Wase 2

Na Kosipeli Tawamudu

E a sega tu ni kilai na kosipeli tawamudu … me yacova ni sa qai vakatakila mai na Turaga mai lomalagi mai na domona na nona agilosi, ia ni da sa rogoca na veivakavuvuli oqo ka da ciqoma ka muria eda sa na qai rawata na ivakavuvuli ni bula tawamudu.¹

Na Bula nei John Taylor

Ena yabaki 1836 mai Toronto, Canada, era a sota kina vakavica e na dua na macawa o John Taylor kei na vica tale me ra vulica na iVolatabu ka segata me ra kila na dina. Era vakabauta matua sara na nodra soqoni vata tale na Isireli, na isolisoli ni Yalo Tabu, na veiliutaki vakatui ni iVakabula e na yabaki udolu, na nodra guti na iapositolo kei na parofita, kei na bibi ni kena qaravi na veicakacaka vakalotu mai vei ira ka taukena na kena lewa mai Vua na Kalou. Ia e na gauna koya era a sega ni kila e dua na Lotu ka vakavulici na veika oqo. E na nodra vakasaqara na dina, e kaya kina o John Taylor, “Keimami masu vua na Turaga ka lolo ka masuta me vakavulica vei keimami na Kalou na ivakavuvuli dina, ni na vakalesuya mai na kosipeli makawa ka savasava, ka ni kevaka e tiko e vuravura e dua na lotu dina me vakauta mai kivei keimami e dua na italai.”

A saumi na nodra masu e na nona yaco mai o Parley P Pratt. Ni a se bera ni lako e na nona kaulotu o Elder Pratt, a parofisai vua o Elder Heber C Kimball, “oqo na loma ni Turaga mo lako ki Canada, era tiko mai kea e so na tamata era sa vakasaqara tiko vagumatua na dina, e vuqa vei ira era na vakabauta na nomu vosa, ka ciqoma na kosipeli.”

A tekivu vunau mai Toronto o Elder Pratt, ka dede vakalailai e a veivakilaitaki vei John Taylor kei ira era a vuli vata tiko kei koya. E a qai vola kina e muri o John Taylor: “Keimami a rekitaka vakalevu na nona ivunau, ia ni tukuna na nona ivakadinadina me baleti Josefa Simici kei na iVola i Momani keimami a sega ni kila na ka me keimami tukuna. Au a vola e walu vei ira na imatai ni ivunau e a vunautaka ka veidutaitaka kei na ivolanikalou. Au a dikeva talega na ivakadinadina me baleta na iVola i Momani ka wilika na Vunau kei na Veiyalayalati. Au a vakayacora tiko na ka oqori vakawasoma me tolu na macawa ka’u vakamuri Baraca Parley voli e veivanua e lakova.”²

E a qai vakadeitaka e muri o John Taylor ni sa vakalesui mai na kosipeli tawamudu. E a papitaiso e na I ka 9 ni Me 1836. E dau rekitaka na vakavulica na dina tawa veisau ka tawamudu ni kosipeli, e na gauna ni nona daukaulotu, iapositolo, ka vakakina e na nona ilesilesi vaka-Peresitedi ni Lotu.

iVakavuvuli nei John Taylor

E vukei keda na kosipeli meda rawata na ituvaki ni Kalou ka vakavakarau ki na bula vakacerecerei.

Eda vakabauta, taumada, o keda na Yalododonu Edaidai, na kosipeli, oqo e dua na ka bibi me da tukuna ka vakananuma, ka ni ra tu e na kosipeli na veivakavuvuli ka titobu sara, ka okati kina na veika e vuqa, ka rabailevu sara na vanua e yacova mai na veika eda rawa ni vakasamataka. Na kosipeli e vakavulica vei keda na bula kei na ituvaki ni Kalou. E vakavuvulitaka talega vei keda na keda isema vua na Kalou oqori, kei na veitavi bibi e so e noda me vaka ni da luvena. E vakavulica vei keda na veilesilesi kei na itavi e noda me baleta na noda matavuvale kei ira na noda itokani, ki na itikotiko, vei ira na bula kei ira na mate. E vakatakila vei keda na veivakavuvuli me baleta na veigauna sa bera mai. Me vaka na nona vosa e dua na tisaipeli makawa, “e vakatakila mai na dina ni bula kei na bula tawamate rawa,” [raica 2 Timoci 1:10] e vakaveiwekanitaki keda kei na Kalou, ka vakarautaki keda ki na bula vakacerecerei e na vuravura tawamudu.³

