodonu me da yaco kina ni bera noda vakavakarau me da taukena na lagilagi kei na bula vakalou; kena ibalebale e dua na nona ga na lotu vakarairai e na yaco mai ia e na lailai sara vei keda, ia na tamata ko ya, sa kila na loma ni nona turaga, ka sega ni vakarau kina, se cakava me vaka na lomana e na yaviti vakalevu [raica Luke 12:47]. E na “sega ni curu ki na matanitu vakalomalagi kei ira kecega sa kaya vei au, “Turaga, Turaga; ko koya ga sa cakava na loma i Tamaqu sa tiko mai lomalagi.” [Maciu 7:21.] Oqo na ivakavuvuli ni Kosipeli mai na noqu kilai ira. E sega ni sa rauta sara ga vei keda noda taleitaka na Kosipeli ka da soqoni vata tiko eke e na vanua ko Saioni ka sema vata kei ira na tamata ni Kalou, tiko ena soqoni ka vakayagataka na Sakaramede se na ivakayakavi ni Turaga ka tovolea me da toso vata ka kakua ni tao e na levu ni leqa; mai na veika taucoko oqo, kevaka e sega ni dodonu vua na yaloda, kevaka eda sa dukadukali tu e na siga oqo e na mata ni Kalou, kevaka e sega ni savasava na yaloda ka savasava noda vakanananu, rerevaka na Kalou ka vakamuria Nona ivakaro, eda na sega ni rawa, kevaka walega me da veivutuni, vakaitavitaki keda e na veivakalougatataki o koya au sa tukuna oti, kei na kena ka ra wasea kina nodra ivakadinadina na Parofita.¹⁶

Sa noda itavi me da Yalododonu. Ia me da kilikili e na kena ivalavala e sa noda itavi me da bulataka na ivakavuvuli ni itovo savasava, dina, bula dodonu, yalo savasava, ka dokai ka na vakataudeitaki e na veigauna taucoko na loloma ni Kalou Cecere; na Nona veivakalougatataki me na tiko vata kei keda e lomada, me vakalougatataka talega na noda vuvale … ka ni o keda, eda tamata, eda a vakarurugi tu mai na Nona veitaqomaki vakalou. ¹⁷

Vakatutu ni Vuli kei na Veivosaki

Na veivakalougatataki cava soti e rawa ni da sotava mai na noda vakabauta me vakarokorokotaki na siga ni Vakacecegu? (Raica talega na V&V 59:9–13.) O sa bau vakalougatataki vakacava e na nomu taqomaka na siga ni Vakacecegu me savasava?
Na cava e rawa ni o cakava me taucoko kina nomu qarava na Kalou e na siga ni vakacecegu? E rawa vakacava nomu vakarautaki iko mo drau veivolekati vakalevu sara vata kei na Yalo Tabu ni bera ni tekivu na veisoqoni Vakalotu?
Na cava era rawa ni cakava na itubutubu kei na tukadra kei na budra vei ira na luvedra kei na makubudra me taqomaki ka vakatabui kina na siga ni Vakacecegu? E rawa vakacava me da cakava na siga ni Vakacecegu me duatani mai na veisiga tale e so e na noda vuvale? E rawa vakacava na kena vakarokorokotaki na siga ni Vakacecegu me vakaukauwataka na veivuvale ka taqomaki keda mai na vuravura?
Na cava na vuna e yaga kina me da vuli mai na Yalo e na noda sokalou e na siga ni Vakacecegu? Na cava e rawa ni cakava e na nomu itavi vaqasenivuli se gonevuli mo sureta na veivakauqeti ni Yalo Tabu e na siga ni Vakacecegu?
Na veiyalayaalati cava eda cakava e na noda vakayagataka na sakaramede? (Raica talega na Moronai 4–5 se V&V 20:76–79.) Erau sala vata vakacava na veiyalayalati oqo kei na noda veiyalayalati ni papitaiso? (Raica talega na Mosaia 18:7–10.)
Na cava na vuna e bibi kina noda dau vakayagataka wasoma na sakaramede? Na cava o rawa ni cakava mo vakila kina nomu voleka sara vua na Turaga e na nomu vakayagataka na sakaramede?
Na cava na kedrau duidui noda dau tiko walega e na veisoqoni kei na noda taqomaka vakaidina ka vakatabuya na siga ni Vakacecegu?

iVolanikalou ka Salavata: LakoYani 20:8–11; Aisea 58:13–14; Maciu 12:10–13; 3 Nifai 18:1–12; V&V 27:1–14; 59:9–20

taking the sacrament — “E na noda vakayagataka na sakaramede e sega walega ni vakanauma kina nona mata ka vakararawataki na noda Turaga ka iVakabula o Jisu Karisito, io eda sa [vakanamata tu] e na gauna e na lesu tale mai kina.”

people outside church — E dua na itaba makawa ni Pinto Ward, St. George Utah Stake. E a vakatavulica o Peresitedi Taylor ni siga ni Vakacecegu sa ikoya na gauna ni vakacegu mai na noda cakacaka ka vakaukauwataka noda veiwekani kei na Kalou.