Wase 4

Talairawarawa, e iTavi Tabu

Ni da vakamuria na ivunau ni Kalou, eda sega ni rerevaka e dua na ca; ni sa tiko vata kei keda na Turaga e na veigauna ka tawamudu.¹

Na Bula nei John Taylor

Ea vakaraitaka o John Taylor na talairawarawa e na nona bula taucoko. E a vakadinadinataki oqo e na gauna a taura kina na ilesilesi me biuta na nona matavuvale me la’ki qarava na Turaga e na kaulotu i Igiladi.

E a yaco mai na kaci ni veiqaravi e na Jiulai 1838 e na ivakatakila ka volai e na Vunau kei na Veiyalayalati wase 118. E na ivakatakila oqori era a vakaroti kina na iApositolo me ra lako ki na nodra dui kaulotu mai na tikina me a tara kina na valetabu mai Far West, Missouri, e na 26 ni Epereli 1839. E vakadredretaka dina sara na kena muri na ivakaro oqo mai na veivakacacani kei na nodra vakasevi tiko na Yalododonu mai Missouri e na vulaibatabata ni 1838–39. Ia e dina ni tu na rerevaki ni lesu i Missouri, era a vakanuinui ga vua na Turaga o John Taylor kei iratou na nona itokani iApositolo ka ratou a talairawarawa tikoga. Ni oti vakalailai na bogilevu tutu ni ika 26 ni Epereli 1839, eratou a lesu tale ki Far West ka ra la’ki sota e na vanua me a tara kina na valetabu, era a vakadabera na vatuitutu ni valetabu ka ra biubiu sara ki Nauvoo me la’ki vakaoti kina na vakavakarau ni kaulotu ki Igiladi.²

E a biuta i na nona kaulotu o Elder Taylor mai Montrose, Iowa, na vanua ka sa la’ki vakaitikotiko kina kei na nona matavuvale e na veibareki tolonikau makawa e na tai ka dua ni uciwai mai Nauvoo. E dina ni ratou tauvi malaria tu vakamatavuvale, e a talairawarawa ga ki na kaci me kaulotu i Igiladi. Ni vosa me baleta na mosi ni nona sa na biuta tu na nona matavuvale, e a kaya kina vakaoqo: “Na vakasamataka na veika dredre era se qai sotava oti, na kena sega ni vakadeitaki na nodratou tiko ga e na vale eratou sa tawana oqo— ka dua ga na kena rumu—na mate veitauvi, na nodra dravudravua na veitacini tagane, na nodra sega ni taqomaki vinaka tu mai vei ira na dauvakacaca, kei na sega tu ni macala ni veika e rawa ni yaco e na noqu yali tu, e vakavuna na noqu vakanananu vakalevu. Na noqu leqataki iratou na watiqu kei na luvequ e qai vakalevutaka cake tale na gauna kei na yawa ni vanua e na tawasei keitou tu. Ia na vakasama ni noqu lako yani e na ivakaro ni Kalou i Isireli me’u la’ki sikova tale na vanua ni noqu sucu, me’u la’ki vakavulica kina na ivakavuvuli dina tawamudu ka vakatakila na veika sa vakatakila na Kalou me baleta na kena vakabulai na vuravura, e ubia vakadua na veivakanananu kece tale e tu.”³

E rawata na nona kaukauwa o Peresitedi Taylor mai na nona ivakadinadina titobu ni kosipeli: “E na imatai ni gauna au rogoca kina na kosipeli, au vakadinadinataka ni tiko kina e dua na dina. Au a voleka sara ni nuitaka me s sega ni dina. Au kaya kevaka e dina, me vaka ni’u tamata dina sa na dodonu me’u talairawarawa kina, kevaka e sega au sa na sega tale ni rawa me’u nuitaki au vakaiau.”⁴

iVakavuvuli nei John Taylor

Era digia na tisaipeli dina ni Turaga me ra muria na Lomana

E na vakayacora na Turaga na nona inaki uasivi duadua, ka vakayacora na veika e sa nakita oti. E sa noda itavi meda qarava na noda lotu, me da cibitaka na kosipeli eda sa kila, ka talirawarawa sara vakavinaka ki na veika e gadrevi kina, muria na kena lawa, ka soli keda ki na veika e vinakati kina, e na noda muria na veidusimaki ni matabete tabu, ka tu kina na idola ni veika vuni ni ivakatakila ni Kalou, vakateteya na noda ilesilesi, ka vakarokorokotaka na noda Kalou ka me rawa kina meda kitaka vakavinaka na noda itavi e vuravura, ka meda sovaraka kina na veivakalougatataki vei ira na noda kawa, ka vakateteya yani na ivakavuvuli cecere ni tawamudu, ka ra nakiti me ra vakalougatataki, vakararamataki, vakaturagataki, ka vakacerecerei kina o ira kece era talairawarawa kina.⁵