Na Kosipeli e solia vua na tamata me veitaratara kei na Kalou, na Tamada Vakalomalagi; na Kosipeli oqo e vakatakila na rarama ni bula vakatukatuka; e kacivaki na kosipeli oqo me yaga vei ira na tamata kecega e na veiyasai vuravura kecega…. e dua na itukutuku ni veivakabulai kivei ira na veimatanitu e vuravura…. E dau kauwaitaka na Kalou na nodra tiko vinaka na kawatamata, oqo na vuna e tauyavutaka kina e vuravura na veivakavuvuli vakalomalagi—oqo na Kosipeli ka a kaukauwa e na kedra maliwa na Kalou e na veivuravura tawamudu, ka ra lewena na ivakavuvuli ka ra nakiti me ra laveti cake, vakaturagataki, ka bula vakacerecerei kina na kawatamata.⁴

E tawamudu ka tudei na kosipeli

E duidui ka rawarawa na kena kilai na ivakavuvuli cecere me baleta na dina…. Era yacova yadua yani na veitabagauna e liu, era tu edaidai, ka ra tadodo yani ki na veigauna ka se bera mai. Era umani koto e na kosipeli na dina kece sara, me baleta na nodra vakabulai na kawatamata, oqo na vuna e tukuni kina e na ivolanikalou ni kosipeli tawamudu ….

… Na Kalou, vaka kina na Luvena o Jisu Karisito, e duadua tu ga mai na siga e na noa, edaidai, ka tawamudu.” [1Nifai 10:18] E dua ga e na vuku, dua ga e na savasava, dua ga e na nona cakacaka, nona ituvatuva kei na nona lalawa; ni vakalekalekataki o koya, e sega ni veisau. Ka’u vakabauta ni kevaka me ra na rairai mai i vuravura e na itabagauna oqo o ira na Yalododonu era a dau veitaratara vata kei koya e na veitabagauna makawa, era na raica na ivalavala vata ga ni veitaratara, na ivalavala vata ga ni kena soli na vuku, kei na ituvaki vakatamata sega ni dauveisau vata ga ka a tu e na 1,800, 4,000, se 6,000 na yabaki sa oti.

E dina sara ni dredre vua na tamata e na veigauna kecega me ciqoma ka taleitaka na itagede ni rarama, dina, kei na vuku era a dau rawata e na veigauna tale e so. E na so na gauna e na vuku ni veika e na vakasuka na Kalou na rarama ni Nona iserau—na nona YaloTabu—na rarama kei na vuku ka vu mai vua—e na dua na kena itagede mai na kawatamata, ia na nona lawa e sega ni veisau ka ni o koya na bula ka sega ni veisau rawa.

Na dina e sega ni veisau. Na veika e a dina e na 1,800, 4,000, se 6,000 na yabaki sa oti e na dina tiko edaidai, kei na ka a lasu e na itabagauna cava ga ni vuravura e lasu talega edaidai. Na dina, me vakataki koya na Iloimi cecere, e tawamudu ka sega ni veisau, ka sa noda itavi meda vulica na kena ivakavuvuli, me da kila na sala meda taleitaka, ka bulamuria.

Me vaka ni dua na ivakavuvuli ka vu mai vua na Kalou na kosipeli, me vakataki koya a tauyavutaka, na kosipeli e duadua tu ga “mai na siga e na noa, edaidai, ka tawamudu,”—tawamudu ka sega ni veisau. A vakavuna na Kalou ni ra se bera ni ra sere vata e na marau na kalokalo ivolasiga, se ni se bera ni buli o vuravura, me baleta na nodra vakabulai na kawatamata. E a tu e na vakanananu ni Kalou, na levu ni kena vakadikevi vakamalua sa qai vakatakilai mai ni sa dua na ituvatuva tawamudu, sega ni veisau ka sega ni veivukiyaki me ra vakabulai, vakalougatataki, bula vakacerecerei ka rokovi kina na kawatamata.⁵

