Wase 14

Na iTavi kei na iVakaro ni Matabete

Na isoqosoqo ni lotu.…me vaka na ivakavuvuli ni a vakatakila na Kalou.¹

Na Bula nei John Taylor

Ea vakananuma vakabibi o Peresitedi Taylor me baleta na isoqosoqo e na loma ni matabete, na ivakavuvuloi ni matabete “na ivakatakarakara ni veika mai lomalagi” kei na veika “e basika mai kina na veivakalougatataki ni Kalou e drodro vei ira nona tamata e vuravura.”² E a tekivutaka sara na bose vakamacawa ni matabete e na veitabana levu, vata kei na veibose vakavula ni matabete ni iteki kei na koniferedi ni iteki e na veivula va, me vakauqeti ira na vakaitutu ni matabete me ra vulica ka vakayacora nodra itavi.

E na nona a mate o Brigham Young e na Okosita 1877, era a vakacegui na Mataveiliutaki Taumada ia na Kuoramu ni iApositolo Le Tinikarua vata kei John Taylor me nodra Peresitedi, era sa iliuliu levu e na Lotu. Dina ga ni mataqali ka vakaoqo e kila tu o Peresitedi taylor ni Le Tinikarua e dua na kuoramu ka tautauvata na nodrau kaukauwa kei na Mataveiliutaki Taumada (raica na V&V 107:22–24), e kila tale tu ga na itutu dina ni matabete ni dodonu na Lotu me liutaki mai na dua na Peresitedi kei na rua nona daunivakasala. E na gauna vata talega, e a vakasaqara e na yalomalumalumu me vakayacora na lewa ni Turaga ka cata me taura vakaikoya na cakacaka.

Ni oti e tolu vakacaca na yabaki mai na nona a mate o Brigham Young, e veiveisau na mataveiliutaki Taumada. E na i ka 10 ni Okotova 1880, e a vakatikori me Peresitedi ni Lotu o Peresitedi Taylor vata kei George Q. Cannon kei Jospeh F. Smith me rau daunivakasala. E na nona vosa e na siga ni veivakatikori, e kaya kina o Peresitedi Taylor: “Ke a sega beka ni noda itavi me tuvai vakavinaka ka vakataucokotaki na vakailesilesi taucoko ni isoqosoqo, e dodonu ka’u taleitaka vakalevu me’u veitomani tiko ga kei iratou na taciqu ni le tinikarua, au kaya wale tikoga ni noqu vakanananu vakataki au. Ia e vuqa na taro me baleta na veika oqo ka sega ni noda itavi me da tukuna se era na vakacava beka, se sala cava eda na muria. Ni sa solia vei keda na Kalou e dua na lewa ka sa digitaka e dua na isoqosoqo e na nona lotu, vata kei na veikuoramu ni matabete e vakaraitaki vei keda mai na ivakatakila e basika mai vua na Parofita Josefa Simici, au sega ni vakasamataka rawa me Mataveiliutaki Taumada, le tinikarua, bete levu, le vitusagavulu, na bisopi, se o cei tale, e tu vua na dodonu me veisautaka se vakadodonutaka na ituvatuva ka sa vakaraitaka ka tauyavutaka na Turaga.”

E a qai vakamacalataka me tekivu mai na nona a mate o Brigham Young, na matabete era a sa tuvani vakamatata tu, vakavo walega na mataveilutaki taumada ka sa ganita sara ga ni kuoramu ni Mataveiliutaki Taumada, kei na veikuoramu taucoko sara, e dodonu me ra tawana na itutu era sa lesi kina mai vua sa Cecere sara.

