Wase 1

Na iTekitekivu kei na iCavacava ni Tamata

O keda na luve ni Kalou, ka sa raica na Kalou e na itabagauna oqo ni ganita me digitaki keda me da veitaratara vata kei koya. E sa biuti keda e na dua na itutu me rawa kina ni da vakataucokotaka na inaki eda a buli kina, mai na nona a vakatakilai koya ka vakakina na Luvena o Jisu Karisito, mai na nodra veiqaravi na agilosi kei na vakalesui mai ni matabete tabu ka vu mai Vua na Kalou, ka qaravi talega kina o koya, ka biuti keda e na dua na itagede ka rawa kina meda vakacavara na inaki ni noda a buli.¹

Na Bula nei John Taylor

E na dua na nona vosa Vakaperesitedi ni Kuoramu ni Le Tinikarua, e nanuma lesu kina o Peresitedi Taylor na gagano vakayalo e dau vakila e na nona gauna ni gone me kila na inaki ni bula kei na kena isema vua na Kalou. E a kaya kina: Ni’u a se gonetagane lailai au dau tarogi au, O cei o au? Au lako mai vei? Na cava au mai cakava? Kei na cava au mai tiko kina eke? Eda se veilecayaki voli ga e na vuku ni ka oqo, e vuqa sara era vakakina, ia oqo na veivakanananu eda sega ni rawa ni levea na kena dau votu mai vei keda. Eda raica na nodra sucu mai ki vuravura na gone, eda raica na vulaitubutubu kei na vulaikatakata, na vulaikelikeli kei na vulaibatabata, eda na dau tarogi keda, e na kaukauwa cava era basika mai kina na veika oqo? Na cava eda mai tu kina eke kei na cava e kedra inaki na veika kece e vakavolivoliti keda tu?”²

E vakaraitaki e na ivakavuvuli nei Peresitedi na reki e kunea e na ivakavuvuli ni kosipeli ka a vukei koya me kila na vanua e cavutu mai kina kei na vanua e na cava kina me vaka ni luve ni Kalou. E tukuna kina “ni ra sa vakananuma na yalododonu ni Kalou, ka sa dolavi ki matana na raivotu me baleta na tawamudu ka votu ki nona vakasama na nona inaki ni Kalou e sega ni veisau— ni vakananuma na nona itutu dina e mata ni Kalou, matadra na agilosi, kei ira na tamata e guilecava kina na veika ni vuravura ka vagalalataki koya mai na gadreva na iyau ni vuravura. E vakasamataka na Kalou kei na nona icavacava e na yavu tawamudu ni Kalou ka marau e na tubucake ni nona vakanuinui ki na lagilagi tawamudu.”³

iVakavuvuli nei John Taylor

Eda luve ni Tamada Vakalomalagi ka na rawa me da vakataki Koya

A cava na tamata mo ni nanumi koya kina? Kei na luve ni tamata, mo ni dautalevi koya kina?

E na dua na rai, na tamata e dravudravua, malumalumu, ka lecaika, ka sega sara ga na betena: e na dua tale na vakasama, e kunei ni yalomatua, vuku, kaukauwa, yalo dodonu, ka vakacerecerei. E vakatau mai na nomu rai me baleta na tamata ka dusia na nomu vakanananu me baleti koya. E na dua na kena vakasama, e vaka beka eda rawa ni kaya, me vaka na co ni lomanibai ka tu edaidai, a sa biu ki na lovo ni mataka. E veiveisau na nona nanuma, na nonavakasama, nona raitayaloyalo, kei na ivalavala. E dau vakasavuliga, taleitaki koya vakaikoya, ka daurairai, ka sega ni liutaki mai na dua na ivakavuvuli dodonu. A bula mai me vaka beka na bebe, e veivukayaki ga vakalailai, mate, ka yali yani.