Na kosipeli vata ga oqo e a vunautaki vei Seci, kei ira kece na tamata ni a bera ni luvuci o vuravura, o ira na Peteriaki, ka ra a veiqaravi e na kena dodonu. E na kena kaukauwa, me vaka eda sa raica oti, e a kau bulabula kina o Inoki kei ira na nona tamata. E a volai me baleti Noa: “A sa lesi Noa na Turaga ka vakarota me lako yani ka vunautaka na itukutuku vinaka vei ira na luve ni tamata; raica oqo na ka vata a lesi vei Inoke.” [Mosese 8:19] Ka kena ikuri, meda cavuvosa mada mai na ivakadinadina i Noa ni se bera na waluvu: “A sa ia tikoga na vunau vei ira na tamata ko Noa ka kaya: Mo dou rogoca mada ka muria na noqu vosa. Dou vakabauta ka veivutunitaka na nomudou ivalavala ca; ia mo dou papitaiso e na yaca i Jisu Karisito na Luve ni Kalou me vakataki ira na noda qase; ia e na qai soli vei kemudou na Yalo Tabu, ka na vakatakila vei kemudou ko Koya na ka kecega; ia kevaka dou sa sega ni muria na ivakaro oqo, e na vakarusai kemudou na waluvu.” [raica Mosese 8:23–24.]

Mai na ivakaraitaki oqo eda vulica kina ni ivakavuvuli ni Kosipeli e na imatai ni itabagauna ni vuravura era tautauvata kei na kena era vakavulici e na noda itabagauna.

E tomani tiko na Kosipeli kei na Matabete Tabu mai vei Noa kivei Eparaama. A ciqoma o Eparaama na matabete mai vei Melikiseteki, o koya ka a ciqoma mai na nodra ituvatuva na tamana, me yaco sara vei Noa.” [V&V 84:14]… Na kila ka kei na vakatovotovo ni Kosipeli a vakadewai mai vei Aisake, Jekope, Josefa, kei ira na Peteriaki tale e so, me yacova sara na gauna i Mosese….

Na kosipeli vata ga oqo a vakarota na Dauveisereki vei ira na Nona tisaipeli me ra vunautaka, ni a “kaya vei ira Dou lako yani ki vuravura taucoko ka vunautaka nai tukutuku vinaka kivei ira na tamata kecega. O koya sa vakabauta ka papitaisotaki e na bula: ia e na cudruvi ga ko koya sa sega ni vakabauta; ia na veivakatakilakila oqo era na cakava ko ira sa vakabauta: Era na vakaseva tani na tevoro e so e na yacaqu; era na vosataka na vosa ni veivanua tani, era na tomika cake na gata e so; ia kevaka era gunuva na ka e gaga sara, era na sega ni ca kina; era na tabaki ira talega na tauvimate e na ligadra, a ra na bula kina.” [Marika 16:15–18.]…

Me vaka eda raica e na siga ni Penitiko, na iApositolo liu,o Pita, ni sa sauma na nodra kerekere na lewevuqa era vakabauta, “Kemudou na tagane, a cava me da kitaka?” e saumi yani e na vosa sa cavuti oti: “Mo ni veivutuni ka papitaisotaki, koi kemudou yadua, e na yaca i Jisu Karisito, me bokoci kina na nomudou ivalavala ca, ka dou na rawata na Yalo Tabu me isolisoli. Ni sa caka vei kemudou na vosa ni yalayala vei ira talega na nomudou gone, kei ira vakayadua ga era sa vakayawa, io, vei ira vakayadua ga e na kacivi ira vua na Turaga na noda Kalou.” [raica Cakacaka 2:37–39]

Io o koya vata ga na Kosipeli tawamudu sega ni veivukiyaki ka sega ni dau veisau ka a vosa kina vakaoqo o Joni na iApositolo e na kena vakalesui mai:

“Ia ka’u a raica e dua tani tale na agilosi sa vuka e na maliwa kei lomalagi kei vuravura, a sa taura na itukutuku vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata, ka sa kaya e na domo levu, Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka a buli lomalagi, kei vuravura, kei na wasawasa kei na ivurevure ni wai.” [iVakatakila 14:6–7]

Mai na iVolatabu me da goleva mada na iVola i Momani, e na veidrauna eda na kunea kina ni Kosipeli vata ga ka ra a vakaroti ira kina o Jisu na Nona tisaipeli me ra lako yani i vuravura taucoko ka vunautaka, a vunautaki e na vanua oqo, mai na veitabagauna e liu sara. Era a kila na Jeretaiti mai na ivakatakila ka a soli vua na taci Jereti; e dua vei ira a kaya kina vua ko Jisu