E tomana o Peresitedi Taylor: “Oqo na vakatutu ni Yalo ni Turaga vei au. Au vakaraitaka noqu nanuma vei iratou na le tinikarua, ka tautauvata kei au nodratou nanuma, e dina, e lewe vica vei iratou e tautauvata sara tu ga kei na noqu vakanananu e na veika vata ga au a vakasamataka tiko. E sega ni tiko vei keda, se e sega ni dodonu me vaka kina, na vanua, na itutu, se dokai, e dina ga ni sa ka dokai me da nona dauveiqaravi na Kalou. E sa ka dokai me da taura na itutu ni matabete ni Kalou. Ia ni sa ka dokai me da nona dauveiqaravi na Kalou, taura nona matabete, e sega ni dokai me dua na turaga se e dua ga na ilawalawa turaga me ra vakasaqara na itutu ni matabete dokai. E kaya o Jisu, Dou sa sega ni digitaki au, ia ka’u sa digitaki kemudou. Me vaka ga au sa tukuna oti, kevaka me a vakatau e na noqu vakanananu vakataki au, ke’u a kaya, era sa toso vakavinaka tu na veika kece, taladrodro vinaka, ka duavata; ka tiko talega e lewe vica noqu itokani vinaka ka’u doka ka vakarokorokotaka, me ra taciqu, ka’u marautaka na nodra veivakasalataki. Me ra sa biu tu mada ga na veika e na nodra itutu. Ia au na sega ni vosa kina, sa ikemuni mo ni tukuna na nomuni gagadre, ia sa ikeimami na vakaitutu e na matabete dokai me raica ni isoqosoqo kece ni matabete oqori era taqomaki vakavinaka tu kei na veika taucoko e na loma ni lotu kei na matanitu ni Kalou e sa tuvai vakavinaka tu me vaka na ituvatuva e a vakatakila. E na vuku ni veika oqori keimami sa taura na sala ka gadreva me vakatikori vei keimami edaidai mai na nomuni veitokoni.”³

iVakavuvuli nei John Taylor

E rua tiko na matabete, ko ya na Melekiseteki kei na Eroni.

iMatai—Raica sa rua na iwase ni matabete e na lotu; na Matabete iMelekiseteki kei na Matabete iEroni. … iKarua—Erau vakatikori mai vua na Turaga; erau tawamudu, ka rau na veiqaravi e na gauna oqo ka tawamudu. Ikatolu—Na Matabete iMelekiseteki sa tu vua na kaukauwa kei na lewa ni veiliutaki; raica sa lewa na ilesilesi kece e na lotu e na veigauna kecega; a sa qarava talega na cakacaka vakayalo. Ikava–Na ikarua ni matabete sa vakatokai na Matabete iEroni, ni a soli vei Eroni kei ira na nona kawa e na veitaba tamata kecega. Ikalima—Ia sa vakatokai me Matabete e ra, ni sa vakarorogo ki na Matabete iMelekiseteki se ki na matabete e cake; a sa nona itavi me qarava na veika vaka-yago. … iKaono—E tiko e dua me veiliutaki e na veimatabete yadua, na Melekiseteki kei na Eroni.

iKavitu—Raica sa tu na kaukauwa kei na lewa ki na ilesilesi torocake, se matabete iMelekiseteki; io sa lewa na veivakalougatataki kei na cakacaka vakayalo e na lotu; io me kila na veika vuni ni matanitu vakalomalagi; raica e na wase rua vei ira ko lomalagi ka ra na veikilai kei ira na nona lewe ni isoqosoqo lewenilotu na Ulumatua; io era na vakalougatataki e na nona iserau na Kalou ko Tamada kei Jisu Na Dautataro ni veiyalayalati vou, ka na veiliutaki vei ira kece sara na vakailesilesi vakayalo e na lotu, ia sa tu na kaukauwa kei na dodonu vei iratou na iLiuliu ni Matabete e Cake e na ilesilesi ni matabete i Melekiseteki, me ratou lewa na veika kece e na lotu, vakayalo ka vakayago.

