Wase 23

Dina Tawamudu

E sega na ka e talei cake vei au mai na iVakavuvuli ni dina.¹

Na Bula nei John Taylor

E dua na idivi kei John Taylor sa ikoya na nona yalodina ki na dina, se vakacava sara na nodra nanuma na tamata. “E lailai sara na kena veirawai kina vakasama nei John Taylor na veivakacaucautaki se veivakacacani nei vuravura me baleta na dina,” e a vola vakaoqo ko Elder B.H.Roberts. “Na levu ga ni noda vosa vakacacataka na [dina], na levu ni nona yalodina kina.”² Na veika e yaco e na nona a tavuki ki na kosipeli o John Taylor e vakaraitaka e dua vei ira na veivakaraitaki taumada ni nona lomana na dina.

E a vakaveikilaitaki ki na kosipeli o John Taylor mai vei Parley P. Pratt e Canada. Eratou a marautaka vakalevu na nona veivakavulici o Elder Pratt o John Taylor kei na so na nona itokani vakalotu, ka via tautauvata kei na so na nodratou vakabauta me vaka na cakacaka ni papitaiso ni tabadromuci kei na veitabaki e na liga e na isolisoli ni Yalo Tabu. Ia, e na gauna e a talanoataki Joseph Smith kina kei na iVola I Momani o Elder Pratt e so vei ira era a lomalomarua na tomana nodra vuli, ka se sega saraga ni via vakadikeva na iVola i Momani kei na kena veivakavuvuli. Ena yaloqaqa e a vosa vei iratou na ilawalawa oqo o John Taylor ka kaya;

“Eda tu oqo, me vaka ni da mai vakasaqara na dina. Ia, oqo eda sa mai vakacavara ena noda vakadikeva e so na vakabauta vakalotu kei na ivakavuvuli vaka-Momani? Na turaga oqo, o Mr Pratt e sa mai vakaraitaka vei keda e vuqa na ivakavuvuli ka salavata kei na noda rai. … ’ Eda a masulaka vua na Kalou me tala mai e dua na dautukutuku, ke tiko dina e dua na Nona Lotu e vuravura. Sa lako mai vei keda o Mr. Pratt … sega na taga ni lavo se taga ni vaqa, me vaka na nodra dau veilakoyaki na iApositolo e na gauna makawa ka sega ni dua vei keda e rawa ni vakalasuya na dina ni nona ivunau e na ivolanikalou se mai na vakadidike. Au gadreva me’u vakadikeva na nona ivunau kei na ivakadinadina me baleta na kaukauwa. … Kevaka me’u kunea ni dina na nona lotu, au na ciqoma, veitalia se cava na kena isau.” Na vakadidike matailalai nei John Taylor e vakavuna me papitaiso e nai ka 9 ni Me 1836. E a qai cavuta e muri. “Au se sega ni lomalomaruataka e dua na ivakavuvuli vaka-Momani mai na gauna ‘o ya.”³

Me vaka e dua na lewe ni Lotu ka iliuliu talega, sa dau nuitaki o John Taylor me veivakavulici ka isasabai ni dina. “E a kaburaka na kosipeli e na vuqa na vanua; ka me vaka e dua na jabeni ni dina sa dau tu vakarau me sotavi ira na saqata; o koya gona ke sotavi ira nona dauveisaqa e na dua na soqoni raraba se veivosaki, ka ra levu kina na dau saqati koya, se e na dua na tabana ni niusipepa raraba, e a dau tautauvata tu ga na nona qaqa e na nodra veidroyaki e na nona veitukutuku kaukauwa me baleta na dina.”⁴

iVakavuvuli nei John Taylor

Ko ira era lomana na dina era vakalougatataki e na kilaka kei na kaukauwa.

Nona tu e na dela ni dina oqo kei na veika me baleta ka wavoliti e na kila ni dina, na tamata ni Kalou oqo, e na vakabauta e rai matua ki liu, dolava na ilatilati ki na tawamudu, ka luvata laivi na veilati ki na veika vuni vakalomalagi, kei na rawa ni nona rai lesuva na veika sa yaco oti e delai vuravura, ka ra taura matua na inaki nei Tamada sa cecere e na kedra vakatakilai tiko mai e na kedra cecere, kaukauwa, kei na lagilagi. Ia, oqo ni da bula tiko e na gauna sa lekaleka sara ka vakadikeva tiko na veika sa oti, veika sa yaco tiko kei na veika sa bera mai, e raici koya me vaka e dua na ka bula e na tawamudu; ka vakadeitaka tiko na kedra isema kei na Kalou, ni luve ni Kalou, ka ucui tamana ka bukawaqa e na nona dela ni gauna. E sarava na vuravura kei na tamata, e na nodra veicegu ni bula kila na veika era dau vakaogai ira kina, kei ma na vuku sa solia vua na Tamana Vakaselesitieli e kila deivaki na kedra itekivu kei na kedra itinitini.

