Wase 19

Veivakalougatataki Vakavuravura kei na Lawa ni Dua na iKatini

Eda sa vulica me da sauma na noda ikatini, me rawa kina ni da vakaraitaka vua na Kalou ni da nona tamata, kevaka me solia vei keda na veika kece eda kerea, e na rairai ni da solia lesu beka vua e dua na ikatini, e na cakacaka oqori eda raica kina na ligana.¹

Na Bula nei John Taylor

E vakabauta ko John Taylor ni solia na Kalou na ka eda gadreva vakayago me ikuri ni veivakalougatataki vakayalo. O koya oqori e vakauqeti ira kina na Yalododonu me ra qara ka kila na liga ni Kalou e na veika vakavuravura, ka vakavulica ni “dodonu me da biuti keda e na itutu me da tuberi ka dusimaki mai vua na Turaga e na veika vakavuravura ka vaka kina vakayalo, de na qai sega ni da rawata na lagilagi e vuqa vei keda eda vaqara tiko.”²

E dina ni laurai na bibi ni ka vakavuravura me baleta na bulabula ni bula, ia e taura matua tale tu ga o Peresitedi Taylor na veika dina me baleta na veika ni vuravura. E na nona rai o Peresitedi Taylor me baleta na iyau vakavuravura, e a vola kina vakaoqo ko Elder B. H. Roberts mai na Vitusagavulu: “e sega ni soli koya ka na rawa ilavo. … Ia na levu ni veika e nona ka rawata e Nauvoo, kei na kena ka solibulataka me rawa kina ni dro ki na lekutu kei na Lotu i Karisito, sa rauta me vakadinadinataka ni rawati koya tu vakailavo. Ia na matana kei na utona e rai tu vakadua ki na iyau vinaka cake sara, ko ira ka sega ni vakacacana rawa na sarasara kei na veveka, a sa sega ni ravabasuka kina na daubutako me butakoca [raica na maciu 6:19–20]. Na veika oqo e vakasinaita na yalona, taura na nona vakasama ka biuta mai e dua na tiki ni gauna lailai sara me domona kina na iyau ni vuravura oqo. Na nona ibole na—“Na ilavo e lailai na kena bibi e na vanua e qarauni kina na dina.”³

Vei Peresitedi Taylor, na rokovi ni lawa ni ikatini e dua na tiki bibi ni nona vakayacora na nona itavi vakavuravura ka vakaraitaki ni veivakalougatataki ni liga ni Kalou. E na dua na gauna ni a dau saumi na ikatini e na veika tale e so ka sega e na ilavo, e a vakavulici iratou na luvena me ratou solia na ka e uasivi duadua vua na Turaga me ivakavinavinaka ni veika kece eratou rawata. “Ni keitou dau beti vuanikau e na kena draki,” e a vola na luvena ko Mosese W. Taylor, “e na lako mai ko tamaqu ka mai vakadikeva na basikete ka digitaka na vuanikau lelevu ka vinaka duadua ka kaya: ‘Taura oqo me ikatini ka raica me saumi taucoko vakadodonu.’”⁴

iVakavuvuli nei John Taylor

Eda dinau tu vua na Kalou e na veika e tu vei keda.

Ko cei e buli keda? Ko cei e vakarautaki keda, kei na veika ka vakavolivoliti keda tu ka da ceguva? O cei e tuvanaka na veivuravura ka da raica ni wavoliti keda tu? O cei e solia na ikatalau, vakasigalevu kei na ivakayakavi vei ira na milioni ka ra bula tu e na dela ni vuravura? O cei e vakaisulutaki ira, e na nona kitaka na viavia ni veikau? O cei e solia vua na tamata na nona icegu, bula, bulabula, nona kaukauwa ni veitosoyaki, vakasama, kei na veika kece vakalou ka soli vua? O cei e lewa ka cicivaka na veika ni vuravura mai na kena buli me yacova mai na gauna oqo? Na Kalou Duadua, na Eloimi Levu, na Kalou Levu o koya na Tamada.⁵

