Wase 7

Yalodina

Me da saga me da savasava, me da saga me da bula dodonu, me da saga me da kilikili, me da maroroya na noda yalodina, me da cakavinaka i na tamata kecega, ka vosa dina e na gauna kece, ka veiqaravi e na noda dina kece.¹

Na Bula nei John Taylor

Ea vakasakiti e na bula nei John Taylor na nona yalodina ka ivakaraitaki vei ira kece era kilai koya kei ira era veiqaravi vata kei koya e na Lotu. E na siga ka tarava na nona mate e na Jiulai 1887, erau a volavola e na Deseret News na nona daunivakasala o George Q. Cannon kei Joseph F. Smith me rau vakasala raraba e na nona sa takali. E dua na tiki ni vakasavu itukutuku e vakamacalataka na itovo divi kei na nona yalodina na parofita lomani oqo:

“E kunekune dredre na tamata ka bulataka na itagede ni yalodina kei na taucoko ni ivakaraitaki ni nona bula savasava vakayago ka vakayalo me vakataka na noda Peresitedi lomani ka sa qai takali. E sega ni kila na yalolailai e na cakacaka ni Kalou. Ia e na matadra na tamata dauvakasausa, kei na veigauna tale e so ni vakarerei na nona bula, kei na gauna e basika kina na veitulevaki ki na tamata e na matanalevu, e sega vakadua ni [taqaya]—e na gauna kece e vakaraitaka na yaloqaqa kei na yalodua. Na Yalododonu yadua e sa dau kila rawa e liu, e na so na gauna e vinakati na tudei kei yaloqaqa, na tikina e na kune kina o Peresitedi John Taylor kei na itautau ni domona e na gauna o ya. E qarava vakadodonu na veika e sotava, e na doudou kei na sala e vakavurea na qoroqoro vei ira era raica ka rogoci koya. E sega ni liaci na nona yaloqaqa, e dei vakavatu na nona dina ka rua na nona itovo ka kilai raraba. … Oqo e dua na tagane era vakabauta kece na tamata.”²

iVakavuvuli nei John Taylor

Na ibalebale ni yalodina na bulataka vakadodonu na ivakavuvuli ni dina kei na yalosavasava.

Me da tagane ni veika dina, rakorako kei na yalodina—tagane ka ra bubului ni da bolea na mavoa ka na sega ni veisau—tagane ka vauci ira na nodra vosa. … Eda tovolea tiko me da bucina e dua na kawatamata ka ra tagane ni Kalou, tagane ni dina, tagane yalodina, tagane bula dodonu, tagane era na kilikili me veimaliwai kaya na Veikalou e na vuravura tawamudu.³

E nakita na Kalou me ra nona tamata ka tagane liga savasava ka yalo savsava, ka sega ni guta na veitemaki, … ka ra tagane era na maroroya na dina kei na yalodina, ka rakorako ka yalo dodonu, ka ra na vakaqara na sala ka sa vakadonuya na Kalou e na veivuravura tawamudu, vata kei ira kece na tagane dauveidokai ka yalo savasava ka ra a bula e na dua na gauna se ra bula tiko edaidai, ni da sa ciqoma vakaikeda na ilesilesi ni Yalododonu, sega e na yaca walega, ia e na noda vakasama taucoko, noda ivosavosa kece kei na noda ivakarau.

Na leqa e tiko vei keda o ya na noda taleitaka na veika vakavuravura, ka levu sara na veiitovo vakavuravura sa kabita na yaloda; na yalo ni kocokoco kei na guta na ca, vata kei na—na cava li na kena itukutukuni—lasulasu e sa tete me vaka na matetaka rerevaki e na balavu kei na raba kei vuravura taucoko, ka da sa vakalaiva na kena yalo me kabiti keda e na kena veiivakatagedegede e so. Me vaka na matetaka e sa yamaraka na veitagede kece ni bula vakaitikotiko; e sa yaco edaidai eda sa sega ni qaravi mai na itagede cecere, vakaturaga, ka ivakavuvuli rakorako ka bula vata kei na Kalou, ni da sa taleitaka na ivalavala lolovira ka sa volai ni vu ni ivalavala ca [1 Timoci 6:10]; ni da sa sega ni lomana na Kalou, eda sa domona na veika vakavuravura, na kena veika ni lasa ka sega ni dei. … Vakaraitaka ki na vuravura, vei ira na agilosi kei na Kalou ni o iko o tovata kei na dina kei na dodonu, savasava kei na yalodina, ni o iko o tovata kei na Kalou kei na Nona Matanitu.⁵