Na nona vuku vakaserautaki vakalou ka tokona tiko na kena rabailevu, me vaka na vuravura ka rabota yani na maliwa lala, nona lawa, na lawa ni loloma; nona lawa, na lawa ni dodonu veikeda kece. E daulomana na kainona ka kitaka vua na veika vinaka; e lomana na nona Kalou ka qaravi koya; e raica na kaukauwa ni dina, ka me vaka na rarama lagilagi ni Kalou ka rabota yani na maliwa lala, ka tababokoca na veivuravura, ka basika yani ki na veivanua era kilai vua na tamata, agilosi, Kalou se vuravura, e kukube kina. Sa yaco me nona ivakaruru, vakadra ni vau ni nona, sasabai, nona uluvatu, ka bai ni valu tudei; ka nona kece ena bula oqo kei na tawamudu. Era vakatokai koya na tamata me lialia baleta ni sa sega ni rawa vua me vakauti tu na nodra sesewa, se vakamuria nodra veilecayaki, se vei ivakaraitaki ni veivakarusai. Ia ni ra vakayayamo voli ki na veiyaloyalo walega, e toboka o koya na kena ka dina. Ia, nira lomavinakataka tiko na nodra itukuni, lotu guce, ukutaki ni dua ga na gauna, ka sega sara ga nona tikina e na tawamudu, ka tokona ga na veika cecere, vakaturaga ni tamata, e sega ni rere na vakaveikilaitaka tiko na Kalou; e na nona vakayacora tiko oqo e rawata kina me talairawarawa vua ka vakatusa na vakabauta sa solia vua na Kalou. Sa taura na veidina, vakatamata se vakalou. Sa sega na ka me vakayali me vaka na veivakacalai, kei na ka me tubu kina me vaka na dina. E a vakekeli, cakacaka, ka vakasaqara me vaka na iyau talei ka vunitaki tu; ia, ni ra lomavinakataka tiko na dagona, se veika ka biu ka tawayaga, e kovea ko koya na uto ni veika bibi ni vei vinaka, ka kukube ki na veika e na vakaturagataka ka laveta na vuvale vakaturaga. …

Era rekitaka li na tamata e na veigauna makawa na dina? E vakakina koi keda. Era yaco li vei ira na veivakatakila kei na raivotu? E vakakina vei keda. Era dau parofisai li? E vakakina koi keda. E a dauveitaratara li kei na Kalou? E vakayacora tiko koi keda. E ra a parofisaitaki li na “vakalesui mai ni veika?” [raica Cakacaka 3:21] Eda kaya ni sa kena gauna oqo. Era a parofisaitaka li na matanitu ni Kalou? Eda veivuketaka tiko na kena tarai cake. E a yaco li vei ira na veidusimaki ni agilosi? Sa vakakina koi keda. E tiko li vei ira na yalo ni parofisai kei na veivakatakila? Sa vakakina koi keda. Era a namaka tiko li na ikarua ni lesu mai e na nona na rairai tale mai e na lagilagi na noda Turaga ka iVakabula ko Jisu Karisito? Sa vakakina koi keda. Era a namaka li na nona na vakatalai ira tani na tamata ca mai vuravura na Kalou ka vakaduria na veiliutaki ni yalododonu? Sa vakakina koi keda. Era a vakasaqarai Jisu li kei ira na yalododonu me ra veiliutaki e vuravura? Sa vakakina koi keda. Koi keda, eda sa vakasaqara vakaidina e na gauna oqo na veika era vakayacora; vakasaqara tiko me da kila na veika era a kila, ka me da vakayacora na veika era parofisaitaka, na veivakataucokotaki levu sa i ko ya talega na veivakalesui tale ni veika kece; era na vakalasuya, qolouvaka, ka vosavakasakita na tamata; ia; era na sega ni rawa ni vakaleqa na navunavu ni Kalou, se tarova na itosotoso ni dina tawamudu e na dua na icegu—kena inaki e sa na toso tikoga ki liu, toso tiko ga ki liu, TOSO TIKOGA KI LIU, ka na vakarusa na veisaqasaqa. …

