Wase 8

Noda iTavi Vakadaukaulotu

Ni’u raici ira na daukaulotu ni ra kaulotu me vunautaka na kosipeli [ka’u sega ni vakatitiqataka] ni ra lako me ra vakaitavi e na dua vei ira na cakacaka levu taudua ka lesi mai kina matavuvale ni kawatamata.¹

Na Bula nei John Taylor

E a veiqaravi o Elder John Taylor me kaulotu e Amerika kei na vanua tani, ka a vakacavara kina e vica na iwasewase ni kaulotu e na maliwa ni 1839 kei na 1857. E a vakaraitaka na nona vakabauta kaukauwa kei na ivakadinadina ni a veiqaravi vakavuqa e na gauna dredre, e na so na gauna e sega vua na ilavo se kakana. E a vakadinata na Turaga ni na maroroi koya kei na nona matavuvale ka solia vua na sala me vunautaka na kosipeli.

E dua na gauna e basika kina na veitokoni ni Turaga a yaco ni se qai biuta wale o Elder Taylor na nona matavuvale e Montrose, Iowa e na ilakolako ni kaulotu i Igiladi. Ni a toso voli e lomai Indiana, e a tauvimate bibi ka a vakasaurarataki me davo e na dua na otela me vakabulabula. E na loma ni gauna o ya, e a vakayagataka o Elder Taylor e na vunautaka na kosipeli e na soqo voleka i na otela, e dina ni a dau dabe e na so na gauna ni vosa tiko. Era a raica na vakarorogo vua ni dina ni sotava tiko na leqa dredre, e sega vakadua ni kere ilavo. E a yaco me dua vei ira me a tarogi koya ni a kaya: “Mr Taylor, o sega ni tautauvata kei ira tale na so na dauvunau; o sega vakadua ni talanoataka na nomu gauna voravora se na ilavo, o sa tiko voli eke e na dua na gauna dede e na tauvimate; na bili ni nomu vuniwai, otela kei na veika tale e so e sa na bibi sara. Keitou sa veivosakitaka e so na itokani ka keitou vinakata me keitou vukei iko.”

E a ciqoma o Elder Taylor na veivuke oqo e na vakavinavinaka levu ka sa mai tomana sara yani na nona ilakolako, ni oti na nona sauma na nona dinau kece. E a kaya o Elder Taylor me baleta na veika e a sotava, “Au vakabauta cake na Turaga mai na dua vei ira na tui e vuravura.”² Mai na nona veivakabauti vua na Turaga vata kei na nona dina i na vakavulica na kosipeli vei ira na tani, e a ivakaraitaki kaukauwa o John Taylor e na cakacaka vakadaukaulotu.

iVakavuvuli nei John Taylor

Na cakacaka ni veivakalotutaki e kauta mai na kila ni bula kei na tucake tale mai na mate ni kawatamata.

Eda bula oqo eke e na dua na inaki; na vuravura a tuvani e na dua na inaki; … e a vakarautaki na kosipeli me baleta e dua na inaki e na veitabagauna sa oti yani, kei na veitaba tamata ka a vakaraitaki ka tukuni vei ira, o keda edaidai, eda vakamumuri wale ga e na veiinaki o ya. Na Turaga e liutaki keda me vaka a liutaki ira na Isireli, me vaka talega ni a liutaki ira na Nifaiti mai Jerusalemi, kei na yavusa e tini, kei na veitamata tale e so, ka ra a lako i na veivanua tale e so. E sa liutaki keda voli, ka imatai ni ka e a cakava vei keda … me a vakauta mai na nona kosipeli, e na nona a vakaraitaka e liu vei Josefa Simici, o koya ni a sa soli vua na lewa mai vua na Kalou Cecere, kei na nona sa taura na nona ilesilesi mai na matabete tabu ka tiko mai lomalagi, vata kei na ilesilesi o ya na lewa me solia tale vei ira e so, a yaco me a solia vei ira tale e so, a mani yaco kina na kosipeli me a vakau mai vei keda e na veiyasa ni vuravura eda bula kina.