Guilecava na vuaravura se na veika era rawa ni tukuna, ni ra rawa walega ni kitaka na veika e vakatara na Turaga mera kitaka. … Eda na vunautaka vei ira na kosipeli, ka tosoya tiko ga na yalayala ni ivakavuvuli ni dina, ka tuvani keda e na ituvatuva ni Kalou, ka vakasaqara me da duavata—ni kevaka eda sa sega ni duavata eda sa sega ni nona na Turaga ka na sega ni vaka kina, ka sega ni mudu. Mo ni rogoca, na Yalododonu Edaidai! Me da kakau ni vakalevulevui keda vakaikeda se na noda taracake na noda iyau kei na itutu vakavuravura, ia me da vakasamataka me da kaya e yaloda, “Na cava e rawa me’u cakava me’u tarai Saioni cake kina. Au sa tu oqo, na veika kece au taukena e sa koto e na icabocabo ni soro, au sa vakarau me’u cakava na lewa ni Kalou ka veitalia ga se cava, se evei na vanua e vakauti au kina, i na iyalayala ni vuravura se sega.” Ia eda se bera ni yacova oqori; eda se saga tiko ga na veika eda gadreva vakaikeda ka taleitaka na veika vakavuravura, ka veibaleyaki e na noda qarava na kena ivalavala. Ia ni da sauca na vuravura ka nuitaka me yaco kina na marau, eda sega ni rawa ni biuti keda me liutaki keda. Na Kalou e Turaga ka noda Kalou; o Koya me noda tui ka daunilewa, ka me vakatulewa ki na noda bula.⁶

Na ibalebale ni yalodina me da dina vua na Kalou, veikeda vakaikeda, kei keda yadudua.

E dua na ivakavuvuli levu me idusidusi, au nanuma, me da vakamuria e na noda lotu, me ulu ni veika kece eda cakava e na bula oqo, o ya na dina ni noda inaki. E kaya na ivolanikalou— “Kevaka e na sereki kemudou na dina dou sa na sereki dina, na luveni Kalou ka sega ni beitaki me ca, e na kedra maliwa na itabatamata takelo ka loma vakatani.” [Raica Joni 8:32,36; Filipai 2:15.] E sa tukuni tale vei keda ni Kalou e vinaka na dina e na yaloda [raica Same 51:6]. E dodonu na tamata me ra dina vakaira, ka ra dodonu e na nodra veimaliwai e na nodra vosa kece, veivosaki, veitalanoa, veivosaki e na bisinisi kei na veika kece sara; e dodonu mera veiqaravi e na veidinadinati, dina taucoko kei na yalodina, ia na tamata e sega ni dina vakaikoya e tamata lialia dina sara ke dina e na veika e nanuma ka dina e na veika e baleta na nona lotu.

Eda rawa ni da veilasutaki … me vaka na ilavo lasulasu ka vakayagataki me nanumi ni ilavo dina ka saumilevu e na kedra maliwa na tamata. Ia na Kalou e dikeva na yalo ka vakatovolea na veika e guta na luve ni tamata [raica Jeremaia 17:10]. E kila o koya na noda vakasama kei na noda gagadre kei na lomada; e kila o koya na noda cakacaka kei na noda inaki ka a vakavuna me da a kitaka; e kila kece o koya na veika kece eda cakava kei na noda ituvatuva na kawatamata, ka vaka kina na noda vakasama vuni kei na cakacaka kece ni luve ni tamata, era kune votu e matana, e na vukudra e na vakairaitaka o koya e na siga ni veilewai.⁷

