Wase 5

Na Veisorovaki Tawayalani i Jisu Karisito

Na tamata, e na inaki ni veika kecega e rawa vua me cakava, e na rawa walega ni vakacerecerei koya ki na veirokovi kei na rawaka vakatamata o koya e gadreva kina na veisorovaki ni dua e Kalou, me na qai rawa ki na tamata … me vakacerecerei.¹

Na Bula nei John Taylor

E na dua na lotu ni Sigatabu kei ira na lewe ni Lotu, e a vosa kina o John Taylor e na vuku ni marau e kunea e na nona dau vakananuma na Veisorovaki i Jisu Karisito: “Au dau marautaka na soqo vata kei kemuni na Yalododonu. Au taleitaka me’u dovi madrai vata kei ira me ivakananumi ni yago ni noda Turaga ka iVakabula o Jisu Karisito ka a dovi ka vakakina me’u vakayagataka na bilo me ivakananumi ni nona dra ka a liviraki. Ka me’u vakananuma talega kina na veika e umani vata koto kina. Na noda veiwekani vua na Kalou mai vua na noda Turaga o Jisu Karisito, kei na noda inuinui me baleta na veigauna sa bera mai; na ikarua ni nona basika mai na noda Turaga o Jisu Karisito, e na gauna, e sa soli kina vei keda me da kila, e na vakaisulutaki koya ka waraki keda, ka da na qai kana madrai ka gunu waini vata kei koya e na matanitu i Tamana. Au dau taleitaka me’u vakananuma na veika oqo kei na udolu tale na ka veisemati vata kei na veivakabulai, na nodra marau kei na nodra vakacerecerei na Yalododonu ni Kalou e na vuravura oqo, kei na vuravura sa bera mai.²

iVakavuvuli nei John Taylor

E a veiyalayalati o Jisu me na qarava vakavinaka na yavu nei Tamana e na nona sorovaka na ivalavala ca ni vuravura.

E na bose o ya mai lomalagi a tuvani kina na yavu me na vakayagataki me baleti ira na luve ni Kalou era a se yalo tu ena gauna o ya, ka se bera ni taukena e dua na yago. Ni a laurai na buli kei vuravura kei na kena vakatamatataki, se na rawa vei ira me ra vakayago, ka me ra muria na lawa ni bula e na yago oqori, ka me ra vakacerecerei kina e na kedra maliwa na Kalou, e a tukuni vei keda, e na gauna koya “ni ra a serevata na kalokalo ivolasiga, ka ra kaila e na reki ko ira kecega na luve ni Kalou.” [Jope 38:7.] A qai basika kina na taro, e na caka vakacava, e na ivakavuvuli cava, me na rawa kina na nodra vakabulai, nodra vakacerecerei kei na nodra lagilagi tawamudu na luve ni Kalou?

E vakadiandinataki ni a vakaturi ka veivosakitaki e na matabose oqori e so na yavu, ia ni sa veivosakitaki vakavinaka sara na veivakavuvuli oqori, kei na nona sa vakaraitaka na Tamada na lomana me baleta na Nona yavu, a qai lako yani o Lusefa vei Tamada kei na nona yavu vakaikoya, ka kaya, “Raica koi au oqo, mo ni talai au; ia au na vakabulai ira kece mai na tamata me sega ni dua e yali; raica au na kitaka vakaidina na ka oqo ni’u sa luvemuni; ia me vakarokorokotaki kina na yacaqu” [Mosese 4:1.] Ia ko Jisu e na nona rogoca na vosa nei Lusefa, e qai kaya, “I Tamaqu me nomuni tikoga na vakarokoroko ka sega ni mudu.”[Mosese 4:2.]

Mai na veimalanivosa oqo mai vua na Luvena lomani, e dodonu me da taura rawa mai kina ni a veivosakitaki na ulutaga oqo a sa vakatakila kina na Tamana na lomana ka tuvana kina na Nona yavu e baleta na veika oqo, ia na veika ga a vinakata na Luvena daulomani me vakayacora na lomai Tamana, ka a sa vakaraitaki oti. E a nona gagadre talega me soli ga vei Tamana na kena lagilagi, o koya me vaka ni Kalou na Tamana, ka a vakatekivuna ka cakava talega na yavu, e tu vua na dodonu me nona kece na kena lagilagi.