“Ia sa qai tiko na Matabete e Cake, raica oqo na ilesilesi cecere duadua. Ia sa kilikili me digitaki e dua mai na Matabete e Cake me liutaka kece na matabete, raica e na vakatokai me Pereistedi ni Matabete e Cake ni Lotu. Io sa ikoya na bete Levu sa liutaka na matabete e cake ni Lotu.” [V&V 107:64–66.]

Sa ikoya qo na ivakadinadina ni matabete oqo e liutaka kece na peresitedi, na bisopi kece, oka kina na veiliutaki ni bisopi; o ira kece na veiliutaki, isoqosoqo, kei na vakatulewa e na Lotu taucoko, e vuravura taucoko.

Raica eratou sa iliuliu ni matabete iEroni ko iratou na bisopi, ni sa matabete e ra, ni sa vakarorogo ki na matabete iMelekiseteki, se ki na matabete e cake [raica V&V 107:14], ka sa sega na tamata sa dodonu vakalawa me lewa na matabete iEroni, me veiliutaki vei ira kece na bisopi kei ira kece na matabete e ra, ko ira ga na kawa iEroni. Ia na bete levu e na Matabete iMelekiseteki sa soli vua na kaukauwa me vakayacora talega na cakacaka ni vei ilesilesi e na matabete e ra; io sa rawa ni vakayacora na cakacaka vakabisopi…ke a sa kacivi, digitaki ka lesi ki na itutu oqo; io me ratou lesi koya na iLiuliu Levu ni Matabete iMelekiseteki [Raica V&V 107:17.]⁴

Na matabete levu [se Melekiseteki], eda kila, sa tu vua na kaukauwa kei na lewa ni veiliutaki e na veigauna kecega e vuravura [raica V&V 107:8]. Ia sa tiko na duidui ni kaukauwa raraba ni matabete kei na itutu kei na ilesilesi ka vakatikori vei ira na turaga. … Me vaka ni dua na turaga e bete levu e iapositolo o koya? Sega. E baleta ni dua na turaga e sa bete levu, e peresitedi ni dua na iteki, se daunivakasala ni peresitedi ni iteki? Sega. Baleta o koya e bete levu, e bisopi o koya? Sega, e sega ni rawa. Kei na so tale, e na veitutu tale e so. Na matabete e cake e tu vua na kaukauwa me veiliutaki e na veicakacaka tabu oqori, itutu, se vanua, era na digitaki iratou ko ira na lewe ni matabete ka ratou lesi ki na itutu cecere ko ya; ia eratou na qai tokoni mai vei ira na lewenilotu. … E sega ni baleta e dua na turaga e taura tu e dua na ivakatagedegede ni matabete me sa veiliutaki e na veitutu kece ni matabete. E veiliutaki walega ke sa kacivi, ka lesi ki na itutu e nakiti kina.⁵

Na itutu ni Matabete e soli mai me vakavinakataki ira na Yalododonu.

Na Turaga e sa solia mai e na nona lotu e so me ra iapositolo ka so me ra parofita, bete levu, le vitusagavulu, italatala qase, ka so tale. Baleta na cava? Me ra vakavinakataki kina na Yalododonu. [Efeso 4:11–12] E sa taucoko tu li na bula me da tekivu kina? E sega. Na veitutu e so me ra vakavinakataki kina na yalododonu. Na cava tale? Me qaravi kina na cakacaka vakalotu, me vakarautaki na tamata ka tuberi ka me sinai e na kila ka, vuku, ka rarama, ka vulica me vunautaka na ivakavuvuli ni dina tawamudu ka kauta mai na iyau maroroi ni Kalou na veika vou ka makawa, na veika ka tuvani tu me tosoya cake na tiko vinaka ni tamata. Ia, oqo, na veitutu kece vakalotu, na veitamata yadua e dodonu me dokai e na nona itavi.⁶