[E tukuna ko Jisu], “Vakasamataka na viavia ni veikau, era sa sega ni daucakacaka, de dau tali, ia ko Solomoni e na nona iukuuku kecega sa sega ni vakaisulu me vaka e dua vei ira oqo.” [Raica Maciu 6:28–29.] E a kaya tale, dou raica na manumanu vuka, ni ra sega ni kakaburaki, se dautatamusuki, se dau kumuna vata ki na lololo, a sa vakani ira na Tamamudou vakalomalagi, e na sega li ni qarauni kemudou, sa lailai na nomudou vakabauta? [Raica Maciu 6:26.]. …

Kevaka e tu vei keda na bula, na tiko bulabula, se na iyau; kevaka e tu na luveda, kei na itokani kei na vale, kevaka e tu vei keda na rarama ni dina, na veivakalougatataki ni kosipeli tawamudu, na ivakatakila ni Kalou, na matabete tabu, kei na kena veivakalougatataki kece kei na matanitu kei na lawa, ko ira kece oqo kei na marau dina kece ka tu vei keda e lako mai vua na Kalou. E sega ni da dau raica na ka oqo, ia e ka dina kece ni da dinau tu vua na Kalou e na vei isolisoli vinaka ka totoka kecga [Raici Jemesa 1:17]. E tuvanaka na yagoda e na nodra bula e na vinaka taucoko, tautauvata kei na totoka. O koya me vaka na dauniserekali e vakamacalataka,

“Kitaka na co ka solega na veidelana,
Ka vakaisulutaka na were matadredredre e na sila,
Na kakana kedra na manumanu na ligana e solia,
Kei na reveni lalai ni ra tagi.”

E dauveivosoti ka dauloloma ka daulomasoli vei ira kece na nona ibulibuli, ka dodonu me da dau vakasamataka na veika oqo e na so na gauna, eda na qai kila kina na noda vakararavi vua sa cecere Sara.

Ni tukuni tiko na veika e baleta na vuravura oqo, era dau taroga wasoma e vuqa—“A cava, e sega kina ni da raici ira?” E dodonu me vaka kina. E sega li ni da dau veivosakitaka na tarai cake kei Saioni? E vakakina. E sega li ni da veivosakitaka na tara koro lelevu ka caka kena itaukei totoka, iteitei kei na loga ni vuanikau, ka biuti keda e na dua na itutu me rawa kina ni da marautaka vata kei ira na noda vuvale na veivakalougatataki ni bula? E vakakina. E sa solia vei keda na Kalou na qele kei na veika kece e ganita na inaki oqo, ka sa solia vei keda na vuku me da vakayagataka. Ia na ka vakaitamera ga ka a sa raica oti tu sa ikoya, ni da vakayagataka na vuku ka solia vei keda me da vakayacora kina na veika eda gadreva me baleta na noda tiko vinaka kei na marau, e sega kina ni dodonu me da guilecavi koya na ivurevure ni noda kalougata kece, se me baleta na gauna oqo se na gauna se bera mai.⁶

Na Kalou e noda Kalou ka da biuta na noda veivakadinati Vua; e sega vei keda na ka me da dokadokataka. E tu vei keda na vu tuniyau? O cei e solia vei keda? Na Turaga. E tu vei keda na iyau? O cei e biuta vei keda me da taukena? Na Turaga. Na noda ose, bulumakau kei na sipi, noda manumanu vuka, manumanu yava iva kei na veika eda taukena, e nona isolisoli. Na koula kei na siliva kei na veika talei ni vuravura, kei na bulumakau e na udolu na veidelana, sa nona, ka da sa nona ko ikeda, ka da tu e ligana, kei na veimatanitu kece sa tu e ligana, ka na vakayacora vei keda vakakina vei ira na ka e nanuma ni vinaka. Me vaka ni Tama dauloloma, ka vuku, e na qarauna na veika era taleitaka; e na gauna e yaco mai kina na veilewai, e na sega ni bureitaki. E dodonu me da dau nanuma ni noda kaukauwa e tu vua na Kalou; e sega vei keda na ka me da dokadokataka, e sega vei keda na vuku ka sega ni solia na ka e na bula oqo, se iyau, ia na ka ga e soli vei keda mai vua na Turaga. Na ka eda taukena me baleta na gauna oqo kei na tawamudu e solia vei keda ko koya.⁷