“Raica, sai au ga sa vakarautaki tu mai na ivakatekivu kei vuravura me’u vakabulai ira na noqu tamata. Raica sai au ko Jisu Karisito. Sa i au na Tamana kei na Luvena. Sa i au na nodra rara-ma na tamata kecega sa vakabauta na yacaqu ka tawamudu; ia era na yaco me luvequ tagane kei na luvequ yalewa.” [Ica 3:14]…

Ni a basika o Jisu vei ira na Nifaiti, e a vunautaka na ivakavuvuli vata ka a vunautaka taumada vei ira na Jiu, ka vakuria e na veigauna e so mai na veika dina tale e so, me baleta na nodra vakabauta na tamata ka ra cavuti e liu, “A sa vakamacalataka na ka kecega mai na ivakatekivu me yacova ni sa lako tale mai e na nona iukuuku.” [raica 3 Nifai 26:3.] E kaya kina e na maliwa ni veika tale e so, “Ia ko koya yadua sa rogoca na noqu vosa ka veivutuni ka papitaiso, e na vakabulai. Dou vulica na nodra ivakavuvuli na parofita ni ra sa tukuna vakaidina na veika oqo.” [3 Nifai 23:5]

Ka sa ikoya talega na Kosipeli vata ga oqo, ka salavata na kaukauwa kei na yalo vata, ka vakalougatataki mai na veivakauqeti vata ga, ka liutaki mai na Matabete vata, sa vunautaki tiko oqo i vuravura taucoko me ivakadinadina.⁶

E liutaki keda na kosipeli e na dua na sala ni reki, tubu cake, kei na galala.

Na ivakavuvuli ni kosipeli e sega ni yaga se vakaibalebale vei ira na sega ni vakabauta. Ia vei keda eda vakabauta, e kilai kina na veika kece sara e baleta na nodra tiko vinaka na tamata e na gauna oqo ki na tawamudu. Kivei keda na kosipeli sa i koya na oliva kei na omeka, na kena itekivu kei na kena iotioti. Era tiki bibi sara ni noda marau, na veika eda taleitaka, kei na ka eda rekitaka, se e na bula oqo se na bula sa bera mai.

Eda vakabauta ni da sa mai lewena na Lotu oqo ka mai vakayacora na veiyalayalati vou ka tawamudu, e sa dua na bula ni veiqaravi ka na tara yani na noda isema ni veiwekani kece sara e na bula oqo kei na tawamudu. Ia ni da sa tubu ka toso tiko, e sa na yaco me matata, ka dina, bula, rawa ni da tara ka matata ki na noda vakasama, na veivakasama ka a buwawa ka katabokoboko liu, ka da na qai kila ni da sa luvena tagane ka luvena yalewa na Kalou, eda matataki lomalagi. Eda vakila ni sa vakatakila mai vei keda na Kalou na kosipeli tawamudu, ka umani vata kaya na veiyalayalati tawamudu kei na veiwekani.

Na kosipeli, e na ivakatekivu ni kena cakacaka, a tekivu, me vaka e tukuna na parofita ni dodonu me vakakina, “me vagoleya na lomadra na qase vei ira na gone kei na lomadra na gone vei ira na qase.”[raica Malakai 4:6.] E sega tale ni dodonu me da taroga, me vaka e liu, “O cei o au?” “Au gole tiko i vei na vanua?” “Na cava au mai cakava eke?” se “Na cava na inaki ni noqu bula?” ka ni dei vinaka tu na noda kila na veika oqo. E vakamatatataki vei keda mai na vua ni kosipeli. … Ni da kila na veika oqo kei na vuqa tale na veika e tautauvata e vakavuna meda muria na sala eda lakova tiko. Oqo na veika e tarovi keda mai na veitemaki ni veivakasama, na veivakidacalataki, vakatutu kei na yalowai ni tamata

Ni da sa vakararamataki mai na yalo ni dina tawamudu, ni da sa vakaivotavota mai na Yalo Tabu, kei na noda inuinui ni sa curu sara ki loma ni ilati, na tikina ka sa curuma na Karisito,o koya e liu vei keda, ni da kila ni da sa luve ni Kalou ka ni da sa cakacaka tiko e na ka kecega ka da veidusi i na tawamudu, eda saga tikoga na noda inaki ka da sega ni kauwaitaka na nodra veivakadonui se sega na tamata.⁷