E a tukuna na Kalou e na ivakavuvuli ni Yalododonu Edaidai ni tamata e vuravura era lecaika kina, kei na nodra lecaika era sega ni kila me ra taleitaka vakacava na noda vakanananu. Era vakatoka na ca me vinaka, era kaya sa rarama na butobuto, e cala na dina, kei na dina e cala, baleta ni sega vei ira na ivurevure ni nodra raica na kedrau duidui e dua kei na dua tale. “Ia ko ikemudou na itabatamata digitaki, a matanitu vakaturaga,” [raica 1 Pita 2:9] wasei ka vakatikori mai vua sa Cecere sara e na kena vakayacori na nona inakinaki. Na Kalou e sa lesia e na kemuni maliwa o ira na peresitedi, o ira na iapositolo, o ira na parofita, o ira na bete levu, le vitusagavulu, veibisopi kei ira na veiliutaki e so; o ira oqori era nona ilesilesi, vakaukauwataki ka liutaki mai vua, e na ruku ni nona veivakayarayarataki, vakatavulici ni nona lawa, cereka na ivakavuvuli ni bula, ka ra tuvani ka vakatikori e na ivakaraitaki me liutaka na tamata e na sala ni bula vakalou kei na lagilagi tawamudu.⁷

Isa, kevaka me rawa ni da kila na lagilagi, vuku, kaukauwa, cecere, kei na vakatulewa ni Tamada Vakalomalagi. Kevaka me rawa ni da vakananuma na bulatawamudu, na lagilagi, na marau ka sa waraki ira tu na bula yalododonu, na nodra bula savasava ka totoka, o ira era rokova na Kalou, sa i ira sara ga oqori na Yalododonu nei Koya sa Cecere Sara. Kevaka me da vakasamataka na veivakalougatataki levu e sa vakarautaka tu na Kalou vei ira na tamata era na qaravi Koya, yadrava na Nona lawa, ka talairawarawa ki na Nona ivunau, e sa na veisau na veika eda vakila mai na ka eda cakava. Ia e sega ga ni vakakina. Na Turaga e sa kauti keda mai na veimatanitu me rawa ni da mai vakavulici ena veika ni Matanitu ni Kalou. O Koya e sa vakadeitaka na Matabete Tabu me baleta na itavi o ya. Na mataisoqosoqo ka sa tu ena iTeki, Tabanalevu, kei ira na Mataperesitedi, Matabisopi, Matabose e cake, Bete Levu, Vitusagavulu, iTalatala Qase, Bete, iVakavuvuli, Dikoni, kei na so tale, era sa tu ena Lotu ena nona lewa na Kalou me vakavulici ka vakatorocaketaka na noda bula.⁸

Eda sa tauyavutaki ena iapositolo kei na parofita: peresitredi kei na nodra daunivakasala, bisopi kei na nodra daunivakasala, italatala qase, ivakavuvuli kei na dikoni. Eda sa tauyavutaki ena ivakaro ni Kalou, ka sai ira sara ga na ivakavuvuli oqo, ka vaka e ka lalai vei keda, ia e lako mai vua na Kalou. E sa tiko vei keda na vitusagavulu kei na bete levu, ka sai ira oqo era tu ena itutu ka vinakati vei ira me ra gumatuataka na kena qaravi ena bula oqo, ena vuku ni dina kei na yalododonu, ena vuku ni matanitu ni Kalou, kei na tauyavu ni vakavuvuli e dina vei ira na yalododonu nei koya sa Cecere. Eda tiko eke me da tokona na Kalou ena nodra vukei na bula kei na nodra vakabulai na mate, na nodra vakalougatataki na tukada, na kena vakalougatataki na nodra bula na luveda; eda tiko eke ena vuku ni kena vakabulai ka vakaukauwataki na vuravura eda bula tiko kina, ka ni sa biuta koto na Kalou na nona kaukauwa kei na ivakasala e vuravura ena vuku ni ka o ya, me rawa ni vulica na tamata me cakava na loma ni Kalou e vuravura me vaka sa caka tiko mai lomalagi. Oqo na inaki ni noda mai bula eke. Ka sa noda itavi me da vulica ka kila na noda itutu.⁹

Na matabete e sa tuvani tu me vaka na lewa ni Kalou.