E dodonu me da dina vakaoti, e na noda veimaliwai yadudua, kei na tagane kecega; na noda vosa me vinaka me vaka na veidinadinati vakaivola; me da kakua ni vakaraitaka na qaciqacia kei na dokadoka; me da yalo malumalumu, vakalolovirataki keda; ka vakasinaiti keda e na yalodina kei na veivakarokorokotaki; ka cakacaka vakadodonu ka savasava vei ira kece na tagane.⁸

Kevaka e dua na tamata e dinautaka e lima na dola e dodonu me solia e dua na kena ivakadei, ni rerevaka o koya e solia na ilavo ni na lasutaki. E sa sega na veidinadinati ni tagane e na nodra dui vosa. Kevaka au sega ni nuitaka e dua na tamata, au na sega ni vakabauti koya. E sega na nona dei, sega na nona yavu, e sega na dina me vauci koya. Ia o ira na tamata sara ga vaka oqo e kaya na parofita e dodonu mera bula e na iotioti ni siga. Era veiyalayalati ka kila ni ra na sega ni sauma. Na nodra vosa e sega na kena bibi, e sega ni ra nuitaki.

Au vosataka na veika oqo mo ni kila, ni oqo na itutu ni vuravura edaidai. Eda sega li ni okati kina? E vaka kina—au nuitaka ni da sega ni coko kina. Au nuitaka ni levu cake na dina, yalo dodonu, yalodina kei na vosadina, ka levu cake na veivakavuvuli e na keda maliwa ka nakiti me veilaveti cake ka vakaturagataka na kawatamata. Au vosataka na veika oqo e na madua e na vuku ni kawatamata; kevaka era tiko e na keda maliwa na Yalododonu oqo e dua na ivalavala vakamaduwa, ka dodonu me da kidrowataka; e baleta ke dua e na vuravura e dodonu me tagane yalodina, dina ka dauvosa dodonu, oqo o keda, e vanua kecega kei na gauna kecega. Kevaka eda kaya ni dua na ka e kilikili me vakabauti ni da sa bubuluitaka, me da raica me vaka eda sa vauci vakatini na udolu me da raica me na yaco.⁹

Na cava eda vakabauta? Eda vakabauta na savasava, na yalo dodonu, na dina, yalodina, e na vosa vakadodonu kei na sega na lasu; eda vakabauta me da veimaliwai kei na tagane kece e na ituvatuva dodonu, veivakarokorokotaki; eda vakabauta me da lomana na Kalou, talairawarawa ki na nona ivunau. Eda cakava taucoko tiko? E sega, e vakatikina. Au nuitaka eda cakava tiko. Ia e dua na iwasewase levu ni Yalododonu Edaidai era sa cakava tiko; ia kevaka e tiko e so era se sega tiko ni kitaka, mera veisautaka na nodra ilakolako. … Na inaki ni noda tiko eke me da tarai Saioni cake, e nuitaka o Koya me da duri vakadodonu ka veidokai e na noda veimaliwai kece sara yadudua kei ira kece na tagane.¹⁰

Me tu veikeda na yalodina me da vorata na ivalavala ca ka tara na matanitu ni Kalou.

Eda bula e na gauna dredre ka bibi. E na so gauna e so na tagane era kurabui ni ra raica na veidabui, ivalavala ca kei na dukadukali, na tokitani mai ni vosa dina kei na yalodina, vata kei na itovo sakasaka ka buroro volivoliti keda; ia na cava vuna mera ku rabui kina? … A sa sega li ni vunautaki vei keda ni veimatanitu e vuravura era taukena na tikitiki ni veivakarusai e lomadra ka ra na yaco mera kasura? Ni da raica na veidokai me sa buturaki sobu e yavadra, e tucake vakayawa sara na yalodina kei na ivalavala dina, ia o ira na dukadukali, veivakasaini kei na codro (se talaidredre) era qarava na veiliutaki, eda rawa ni namaka na imatau me biu volekata na vunikau kei na [vunikau] e sa tola na lomana ka voleka me na bale [raica V&V 97:7]. O koya oqori e sa na yaco e na veimatanitu edaidai. Eda a sa namaka na veika oqo me yaco, ka ra na ca vakalevu sara mai na kena edaidai. Ia eda sa tekivu vakavulica tiko na ivakavuvuli dodonu.¹¹