Ia o Lusefa e a vinakata me veisaqasaqa kei na lomai Tamana, ka segata me vakuwa na tamata mai na nona vakayagataka na nona galala ni digidigi, ka me a vakabobulataka kina na tamata, ka biuti koya kina e na dua na itutu ka na sega kina ni rawa vua me rawata na bula vakacerecerei ka a lewa na Kalou me nona na tamata, mai na nona talairawarawa ki na lawa a vakatura ko Koya. … Kevaka me a sega ni tu vua na tamata na galala, se kevaka me a sa kautani mai vua, ke a sega ni rawa me temaki mai vua na tevoro, se mai na dua tale na kaukauwa; ni kevaka me a yaco ga na loma ni Kalou, ka me vakayacori ga ka sega kina na nona itavi na tamata se na nona galala, ke na sega ni rawa vua me cakava e dua na ka cala, ni sa na kautani mai vua na kaukauwa me cakava kina e dua na cala. Oqo na itutu e a guta o Setani me a kauta mai, e sega walega vei ira na yalo mai lomalagi, ia vei ira talega na kawatamata e vuravura. Ni sa kaya o Setani, “ia au na vakabulai ira kece mai na tamata… ia me vakarokorokotaki ki-na na yacaqu.”³

E a sega ni vakadonui na yavu nei Setani … ni a veisaqasaqa kei na ivakasala ni Kalou, na Tamana. A qai vosa vei Tamana na Luvena Daulomani, e na nona sega ni vinakata me cakava e dua na nona ituvatuva vakataki koya, ni sa kila tu na Lomai Tamana, e kaya kina “I Tamaqu me yaco ga na lomamuni ka me nomuni tikoga na vakarokoroko ka sega ni mudu;” [raica Mosese 4:2] ka rau sa qai veiyalayalati kina o Koya vata kei na Tamana, ka vakadonuya kina me na sorovaka na ivalavala ca ni vuravura, ka sa yaco kina o Koya, me vaka e sa tukuni, “na Lami sa lewai me mate mai na ivakatekivu kei vuravura” [raica na Mosese 7:47].⁴

Eda guta na veisorovaki me da walia kina na mawe ni Lutu

Ia ni sa tu vua na tamata na galala me vakayacora kina na lomana ka rawa kina me temaki, na malumalumu ni yago, na veitemaki ni vuravura, kei na kaukauwa ni butobuto, a sa kilai ni sa dodonu me lutu, ia ni sa lutu, sa na sega ni rawa vua vakaikoya me sereki koya, ia oqori, me vaka e dua na lawa ni dodonu tawamudu, sa na gadrevi kina e dua na veisorovaki bibi me walia kina na ivalavala ca me sereki kina na tamata, me vakabulai kina mai na veiqaqauraki kei na veivakarusai ni Lutu, ka a biuti koya kina e na dua na vanua me rawa kina ni vakasukai lesu tale ki na yasa ni veitovaki ni Kalou, me vaka na lawa tawamudu ni dodonu kei na loloma cecere; ka me kunea kina na nona sala lesu ki na iserau ni Tamana. …

Ia a sa vakakina, me vaka e a kaya o Jisu vakai Koya, “A sa kaya vei ira sa volai vakaoqo, ni sa kilikili kei koya na Karisito me vosota vakakina, me tucake talega mai na mate e na ikatolu ni siga, ia me vunautaki talega na veivutuni, kei na vakabokoci ni ivalavala ca, e na vuku ni yacana, vei ira na lewe ni veivanua kecega, me vakatekivu e Jerusalemi.” [Luke 24: 46–47.]⁵