Ni ra lako yani na ilawalawa tagane oqori mera vunautaka na kosipeli, era a lako, me vaka a kaya o Jisu, sega mera muria na “lomadra, na loma i Tamaqu ga ko koya sa talai ira,” [raica Joni 5:30] ka tokoni ira ka ra taura tu na matabete tabu eke e vuravura e na sasaga e na nodra veituberi e na ivakavuvuli dina. E a yaco kina mera sikovi ira na veimatanitu, ka rawa kina na udolu kei na tini na udolu kei na milioni mera rogoca na nodra ivakadinadina; ia me vaka ga e na gauna e liu, e na vaka talega kina edaidai. E a kaya o Jisu—“Ni sa qiqo na matamata ni koro, ka rabailailai na sala, sa basika ki na bula, a ra sa lewe lailai sa kunea; ia sa galala na matamata ni koro, ka rabailevu na sala, sa basika ki na rusa, a ra sa lewe vuqa sa curu kina.” [Maciu 7:13–14.] E a sa yaco na veika oqo e na veitaba gauna kece e na kedra maliwa na tamata kece, e na veivanua kei na veigauna e sa vunautaki kina vei ira na kosipeli.³

E a vakasuka mai na kosipeli na Kalou me rawa kina me vakalesui mai na bula kei na tucake tale mai na mate me kila na kawatamata; ni sega ni kilai na kosipeli e na sega ni yalomatuataki na bula kei na vakatukatuka; ka ni tagane era na sega ni kila na veiivakavuvuli oqo vakavo ke sa vakatakilai vei ira. … Ni sa tawasei na lomalagi ka rau rairai ka vakaraitaka na ivakavuvuli ni kosipeli na Tamada kei na Luvena vei Josefa, ia ni sa vakalesui na Matabete tabu kei na Lotu ka tauyavutaki na matanitu ni Kalou e vuravura, sa yaco na veivakalougatataki levu i na itabatamata oqo ka a rawa ni soli i na tamata. Kevaka era rawa ni vakasamataka, o ya na veivakalougatataki levu duadua e rawa me solia na Kalou i na kawatamata.⁴

E noda itavi me da vukea na Turaga e na cakacaka ni kaulotu.

E vinakata na Turaga e na itabagauna oqo, me vaka na veitabagauna tale e so, me soqona vua e dua na kawatamata ka na talairawarawa i na nona lewa, maroroya na ivunau, vakarorogo i na nona ivakasala ka vakayacora na nona ivakaro. … Edaidai na Turaga, me vaka ga e na veigauna kece sara e liu, e vakatala na nona vosa vata kei koya ga e lewa; e digia ga na nona italai ka talai ira e na kedra maliwa na tamata. E na gauna era lako kina na italai ni Isireli, e tukuna vei ira e na dua na ivakatakila—“Ni dou sa lako, era na vakavolivoliti kemudou na noqu agilosi, ka laveti kemudou cake, ka na salavata kei kemudou na noqu Yalo Tabu.” [Raica V&V 84:88.] Ni ra a lako yani, e a dina na Kalou e na nona yalayala, ia e levu vei kemuni, e na gauna o ya e na veivanua yawa, o ni a rogoca na ivakavuvuli, e na gauna o ni rogoca kina o ni a kila ni dina, me vaka ga a kaya o Jisu—“Era rogoca na noqu sipi na noqu vosa ka kilai au, ka ra muri au, ia era na sega ni muria na vulagi, ni ra sega ni kila na domo ni vulagi.” [Raica Joni 10:5, 27.] Ko ni a rogoca na vosa dina ka salavata mai kei na yalo ni Kalou, ka a vakavuna vei kemuni mo ni vakauqeti vakayalo mo ni kila na dina ka rawata kina na talairawarawa. …

Eda sotavata me da veivuke e na inaki cava? Me da mai sagai keda ga vakaikeda? E sega. Me da mai kumuni iyau? E sega. Me da taukena ka marautaka na veika vakavuravura? E sega, ia me da kitaka na lewa ni Kalou ka vakacabori keda, na noda taledi kei na keda yaga, noda vuku kei na veika eda rawata e na kena ituvatuva kece sara me rawati kina na inakinaki nei Jiova ka vukea me tauyavutaki na sautu kei na yalo savasava e vuravura. Oqo, e na noqu kila, na noda itavi, ka sega ni da mai cakava na veika e baleti keda vakaikeda ka biuta na Kalou kei na nona matanitu mera cakava na veika era vinakata. Eda taleitaka kece na cakacaka levu ni Kalou edaidai, ka dodonu me da cakacaka vata kece na itavi oqo.⁵

Au a tabaki me’u iTalatala qase mai vua a tu vua na kena lewa, ka’u a lako me vunautaka na Kosipeli. Era a dui lako talega yani na Veiitalatala qase me vakataki au i na veimatanitu rarama, ka ra vunautaka talega na ivunau ka yalataka talega na veiyalayala vata. E so vei ira era sega ni vuku; e so era sega ni vuli vinaka. Eda a talai ira yani e dua na itagede ni iTalatala qase ka ra duatani duadua. E so na gauna na daukaulotu e dauveivoli, e so tale na gauna e lewe ni veiliutaki e na matanitu, daunituki kaukamea, daubulivatu ni vale, dautara vale, dauteitei, se daucakacaka saumi siga, ka vakatau ga i na tikina e lako mai kina. Ia era vakauqeti kece mai na Yalo Tabu, era lako kece yani e na kaulotu mera vunautaka na Kosipeli ni rarama, ni bula kei na veivakabulai. Era sa taura na iyau talei ni bula tawamudu, ka taura na kaukauwa mera vakavulica na kena dina vei ira na tani; ka ra yalataka na veiyalayala vata ga.