E kaya o Jisu, “Vakataqara vei kemudou na noqu ivua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou.” [Raica Maciu 11:29] Na ivua cava a vakataqari vei ira era dau muri Jisu? O koya vata sara ka vakataqari vei iko. … Na vosa e a cavuti na: Lako yani e na yacaqu kei na noqu dodonu, ka na salavata kei iko na noqu Yalo Tabu. A yaco me vakakina, ka sa yaco me duabau na nodra vakabauta na tamata, na ivunau kei na ivakavuvuli, me vaka ga e kaya na ivolanikalou. “Vakataqara vei kemudou na noqu ivua.” Na cava beka oya? E kaya o koya, “Sa kalougata ko ira sa yalomalua: ni ra na taukena na vanua. … Sa kalougata ko ira sa yalosavasava: ni ra na raica na Kalou. … “Sa kalougata ko ira sa via kania ka via gunuva na ivalavala dodonu: ni ra na vakamamautaki.”[Raica Maciu 5:5–6, 8] Oqo na ivakaraitaki ni ivua a vakataqara vei ira o Jisu, oqo na kena e vakataqara vei iko o Jisu—mo dau gadreva na buladodonu, muria na ivakaro ni Kalou, ivakaraitaki ni nomu lotu ka talairawarawa ki na ivakavuvuli ni dina, e ivua dredre beka oqo? Oqo na veika e gadrevi vei ira na Yalododonu Edaidai. Vakataqara vei kemudou na noqu ivua ka vuli vei au!” E a cakava vakacava? E a talairawarawa ki na lomai Tamana, a qai namaka vei iratou na nona tisaipeli me ratou talairawarawa ki na lomana.⁶

Na Talaidredre e na lawa ni Kalou e sureta na veivakaleqai

Me vaka na lawa tawamudu ni Kalou kei na vinaka tawamudu ni veika e na kedra itutu vata kei koya e na veivuravura tawamudu ka vakakina na kedra itutu e na vuravura oqo, e dodonu vei keda kece sara me da na lako tiko e na veituberi kei na veidusimaki ni Kalou, ka sa noda itavi me da vakarorogo ki na nona lawa ka liutaki mai na nona ivakasala—ka dodonu me’u vakasama vakabibi vakalailai—mai na noda vakatubura na dua na sore ni witi oya se tini na milioni na sore ni witi vakakoya, ka ni sega ni rawa ni da cakava kevaka eda sega ni dusimaki mai na lawa e vinakati me rawa kina na tubu.

Me kena ikuri, eda luve kece ni Kalou, se sega li? Au nanuma ni kaya na ivolanikalou, “Ni da sa luvena kecega, ni sa Kalou o Koya ka tama ni yalo ni yago kecega;” [raica Cakacaka 17:28; Iperiu 12:9] ia ni Kalou ka tama ni yalo ni yago kecega, ka ni sa cakava e dua na vuravura me ra tawana na yago kecega, ka ni sa vakarautaka na veika me bula kina na yago oqori, na kedra kakana, nodra isulu, nodra tiko vakacegu, na vanua ni vakacegu kei na marau, ka solia vei ira na vuku ka tukuna vei ira me ra lako yani ka vakayagataka na veika sa buli tu me yaga vei ira, e sega li ni tu vua na dodonu me dusimaki keda ka liutaki keda, me kerea me da muria na nona lawa? E sega li ni ganiti koya vakavinaka na dodonu oqori, ni da vakasamataka?

