Wase 17

Na iVakatakila Muria mai na Yalo Tabu

Na iVakatakila. … sa yavu sara ga ni noda lotu.¹

Na Bula nei John Taylor

E a tukuna ko Peresitedi John Taylor: “Au nanuma vinaka e dua na vosa ka tukuna vei au ko Joseph Smith. … E a tukuna, “Elder Taylor, ko sa papitaiso oti, sa tabaki oti na ulumu e na ciqomi ni Yalo Tabu, ka ko sa tabaki oti e na itutu tabu vakabete. Kevaka ko na muria tikoga na veiliutaki ni yalo ko ya, e na dau tuberi iko tikoga e na dodonu. So na gauna e na veibasai kei na nomu nanuma; veitalia oqori, muria ga na nona lewa, ia ke ko dina e na nona vakasolokakana e na dua na gauna e na ivakavuvuli ni ivakatakila me na rawa kina ni ko kila na ka kecega.²

E a muria na ivakasala nei Joseph Smith ko John Taylor ka vakanuinui ki na ivakatakila mai vua na Yalo Tabu e na veituberi ki na nona bula vakaikoya kei na nona veikacivi vaka parofita, daurairai, ka dau ni vakatakila. Ko Peresitedi Heber J. Grant, na ikavitu ni Peresitedi ni Lotu, e a kaya e na nona dau kila vinaka ko Peresitedi Taylor na veivakauqeti ni Yalo Tabu: “Au a kacivi ki na Matabose ni iApositolo Lewe Tinikarua e na ivakatakila ni Turaga vei Peresitedi John Taylor. Mai na gauna au a curu kina ki na Matabose ni Lewe Tinikarua, o ya ni oti e rua na yabaki e na nona sa kacivi me Peresitedi ni Lotu ko John Taylor, me yacova na gauna e a mate kina, au dau sota kei koya, e na veimacawa, … ka’u kila ni tamata ni Kalou bula o koya. Au kila ni dau lako mai vei koya na ivakaraitaki ni Turaga; ka’u kila ni veigauna kece, ni dau tukuna: ‘Oqo na ka e gadreva na Turaga,’ ko ira kece e na loma ni matabose ni apositolo era dau tokoni koya e na nona itutu, kei na veigauna kece e dodonu kei na ivakaraitaki ni Turaga vei koya e vakaraitaka ni nona vuku e na kaukauwa ni Kalou e uasivita na vuku ni veitamata tale e so. …

“Au rawa ni talanoataka na gauna era dau talai kina na iapositolo me ra la’ki vakayacora e so na cakacaka e na veiuqeti ni Turaga vei John Taylor, e na nodra nanuma ni ra na sega ni rawata na cakacaka. Era a lesu rawa mai ka mai tukuni yalotaka na veivuke ni Turaga era a rawata kina na cakacaka e a solia vei ira ko Peresitedi Taylor, na parofita ni Turaga.”³

iVakavuvuli nei John Taylo

E dua tiko na kedrau duidui na Yalo ka liutaki ira na tamata me ra caka dodonu kei na isolisoli ni Yalo tabu.

Me baleta na cakacaka ni Yalo e na tamata, me’u vakaraitaka mada vei kemuni e dua na ka kilai levu vei ira na tamata, ko ya na, veitalia ke ca vakacava e dua, sa titobu sara na nona yali mai na dina, na mataqali tamata oqori e na qoroya ka doka e dua na tamata vinaka, tamata dokai, kei na tamata bula dodonu; na tamata oqo e na dau kaya; “Au diva me’u rawa ni kitaka na ka e cakava na tamata ko ya, ia au sega ni rawata: Au diva me rawa ni’u muria e dua na sala dina, ia au sa rui vakasinaiti e na ca.” E sega ni ra vosota rawa na nodra doka na vinaka kei na dokai, dina ga ni ra sega tu beka ni vauci e na ivakavuvuli ni veidokai kei na bula dodonu. Na yalo vata ga oqo ka soli ki na tamata kecega e na taudaku ni kosipeli e a sa vakatakilai mai e na veitaba yabaki kei vuravura. …