O kemuni kece na rogoci au e na yakavi siga edaidai vata kei ira na udolu tale na so, o ni sa rogoca na veivakavuvuli oqori, ka ra a dodoka yani vei kemuni na veiyalayala; ni o ni talairawarawa i na Kosipeli, o ni ciqoma tale ga na Yalo Tabu; o ni sa noqu ivakadinadina ni dina e baleta na veika au kacivaka mo ni rogoca kei na Yalo Tabu kei na kaukauwa ni Kalou ka salavata kei na talairawarawa i na Kosipeli, o ni na sega ni cakitaka. Na ivavakoso oqo e na sega ni cakitaka. Ni o ni talairawarawa i na lawa ni Kalou, vakamuria na nona ivakaro, ka a papitaiso me bokoci na nomuni ivalavalaca ka tabaki na ulumuni e na soli ni Yalo Tabu, o ni a ciqoma; ka yaco mo ni ivakadinadina bula e na mata ni Kalou. Oqo na ka vuni ka sega ni kila o vuravura. … E sa tu vei keda na ivakavuvuli ni bula tawamudu, ka da cakacakataka tiko kina na inakinaki tawamudu; ka da sa cakacaka tiko me taracake na Saioni ni Kalou, ka me vakavulici kina na yalo savasava, ka taqomaki kina na tagane, ka kacivaki kina na galala ki na tagane kece sara ka duidui na kedra roka, vei ira kece era duidui na nodra vakabauta e na veimatanitu yadua.⁶

E noda itavi me da vunautaka na Kosipeli ki na tamata kece… ka da sa kitaka tiko oqo, e dina ni levu na veisaqasaqa mai vei ira na ilala tamata, ia e na yaca ni Kalou eda na kitaka vaka kina. … Ia kevaka era lomana cake na tevoro mai na Kalou, era rawa ni cakava ia era sureta na leqa kei na rarawa vata kei na leqa rerevaki kei na ivalu kei na vakadavedra. Ni na veiboleiblei na veivanua e so, kei na veimatanitu e so; kei na itikotiko vakaturaga era na voroki; kei na veimatanitu era na cagina i na veimatanicagi e va, kei na veikaukauwa kece e vuravura era na kuretaki; ka na qai lako mai na Turaga e na nona gauna vakaikoya me vakatulewa i na veimatanitu; ka dodonu vei keda me da kila na veika eda cakava tiko, ia ni da nanuma ni da yalododonu ni Kalou ka sega ni dauveidabui, ia me da sinai e na vosa dina ka sinai e na yalodina ka vakatetea na noda ilesilesi kei na vakarokokrokotaka na Kalou.

Oqo na veika e nakita vei keda na Kalou. Ka oti me tara e so na valetabu, na cava e tarava? Me ia na veiqaravi e loma. Me vakau na kosipeli i na veimatanitu kei vuravura. Ka mera qai soqoni vata na tamata. Na cava e tarava? Me tara tale e so na valetabu. Na cava tale e tarava? Mera veiqaravi e loma na tamata.⁷

Era vakavulica na dina tawamudu na daukaulotu e na kaukauwa kei na lewa ni Kalou.

E tiko na duidui levu e na noda sala me vakatetei kina na kosipeli, kei na kena era kitaka na vo ni vuravura. E vuqa vei ira na tamata … era na sega ni rawa ni vakayagataki mera vunautaka na kosipeli e na vakasama ni tamata vakavuravura; ia na duidui levu e na keda maliwa ni da lako yani e na yaca ni Kalou i Isireli, tokoni mai na nona kaukauwa, vuku kei na yalomatua, me vunautaki na ivakavuvuli tawamudu ka a soli vei keda mai Vua; ia o ira era kacivaka na veika era vulica e na koronivuli lelevu.