Na kaukauwa raraba ni dina tawamudu e na tudei ka sega ni vakamavoataki e na nodra vakasama na ilawalawa meca, ka na kila na veimatanitu ni sa veiliutaki e lomalagi na Kalou.⁵

Na dina, dina tawamudu, e yavu ni nuinui Vakarisito: sa ikoya duadua talega oqo na yavu tudei ka rawa vua me dau taracake kina na ka. Na kena biu oqo ka tokoni na veivakasama vakalotu sa dauvakamareqeti kina na lutu ki na veivakacalai ni voroki ni yalayala vakabibi ena vakamau, ivakavuvuli sega kina na kila ka, veivakacalai kei na vakabauta lasu ka sa vakanamata ki na rusa. Na kaukauwa ni Kalou e na dua wanonovi ira era lomana ka maroroya na dina.⁶

Na kosipeli sa dau liutaki keda mai na dina ki na dina.

Na kosipeli sa tuvalaki me tuberi keda mai na dina kina dina kei na yalomatua kina yalomatua, me yacova ni sa na yaco na vosanikalou ka tukuna ni da na rai me vaka eda sa raici, ka kila me vaka noda kilai [V&V 76:94], me yaco ni sa sega ni dua e tukuna vua e dua tale, ni kila li na Turaga, ia, era na kilai koya kece tekivu mai vei ira sa tamata wale kei ira talega era sa turaga [raica Jeremaia 31:34], me yacova ni sa cilava mai na tamata taucoko na vuku ni Kalou ka yaco ni ra sa cegu malumu tu e na matanisiga ni dina tawamudu.⁷

Me vaka na noda lotu, au na rawa ni kaya ni sa okata kece na ivakavuvuli ni dina kei na vuku ka lakovata kei na noda ivakarau vakatamata, kaukauwa ni vakasama, tamata yago vuca rawa se tawa vucarawa ka salavata talega e na vuravura oqo ka vakakina na vura vura ka na lako mai. Eda ciqoma na veidina e yaco mai, veitalia se gauna cava e lako mai kina, se evei e vu mai kina, se o cei e vakabauta. Dina, ni liutaki vua na vosa “kece” e umana na veika kece sa bula se e na qai bula ka na yaco me kilai vua se e na maliwa ni tamata e na gauna oqo ka vakakina na gauna tawa cava ni tawamudu. Ka sa itavi ni veika bulavata na vakasama ka ra sa nuitaki ka ra isau ni taro vua na Kalou me baleta na nodra ivalavala, ka vakasaqara na dina, ka me vakatara me moici ira kei na nodra ivakarau kei na vei ivakarau tale e so ni bula, sega ni yavalati mai na veitotaki se ka e vakasamataki tu ga, veitalia na kena lasu se rairai kilikili.

Oi keda na Yalododonu nikua eda vakabauta taumada na kosipeli, ka sa dua na ka levu me tukuni, ka ni kosipeli e okata na ivakavuvuli ka titobu sara, rabailevu sara, ka buroro tiko yani ka vaka e dua na ka ka sega ni se kila vakadua. Na kosipeli e vakavulica vei keda na veika me baleta na Kalou kei na veika kece saraga baleti koya. E vakatavulica talega na keda isema vua na Kalou oqo kei na noda itavi kece sara e na rukuna me vaka na luvena. E vakavulica veikeda na veitavi kei na vakanuinui e namaki vei keda me baleti ira na noda matavuvale kei na noda icaba, ki na lewe ni itikotiko, kivei ira na bula vakakina ko ira na mate. E tadolava veikeda na ivakavuvuli ka salavata na veigauna kei na veika se bera mai. Ia, me vaka na ivosavosa ni dua vei ira na tisaipeli e na gauna makawa, “e vakvotuya na bula kei na tawa mate rawa” [raica 2 Timoci 1:10], ka kauti keda ki na veiwekani kei na Kalou, ka vakarautaki keda ki na veilaveti e na vuravura tawamudu.⁸