E na dua tale na iyaloyalo, eda raici koya me vaka ni yavu mai vei ira na Kalou—me dua ka rawa ni yaco me Kalou—me dua ka bula me tawamudu ka a bula e liu ni bera ni lako mai ki ke, ka na bula tiko ga ni sa vuki oti na yagona me kuvu ni soso, na tikina ka a vu mai kina, na vanua talega ka na vakaturi cake mai kina ka vakaivotavota e na marau ka goleva kina, se me ciqoma na isau ni nona ivalavala tawakilikili, e vakatau e na veika sa yaco oti. …

… A cava na [tamata]? E a bula e na veivuravura tawamudu; a bula tu ni se bera ni mai bula eke. E sega walega ni luve ni tamata, e luve talega ni Kalou. E rawa ni yaco me Kalou, e taukena e lomana e dua na lidi ni yameyame ni buka tawamudu ka a basika mai na yameyame ni buka tawamudu ni Kalou mai na vuravura tawamudu, ka sa mai biu e vuravura me rawata na vuku dina sara, na rarama dina, na kilaka dina,—me rawa ni kilai koya vakataki koya—me rawa ni kila na Kalou—me rawa ni kila e dua na ka me baleti koya ni bera ni lako mai ki ke—me rawa ni kila na veika e dodonu me la’ki marautaka i na vuravura tawamudu.⁴

Me da taura mada na tamata, e tukuni ni a buli me ucuya na Kalou, e baleta ga ni luve ni Kalou, e dina sara ni vu dina mai vua na Kalou, e na vatukana me vaka e tukuni vei keda, eda sa buli me vakakina, e sega ni vu o koya mai na dua na ibinibini ka mate, veitosoyaki se sega, ia a basika mai me na taukena na bula me vaka na sore ni bula, na kena ituvaki kei na kaukauwa taucoko sara ni Kalou. Ia ni sa vakataucokotaki, ka tubu me matua, e na yaco me vaka na Tamana—me dua na Kalou, ka ni dua dina na luvena. Me vaka na ose, na bulumakau, na sipi, kei na veika bula yadua, wili kina na tamata era na vakasucuma ga na nodra kawa era mataqali vata ka ra na tomana tikoga na nodra kawa, sa vakakina na Kalou ni na tomana tikoga na nona.⁵

E tucake vakadodonu e vuravura na tamata ni vatukani koya na nona dauveibuli cecere; e maqosa na kena ibulibuli e na veitikina yadua, na yagona ka tu kina na veitikina yadua me qarava na nodra dui itavi me baleta na nona bula, ni tu sega walega e na dodonu baleta talega ni rawata vakakina, na kena totoka, na lagilagi kei na dodonu, e ulu ni veika buli kecega; e taukena talega na kaukauwa ni vakasama kei na rawaka me liaca na veika sa yaco oti; kei na yalomatua me wasewasea se cava e vakavuna e dua na ka e yaco, kei na nona vakayagataki na vakasama me vakadidike mai na veivakauqeti ni Kalou Cecere, me kila na lawa talei ni veika bula me vaka e vakaraitaki e na veibuli; ka rawa talega ni vakayagataka na veika e so kei na kaukauwa ni veika bula, kei na kedra vakamatautaki mera yaga vua; e na nona kaukauwa me vakasaqaqara yani kina ki na wasa titobu, ka cabe cake ki lomalagi, ka vakusakusa yani vakatotolo sara ni takosovi vuravura, e na nona vakayagataka na kaukauwa cokovata se yadua ni veika buli ka ra vakavolivoliti koya ka vakayagataki ira mera yaga vua; me vakakina e na nona vuku, e lewa kina na ika ni waitui, na manumanu vuka ni maliwa lala, kei na manumanu yavaiva.⁶

Me da guti Jisu Karisito me da rawata kina na noda ilesilesi vakalou

E duri na tamata e na ulu ni veika buli kecega ka matataka na Kalou e vuravura taucoko. Ni tawana tu na itutu vakacerecerei oqo, ka ucuya na Kalou, ia e tu ga vua, me vaka ni tamata, na kaukauwa ga e nona na tamata; e tu na nona cala, na malumalumu, na tauvimate kei na mate. Ia ni sa mate, kevaka e sega ni vukei me baleta na gauna e bera mai, e sa na davo galugalu no e na leqa na yago oqori, na nona gacagaca ka a dau bulabula ka yavavala e liu, e sa galu, tu vakadua ka sega na kena kaukauwa. Ka vakaevei na vakasama ka a dau vakananuma na tawamudu e liu kei na tawamudu ka se bera mai? Ka vakaevei na kena kaukauwa? Se vakaevei na yalo oya, mai na kena kaukauwa vakalou, na nona kila taumada kei na kaukauwa, e rawa kina me kubeta na tawayalani? E vakaevei oqori, ke tiko evei?. …