Eda sa bula tiko oqo e na icavacava ni itabagauna, ni sa tekivu me kumuna na Kalou na veika kece me dua, ka sa kauti keda mai na veimatanitu, veivanua, dui draki kei na veimatatamata. Na cava na vuna? Me vakalialia keda? E noda inaki li me da bula me vakataki ira na dukadukali—me da “kocokoco, dautukutukuni koda, dokadoka, dauveivakacacani, talaidredre vei ira na itubutubu, veivakasesei, lewa vakaikeda, vakalialiai ira era cakavinaka, me rawati na itutu vakalou ka sega na lewa?” [Raica 2 Timoci 3:2–5.] E sega, eda lako mai me da mai vulica na lawa nona sa Kalou Cecere, ka vakarautaki keda vata kei ira na noda kawa ki na itikotiko vakaturaga, veimatanitu, turaga sa liu kei na turaga sa kaukauwa e na matanitu selesitieli ni noda Kalou.

Eda veivosatakitaki Saioni e na so na gauna, ka me na tara mai na tikina o Jackson; vaka kina o Jerusalemi vou ka me na tara ka vakarautaki me sota kei Jerusalemi ka na lutu mai lomalagi. E vakaevei na noda bula kei na ivakarau ni vakatautauvatataki kei na veika oqori? E vakaevei na yaloda, vakasama kei na vakanuinui eda namaka, se da guiguileca baleta ni da vakawelei e na veika e baleta na gauna kei na veika eda sotava?

Eda sa vakarautaki ira tiko na luveda me baleta na gauna oqo, ka vakatetea na nodra veikilai e na veitikina kece era lakova me ra liutaki ira na tamata kina sala ni bula ka laveti ira vua na Kalou? Se da sa muria e dua na sala tani—e sega kina na vakavakarau, me waraki ga se cava e yaco mai? Au nanuma ni dodonu me da dikeva na cala e kune e na noda bula ka vakaitavi sara me da le wa na noda bula, ka tovolea me da muria na sala ka vakadonuya na Kalou Cecere. …

E dodonu me da vakarautaki ira na noda itabagone me ra vakamuria na we ni yavada, kevaka era dodonu, me rawa kina mera lewenivanua rokovi, ni da sa biuta na vuravura oqo ka toki i na kena ka tarava, eda sa biuta tu mai na [noda kawa] ka ra vakasinaiti e na yalodina, ka ra na maroroya na ivunau ni Kalou. Me da vakavulica vei ira na luveda na yalomalumalumu kei na vakarorogo, yalodina, yalo savasava kei na lomana na Kalou, me rawa kina ni ra vakavulica vei ira na luvedra. … Vakasaqara mo qisia i na lomadra na nomu itabagone na ivakavuvuli ka vakavurea na vakarokoroko, sinai e na ivakavuvuli vakaturaga, vuku, yalo dodonu, yalo malua, tagane kei na yalewa savasava, vakasinaiti e na yalo dina kei na dauvosa dodonu … me rawa kina o ira vata kei iko mo ni rawata na matanitu ni Kalou.¹²

E na so na gauna eda guilecava, ni da vakaitavi, kei na vuqa tale, e na noda tauyavutaka na yalo savasava na matanitu ni Kalou e vuravura; ka yaco kina me da vakaraitaka na ivakarau masamasa ka guiguileca na noda ilesilesi tabu ka cecere eda sa lesi kina. E vuqa vei keda e rawai e na veitemaki; eda tataivatia ka curu i na butobuto, ka vakayalia na Yalo ni Turaga. Eda guilecava ni Kalou kei ira na agilosi era wadravi keda; eda guilecava na yalodra na tamata yalododonu kei ira na noda qase, ka ra waraka na kena tauyavutaki na matanitu ni Kalou e vuaravura, era wanonovi keda, kei na veika eda cakava e tadola tu vei ira era vakatarai ka vakadonui e na vuravura sa tabogo.