E na vakatulewa matau ni Kalou kei na yavu ka a vakatura o Koya sa Cecere Sara, e a sa lewai kina ni na biu na tamata e na ruku ni dua na lawa ka vaka me rawarawa sara, ia na vakatovolei ni lawa oqori e salavata kei na kena isau bibi. Ni muri na lawa oqori e na rawa kina na bula tawamudu, ka na itotogi ni kena voroki na lawa oqori na mate. … Kevaka me a sega ni voroki na lawa oqori [e na Lutu], e rawa me a bula na tamata; ia kevaka me a bula na tamata me vakaoya e na rawa beka me a rawata me a vakaluveni, ka rawata na inaki ni Kalou e na kena vakarautaki na vale yalo me baleti ira na yalo era sa buli oti tu mai na vuravura ni yalo? Ka me kena ikuri, era na gadreva beka me dua me daunilewa e na vukudra, o koya me isoro ni veivakaduavatataki ni kena a voroki na lawa, na kena ka rawa ni laurai mai na veika sa yaco ni a nakiti me a voroki; se rawa beka me a tomani tikoga na nona tubu tawamudu se na itutu tawamudu ni tamata, ka rawa vakavinaka na nona bula vakacerecerei ki na Letolu Vakalou, ke sega na isoro ni veivakaduavatataki kei na veisorovaki ni Luve ni Kalou?⁶

Kevaka me a sega na veisorovaki nei Jisu Karisito, na sorovaki ka a vakayacora, ke a sega ni dua na inuinui ki na tucake tale mai na mate ki na kawatamata me yacova na tawamudu. Ia na Kalou ni a vakarautaka mai na veisorovaki i Jisu Karisito, na sala ka na rawa kina me da vakalesui tale ki na iserau ni Tamada, me da vakaitavi vata kei Koya e na kedra maliwa na Kalou e na veivuravura tawamudu–ni sa vakarautaka o Koya na veika oqori, sa vakarautaka talega na tucake tale mai na mate. E sa tukuni koya ni o Koya na tucake tale mai na mate kei na bula. E kaya kina, “Oi au na vu ni tucake tale, kei na vu ni bula: ko koya sa vakabauti au, kevaka sa mate e na bula ga.” [Joni 11:25.] E na sega ni dede sa na tadola na ibulubulu ka ra na rogoca na mate na domona na Luve ni Kalou, era na lako mai, ko ira sa ivalavala vinaka era na tucake tale me ra bula, ia ko ira sa ivalavala ca era na tucake tale mera cudruvi.⁷

Me rawata na veisorovaki, e a bolea o Jisu Karisito na noda ivalavala ca ka sotava na mate vakayago

E tukuni vei keda ni “kevaka sa sega ni vakadavei na dra sa se-ga ni bokoci na ivalavala ca.”[Iperiu 9:22]. Oqo e na sega ni ya-cova rawa na noda vakasama. E kauta laivi na ivalavala ca o Jisu e na nona sorovaki Koya, na tawacala e na vukudra na cala. … Ni a colata o Koya vakataki Koya na ivalavala ca ni tamata kece-ga, ka vakaduavatataki ira e na nona sorovaki Koya, sa colata ki-na na icolacola ni veitabayabaki kei na veitabatamata kecega, na yaluma tawa tukuni rawa ka tau vua e na vuku ni veisorovaki ce-cere ka colata kina na ivalavala ca ni vuravura, ka sotava kina va-kataki koya na isau ni nodra voroka na tamata e dua na lawa tawamudu ni Kalou. Ia na nona rarawa bibi, na yaluma levu, na vakararawa ni veivakararawataki, ka a sotava kece e na nona so-li koya u2026 ki na saumi ni lawa tawa voroki rawa.