E kaya ko vuravura, sega, e sega ni tu vua e dua na dodonu; au lewai au ga vakai au; au tu vakai au, au lewa na sala au via muria. E so na Yalododonu Edaidai era voleka sara ni ra kaya na veika vata ga; e sega sara ni tautauvata, ia era vinakata me ra voleka kina. “O au na tamata galala; sabu o cei me lewai au e na ka au cakava, “Ia au na tukuna vei iko e dua tale na tiki ni talanoa oqo ni o na cakava ga na ka o vinakata mo cakava, vakavo kevaka o yalomatua mo talairawarawa ki na lawa ni Kalou. Eda sega ni rawa me da vakacacana na nona lawa ka sega ni vesuki mai na kena itotogi e sega talega ni rawa ni da butuka sobu na veivakavuvuli tawamudu oqo ka tu e na veika buli kecega. Kevaka era duavata na veika bula kecega me ra lewai mai na lawa se mera vakaruwai, na cava e sega ni rawa kina vua na tamata?⁷

E sega ni rawa ni da lewai keda vakaikeda ka rawata na veivakalougatataki ni Kalou. O ira kece era tovolea era na kila ni ra cala. E na kauta laivi na Yalo Tabu ni Kalou mai vei ira oqori, ka ra na qai tavaiyaya vakai ira e na butobuto, ka gole sobu i eli. E namaki me da bula e na veivakatagedegede vakaturaga, me rawa ni da vakila ni da luve ni Kalou, ni Tamada na Kalou, ka na sega ni beci o Koya e na vukudra na luvena talaidredre, se mai vei ira era saqata na nona lawa se na nona matabete. E namaki keda me da bulataka na noda lotu, me da talairawarawa ki na nona lawa ka muria na nona ivakaro.⁸

Kevaka eda Yalododonu ni Kalou, e dodonu meda tekivu ena noda vulica meda talairawarawa vua na Kalou e vuravura me vaka sa caka tiko mai lomalagi ka ni sega ni o ira kecega sa kaya Turaga, Turaga, era na curu i na matanitu i Karisito, ia ko koya ga sa cakava na lomai Tamana sa tiko mai lomalagi [Raica Maciu 7:21]. Eda dau nanuma e na so na gauna ni da rawa ni cakava ga na ka eda vinakata. E rawa ni da cakava ga na ka eda vinakata, ka na qai cakava ga na ka e vinakata na Kalou; ia e na veivosa yadua kei na nanuma vuni yadua eda na lewai kina, e tukuni vei keda. …

Eda sega ni tiko eke me da dui mai caka noda, ia meda cakava na loma ni Tamada Vakalomalagi.

E so na tamata era nanuma ni ra caka vinaka tiko, ka ra cakava me vaka na ivakarau ni nodra kila, “me vaka ga na lomadra,” era na qai kidacala mai ka kila ni ra sa sega ni cakava tiko na loma ni Kalou. Era a nanuma beka ni tu na watidra kei na luvedra, ia era na qai kidacala ni ra kila ni ra sa yali mai vei ira, ka ni ra sa vakuwai mai na vuqa na veivakalougatataki era a vinakata. Mai na noda loloma cecere, na cakavinaka kei na noda veikauwaitaki vei ira na tacida kei na ganeda, ka vakakina vei ira na tamata kecega, eda sega ni rawa ni voroka na lawa ni Kalou, ka sega tale ga ni rawa ni da talaidredre ki na ivakavuvuli sa vakotora e na nona leKevaka e rawa ni dua nawa o Koya. E namaka o Koya vei keda me da cakava na veika e dodonu e Matana, kevaka e sega sa na dodonu me da sauma na isau ni noda talaidredre i na ivakavuvuli dodonu.⁹

Kevaka e rawa ni dua na kawatamata me talairawarawa I na lawa ni Turaga, e na rawa beka me na tauyavu na nona matanitu e vuravura. Kevaka e sega, na sala duadua ga e rawa ni tauyavutaka kina na nona matanitu sa i koya me kauta tani mai vuravura, se me kakua mada ni tauyavutaka na nona matanitu me yacova e dua tale na gauna; ka ni na sega ni rawa ni tauyavu na nona matanitu kevaka e sega ni dua na kawatamata e talairawarawa vua. …

Ni sega na yalo ni talairawarawa, e na lako tani na Yalo ni Kalou. Na kawatamata era na sega ni rawa ni maroroya ka ra veisaqasaqa tiko kei na lewa kei na ivakasala ni lotu kei na matanitu ni Kalou.¹⁰

Na talairawarawa e kauta mai na veivakalougatataki e na bula oqo kei na tawamudu.