Sa vakatakila vei keda na Kalou na veidina lelevu ka lagilagi, ka sa tu vakarau tu o Koya me tomana nona vakaraitaka tale e levu kevaka eda biuti keda e na ruku ni Nona veiliutaki kei na Nona veidusimaki. Me da segata me da muria na vei ivakavuvuli ka mai vakavulica vakawasoma vei keda ko Jisu—me da vakayacora na loma I Tamada sa tiko mai lomalag, ka tukuna, “ni’u sa sega ni muria na lomaqu, a loma i Tamaqu ga ko koya sa talai au mai.” [Joni 5:30.] Eda tiko eke me vaka nona a tiko eke, ka da sa vauci keda ki na ivua me vakataki koya me da vakayacora na loma i Tamada Vakalomalagi. E dodonu me da muria na lawa ni Kalou, na vosa ni Kalou, kei na loma ni Kalou.⁹

E sega ni dodonu me da rerevaka na solia na noda bula e na vuku ni dina.

Na dina sa dau saqati tu ga mai vua na luve ni tamata, e semati oqo kei na veiyalo ni veidabui kei na ivalavala lawaki ca. Era a sa dau vakacacani na Parofita; baleta? Baleta ni ra dau yaloqaqa e na nodra tukuna na vosa ni Kalou vei ira na tamata. Ko Sitiveni e na nona a vosa e na iulutaga vata oqo, e a kaya, “ O cei vei ira na Parofita era sa ra sega ni vakacacana ko ira na nomudou qase? Era a vakamatei ira era a tukuna eliu ni na lako mai ko koya na Yalododonu; ko koya dou sa qai solia yani ka vakamatea.

Sa vakalesuya mai na kosipeli na Turaga me vaka na kena a tiko e na nodra siga na iApositolo. Na kosipeli oqo e sega ni rau veiriti kei na ituvatuva ni tamata, ka dau veisaqasaqa se vica vata tu; ka sega ni ra vakadinata me vaka na tamata yalodina, na dina vaka iVolatabu, ka ra tukuna tiko ni ra vakabauta, ia, era sega saraga e na bula ni veisiga, era tovolea tikoga me ra ubia na nodra cala kei na daulutu ituvatuva kei na veivakavuvuli sega ni vaka iVolatabu, me ra dau sabai ira e na nodra bula ni dauvakadonui ira vakai ira. … Ia, na dina e na votu ga mai; na loma yalododonu era na vakaturi mai na nodra moce; na inaki ni Kalou e na votu mai; na matanitu ni Kalou e na tauyavu, kei … na dina e na duri dokadoka ka doudou, … ka sa sega ni dua na kaukauwa me na rawa ni tarova na kena itosotoso.¹⁰

Au na talanoataka mada oqo me baleta e so na veiyalo ka yacovi au e na imatai ni gauna au curuma mai kina na lotu oqo. Sa via dua toka na gauna labavu. “E na matai ni gauna au rogoca kina na kosipeli, au a vakaukauwataki me’u vakadonuiya ni tiko e dua na ka yaga me baleta. Au voleka sara ni nuitaka me sega ni vakakina. “Kevaka me vakakina,” au kaya “me vaka e dua na tamata dodonu au sa na vakaogai au me’u talairawarawa kina, ia, kevaka me sega au sa na sega ni vakabauti au vakai au.” Ni oti noqu vakadikeva na veika oqo ka sa rawai au na kena dina, au a kaya, “Au sa curu talega koi au; sa dodonu me’u karona; au na sega ni rawa ni biliga na ivakavuvuli ni dina tawamudu.” Ka’u na dau tukuna tikoga, au sega ni kila se na dua tale na gauna e na noqu bula, me na dua e solia vei au e dua na dina ka sega ni rawa me na veisautaki, ka’u sa tu vakarau me’u ciqoma me vaka nikua.

Kevaka e dua na tamata ka tiko e na vuravura ni lotu, se vuravura ni politiki, se na vuravura ni vakadidike, me solia vei au e dua na ivakavuvuli dina, au sa tu vakarau me’u vakabauta, veitalia se lako mai vei. E qai taroga e dua, ko vakabauta na iVola Tabu? Io. Ko vakabauta na iVola iMomani? Io. Ko vakabauta li na iVola ni Vunau kei na Veiyalayalati? Io. Au vakabauta kece sara na veika sa vola ka tukuna na Kalou, na ka kece sa volai vakaivola, ka’u na vakabauta talega na veika ka na veivosakitaka kei na matavuvale vakatamata. Eda vakatusa ni da vakabauta na veidina, ka da liutaki e na dina kece sara.¹¹