Na rarawa ni Luve ni Kalou e sega walega ni rarawa ni nona ma-te vakaikoya; ni taura na itutu ka mai taura e na nona sorovaka na ivalavala ca ni vuravura e a sa colata kina na bibi taucoko ni itavi, kei na icolacola ni ivalavala ca ni tamata kecega, oqo eda na sega ni vakasamataka rawa. Me vaka a tukuni, “a mai mate sara na Turaga na nomudou iVakabula; io sa mai colata na nodra rarawa na tamata kecega;” [raica V&V 18:11] ka a kaya ko Aisea: “E dina sa colata ko Koya na noda rarawa, ka sa colata na rarawa ni lo-mada,” ka vakatalega kina, “ia ko Jiova sa vakatauca vei koya na noda caka cala kecega,” duatale, ka ni sa solia oti na nona bula ki na mate: ka sa wili vata kei ira na dautalaidredre; ka sa colata ko koya na nodra ivalavalaca na lewevuqa;”[raica Isaia 53:4, 6, 12] se, me vaka e volai e na iKarua ni iVola i Nifai: “A sa colata ko ko-ya na rarawa ni tamata kecega, io na rarawa ni veika bula kecega, na tagane kei na yalewa kei na gone; ko ira na kawa i Atama;” [2 Nifai 9:21] e na Mosaia e tukuni kina: “Ia sa uasiviti ira na ta-mata ko koya e na nona vosota na veivakatovolei, e na rarawa ni yago, na viakana, na viagunu kei na oca me yaco sara ki na mate, o koya sa sega ni vosota rawa na tamata; ia sa rarawa vakalevu e na vuku ni nodra ivalavala ca kei na nodra itovo vakasisila na no-na tamata, ka sa bunotaka kina na dra,” [Raica Mosaia 3:7.] …

Ni Kalou, e a lako sobu mai ki ra sara, ka soli koya me baleti ira na tamata e na nodra itutu ni lutu; ni a tamata, e a colata na veika e semativata kei na Nona a vakararawataki e vuravura. E a lumuti e na waiwai ni reki me uasivi cake kina vei ira na nona itokani, e a boleya ka rawata ka vakadruka na kaukauwa ni tamata kei na tevoro, na vuravura kei eli ni rau a cokovata, ka a tokoni mai na kaukauwa cecere oqo ni Letolu Vakalou, e a vakadruka na mate, eli kei na ibulubulu ka tucake mai e na qaqa me vaka ni Luve ni Kalou, na Tamana tawamudu, na Mesaia, na Ravouvou ni sautu, na Dauveisereki, na iVakabula kei vuravura; ni sa vakacavara na cakacaka me baleta na veisorovaki, ka a solia Vua na Tamana me cakava me vaka ni Luve ni Kalou ka Luve i tamata. Me vaka ni Luve ni Tamata, e a vosota na veika kecega e rawata na lewe kei na dra me vosota; me vaka ni Luve ni Kalou a vakadruka na ka kecega, ka cabe cake kina me tawamudu ki na liga imatau ni Kalou.⁸

A sa yaco kina na iVakabula me lewa na ituvatuva kece sara— e a saumi na dinau, a yaco na veisereki, a vakataucokotaki na veiyalayalati, a vakayacori na lewa dodonu, a yaco na loma ni Kalou, ka a soli e na gauna oqo na kaukauwa kece ki na liga ni Luve ni Kalou—na kaukauwa ni tucake tale mai na mate, na kaukauwa ni veisereki, na kaukauwa ni veivakabulai, na kaukauwa me vakayagataki kina na lawa me qaravi ka vakacavari na nona inaki. A sa vakacilavi na rarama ni bula kei na tawamate rawa, a vakatakilai na kosipeli, ka sa yaco kina o Koya me ivakatekivu ni bula tawamudu kei na bula vakacerecerei. O Koya na Dauveisereki, na Vu ni Tucaketale, na iVakabula ni tamata kei vuravura. …

Na yavu, na ituvatuva, na veidinadinati, a tauyavutaki na veiyalayalati, vakadeitaki ka vakadonui, ni a se bera na yavutaki o vuravura; e a vakatakarakarataki e na vakacabo isoro manumanu, ka a qai vakavatukanataki e na kauveilatai.

Ia ni a sa daunivakasala vua na Kalou mai vei ira na tamata, a sa yaco o Koya e na dodonu me taukei ni lewa ka dauveidusimaki e vuravura ka vakakina mai lomalagi vei ira na bula ka vakakina vei ira na mate, me baleta na gauna sa oti, edaidai, kei na gauna sa bera mai, me baleta na tamata ni tiki kei vuravura oqo se lomalagi, e na veigauna se tawamudu, na Kavetani ni noda vaka bulai, na iApositolo ka Bete Levu ni noda ilesilesi, na Turaga ka iTaukei ni bula.