Kevaka… e dua na yalo e tiko vua na tamata e na yacova yani na gauna e bera mai ka na kubeta na tubu tawamudu, na marau tawamudu, kei na vakacerecerei tawamudu, ia na lagilagi oqori, na veivakacerecerei oqori, na kila ka oqori kei na veikaukauwa oqori e dodonu me ra isolisoli ni dua na ka bula se dua na dodonu ka levu cake mai na kena e tu vua na tamata. … Oqori na isolisoli eda na veivosaki kina edaidai. Oqo e baleta e dua na ivakavuvuli ka vu mai vua na Kalou, ka vua ni dua na vuku cecere, na nona inaki, kei na kaukauwa, kei na kila ka era cecere cake sara mai na kena vakatamata, me vaka ga ni cecere cake na lomalagi mai vuravura, se na vakaturaga ni nona cakacaka na Dauveibuli Cecere mai na rabailevu ka tawayalani ni maliwalala, e cecere cake sara mai na igu malumalumu ni luve ni tamata.

Na veivakameautaki kei na veisorovaki i Karisito e rawa kina vei keda na tamata, o keda eda a buli me da ucuya na Kalou, meda vakacerecerei ki na vuku levu kei na itutu Vakalou; kei na tamata vakaturaga, buli e na ibulibuli ni Kalou, e yaco rawa, sega walega vua na luve ni tamata ia me luve talega ni Kalou ka rawa me vaka na Kalou, ka taukena na kaukauwa, vakaturaga; vakacecerei kei na itutu ni Kalou. Me vaka e volai, “Oi kemudou sa lomani, eda sa qai luve ni Kalou, ia sa sega ni rairai se da na vakaevei maimuri: oqo ga eda sa kila, ni na rairai mai ko koya, eda na tautauvata kaya; ni da na raica na matana dina.” [1 Joni 3:2.]

E na rawata na tamata mai na kaukauwa ni yagona na rokovi kei na taucoko vakatamata, ia e na sega ni rawa ni toso tale; e sucu me tamata, e bula me vaka na tamata, ka mate me vaka na tamata; ia mai na ibalebale dina sara kei na kaukauwa Vakalou, ka tu vua na tamata, ka a soli mai vua me vaka na isolisoli ni Kalou mai vua na Tamana vakalomalagi, sa na rawa kina vua me tubucake mai na bula yalani vakatamata ki na bula rokovi va-Kalou, ka vakakina mai na veisorovaki i Jisu Karisito.….e rawa kina vua na vakacerecerei tawamudu, na bula tawamudu, kei na tubucake tawamudu. Ia na veisau oqo mai na nona bula vakatamata ki na Vakalou e na rawa duadua ga mai na dua na kaukauwa ka levu cake mai na tamata—e dua na kaukauwa tawa yalani, e dua na kaukauwa tawamudu, io na kaukauwa Vakalou: ni na qai mate kecega e na vukui Atama, e na vakabulai kece talega e na vuku i Karisito [raica 1 Koronica 15:22].

Mai [vei Karisito] na kawatamata era veikilai ka veitaratara kei na Kalou; mai na veisorovaki e sa rawa kina vua, me vakataki Koya, me ra vakadruka na mate; mai na veisorovaki kei na kaukauwa ni Matabete ka salavata kaya, era sa na taukena na kaukauwa ni Kalou ka ra na itaukei vata kei Jisu Karisito, ka ra na rawata na itikotiko vakaturaga, na matanitu yalataki, na kaukauwa kei na lewa ni veika kecega e na veivuravura tawamudu. Era sega ni rawa ni ra mate, ni sa vakarusai na iotioti ni meca o ya, ka sa tilomi ko mate mai na qaqa, sa na rawa ni ra yaco me ra tama ka tina ni bula mai na veisorovaki ko ya, ka na rawa kina na tubu tawamudu.⁷

E vukei keda Na Lotu i Jisu Karisito me da kila na noda ilesilesi vakalou.