E sa solia vei keda na Kalou na kosipeli kei na matabete levu, ka sega ni kena inaki me vaka na nodra nanuma e so, me vesuka na tamata e na veivakabobulataki se me lewa vakasaurara na vakatulewa ni tamata, ia me vagalalataka ga na tamata me vaka ni galala na Kalou; me rawa kina ni ra gunu mai na uciwai ka “vakamarautaka na koro ni Kalou,” me rawa kina ni ra laveti cake ka sega ni biu sobu; me rawa kina ni ra vakasavasavataki ka sega ni vakacacani; me rawa kina ni ra vulica na lawa ni bula ka lako voli kina, ka sega ni lako e na sala ni ca me ra mate kina vakayalo

E na vuku ni kosipeli i Jisu Karisito eda sa semati kina kei na Kalou. Me vaka e kaya e dua vei ira na iapositolo ni gauna makawa: “Oi kemudou sa lomani, eda sa qai luve ni Kalou, ia sa sega ni rairai se da na vakaevei mai muri: oqo ga eda sa kila, ni na rairai mai ko koya, eda na tautauvata kaya; ni da na raica na matana dina.”[raica 1Joni 3:2] E Tamada na Kalou, ka sa tadola tu e na keda maliwa kei na Kalou e dua na sala ni veitaratara; eda sa na vakarau tu me da ciqoma na veivakalougatataki mai Vua, ka vulica me da kila na veivakavuvuli dina me baleta na noda vakabulai yadua, ka vakakina na vakabulai ni kawatamata, e na veigauna kece eda bulataka tiko kina na noda lotu.⁹

Eda sa ciqoma oti na kosipeli tawamudu, na kena vata ga ka a tu e na gauna nei Jisu; sa i koya oqo e sa vakararamataka na noda vakasama, vakalevutaka na noda guta na rawaka, ka solia vei keda e so na kila ka me baleta na veigauna sa oti kei na veigauna ki liu, ka sa vakatakila kina vei keda na inaki ni Kalou, ia mai na kena ivakarau, kei na tauyavutaki ni matabete eda sa vakalougatataki kina, vakabulai, taqomaki, ka tuberi me vakataki keda edaidai.¹⁰

Vakatutu ni Vuli kei na Veivosaki

E vakamacalataka vakacava na kosipeli o Peresitedi Taylor? E na duatani beka vakacava na noda bula kevaka meda a sega ni kila na kosipeli? Na veika cava soti beka o sa sotava ka vakaraitaka na ivakavuvuli ni kosipeli e veilaveti cake, veivakaturagataki, ka veivakacerecerei ki na kawatamata.”?
E vukei keda vakacava na kosipeli me da kila na ituvaki ni Kalou kei na keda isema Vua? Na cava e yaga bibi kina na kilaka oqo ki na noda vakabulai? (Raica talega Joni 17:3.)
E na rawa vakacava me vukei iko mo kila ni kosipeli e tawamudu ka sega ni dau veiveisau? E na vukei iko vakacava na nomu kilaka oqo me vakauqeta na nomu vakabauta kei na nomu vakatulewa?
E vakavulica o Peresitedi Taylor ni inaki ni kosipeli me “vagalalataki ira na tamata kecega” E vagalalataki keda mai na cava na kosipeli? E vagalalataki keda meda cakava? E rawa vakacava me da vukei ira na tani me ra kila ni kosipeli e kauta mai na galala ka sega na veitarovi?
Na cava o sa vakayacora mo rawata kina na ivakadinadina ni kosipeli? Na cava soti o sa sotava e vaqaqacotaka na nomu ivakadinadina? Na cava e rawa ni da cakava me vakadeitaka na kena “tiko ga vata kei keda” na ivakavuvuli ni kosipeli?
E kauti keda vakacava na kosipeli ki na “dua na veisemati kei na Kalou”?

Tiki ni iVolanikalou ka Veisemati: Joni 8:31–32; 2 Timoci 1:8–10; 1 Nifai 10:18–19; 3Nifai 27:13–22; Yavu ni Vakabauta 1:4