[Na matabete] e sa dua na lewa, me vaka na ka au kila, e a vakaraitaka o koya sa Cecere sara, o Koya duadua ga. E sega ni vakatamata, e sega talega ni lako mai vua na tamata, e na kena sega ni lako mai vua na tamata, e na sega ni rawa me toso iliu se me vakavinakataka na tamata ke sega na veiliutaki nei Koya sa Cecere sara. Na kena dodonu, e na levu ni veivuke, kei na levu ni ituvatuva, vata kei na ivakavuvuli, era vakaleqai tu kina noda malumalumu kei na sega ni dei na tamata, e sa dredre me taqomaki na savasava ni veisoqosoqo ka a solia na Kalou vei keda, ka tomani tiko ga na nodra gadreva na veiqaravi uasivi duadua, yaloraramusumusu, vakuwai koya vakaikoya, tataqomaki, qaqarauni kei na vakararavi vua na Kalou.¹⁰

Kevaka eda sa ciqoma e dua na itutu, se ilesilesi, se lewa, se dua na kaukauwa mo veiqaravi e na dua na cakacaka tabu, eda sa ciqoma oqori mai na veivakalougatataki ni Kalou, ka na rawa walega ni da vakayacora na cakacaka tabu oqori me vakatau mai na matabete e vakatarai me da taukena. … Kevaka eda vakayacora na noda itavi, o ikeda vakayadua e na noda itutu dododnu, e na solia vei keda na Kalou na kaukauwa me da rawata na veika e tu e na matada, veitalia ga se cava, se matabete cava eda taukena, veitalia ke Peresitedi ni Lotu, se Peresitedi ni iteki, e dua na Bisopi, lewe ni Matabose e cake, dua na Bete Levu, dua na Le Vitusagavulu, se iTalatala qase, Bete, iVakavuvuli se Dikoni; veitalia na cava, kevaka era vakayacora na nodra itavi ka vakacaucauataka kina na Kalou, e na tokoni ira e na nodra cakacakataka kei na kena qaravi.¹¹

O iko kei au e rawa ni daru vakamavoataka nodaru veiyalayalati; o iko kei au daru na sega ni kauwaitaka na ivakavuvuli ni Kosipeli ka vakamavoataka na lewa ni matabete kei na ivakaro ni Kalou; ia e na kedra maliwa na dauveiqaravi ni Isireli e na udolu ka tini na udolu era na dina tu e na ivakavuvuli ni dina, kei na Kalou mai lomalagi, na agilosi tabu kei na Matabete makawa ka ra sa bula vata tiko kei na Kalou era sa duavata taucoko me rawa na kena vakayacori na inaki oqo. Na Turaga e na laiva mai na Nona inakinaki e na Nona sala kei na Nona gauna. Ni da sa tuvana oti oqo, me vaka au sa tukuna oti, e sega ni rawa vei keda me da cakava me vaka noda vakasama vakaikeda, ia e na tukuna mai na Kalou.

Sa tu na lewa vakamatautaki ena Lotu. O ikemuni na turaga, o ni taura tu na Matabete tabu, o ni kila na veika kece oqo. E a sega li ni solia na Kalou vei ira na tamata yadua na ivakatakilakila ni Yalo Tabu me yaga kina? Io. E sega li ni a cakava o Koya e levu cake na ka mai na kena oqori vei ira na yalododonu era dina ka vakabauta? E a sega li ni solia o Koya vei ira na isolisoli ni Yalo Tabu? E vaka kina, era kila ka vakadinadinataka. Era a kau mai me ra cakacaka vata, ka cakacaka vata kei na Kalou kei na kai lomalagi me ra vakatawai kemudou. Ia ni sa tiko vei keda na Yalo Tabu eda gadreva li e so me ra dusimaki keda? Io, e veigauna taucoko. Na cava e vuna? E baleta ni sa sinai ko vuravura e na butobuto, na veivakayarayarataki nei Setani kei na malumalumu vakatamata. Eda gadreva na ivakatawa e na vale cecere kei Saioni, ka ra sa qaqarauni tu e na veika maroroi kei Isireli, ka raica talega me ra kakua ni lakosese na tamata ni Isireli. … O ira kece na vakaitutu e gadrevi me ra cakacaka vakalotu era na laurai e na Lotu, kei na veika kece era sa tuvani me vaka na lewe ni Kalou.¹²