Na cava na itavi ni tamata eke? Na talairawarawa vei ira na italai ni Turaga ka ra tu e na keda maliwa; ia ni da sa muria tiko na ivunau ni Kalou, e sega ni dodonu me da rerevaka e dua na ca; ni na tiko vata kei keda na Turaga e na gauna oqo kei na gauna tawamudu.¹¹

E kaya o Jisu Karisito, “au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura.” (Joni 14:27) Na vanua kecega e tiko kina na vakacegu oqo, e na biuta tu kina e dua na yalo e veivakacegui ka veivakabulabulataki ki na yalodra o ira era vakayagataka. E vaka na tegu ni mataka ki na kau e karamaca. Na vakacegu oqo e isolisoli ga mai vua na Kalou, ka na rawati mai vua e na talairawarawa i na nona lawa. Kevaka e dua na tamata e vinakata me kauta na vakacegu oqo vei ira na nona matavuvale se o ira na nona itokani, me vakabulabulataka taumada vua; na vakacegu savasava e na rawa walega mai na lawa kei na dodonu vakalomalagi, kei na talairawarawa ki na kena lawa.¹²

Eda sa vulica oqo, ni bula na Kalou; eda sa vulica ni da masu vua e na rogoca na noda masu; eda sa vulica ni icavacava cecere duadua ni marau ni tamata sa i koya me rerevaka na Kalou, rokova na nona lawa ka talairawarawa ki na nona ivunau; eda sa vulica talega ni dua na noda itavi meda tovolea me da vakamarautaki ira ka vakavukui ira na tamata kecega, na marau kei na vuku oqori e na rawa walega mai na talairawarawa ki na lawa ni Kalou.¹³

Ni da Yalododonu Edaidai eda vakabauta ni sa vakalesui mai na Kosipeli oqo, ka kena ikuri eda kila ni sa tu vei keda. E dua o au, e vakatalega kina o kemuni; ia mai na talairawarawa ki na kena ivakavuvuli kei na ciqomi ni Yalo Tabu o ni sa kila kina na Yalododonu Edaidai ni oqo a cakacaka ni Kalou, ia kevaka o ni sega ni kila, e baleta ga ni o ni sega ni bulataka tiko na nomu lotu ka muria na ivakaro ni Kalou; “kevaka e dua na tamata sa via cakava na lomai koya,” e kaya na Karisito, “e na kila se sa ka mai vua na Kalou na ivakavuvuli, se’u sa vosa vakai au ga.” [Joni 7:17.]¹⁴

E noda itavi me da qarava vakavinaka na noda ilesilesi eda sa kacivi kina, ia kevaka eda sega ni liutaki mai na veituberi kei na veidusimaki nei Koya sa Cecere Sara, eda na sega ni rawata vakakina—oqori, o ira era sega ni vinakata me ra talairawarawa ki na lawa ni Kalou, era na sega ni rawa ni cakava na ka oqori. Ia o ira era talairawarawa ki na lawa ni Kalou, e rawa ni ra rawata ka ra na rawata sara vakavinaka, ni a kaya ko Jisu: “ Vakataqara vei kemudou na noqu ivua, ka vuli vei au ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqu ivua, ka mamada na noqu icolacola.” [Maciu 11:29–30] Ia, kevaka eda sa talairawarawa vua na Kalou kei ira na yalo era sa mai vua na Kalou ka ra tu vei keda, sa na qai yaco na noda rarama me vaka na nodra na yalo dodonu ka na caudre cake tikoga na kedra rarama me yacova na siga lagilagi koya, ia kevaka eda na sega ni talairawarawa ki na lawa kei na vosa kei na ivakarau ni Lotu kei na Matanitu ni Kalou e vuravura, sa na yaco na rarama ka tu vei keda me butobuto, e na qai yaco me vaka e sa tukuni “e na vakaevei na kena levu ni butobuto koya!”[Maciu 6:23.]¹⁵

Ni ra sa yalomalua na tamata, savasava ka yalo dodonu, ka ra vakasaqara na veidusimaki ni Turaga, kei na rarama ni Nona Yalo Tabu me liutaki ira e na gaunisala ni bula, me rawa kina ni ra kila na Nona lawa, na Nona vosa, kei na Lomana—ka me ra qai talairawarawa kina me vaka na kena ivakaraitaki vei ira–o ira na tamata vakaoqo, o ira na tacida kei na ganeda era muria na ituvatuva oqo, e na rawarawa cake sara vakaduanaudolu me ra kila na veika ni Kalou mai vei ira era vakawelewele tu ga, o ira e duatani tu nodra itovo, o ira na yalowai, o ira na veilecayaki, kei ira era sega ni kauwaitaka na veivakalougatataki kei na veigauna vivinaka sa soli tu vei ira. E na yaco me butobuto na rarama ka tu vei ira na tamata oqo, ia na nodra gaunisala na kena vo e na vaka na nodra na yalododonu ni sa tubu cake tiko ga na nona rarama me yacova na siga lagilagi koya. [Raica V&V 50:24.]¹⁶