Au a namaka e na noqu curuma mai na lotu oqo, me’u na vakacacani ka vakatabui vakalawa. Au namaka ni ra na vakacacani na tamata. Ia, au vakabauta ni a sa vosa na Kalou, ni ra sa vakatakilai mai na vei vakavuvuli tawamudu, ka ni sa tiko na itavi ni Kalou me vakayacora na ka sa veisaqasaqa sara kei na veivakasama, rai, kei na vakabauta vakatamata, ka’u a sega ni kila ni na taura na noqu bula na noqu laki curuma. … Kevaka era a sa vakamatei Jisu e na gauna e liu, e sega beka li ni ra na tiko talega na veiyalo vakakina e na gauna oqo? Au a sa dikeva oti na veika me na yaco vei au e na noqu a tekivu, ka’u sa tu vakarau me’u sotava.¹²

Na turaga sa vakarautaka tu na veisala rawarawa me na vakabula kina na nona tamata, ia, e dodonu me ra vakabauti koya ka nuitaki koya; ni gauna me na yaco mai na dredre ni bula sa na sega vei ira na rere tudei e na nodra maroroya na dina, ka na yaco me vinaka na veika kece keda bula se da mate, e na bula oqo se na bula mai oqo.¹³

Me da tomana tikoga na noda vakasaqara ka karona na dina.

Eda sa vakasaqara tiko na dina. Eda a sa tekivu vakasaqara, ka da se tomana tikoga na noda vakasaqaqaqara, me vaka na kena totolo ni da kunea e dua na ivakavuvuli dina ka vakatakilai mai vua e dua na tamata, mai vua na Kalou, se mai vei ira na agilosi vakalou, eda karona ka okata me noda vakabauta vakalotu.¹⁴

Na tamata e vakasaqara voli na dina e sega ni dua tu na ivakarau me tutaka, sega ni dua na ivakavuvuli me sabaya se vakabauta me laveta. E na karona na veidina kecega, ia na dina ko ya, me vaka na siga e na lomalagi, ni cila sobu tu mai ka robota na veika buli na kena iserau ramase. Kevaka me ra na biuta na tamata na veitovaki kei na veivakaduiduitaki, ka me ra vakasaqara e na masumasu kei na lewa e loma na dina, era na kunea se evei ga era vakanamata kina.¹⁵

E dua na vuni nodra dau druka vakawasoma na tamata e na nodra vakadikeva na veika dina me baleta na dina sa ikoya na nodra dau vakasaqaqara e na nodra vuku vakatamata, ka dau veivakacerecerei e na nodra vuku vakatamata, ka ra sega ni vakasaqaqara yavutaki mai vua na Kalou kei na nona vuku ka vakasinaita ka lewa tale tu ga na vuravura kei na itosotoso ni veika kece. Sa ikoya oqo e dua na dredre levu vei ira na daunivakadidike ni vuravura, me vaka na kena itutu oqo, e tukuna na tamata ko ya ni sai koya na itekitekivu ni veika kece e kunea. Na veilawa vou kei na ivalavala e kunea sa dau nanuma sara me o koya ga ka sega ni solia na veivakacerecerei vua na Kalou.¹⁶

E sega ni dua na ka me levu cake vei au na kena talei me vaka na ivakavuvuli ni dina tawamudu; mai na ivakavuvuli ni veibula tawamudu; bula tawamudu, kei na veilaveti e na matanitu ni Kalou. Ia oqo, sa noda itavi me da ciqoma na veika oqo, baleta ni kevaka eda na sega ni ciqomi ira veitalia na levu ni veidina, e na sega na kedra yaga veikeda.¹⁷

E da se rawa tu ni ciqoma na veidina, ni cava ga, ka da gadreva me da rawata ka taukena, me da vakasaqara me vaka na iyau talei sa vuni; ka me da vakayagataka kece na vuku sa solia vei keda na Kalou me da noda talega na vuku sa solia vei ira na tani; ka me da kerea e na ligana me vakaraitaka vei keda na lomana, me vaka e na veika e vakayagataki me vakaraitaka na marau kei na tiko vinaka ni ilawalawa tamata.