E tabaki ira na peresitedi, iapositolo, parofita, bete levu, vitusagavulu, bisopi, kei na vakaitutu tale e so e na kemuni maliwa na Kalou; era sa nona veilesi, ka ra sa vakaukauwataki ka dusimaki mai vua, e na nona veivakauqeti, era na vakavulica na nona lawa, vakamacalataka na ivakavuvuli ni bula, ka ra sa tauyavutaki ka tabaki me ra dusimaki ira na tamata e na sala ni bula vakacerecerei kei na lagilagi tawamudu.⁸

Eda a tu voli e na butobuto me vakataki ira ga na vo ni tamata me baleta na ivakavuvuli ni veivakabulai, kei na noda veiwekani kei na Kalou ka vakakina o keda vakataki keda, me yacova na gauna a qai vakatakilai kina vei keda na veika oqo mai vei Josefa Simici.⁹

Eda sa ibulibuli ni Kalou, ka sa raica na Kalou e na iotioti ni itabagauna oqo ni ganita me digitaki keda me da veitaratara vata kei koya. E sa biuti keda o Koya e na dua na itutu me rawa kina ni da vakataucokotaka na inaki eda a buli kina, mai na nona vakatakilai koya ka vakakina na Luvena o Jisu Karisito, mai na nodra veiqaravi na agilosi kei na vakalesui mai ni matabete tabu ka vu mai vua na Kalou, ka qaravi talega kina o koya.¹⁰

Eda na vinakata me da kila ka marautaka na noda itutu e mata ni Kalou kei na veivakalougatataki kei na galala eda rawa ni rawata. Eda se qai tekivu ga, me vaka e na cakacaka cecere. … Eda sega ni dau kila tu na veika oqo, o koya eda sa dau sotava kina na veika dredre, baleta ni da sega ni raica, eda sega ni kila na itutu kei na keda isema vua na Kalou.

E Tamada na Kalou; eda luvena o keda. E sa vakacurumi keda ki na nona veiyalayalati, ka sa noda galala me da na toso mai na yalomatua ki na yalomatua, mai na vuku ki na vuku, mai na noda kila e dua na ivakavuvuli ki na dua tale, meda na toso yani ki liu ka tubucake e na noda vakatorocaketaka na dina me yacova ni da sa rawa ni kila na Kalou. Ni da sa luvena, ni da sa luvena tagane ka luvena yalewa, ka tamada o koya. E sa tauyavutaka na Lotu oqo me rawa kina ni da vakavulici e na ivakavuvuli ni bula, me da rawa kina ni kila na ivakavuvuli ni Kalou, me rawa kina ni da vakavulica vei ira na luveda na ivakavuvuli dodonu, me rawa kina ni da yaco me vaka na Tamada vakalomalagi.¹¹

E dodonu me da “saga vagumatua” me da rawata na noda ilesilesi vakalou

E sa vakatakila vei keda na Turaga e vuqa sara na veivakalougatataki, e so na gauna au nanuma ni da dau sega ni marautaka na rarama ni dina ka sa vakatorocaketaki, na lagilagi ka semati vata kei na kosipeli ka sa vakalesui mai, na rarama ni vakatakila ka sa vakatakilai mai, na itutu eda vakatawa ka da veiwekani kina kei na Kalou, na agilosi, o ira na noda kawa kei ira na tukada; na inuinui ka sa teivaka na kosipeli e lomaseredra na Yalododonu Edaidai yalodina yadua ka seraka e na bula tawavuca kei na bula tawamudu. ….

E na so na gauna eda dau guilecava na noda masu, itavi, noda cakacaka kei na veiyalayalati, ka da dau soli keda ki na veika ka na vakabutobutotaka na noda vakasama, vakabuwawataka na vakasama, vakamalumalumutaka na vakabauta ka vakuwai keda mai na Yalo ni Kalou. Eda sa guilecava na qara eda a keli mai kina kei na vatu eda a ta mai kina, ka na yaga talega me da vakasamataka na itutu eda tu kina, kei na keda isema vua na Kalou, vei keda vakataki keda ka vakakina ki na noda matavuvale, me rawa ni vakalesui tale kina noda vakasama ki vua na Kalou ka a buli keda—na Tamada mai lomalagi, o Koya ka dau rogoca na noda masu, ka sa dau vakarau tale tu ga e veigauna me solia na veika era gadreva na nona yalododonu yalodina. Ka so na gauna e dau yaga talega meda dau nanuma lesu na itutu eda taura tu me vakatauvatani ki na vuravura eda bula tiko kina, ki na bula eda a bula tiko kina ni bera na noda lako mai ki ke kei na tawamudu e na qai muri mai.