Ia e tiko e dua na duidui levu e na kedrau maliwa na yalo oqo kei na veika ka liutaki ira na tamata me ra kitaka na ka dodonu, ka dua na iwase ni Yalo ni Kalou, ka soli ki na veitamata yadua me na tubu, ka vakatokai e na ivolanikalou na isolisoli ni Yalo Tabu.⁴

E tiko ka dau tu ga e dua na yalo e na vuravura ka dua na tiki ni Yalo ni Kalou, ka liutaki ira na tamata e na levu na gauna, me ra kila na duidui ni vinaka kei na ca, na dodonu kei na cala. E tu vei ira na kila e loma ka veibilitaki se vakaiulubaletaka na ka era kitaka; ka dina ga ni vuravura ni tamata e sa rui ca ka levu kina na qito ca, ia eda na raica ni voleka ni tamata kece, dina ga ni ra sega ni caka vinaka ko ira, era taleitaka na nodra caka vinaka na tani.

Na ivolanikalou e tukuna ni Kalou “era sa duavata na lewe ni veivanua kecega, me ra tiko e na dela ivuravura taucoko, a sa lesia na veigauna ka digitaki e liu, kei na iyalayala ni nodra veiyasana; me ra vaqara na Kalou, de ra vakayayamo beka vua, ka kunea, ia sa sega ga ni yawa ko koya vei keda yadua.”[Cakacaka 17:26–27.] E tomana tale na ivolanikalou ka kaya, a sa solia vei ira na tamata yadua na ivakatakilakila ni Yalo Tabu me yaga kina [raica 1 Koronica 12:7]. Ia e dua na duidui levu e na kedrau maliwa na itutu era taukena ko ira oqo kei na kena eda taukena. E dua tale na ka levu e noda mai na tiki ni Yalo Tabu ka soli ki na tamata kecega, ka vakatokai na isolisoli ni Yalo Tabu, ka da taura mai na noda talairawarawa ki na imatai ni ivakavuvuli ni kosipeli i Karisito, e na tabaki ni ulu mai vei ira na italai ni Kalou.⁵

Mai na isolisoli ni Yalo Tabu, e rawa ni da kila na veika vakalou.

E na gauna e a vunautaki kina na kosipeli vei ira na tamata e liu e a tukuni vei ira me ra veivutunitaka na nodra ivalavala ca, me ra papitaiso e na yaca i Jisu me bokoci na nodra ca, ka oti me qai tabaki na uludra me ra ciqoma na isolisoli ni Yalo Tabu [raica cakacaka 2:37–38]. E a tukuni talega vei ira, na ka e na kitaka na Yalo Tabu; ni na taura na veika vakalou ka vakaraitaka vei ira; e na vakavuna ko ira na nomudou qase era na tatadrataka e so na tadra, ko ira na nomudou cauravou era na raica e so na raivotu; sa na qai yaco me ra parofisai na tamata kei na vada ni Kalou [raica Cakacaka 2:16–18; raica talega Joeli 2:28–29].

Oqo na nona cakacaka na Yalo ko ya ka tiko vata kei na Kalou, na Tamada, kei na Kalou, na Luvena, ka vakatokai na Yalo Tabu. Sa ikoya na Yalo oqo ka kauti keda mai ki na veikilai kei na Kalou, ka duidui sara mai na tiki ni yalo ka soli ki na tamata kecega me ra vakayagataka.