Na Matabete e dodonu me cakacakataka na loloma kei na yalodina vua na Kalou.

E dodonu me da duavata e na veivakamenemenei vua e dua ki na dua tale, ka nanuma mo lomana na ibulibuli ni Kalou rawarawa duadua, ka vakabibi vei ira na Yalododonu ni Kalou, veitalia se itutu cava era tu kina. Kevaka e so era cala, tovolea mo kauti ira lesu mai e na loloma, kevaka era yaloca, vakaraitaka vei ira na kena e vinaka cake; kevaka e so era sega ni caka dodonu, cakava vakadodonu o iko ka kaya, “Mo lako mai, mo muri au, me vaka noqu muri Karisito.” E sega beka ni o koya oqori na sala dodonu me muri? Au vakasamataka ni rawa; sa ikoya oqori na sala au kila kina na kosipeli. E sega, ni dua vei keda, e tu vua na vakalevulevui koya se me dau veivakasaurarataki se veikalawaci vua e dua, se me cavuta na vosa tawakilikili; ia e na yalo loloma kei na vosota vakadede ka vakaberabera vata kei na loloma sega ni veivakaisini. Au na wilika mai na Vunau kei na Veiyalayalati. …

“Raica, sa lewe vuqa era sa kacivi; ia sa lewe lailai ga sa digitaki. A cava era sa sega ni digitaki kina? Sa baleta ga ni ra sa rui domona na veika ni vuravura oqo, me ra dokai ira kina ko ira na tamata; ia era sega ni vulica na ivakavuvuli oqo—“o koya sara ga na ka au tukuna tiko—“Raica na kaukauwa ni ilesilesi vakabete sa kaukauwa ga vakalomalagi; ia e sega ni rawa me taurivaki se vakayacori na kaukauwa vakalomalagi e na sala tani, e na kena ivakarau dododnu ga.” O nanuma ni Kalou e na solia na kaukauwa vua e dua na tamata me cakava walega kina na nona yalayala se inaki kocokoco. Au kaya vei iko e na sega ni rawata, sega ni rawa, sega e sega ni rawa. “Sa dina ni rawa ni lesi vei keda; ia kevaka eda ubia noda ivalavalaca se me da qaciqacia, dokadoka se viavia lewai ira na tani se taurivaka e na ivalavala e sega ni dodonu, sa na tasogo ko lomalagi; a sa rarawa na Yalo ni Turaga; ia sa lako tani, sa oti e kea na kaukauwa vakabete se na ilesilesi ni tamata ko ya.” [Raica V&V 121:34–37.]

E na so na gauna, eda tucake vata kei Karisito Jisu e na veiyasana vakalomalagi; e vaka dina kina. Ia e sega ni dua na matabete Luve ni Kalou me solia na kaukauwa vua e dua tale na tamata me vakasaurarataka tale e dua se me curubotea e na nona sala vakaikoya. E sega ni dua na ka vakaoqori e na kalasi e cake; e sega ni tiko kina, sa tu duadua ga; a sa caqeta na mata ni moto, ka vakacacani ira na lewenilotu, ka vorata na Kalou.” [V&V 121:38.]¹³