E sega ni dodonu me da berabera se guce ka vakawelewele ka vucesa; ia me vaka era a vakauqeti kina na Yalododonu ni gauna e liu, me da vakauqeti kemuni edaidai—mo dou gumatua sara me maroroi na vakabauta sa soli eliu vei ira [na Yalododonu] [raica Juta 1:3]. …

… O keda, me vaka ni da tamata tawamudu, ni da veimaliwai vata kei na Kalou tawamudu, ka tiko e dua na noda lotu ka vagolei keda vua na Kalou o koya, eda gadreva, me vakataki ira e na gauna makawa, me da kila e dua na ka me baleti koya, me da veivosaki vata kei koya, me da rawata na inaki eda a buli kina kei na vanua eda na cava kina e vuravura, ka me da vukea na Turaga me vakayacori na veika a sa nakita tu mai na ivakatekivu kei vuravura me baleta na kawatamata…. E sega ni se bau veisautaka vakadua na nona inaki na Turaga, se me veisautaka na nona ituvatuva se me bokoca na nona lawa … e dua na iwavoki taucoko na nona cakacaka tawamudu. E dua tu ga na nona inaki, ka na vakataucokotaki na inaki oqori e na vukuna na tamata kei na vuravura e bula tiko kina

Na taro ga vei keda o ya se da na cakacaka vata kei na Kalou, se eda na cakacakataka ga vakataki keda na noda vakabulai se sega; se eda na vakataucokotaka yadua na veiitavi e na vakacolati vei keda se sega; se eda na qarava na veicakacaka vakalotu sa solia mai vei keda na Kalou se sega; vei keda me da tekivu kina, vei ira na noda vuvale, vei ira na bula kei ira na mate. Eda na veivuke e na tara valetabu ka veiqaravi kina; se eda na duavata kei Koya sa Cerecere Sara, e na veidusimaki ni nona matabete tabu, e na kena vakayacori na veika era sa tukuna na parofita tabu e na ivakatekivu ni vuravura; se eda na gumatua me da maroroya na vakabauta sa soli eliu vei ira sa lotu. Na veika oqo era noda itavi e na so na tikina….

… E nona gagadre me da gumatua me da maroroya na vakabauta sa soli eliu vei ira [na Yalododonu], o ya me vaka ni ra tamata tawa mate rawa me ra cakacaka vata kei Koya sa Cecere Sara, me rawa ni ra vakauqeti mai na ivakavuvuli ni ivakatakila; o ya ni dodonu me ra kila e dua na ka me baleta na nodra rokovi kei na nodra itutu vakatamata; kei na kedra isema ki na tawamudu, ki na vuravura eda bula tiko kina e na kena itutu oqo kei na kena ituvaki e na gauna mai muri, ka vakakina ki na veivuravura era na qai muri mai….

Na yalo ni tamata, ni taukena e dua na yago, mai na veivuke ni kosipeli tawamudu, e na vakacerecerei; ia na tamata oqori, kevaka e na yalodina tikoga, e na yaco me duavata kei ira na Kalou e na veivuravura tawamudu; ia ni da sa teitei kakaburaki ka tatamusuki, ka qarava na veicakacaka e so eda dau qarava e veisiga; me vaka era dau cakava na tamata kecega, sa noda inaki levu na bula tawamudu kei na vakacerecerei; sa noda inaki levu me da vakarautaki keda, o ira na noda kawa kei ira na tubuda ki na itikotiko vakaturaga, na matanitu yalataki kei na kaukauwa e na veivuravura tawamudu.