Na kena inaki me kauti keda ki na dina kece, ka me da nanuma na veika sa oti, edai kei na veika e se bera mai. E vakasamataka na veika ni mataka ka tevuraka na veika eda a sega tu ni vakasamataka, kei na veika oqo e sa volai tu vakamatata e na iVolatabu, na iVola i Momani kei na iVola ni Vunau kei na Veiyalayalati. Eke e tiko kina na keda duidui kei ira tale e so, ka a vakakina e na gauna sa oti.⁶

Keimami vakabauta ni dodonu vua na tamata me rau veivosaki kei na Kalou; me rawata na ivakatakila mai Vua, kevaka e sega ni biu e na ruku ni kaukauwa ni veiuqeti ni Yalo Tabu, e na sega ni kila e dua na ka me baleta na veika va-Kalou. Au sega ni via kila se levu vakacava na kila ka ni dua na tamata, se vakacava na levu ni nona veilakoyaki. Au sega ni via kila na nona taledi, na raba ni nona rai se cava na nona lewa e na veika tale e so, e sega ni kila e so na ka ni yalo na Yalo ni Turaga, o ya na ka e tauyavutaka mai na ivakavuvuli au a tukuna oti mai—na vinaka ni ivakatakila. Sega ni ivakatakila ni gauna e liu, ia na gauna oqo kei na ivakatakila sara ga oqo, o koya ka na veiliutaki ka tuberi ira ka ra taukena e na sla kece ni bula oqo, kei na bula tawamudu mai muri.⁷

Na ivakatakila ka sega ni mudu sa yavu ni noda lotu.

E sega ni da rawata na noda vakasama mai vua e dua na dau vulica na veika ni Kalou, mai vua e dua na sainitisi, mai vua e dua na tamata kilai levu, se vakaitutu e vuravura, se mai na dua na isoqosoqo se matabose ni tamata lotu, mai vua ga sa Cecere Sara, ki vei Koya eda sa dinau e na bula taucoko, na dina kece, kei na kila ka kece me baleta na veika sa sivi, veika me baleta na gauna oqo, se me baleta na gauna e se bera mai. O koya gona eda vakila na noda vakararavi Vua. …

Sa sega e dua sa kila na veika ni Kalou sa kila ga na Yalo ni Kalou [raica 1 Koronica 2:11]’ ia ke sega ni vakraitaka na Tamada eda sa na veilecayaki vakadina. … Sa vakaraitaka na Nona lewa vei ira na tamata, vei Joseph Smith, me vaka e sa vakayacora ko Koya vei ira e na gauna e liu, sa dodonu kina me Nona lewa ko ya me vakatakilai ki na veimatanitu kece, veiwekani, duivosavosa kei na tamata, me rawa ni ra kila na tamata na veika e sa vakaraitaka me baleta na veivakabulai kei na bula vakalou ni tamata. O koya gona ko ya eratou vakatikori kina na lewe Tinikarua. Na cava na kena inaki? Me rawa ni ratou tauyavutaka na kosipeli ki na veimatanitu e vuravura ka vunautaka na ivakavuvuli ni bula e na kena lako mai vua na Kalou.

Na nodra ivakadinadina vei ira na tamata o ya ni sa vosa na Kalou, ni sa vakalesui tale mai na kosipeli; era vakamacalataka na cava na kosipeli; era kacivi ira na tamata me ra veivutuni ka papitaiso e na yaca i Jisu me bokoci na nodra ivalavala ca, ka ra yalataka ni ko ira na talairawarawa era na ciqoma na Yalo Tabu. … Ni ra sa taura na yalo ko ya, e sa tadola kina vei ira na sala ni veivosaki kei na Tamadra vakalomalagi e na vukuna na noda Turaga ko Jsiu Karisito, na nona veiuqeti na yalo oqori, na nodra masu e lako cake vua na Kalou ni vuravura taucoko; era vulica me ra vakadinati Koya ka muria na Nona lawa.⁸

E vinaka na iVolatabu. … Na iVola i Momani e vinaka, kei na Vunau kei na Veiyalayalati, me ivakatakilakila. Ia na dausoko ka soko e na wasawasa e vinakata e dua na ivakarau tudei. Me kila vinaka na veika era tu e lomalagi, ka taura na nona vakadidike mai vei ira, me rawa kina ni sokotaka na nona waqa vakadodonu. O ira na ivola oqori era vinaka me ra ivakaraitaki ni so na lawa kei na ivakavuvuli. Ia era sega, ka sega ni rawa, ni tara na veika kece ka vinakati me lewai ka tuvani e na kena ituvatuva.