E sega ni dua na lewa me rau salavata kei na Matabete Tabu vakavo ga e na veivakauqeti, ka sega ni dua na tamata e tu vua na dodonu me dokadoka ka vakaraitaka nona dokai koya vakaikoya e na itutu cava ga e lesi kina e na Lotu oqo, ni o koya e dauveiqaravi ga ni Kalou, dauveiqaravi vei ira na tamata, kevaka e dua na tamata me tovolea ka vakayagataka nona lewa vakataki koya ka sega ni lewa vakalou ka taurivaka na ivalavala ka sega ni dodonu na Kalou e na beitaki koya na tamata oqori, o ikeda taucoko eda na tu e na mata ni Kalou ka lewai e na ivalavala kecega eda sa kitaka e na bula oqo. Eda tiko oqo me da ivakabula ni tamata, ka sega ni da lewa kaukauwa se veivakasaurarataki. …

…Sa ikoya sara ga ka vakaitutu e na Matabete Tabu me da savasava. “Dou savasava mai, ko ikemudou ka kauta na iyaya nei Jiova.” [Raica Aisea 52:11.] Sa ikeda vakayadua me da savasava, ka qai tukuna vei ira na tani, “mo lako mai, mo muri au, me vaka noqu muri Karisito.” Sa ikeda sara ga me da bulataka noda vakabauta vakalotu ka muria na lawa ni Kalou, ka vakayacora na noda itavi ka vakacolati vei keda.¹⁴

Au sega ni vakabauta na mataqali lewa kaukauwa cava ga. Au vakabauta na vosota vakadede, na loloma veivueti, na dausolisoli, na yalomalua, kei na loloma ka rerevaka na Kalou. Au sega ni vakabauta ni a soli na Matabete vua na turaga me vakayacora nona kaukauwa kei na lewa e na yalodra na veituraga tale e so. Na veika taucoko e dodonu me caka e na loloma kei na vosota vakadede, vata kei na yalodina vua na Kalou.¹⁵

Vakatutu ni Vuli kei na Veivosaki

Na cava na vuna e bibi kina me tu na ivakaro e na loma ni matabete? E rawa vakacava me vukei keda vakayadua na ivakaro oqo me da sotava kina nodra gagadre o ira ka tu na noda itavi vei ira?
Na cava na vuna e levu tu kina na itutu e na loma ni matabete? (Raica talega Efeso 4:11–12.) O raica vakacava na duidui ni itutu ni matabete era veivuke e na “vakacokotaki ni Yalododonu”?
Na cava soti o sa bau kaya e na nomu a vakalouagatataki mai na nomu vakamuria na nodra ivakasala na iliuliu ni matabete, mai na nomu sega ni kila se duavata e na ivakasala e na imatai ni gauna?
Ni veivosakitaki na veiliutaki Vakarisito, e vakauqeti ira na lewe ni matabete o Peresitedi Taylor me ra bulataka na vosa “Mo lako mai, mo mauri au, me vaka na noqu muri Karisito.” E rawa vakacava na ivakasala oqo me vakalougatataka noda veitokani vata kei ira na turaga nodra dokai ira na marama me na vukea nodra doka na matabete?
Na cava e vuna ni dokadoka e vakayalia se vakarusa na kaukauwa ni dua na matabete? E rawa vakacava me da vakatubura noda vakaitovotaki keda e na yalo loloma, vosota vakadede ka vakaberabera vata kei na loloma sega ni veivakaisini? E na sala cava e rawa ni da vakaitovotaki keda kina me veivakauqeti e na kedra maliwa eda qaravi ira e na loma ni Lotu?
E na sala cava e rawa ni o vukei ira kina na vakaitutu e na Matabete iEroni e na nomu vuvale kei na tabana levu nodra vakavakarau e na nodra dodonu me ra taura na Matabete iMelekiseteki?

iVolanikalou ka Salavata: Efeso 4:11–15; V&V 20:38–67; 84:18–32; 109:110; 121:33–46