Na ka kece eda taukena e isolisoli ni kalou. E dodonu me da vakavinavinakataki koya e na ka kecega. So na gauna eda dau veitalanoataki ira na tamata ka nodra na dodonu oqo se na dodonu tale ka dua. E sega na noda dodonu, o koya ga e solia vei keda na Kalou. Au na tukuna vei kemuni na cava e na vakaraitaka vei ira na Yalododonu Edaidai. E na vakadinadinataka vei ira ni koula kei na siliva e nona, kei na bulumakau e na dela ni udolu na dela, ka na solia vei koya e lewa, ka bureitaka vei koya e lewa. E na vakaraitaka vakamatata vei kemuni. Na noda taqomaki mai na noda talairawarawa vua na Kalou kei na nona lewa, kei na noda bula vakalou e na gauna edai kei na tawamudu e vakatau mai na ka vata ga ko ya.⁸

Noda kila na noda veivakalougatataki vakavuravura kei na noda icolacola e tiki ni kosipeli.

Au taleitaka na vosataka na veika ka baleta na Matanitu ni Kalou, ka vaka talega kina e so na ka e so era nanuma ni sega ni duavata kei na Matanitu ni Kalou, ia era vakakina; ni ka kece vakavuravura kei na ka kece vakayalo, veika kece e veiwekani kei na yagoda kei na yaloda, veika kece e vakasamataki me vakavinakataka na noda tiko mamarau kei na vinaka e na vuravura ka me na rawati kina na bula vakalou e na matanitu vakalomalagi, e na umanivata kei na Kosipeli ka sa ikoya oqori na ka e noda ni da Yalododonu Edaidai.⁹

Na inaki ni noda veivosaki e sega ni o koya kece na ka vakalotu, ia me veivosakitaki na veika kece me baleta na ka e taleitaka na Lotu kei na matanitu ni Kalou e vuravura…. Eda sota talega me da qara na sala vinaka duadua me da muria me baleta na ka vakavuravura vaka talega kina na ka vakayalo; ka ni da taukena na yago ka vaka kina na yalo, ka da na bula ga ni da kana, gunu, ka vakaisulu, e sa dodonu kina me vakasamataki ka veivosakitaki na ka vakavuravura e na noda veivosaki, ka dodonu me da veivosakitaka na veika kece ka vakasamataki me rawa kina na vinaka, kalougata, se tosoya cake na nodra bula na Yalododonu ni Kalou se ra vakarautaka tiko ki na noda veika vakayalo se na noda cakacaka se itavi e na bula oqo me vaka ni ra turaga kei na dauveiqaravi. … Na vakasama ni veika ga vakalotu vei keda, ka sega ni dua tale na ka e sega ni vakakina; ia eda kitaka na veika kece e na noda rerevaka na Kalou. Na noda lotu e kovuta e vuqa na ka mai na kena ni vuravura; e sega ni uqeti ira na [lewena] me ra gadreva me ra “dabe ka lagasere vakataki ira e na marau tawamudu,” ia e kovuta na veika kece me baleta na tamata, kei na dina kece e vuravura e vakabau talega kina.¹⁰

E leqataka na Turaga na nona caka vinaka vei keda, me vakamakaretaka na noda vakasama, me vakamacalataka na noda lewa, me tevuraka vei keda na Nona lewa, ka me vakaukauwataki keda ka vakarautaki keda e na veika lelevu ka na vakarau yaco e na gauna edai. E gadreva me vakaraitaka vei keda na iwalewale ni noda vakabulai keda, ni noda vakalougatataki keda vakavuravura ka vakayalo, kila ka levu, bula savasava, vakayago, vakapolitiki kei na veisala kece e rawa ni solia kina o Koya na Nona veivakalougatataki e na veitamata ka ra sa lutu.¹¹

E na vuku ni ikatini, eda raica kina na Kalou, vakaraitaka na noda dina, ka vakarautaki keda ki na veivakalougatataki levu sara.