E sa beci beka na lewa dodonu? E sega; e sa wali, e sa saumi na dinau. E sa yali li na buladodonu? E sega; oqo na ivalavala dodonu. Na veika kece me caka sa vakayacori. E sa voroki beka na vakatulewa dodonu? E sega; sa vakataucokotaki na veika kece e gadrevi kina. E qaqa beka na loloma cecere? E sega; e taura ga o koya na ka e nona. Na lewa dodonu, na vakatulewa, na loloma cecere kei na dina era duavata ni ra itovo ni Kalou.“Sa veitavaki na loloma kei na dina; sa veireguci na yalododonu kei na veivinakati.”[ Raica Same 85:10.] Erau qaqa na lewa dodonu kei na vakatulewa me vakakina na loloma cecere kei na sautu; era duavata kece na itovo va-Kalou e na ivalavala cecere, totoka, e na kena gauna, dodonu, dina, ka itavi veiganiti dina.⁹

E rawata duadua ga o Jisu Karisito me vakayacora na Veisorovaki

E rawa me na tarogi, Na cava na duidui e tu e na kedrau maliwa na Luve ni Kalou, me vaka ni Luve ni Kalou, na Dauveisereki, kei ira era vakabauti Koya ka vakaivotavota e na veivakalougatataki ni Kosipeli?

E dua na ka, me vaka eda wilika, ni a solia Vua na Tamana na kaukauwa me bula vakataki Koya: “Me vaka sa bula vakai koya ga ko Tamana; sa solia talega vua na Luvena me bula vakai koya ga;” [Joni 5:26] ka kuria, sa tu vua na kaukauwa me vakalesuya tale vua na tamata na nona bula ni sa vakayalia; ni sa i Koya na Vu ni Tucaketale kei na Vuni Bula, na kaukauwa oqori e sega ni dua tale na tamata e taukena.

E dua tale na duidui bibi oya, ni tu Vua na bula Vakaikoya, e sa tu kina Vua na kaukauwa, me vaka e a kaya, ni na solia na Nona bula ka taura lesu, na kaukauwa oqo ka a soli talega Vua mai vei Tamana. Oqo talega e dua na kaukauwa ka sega tale ni dua na kabula e vuravura e taukena.

E duatale, o Koya na rarama ni lagilagi nei Tamana ka veiucui dina Vua. Na kena ikuri, E kitaka na veika e raica ni cakava na Tamana, o keda eda na cakava ga na ka e vakatarai ka solia o Koya na kena kaukauwa vei keda.

O Koya na Digitaki, na iDusi, ka dua vei ira na Mataveiliutaki mai lomalagi, ka sa tu Vua na taucoko kece sara vakayago ni Letolu Vakalou, sega ni rawa ni tukuni e dua vei ira na ka oqo me baleti keda.

E dua tale na ka o ya, ni sa soli Vua na kaukauwa kecega mai lomalagi kei vuravura, ka na sega ni rawa ni kaya vakaoqo e dua na tamata e vuravura.

E tukuni talega ni a bula e liu o Lusefa mai vei Atama, e vakakina o Jisu. Ia ko Atama ka vakakina vei ira kece na vakabauta, era sa vakaroti me ra cakava na ka era cakava e na yaca ni Luvena, ka me ra kaciva na Kalou e na Yaca ni Luvena e na veigauna kecega, na vakarokoroko oqo e sega ni vakayagataki ki na dua na tamata e vuravura.

