iVakamacala

E va na iwasewase ni veiwase yadua ni ivola oqo: (1) e dua na vosacavuti ka vakamacalataka na veika e golevi e na dua na wase; (2) Na Bula nei John Taylor, “e vakaraitaka na itukutuku e na wase oqo kei na dua na italanoa se ivakasala mai vei Peresitedi Taylor; (3) “iVakavuvuli nei John Taylor,” ka tukuni kina na veivakavuvuli bibi mai na nona itukutuku e so kei na ivunau; kei na (4) “Vakatutu ni Vuli kei na Veivosaki,” ka veivakayaloqaqataki me da railesuva vakataki keda na taro, ka veivosaki, kei na kena vakayagataki e na noda bula e na gauna oqo e na veitaro.

Na Vakayagataki ni iVola Oqo

Na vuli yadudua se vakamatavuvale. Na inaki ni ivola oqo me vakarabailevutaka na nodra kila na lewenilotu yadua na ivakavuvuli ni kosipeli ka a vakavuvulitaka o Peresitedi John Taylor. Mai na kena wiliki e na masumasu kei na vuli vagumatua, me ra na rawata kina na lewenilotu yadua na ivakadinadina ni dina oqo. Na ivola oqo e na vakaikuritaka talega na nodra laiberi ni kosipeli na lewenilotu yadua ka na yaco me dua na ivurevure yaga ni veidusimaki vakamatavuvale ka vakakina na vuli e vale

E baleta na veivosaki e na soqoni ni Sigatabu. Na ivola oqo e nodra ivola ni vuli e na soqoni ni Sigatabu na kuoramu ni Matabete i Melikiseteki kei na iSoqosoqo ni Veivukei. E vakavulica o Elder Dallin H Oaks ni veiivola e so ni Nodra iVakavuvuli na Parofita “era lewena na ivunau kei na ivakavuvuli. Era vutuniyau ka tautauvata kei na veika e gadrevi e na noda gauna oqo ka ra totoka sara e na veivakavulici kei na veivosaki.”¹ E dodonu me ra na vakanamata tikoga na qasenivuli i na lewe ni vola kei na ivolanikalou ka ra semavata ka dodonu me ra vakayagataka na kena ivakavuvuli ki na veika era na kila na lewenikalasi.

E dodonu me ra tautauri na qasenivuli e na veitaro e so e na mua ni iwase me vakayaloqaqataki kina na veivosaki vakalasi. Na nomu dikeva rawa na lesoni ni bera ni o vulica na mala ni vosa nei Peresitedi Taylor e rawa ni vakaikuritaka na nomu raica vakatitobu na nona ivakavuvuli.

E dodonu me vakabibitaki e na soqoni ni Sigatabu na ivakavuvuli ni kosipeli, na ivakaraitaki ka vakavuvulitaki kina na ivakavuvuli oqo, kei na ivakadinadina ni dina. Ni ra vakasaqara na qasenivuli na Yalotabu e na yalomalumalumu e na nodra vakarautaka ka liutaka na lesoni, e na vaqaqacotaka na nodra kila na dina o ira era vakaitavi e na lesoni. Me ra veivakayaloqaqataki na iliuliu kei ira na qasenivuli vei ira na lewenikalasi me ra dau wilika taumada na wase ni vola ni bera ni veitalanoataki e na Sigatabu. Me ra dau dusimaka vei ira na lewenikalasi me ra kauta mai na nodra ivola ki na nodra soqoni ka me ra rokova na nodra vakavakarau na lewenikalasi e na nodra veivakavulici mai na ivakavuvuli nei Peresitedi John Taylor. Ni ra sa wilika rawa na lewenikalasi na wase ni vola, era sa na vakarau me ra vakavulica ka veicuqeni cake vakaiira.

E sega ni ganita se vakaturi me ra volia na lewenilotu e so tale na ivola se idusidusi me tokona na iyaragi sa tu rawa e na ivola oqo. Era sa vakayaloqaqataki ga na lewenilotu me ra dau goleva na ivolanikalou ka sa vakaturi e na kena vakuri na vulici ni ivunau.

Me vaka ni nakiti na ivola oqo me baleta na vuli yadua kei na veidusimaki e na kosipeli, e levu na wase era lewena e levu cake na ivakavuvuli mai na kena e rawa ni tarai e na dua na Sigatabu. O koya qori na vuna e na yaga sara kina na vuli e vale me da rawaka vakavinaka kina mai na ivakavuvuli nei Peresitedi Taylor

iVurevure E so ka Cavuti e na iVola Oqo

Na ivakavuvuli nei Peresitedi Taylor e na ivola oqo era vosacavuti ga mai vakadodonu e na veiivola e so. E vakavo ga kevaka e gadrevi e so na veisau mai vei koya na daunituva vosa me rawarawa kina na kena wiliki, era maroroi vakavinaka sara toka ga e na veimalanivosa oqori na veiicegu, kei na matanivola lelevu, na ituvatuva ni matanivola mai na kena a volai taumada. Oqori na vuna era na raica kina na dauwiliwili ni na basika na duidui e na loma ni vola.