Kevaka me tiko e so na ivakavuvuli vinaka, e so na dina ni veivakarau ni bula ka da se sega ni vakaveikilaitaki kina, eda sa gadreva me da vulici ira. Kevaka e tiko e dua na ka e na vuravura ni vakadidike ka se sega ni da kila, me noda gagadre me da vakaveikilaitaki kina. Kevaka e dua na taba ni vakasaqarai ni dina ka cakacakataki tiko kina na tuberi vinaka ni kawa tamata, eda se bera ni kila, sa noda gagadre me da taukena. Kevaka e dua na ka me salavata kei na lawa ni matanitu, se politiki, se cava tale, eda se se ga tiko ni kila, me da gadreva me da taukena. Kevaka e so na vakasama vakalotu, so na dina vakakila ka vakalotu, so na ivakavuvuli me baleta na Kalou, eda se bera ni vulica, eda kerea na kawatamata, na masuta na Kalou na Tamada Vakalomalagi, me vakararamataka na noda vakasama me da kila, kidava, karona, ka bulataka me vaka e dua na tiki ni noda vakabauta vakalotu. Kevaka me buroro yani na noda kila kei na vakasama me vaka na tete ni delaivuravura, na karoni ni veika ka salavata kei na rarama, bula, se bula salavata kei na veika ni vuravura oqo se ko koya e se bera mai. … Era na vakasaqara na vuku ni Kalou ka tiko e na vuravura tawamudu. … Era na kukube ki na veika sa vakaturaga ka cecere na veivakamarautaki ka cakacakataki me vakadewataka na tiko vinaka ni vuvale vakatamata.

E sega ni dua na tamata se ilawalawa tamata era dusia na sala me muria na yavada, me salavata na veika oqo. E sega na veivakavuvuli se veivakasama me baleta e dua na ka, ka sa kilai tu e na vuravura ka da sa kaya nida vakatudaliga tiko kina, vakavo ke ra sa vakadinadinataki mai na ivakavuvuli ni dina tawamudu. Eda ilova, vakadikeva, vakalewa ka vakataroga vakavinaka na veika taucoko era vakaraitaki ira ki na noda vakasama, ka me vaka ga na noda se rawa tiko ni ciqoma na veidina e tiko, eda rokovi ira e na marau me ra tiki ka wase ni ivakarau eda sa okati vata.¹⁸

Kevaka me tiko e dua na dina e lomalagi, vuravura se eli, au via karona; au sega ni via kila se bulibuli cava e lako mai kina vei au, se o cei e kauta mai vei au, se o cei e vakabauta; kevaka me kilai se tawakilai, dina tawamudu, au diva me’u luvu kina e na marau levu.¹⁹

Vakatutu ni vuli kei na Veivosaki

Na kila cava soti me baleta na dina tawamudu e tu vei keda? E rawa vakacava mo vakavinakataka na sala ni nomu raica na veika oqo?
E liutaki keda vakacava na kosipeli “mai na dina ki na dina.”? Na veiveisau cava ko sa vakila ki na nomu bula ni ko sa ciqoma na veidina vovou?
Na veisoli bula cava o iko se e dua o kila e vakayacori e na vuku ni dina? Na veivakalougatataki cava e yaco mai baleta na ka oqo?
E vuqa vei ira na tamata ni Kalou era sa mate e na vuku ni dina. E rawa vakacava me da bula me baleta na dina e na sala ni noda soli bula kei na gauna me vakataki ira oqo?
Baleta na cava o nanuma kina ni dau saqati vakawasoma na dina tawamudu mai vei vuravura raraba? Na cava eda na rawa ni vakayacora me vukei ira na gone e na nodra kila ka ciqoma na dina tawamudu?
Na cava e bibi kina me da tomana tikoga na noda kila ka me baleta na dina? Na sala cava soti eda rawa ni muria kina na i vakasala nei Peresitedi John Taylor e na noda tomana na noda vakasaqara na dina? E rawa vakacava me da kila na duidui ni dina mai na cala?
E so na veidina vakakosipeli ko kunea me ra veivakauqeti ka veivakaukauwataki? E rawa vakacava vei iko e na nomu bula vaka lewenilotu mo vukea e dua me kila ka karona na dina?

Veitikina e salavata:Filipai 4:8; 1 Cesolonaika 5:21; Alama 32:28–29; Moronai 10:4–5; V&V 45:57; 93:24; Yavu ni Vakabauta 1:13

wheat — Ia, ni ra lomavinakataka tiko na dagona, se veika ka biu ka tawayaga,… [na tamata ni Kalou] e kovea na uto ni veika bibi ni vei vinaka.”