Mai na veivolekati ni Nodrau veisemati kei na Tamana e vaka me taukena kina o Koya e dua na itutu ka sega tale ni dua na tamata e na siova rawa. E dau cavuti o Koya me Luvena daulomani, me Le Duabau ga Nei Tamana—e sega li ni kena ibalebale oqo ni le duabau ga e na yago? Kevaka e ulumatua ka talairawarawa ki na lawa nei Tamana, e sega li ni ganiti koya na itutu oya me matataka na Kalou, me iVakabula ka Dauveisereki kei Vuravura? E sega li ni Nona dodonu kei na nona galala, me vaka ni ulumatua, na itaukei ni itutu va-Kalou, na Tama tawamudu, me lako mai, vakayacora ka vakacavara na inaki nei Tamana Vakalomalagi me baleta na nodra sereki, vakabulai, ka vakacerecerei na tamata? Me vaka ni sega na nona ivalavala ca (ka sega tale na tamata e vakakina), a taura kina na itutu ni iVakabula ka Dauveisereki, ka nona dina ga e na nona itutu vakaulumatua. E sega li ni kena ibalebale ni nona taukena na yago ka sa vakarautaki mai vakatabakidua, me vaka ni Luve ni Kalou, e na yagona kei na yalona, e tu kina na lewa e na itutu ni Luve ni Kalou, se e na itutu ni Kalou, ka ni Kalou, ka sa ikoya duadua ga na tamata e ganita me taura na veisorovaki uasivi? …

E dina ni so tale era na luve ni Kalou e na vukuna, ia e gadrevi dina na Yagona, na Nona talairawarawa sara i na lawa, na sorovaki se na kena vakacabori na yago o ya e na veisorovaki, ni se bera ni dua tale vei ira oqo, o ira ka ra luve ni Kalou talega e na nodra a sucu e na vuravura ni yalo, e rawa ni rawata na itutu vakaluve ni Kalou me vakataki Koya, ka ni rawa duadua ga mai na nona veisorovaki kei na nona vosa e na vukuda. Me rawa kina ni da rawata na itutu ka a vosa kina o Joni ni rawa duadua ga mai Vua, e na ivakavuvuli ni veisusugi: “Oi kemudou na daulomani, eda sa qai luve ni Kalou, ia sa sega ni rairai se da na vakaevei maimuri: oqo ga eda sa kila, ni na rairai mai ko koya, eda na tautauvata kaya; ni da na raica na matana dina.” Na Nona veisorovaki e rawa kina vei keda me da rawata e dua na bula vakacerecerei, na kena eda na sega ni rawata kevaka e sega.¹⁰

Vakatutu ni Vuli kei na Veivosaki

E na noda kila na yavu ni Tamada Vakalomalagi—kei Jisu ni noda iVakabula—“era a sere vata na kalokalo ivolasiga, ka ra kaila e na marau na luve ni Kalou” (Jope 38:7). E na nomu nanuma, na cava eda sa rui marau kina vakalevu?
A vakatura o Setani me kauta laivi na nodra galala ni digidigi na tamata, ia a cata na Tamada Vakalomalagi na vakatutu oqori. Na cava na vuna e dodonu kina me tu vei keda na galala ni digidigi meda rawata kina na bula vakacerecerei? (Raica talega V&V 29:39–44.)
Na cava e rawa ni da vulica me baleta na nanuma ni iVakabula e na vuku ni nona gagadre na Tamada Vakalomalagi e na Bose Cecere mai Lomalagi?
Mai na Lutu i Atama kei Ivi na tamata kece me na mate vakayago ka vakayalo talega, se me tawasei tani mai Vua na Kalou. Na cava a cakava na iVakabula me walia kina na mawe ni Lutu?
Na cava beka me a yaco i na kawatamata kevaka me a sega na Veisorovaki? (raica talega 2 Nifai 9:6–10.)
Na cava na vuna e rawa duadua ga kina vei Jisu Karisito me a vakayacora na Veisorovaki?
Na cava o vakila ni o vakananuma na veisorovaki ni iVakabula? E rawa vakacava ni veivakadeitaki ka solia na inuinui i na noda bula e na veisiga yadua na noda kila na veisorovaki?

Tiki ni iVolanikalou ka Veisemati: Joni 5:26; Iperiu1:1–3; 2Nifai 2:6–8, 25–29; 3Nifai 11:10–11,V&V 19:15–19; Eparaama 3:24–28