Eda vinakata e dua na vunikau bula—na mata ni wai bula—na yalomatua bula, ka lako mai vua na matabete bula mai lomalagi, e na vuku ni matabete bula e vuravura. … Mai na gauna e a veivosaki vakadua kina ko Atama kei na Kalou, ki na gauna, e taura kina na nona veivosaki ko Joni, mai na yanuyanu ko Patemo, se na kena dolavi na lomalagi vei Joseph Smith, e na vinakati kina na ivakatakila vou, me lako vata kei na veika duidui e a biu ki na Lotu se na veitamata yadua.

Na ivakatakila vei Atama e sega ni tukuni kina vei Noa me taya na nona waqa; ka vakakina na ivakatakila nei Noa e sega ni tukuni vei Loti me biuti Sotoma; e sega talega ni dua vei rau oqo e tukuna na nodra biuti Ijipita mai na luve i Isireli. O ira kece oqo e dui tu ga na nodra ivakatakila, me vakataki Aisea, Jeremaia, Isikeli, Jisu, Pita, Paula, Joni, kei Josefa. Ka vakakina ko ikeda, de da qai vosa.⁹

E levu na tamata, kei ira ka ra kaya ni ra Lotu Vakarisito, era na rai avakatani e na vakasama ni vakatakila e na gauna oqo. O cei mada e sa bau rogoca ni lotu dina e sega ni veitaratara kei na Kalou? Vei au na ka oqo e sa qai dua na ka lialia me rawa ni vakasamataka mai na mona ni tamata. Au sega kina ni vakatitiqataka, na nodra sega ni vakadinata na ivakavuvuli ni vakatakila e na gauna oqo, ni vakatitiqa kei na sega ni dina e bula tu e na dua na ivakatagedegede vakarerevaki. Au sega kina ni vakatitiqataka ni levu na tamata era raica na lotu vakaca, ka ra nanuma ni dua na ka e sega na betena me ra kila na tamata vuku, baleta ni sega na ivakatakila, na lotu e vakalialia ka sega na betena. Ke’u sega ni rawata e dua na lotu ka na kauti au vua na Kalou, ka biuti au me keirau veikilai vinaka kei Koya, ka dolava ki na noqu vakasama na ivakavuvuli ni tawa mate rawa kei na bula tawamudu, au sega ni vinakata me’u dua kina na ka.

Na ivakavuvuli ni ivakatakila e na gauna oqo, sa ikoya na yavu sara ga ni noda lotu. … Au na sega walega ni qara na ivolanikalou ka tu oqo vei keda, au na qara talega na ivakatakila kece ka sa solia oti na Kalou, sa solia tiko, se na qai solia mai me veidusimaki ka ivakasala vei ira na nona tamata, ka’u na qai rokovi koya ka solia, kei ira ka vakayagataka me ra nona ivakavakayagataki me kacivaki ka kilai kina na vei ivakavuvuli oqori; ka’u na qai qara me’u liutaki mai na ivakavuvuli ka tu e na vosa tabu ko ya.¹⁰

Eda gadreva yadua na ivakatakila me rawa ni da kila ka vakayacora na noda itavi.

E sega ni dua na itutu e rawa ni da taura e na bula, se da tama, tina, gone, turaga, dau veiqaravi, se qase kei Isireli ka taura tu na matabete tabu kei na kena cakacaka kece, ia na veika eda gadreva wasoma sa ikoya na yalomatua ka drodro tiko mai vua na Turaga kei na kila ka e solia mai o Koya, me rawa ni da kila na noda qarava vakadodonu na noda itavi kei na cakacaka ni bula, ka vakayacora na vei itavi e vuqa ka vakataqari vei keda. Na veika kece ni veisiga taucoko, kei na veisiga yadua, na veimacawa, vula, kei na yabaki, e na ruku ni veika kece, o ira na tamata e na nodra ravi vua na Turaga ka tuberi mai na Yalo ka drodro mai vua, me rawa kina ni da kua ni lutu ki na cala—me kua kina ni da kitaka e dua na cala, tukuna e dua na cala, se nanuma e dua na cala, ka me tiko kei iko e na veisiga na Yalo ko ya, ka na rawa walega ni da maroroya ni da raica tiko na bula savasava, ka vakalou, bula dodonu, kei na bula e na veigauna e na talairawarawa ki na lawa kei na ivakaro ni Kalou.¹¹