O keda ni da tamata eda vakadinadinataka ni lawa ni ikatini e lako mai vua na Turaga; a cava e qai dau gadrevi kina vakalevu na kena dau tukuni wasoma na veika e baleta. Ke da sega ni dina mada ga vei keda, ka dina vua na noda Kalou, na cava na kena vinaka vei keda na noda tukuna tiko ni da matataka na Kalou, na noda qase kei Isireli, na noda vakaisulutaki e na matabete tabu, na noda veivakavulici e na ivakarau ni bula. O ira na Jiu e na gauna makawa, na Farisi makawa kei na nodra bula butobuto kei na qito ca kece, e rawa ni ra dokadokataka ni ra saumi ikatini e na veika kece era taukena. Eda kaya ni da vinaka cake mai vei ira na Farisi makawa, ia e vaka me sa rui dredre vei ira na tamata ka tu veimaliwai kei keda me ra dina vakaiira kei na nodra Kalou e na veika me baleta e dua na ivakavuvuli rawarawa vakaoqo. …

[Na Turaga] e vinakata taumada me ra kila na Kalou na tamata [ena] dua na ivakavuvuli vakavuravura lailai, e vinakata me ra kilai koya, e na nodra solia vua e dua na tiki lailai, se dua na ikatini ni veika e solia vei ira me raica kina se era na dina e na ka oqo, me laurai se era na kitaka me vaka na tamata dokai cecere se sega, se era na tovolea me ra lawakitaki koya. Ke da vakayacora vakadodonu me yacova ni da sa vakacavara na noda itavi, eda sa na qai vakarau ki na cava tale e tu. Sa ikoya na ivakavuvuli ka sega ni ikatini eda sauma ka raica na Turaga; e sega ni kauwaitaka na nona ikatini, ia e kauwaitaka na noda kitaka na veika e dodonu. Ke sega ni rawa ni da dina e na vica ga na ka, e sega ni rawa ni da nanuma me da na veiliutaki e na vuqa na ka [raica Maciu 25:21].¹²

[Na lawa ni ikatini] e veivakatovolei vei ira na tamata ni Kalou, se vei keda ka da kaya ni ko ikeda talega, me rawa ni da kila se rawa ni ra muria na tamata e dua na lawa matata ka solia mai o koya sa Cecere Sara se sega, ka rawa kina ni vakadinadinataki na nodra yalodina kei na talairawarawa. Ia oqo, ke da vakamuria, sa na daumaka kece ka vinaka; ke sega, e sa volai, “Sa sega ni ganita me ra tiko e na kemudou maliwa.” [V&V 119:5.]. …

Eda veivosakitaka tiko na tarai cake kei Saioni. Oqo na vanua e vakayagataki koya kina vakaukauwa vei au ka vakakina vei iko, ni o vakasamataka na kena bula ka raica e na rarama ni Yalo ni dina. Ni sa volai: “Au sa kaya vei kemudou, me ra muria ka rokova tiko na ivakaro oqo ko ira na noqu tamata, io me ra vakataudeitaka na vanua ko Saioni me noqu, ka me vakayacori kina na noqu ilesilesi kei na noqu ivunau, io me ra rokova sara ka vakatabuya, raica, au sa kaya vakaidina vei kemudou, kevaka era sa sega ni kitaka vakakina, sa na sega na nomudou Saioni.” [V&V 119:6.] Eda veitalanoataka tiko na kena tarai cake na vanua ko Saioni, ka sa ikoya e dua na vuna ka da tiko kina eke. Ka sa kaya oti na Kalou ni kevaka eda sega ni muria na lawa oqo, e na sega ni vanua ko Saioni ki vei keda. …