Ia, ni da guilecava na veika oqori, eda vuki me vaka na yalowai, e rarawa kina na Yalo ni Kalou; ka lako tani, ka da sa mai biu tu e na butobuto ka vakayayamo. Kevaka eda rawa ni bulataka na noda lotu, lomana na Kalou, ka dina e na ka kece sara, vakamuria na nona lawa kei na nona idusidusi, ka talairawarawa i na nona ivunau ka vakamuria, eda na vakila na kena duidui. Eda na vakila na loma vinaka ka yalo mamarau. E dodonu na yaloda me vakacegu ka mamarau. Mai keya, na noda reki e na tubu cake mai na dua na siga ki na siga ka tarava, mai na dua na macawa ki na kena ka tarava, mai na dua na yabaki ki na kena ka tarava.¹³

E na vakalougataka na Kalou na nodra bula o ira era vakaraitaka na yalodina kei na savasava.

Me baleta na veika e na yaco vata kei na veimataqali veivakatovolei, leqa, kei na rarawa eda na sotava, vei au era veika sega ni dodonu me leqataki; era sa tu e na liga ni Kalou. … Kevaka eda sa kune ni da makutu ka talairawarawa, ka da tu vata kei na Turaga e na sala ni dodonu, ni dina, kei na yalodina, yalo dodonu kei na savasava kei na vakalou, ka kabita na ivakavuvuli ni vosa vakadodonu kei na lawa ni bula, e na tiko kei keda na Kalou, ka na tokoni ira ka ra vakamuria na veiivakavuvuli oqori. … O ira kece era savasava ka yalo dodonu, era dauvakarokoroko ka kilikili, era na gumatua ka gumatua vakalevu me yacova ni ra vakaotia na itavi ka sa lesia vei ira na Kalou mera kitaka e vuravura.¹⁴

Mo ni dina vakaikemuni, dina e na mata ni Kalou. Mo ni yalododonu, vosa vakadodonu ka sinai e na yalodina, ka lomana na Turaga na nomuni Kalou, ka na vakalougatataki kemuni, na Yalona e na salavata kei kemuni, kei ira na nomuni kawa era na muri mai, ka sega ni mudu. Emeni.¹⁵

Vakatutu ni Vuli kei na Veivosaki

Mai na veika o ni sa vulica vei Peresitedi John Taylor, na cava na ibalebale ni yalodina? E na veitiki ni bula cava e na rawa kina me dredre me maroroi na yalodina?
Na cava o ni nanuma ni ibalebale moni dina vakaikemuni? vei ira na tani? vua na Kalou? Na cava e bibi kina na dina e na veikakece eda cakava e na noda bula? Eda vakalougatataki vakacava ni da dina?
Ena duidui vakacava na bula, Kevaka e sa vakadeitaka na tamata yadua me bulataka na bula ni vosa vakadodonu kei na yalodina? Na cava e na vakayacora na veivauci vaka oya i na veika o ni cakava?
Na veitemaki cava e baleta na yalodina era sotava na gone edaidai? Na cava eda rawa ni vakavulica vei ira na gone me baleta na dredre ni vosa vakadodonu kei na yalodina?
Eda rawa vakacava me da vakatautauvatataka na noda bula kei na veika eda cakava vata kei na noda nakinaki me da tara cake na matanitu ni Kalou? Na cava e bibi kina me da kitaka vakawasoma na veivakatautauvatataki oqo?

Tiki ni iVolanikalou ka Veisemati: Same 15:1–5; Vakaibalebale 20:7; Alama 41:14; V&V 10:28; 136:25–26; Yavu ni Vakabauta 1:13

Peresitedi John Taylor, rauta na yabaki 1883. E vosacavu mai vei rau na nona daunivakasala, “e vica wale sara na tagane era a bula ka ra vakaraitaka na yalodina kei na qaqa vakayago ka vakayalo ka sega ni sauriva.”