Mo ni tarogi kemuni, e na gauna ko ni a bulataka tiko kina na nomu ni galala, ka cilava na nomu ni vakasama na Yalo ni Kalou, ka cilava na yalomu ni na kadrala ni Turaga, e na kila ka ni lomalagi, ka ko a lako e na lewa e na rarama ni dina tawamudu, kevaka ena veigauna oqo ko vakila ni ko ni a sega ni vakarau mo ni vakayacora e dua na itavi ka gadrevi vei kemuni, kevaka ko ni a sega ni dau vakayacora na nomu ni itavi e na yalovinaka kei na vakacegu vei kemuno. Ia ni kauta na noda vakasama na veika ni vuravura oqo, ni yalo mai na noda rai na matanitu ni Kalou kei na veika e baleta, na kena lagilagi, na marau kei na tiko vinaka ni vuvale vakatamata, kei na veika eda namaka tiko me yalo e na vuravura, kei na tikina eda na vakaitavi kina; ni yali na noda raica na noda itavi vakatama, tina, iliuliu ni vuvale, radini vale, gone … ka da kauta ga na noda lewa, nanuma, kei na nanumi koya vakaikoya, ka da vakaitavitaki keda e na ivalavala ca; e na gauna oqori sa na dredre kina vei keda me da vakasamataka na veika vakalou.¹²

Na Turaga e sa solia vei keda na ivakatakila me baleta na veika e baleti keda vakayago ka vakayalo talega. E sa tekivutaka na taraicake kei Saioni, ka me tauyavutaki na nona matanitu, ka na qiqi yani na nona inaki, ka vakayacori na nodra vosa na parofita, na nona cakacaka e na toso yani me yacova ni sa rawa na inaki ni Kalou.¹³

Vakatutu ni Vuli kei na Veivosaki

Na cava na kedrau duidui na Yalo ni Kalou ka tuberi keda me da kitaka na ka dodonu kei na isolisoli ni Yalo Tabu? [Raica talega na V&V 93“2; Joni 14:26.]
Na cava mada o sa bau sotava ka vukei iko kina na ivakatakila ni Yalo mo kila na veika vakalou? Eda kila rawa vakacava na noda ivakatakila vakaikeda mai vua na Turaga?
E rawa vakacava ni noda vakasamataka vakalevu na ka vakavuravura me la’ki tarova na noda taura na ivakatakila? Na cava e rawa ni da kitaka me da vakarautaki keda kina me da taura na ivakatakila?
E rawa vakacava me ivakatakila ka soli mai e na vukuna na parofita e levu na kena veivuke mai na ivolanikalou mada ga? Na cava e sa rui bibi kina me tiko ruarua vei keda na ivolanikalou kei na ivakatakila ka sega ni mudu?
Na ivakaraitaki cava o nanuma rawa ni a vukei iko kina na Yalo Tabu e na nomu vuvale, vanua ni cakacaka se koronivuli, se e vale ni Lotu?
Na cava na vuna eda dau druka kina e na kena vakayagataki na isolisoli ni Yalo Tabu? E rawa vakacava ni da rawata vinaka na veika mai na isolisoli oqo?
Na cava e sa rui veivakalougatataki uasivi duadua kina e na vuravura edai na isolisoli ni Yalo tabu? Na cava e rawa ni ko kitaka mo vakaraitaka kina na nomu vakavinavinakataka na isolisoli oqo?

iVolanikalou e Salavata: i Korinica 12:3; Jekope 4:8; Alama 5:46–48; V&V 45:56–57; 76:5–10; Yavu ni Vakabauta 1:9