[Dua na iKatini] sa ikoya e dua na ivakavuvuli ka da liutaki kina. Au sega ni tiko eke, ko ni sega ni tiko eke me da kitaka na veika ga eda via kitaka, veika eda vakila, kei na inaki. Ko Jisu mada ga e a sega ni lako mai me mai kitaka vakakina. E na Nona vosa sara ga, E sega ni lako mai me mai cakava na Nona lewa, na lewa ga nei Tamana ka talai Koya mai [Raica Joni 5:30]. Eda tiko eke sega ni baleta me da cakava ga na noda lewa, ia na lewa ga nei Tamada ka talai keda talega mai, ka sa kacivi keda ki na noda ilesilesi tabu vakalou. …

Na veika vakavuravura oqo [e so] era nanuma ni lailai sara na kedra bibi, e lailai sara na kedra bibi ni laurai mai na noda cakacaka e vuqa vei keda; ia e vakaitamera sara na keda bibi ni vakarautaki vata kei na vuni dina, na ivakavuvuli ni bula tawamudu ka vakaraitaka na Kalou e uasivi sara na kena bibi vei ira na yalododonu, vei ira na bula kei na mate, e na tamata sega ni wili rawa era a sa bula oti kei ira era na qai mai bula, na veika oqo e vakaitamera na kedra bibi. …

Au sa rui gadreva me’u raici ira na tamata ni ra muria na lawa oqo ni ikatini baleta ni ivakaro rawarawa ka vagolei sara ga mai vei keda. E sega ni baleta ni’u kauwaitaka vakataki au se ra sauma na nodra ikatini na tamata se sega, ka’u sega ni vakabauta ni sega ni kauwaitaka talega na Turaga. Na koula kei na siliva e Nona, kei ira talega na bulumakau me vakarota na veika kece. Kei na veika eda taukena e na veika ni vuravura oqo e soli vei keda me da vakayagataka vakavuku, baleta ni na sega ni rawa ni da kauta vata kei keda e na gauna eda sa na kacivi kina. Sa noda itavi, vaka Yalododonu nona o Koya sa Cecere Sara, me da dina ka dodonu ka taura e dua na sala dodonu, me da sinai e na dina ka taura tiko na ivakavuvuli dodonu e na veivanua e veigauna.¹³

Vakatutu ni Vuli kei na Veivosaki

A cava e so na veikavakalougatataki vakavuravura e sa solia vei keda na Kalou? Na cava e rui bibi kina me da kila ni veivakalougatataki kece oqo e lako mai vaka isolisoli mai vua na Kalou? Na cava e vakavuna me ra guilecava kina e so na tamata ni ivurevure ni veivakalougatataki kece oqo na Kalou?
E vakacava na nodrau veimaliwai ni veika vakavuravura eda taukena kei na noda tiko vianaka vakayalo? [Raica talega na V&V 104:13–18.] E rawa vakacava me da vakayagataka vakavinaka na veivakalougatataki ka solia vei keda na Kalou?
E rawa vakacava ni saumi ikatini e vakraitaka na noda vakavinavinaka vua na Turaga? E rawa vakacava ni da tea na sore ni vakavinavinaka ni da solia na ikatini kei na isolisoli?
Na acava e rawa ni ko cakava mo vakavulici ira kina na luvemu kei na makubumu me ra sauma vakadodonu na ikatini?
Na cava e dau bolebole kina e na so na gauna na saumi ikatini? Na cava e rawa ni da cakava me da rawata kina na bolebole ko ya?
Na cava e sa rui bibi kina na saumi ikatini e dina ga ni da dau leqa tu vakailago e na noda gauna kece ni bula? Na veivakalougatataki vakayago se vakavuravura cava o sa bau taura e na nomu talairawarawa ki na lawa ni ikatini?

iVolanikalou me Salavata: Na Vunau ni Soro 27:30; Aisea 45:12; Malakai 3:8–12; Mosaia 2:20–22; V&V 59:21; 104:13–18; 119:1–7; 120