Na noda bula vakamareqeti kei na noda marau kei na noda iyau e vakatau e na noda talairawarawa vua na Kalou kei na nona lawa, kei na noda vakacerecerei e na bula oqo kei na bula ka tarava e vakatau talega e na ka vata ga o ya. Kevaka e soli i ligada e so na iyau eda na kerea vua na Tamada me vukei keda me da cakava kina na veika dodonu, ia me vaka na ka au sa kaya oti, eda na kerei koya me baleta na veika meda vakayagataka e veisiga, ka da na vakavinavinaka Vua e na vuku ni veika oqori; me vaka ga era a vakayacora na luvei Isireli. A soli vei ira e na so na gauna na mana mai vei ira na agilosi. Au sega ni kila se mataqali iqaqi vakacava e tu vei ira se o cei e dau vavavi vei ira; ia era kauta mai na mana. “O ira era a kumuna vata e levu a sega ni dua na ka e vo vei ira, kei ira era a kumuna e lailai a sega ni lailai vei ira.”[Lako Yani 16:18] Au kila ni veika oqo e dau yaco vei keda e na vuqa na gauna. Era sega ni vakani keda sara e na mana na agilosi, ia e maroroi keda na Kalou, ka’u vakila e na veigauna kece sara me vaka na vakalougatataka na Yaca ni Kalou i Isireli; ka kevaka eda rerevaka na Kalou ka dau caka dodonu, … eda na tamata e Saioni eda na vutuniyau duadua vei ira kecega na tamata.¹⁷

Au nanuma lesu tiko na imatai ni gauna a vunautaki kina vei au na kosipeli—ni se bera ni’u a papitaiso; au a rogoca e dua na veivakavulici ka vakaoqo: “Edaidai e sega na ka bibi me da yalataka vei kemuni, na nona veitovaki ga na Kalou kevaka o ni na buladodonu tiko ka muria na Nona ivakaro. O na vakacacani beka, vakararawataki, vesu se vakamatei me baleta na ivakadinadina e tu vei iko, ni lotu o ni kacivi mo ni talairawarawa kina; ia e rawa ni keimami yalataka vei kemuni ni kevaka e na yaco oqo o ni na rawata na bula tawamudu.”¹⁸

Vakatutu ni Vuli kei na Veivosaki

Na cava o nanuma e gadreva kina na Turaga me da talairawarawa? Na cava e so na veivakalougatataki e sa yalataka vei keda kevaka eda talairawarawa?
Na cava soti o sa bau sotava mai ka vakaraitaka vei iko na veivakalougatataki mai na talairawarawa? Na cava o loma vakacegu kina ni o talairawarawa?
Na cava e tiki bibi kina ni galala ni digidigi na talairawarawa? E na veisala cava eda sereki me da galala mai na noda talairawarawa?
E sala cava e vukei keda kina na talairawarawa me da vaqaqacotaka na noda ivakadinadina? Na cava e rawa ni yaco i na nona ivakadinadina ni dua na tamata mai na nona talaidredre? Na cava o nanuma e vakaibalebaletaka o Peresitedi Taylor e na nona a kaya, “E sega ni rawa me da vakau noda me da qai rawata na veivakalougatataki ni Kalou”?
Ni da kila ni vakatau tiko ki na noda talairawarawa na noda vakabulai, na cava eda rawa ni cakava me da vakavulica vei ira na luveda na ivakavuvuli oqo?
Na cava beka era se sotava tiko ga kina na talairawarawa na veivakatovolei? (Raica V&V 58:2–5.) Na cava e bibi kina me da talairawarawa tikoga e na gauna sara mada ga eda sotava tiko kina na veivakatovolei dredre?

Tiki ni iVolanikalou ka Veisemati: Maciu 11:29–30; Joni 7:17; 14:15; 1Nifai 3:7; Alama 3:26–27; V&V 58:28–29; 130: 20–21

boy being baptized — “Eda sa vulica ni doka ni marau ni tamata na rerevaki ni Kalou ka talairawarawa kina nona lawa ka maroroya na nona ivakaro.”