Oqo na veika eda vakasaqara, kei na veika era a dau vakasaqara na Yalododonu e na gauna makawa. Oqo na veika era a dau vakasaqara o Atama, Noa, Inoke, Eparama kei ira na parofita, me rawa kina ni ra qarava vinaka na nodra itavi e vuravura, me vaka e a kaya e dua na parofita makawa, “ka tu e na nomui votavota ni sa yaco na kena iotioti ni veibogi,”[raica Taniela 12:13] e na gauna e dodonu me dola kina na ivola, kei na gauna e dodonu me basika mai kina na itikotiko vakaturaga e levu ka vulavula, kei koya talega sa tiko kina, a sa dro tani mai vua ko vuravura kei lomalagi; me rawa kina vei keda vata kei ira, kei ira vata kei keda me da vakarau, ni da sa rawata vinaka na inaki ni noda buli mai ki vuravura, me da duavata kei ira na vuku ka ra tu e na veivuravura tawamudu; me da vakacurumi tale ki na nona iserau na Tamada, na vanua eda lako mai kina, ka la’ki vakaitavi ki na veivakavuvuli tawamudu ka na sega ni kila rawa na tamata ke sega na ivakatakila. Eda tiko eke me baleta na inaki oqori … eda tara valetabu tiko me baleta na inaki oqori; eda ciqo edaumeni tiko me baleta na inaki oqori; eda caka veiyalayalati tiko me baleta na inaki oqori; eda veiqaravi tiko e na vukudra na mate kei ira na bula e na inaki oqori, kei na noda inaki kece kei na noda sasaga, me vaka na nodra inaki kei na sasaga na tamata vakauqeti e na veigauna e liu, me baleta na veivakavuvuli tawamudu kei na dina ka vakakina na veivakavuvuli kei na dina ni gauna oqo. …

Oqori na veika eda vakasaqara, ka me da vakacavara, ka sega ni dua na tamata e na tarova rawa, e sega ni dua na isoqosoqo, sega ni dua na kaukauwa, sega ni dua na dodonu, ni veiliutaki na Kalou, na nona matanitu e na toso tikoga, toso tikoga, ka toso tikoga, e na tomani tikoga, ka tubu ka levu cake me yacova ni sa yaco na veimatanitu ni vuravura oqo me matanitu ni Kalou kei na nona Karisito.¹²

Vakatutu ni Vuli kei na Veivosaki

E vukei iko vakacava na nomu kila ni o luve ni Kalou? E na vukea vakacava na kila oqo na nomu nanuma me baleta na nomu ilesilesi? E na la’ki vukea vakacava na nomu masu na kila oqo?
E na la’ki tara vakacava na nomu veimaliwai kei ira na tani na nomu kila ni da luve ni Kalou na tamata kecega? Me na vakaevei beka na kena la’ki tara na keda isema vakamatavuvale na kila oqo?
Na cava na yaga ni noda mai bula vakayago? (Raica talega 2 Nifai 2:11–13, 24–27; Mosese 5:9–11.) Na cava na itavi nei Karisito e na sasaga meda rawata na noda ilesilesi vakalou?
E vukei kemuni vakacava na ivunau ni Lotu e na nomu sasaga moni kila na vanua o ni tekivu mai kina kei na vanua o ni na cava kina? E vukei keda vakacava na Lotu me da rawata na noda icavacava tawamudu?
Na cava na ibalebale vei kemuni moni “gumatua sara” moni rawata na nomu ilesilesi vakalou? Na ivakaraitaki cava o ni sa raica vei ira na tamata era dau vakayacora tiko oqo? E rawa vakacava ni da “cakacaka vata kei na Kalou.” me da rawata na inaki oqo?
E vakavulica o Peresitedi Taylor ni, “noda inaki levu na bula tawamudu kei na veivakacerecerei; e noda inaki levu me da vakarautaki keda, o ira na noda kawa kei ira na tukada ki na itikotiko vakaturaga, na matanitu yalataki kei na kaukauwa e na veivuravura tawamudu.” E rawa vakacava me da nuidei tiko ga ki na inaki oqo e na gauna nikua?

Tiki ni iVolanikalou ka Veisemati: Vakatekivu 1:26; Same 82:6–7; Roma 8:16–17; V&V 76:22–24, 50–70