Era lako yani na noda iTalatala qase e na malumalumu. … Ni ra biuta, era sega ni vakarautaki me sivia na kila era vakarautaki kina e na nodra koronivuli; ia na vosa era sega ni ra kauta mera vakavulica, era kauta na ivakavuvuli. E dina beka ni ra maliwai ira na vuli e na lawa ni Kalou, era rawa ni ririko ka maduwa e na nodra tovolea mera vakamacalataki ira, ia, ni ra lako yani ka vosa vei ira na ivavakoso e vuravura, na Yalo ni Turaga na Kalou e na lako vata kei ira, na Turaga e na tokoni ira ka solia mera vuku, “e na sega ni dua na nomudou meca e na veiletitaka rawa, se vorata.” [raica Luke 21:15.] O ya na yalayala e soli vei ira na italai ni Turaga ka lako yani ni ra vakabauti Koya.⁸

Era tautauvata sara ga kei keda o ira na cauravou oqori: era sa taura na yalo ni bula, na rarama kei na vuku, na isolisoli ni Yalo Tabu, ka ra italai nei Jiova Cecere, ka a digitaki ira, vakatikori ira, ka tabaki ira mera lako ka kacivaka na Nona lewa i na veimatanitu ni vuravura. Era sega ni lako e na yacadra vakaira se kaukauwa, ia e na yaca, igu kei na kaukauwa ni Kalou kei Isireli. O ya na kedra ituvaki, kevaka era kabita na Kalou ka vakateteya na nodra ilesilesi, vakamuria na ivakavuvuli ni dina, ka levea na veitemaki kei na veidabui kece, na kaukauwa ni Kalou e na tiko vata kei ira, ka na dolava na gusudra na Kalou, ka na vakavuna mera vakurabuitaki ira na tamata vuku, ka ra na vosataka na veika ka na dolava na matadra vakaiira vata kei ira era vakarorogo.

Au na via tukuna vei ira na itokani oqori, mo ni gumatua e na vakavakarau e na cakacaka me rawa kina me vakaoti vakavinaka na nomuni kaulotu. Ni kakua ni leqataka na vuravura; veitalia na dola kei na isede, na paodi, na silini, kei na peni. Mo ni voleka vua na Kalou, bulataka na nomuni lotu, vakatetea na nomu ilesilesi, vakamalumalumutaki kemuni e na mata ni Kalou, ni masu lo Vua ka na dolava kina o Koya na sala e matamuni.⁹

E dodonu me da vakarautaki keda vakayalo me rawa kina me da daukaulotu yaga.

Au via vakasala, kevaka e rawa, vei kemuni na via kaulotu mera vulica na iVolatabu, iVola i Momani, iVola ni iVunau kei na Veiyalayalati, kei na noda ivolayavu ni cakacaka, me rawa kina mera kila vinaka na veivakavuvuli ni noda vakabauta. Au via kaya talega vei ira na vo ni gonetagane ka se sega ni lako oqo e na kaulotu, ia era na lako e na dua na gauna mai muri, ni veika oqo era bibi cake vei ira ka ra se sega ni vakasamataka edaidai. E dodonu me da tokoni ka vakaukauwataki cake mai na dina. E dodonu me da saga me da kila na veivakavuvuli, veivunau, kei na veicakacaka tabu ka baleta na Lotu kei na Matanitu ni Kalou.

Eda vakasalataki mai e na iVola ni iVunau kei na Veiyalayalati me da vakasaqara na vuku me vaka na iyautalei e vunitaki, e na noda vulica kei na vakabauta; ka kila na itukutuku makawa kei na lawa ni vanua eda lewena, ka vaka kina na veivanua kei vuravura [raica V&V 88:78–80. 118]. Au kila ni ra cakacaka voli eke na cauravou, e na nodra taleva na buca lutu, cakacaka e na iteitei, lako i na valenisara vakatasuasua, ka vaka, era sega ni vakaoga na nodra vakasama me baleta na veika oqo; ia e na gauna era sa kacivi kina vakaiira i na kaulotu, e na vuqa vei ira era na vakananuma ke ra a yalomatuataka mera a taura na vakavakarau, ka ra a saga mera vulica na iVolatabu, iVola i Momani, kei na iVola ni iVunau kei na Veiyalayalati.¹⁰

Na ituvaki ni tagane eda vinakata me ra italai ni itukutuku ni kosipeli mera tagane era vakabauta na Kalou; tagane era vakabauta na nodra lotu; tagane era rokova na nodra matabete; era tagane ka ra vakabauti mai vei ira na tamata ka kilai ira ka vakabauti ira na Kalou. … Eda vinakata na tagane ka ra sinai e na Yalo Tabu kei na kaukauwa ni Kalou. … Tagane ka ra kauta na vosa ni bula kina veimatanitu, e dodonu me ra tagane dina, yalodina, yalo dodonu ka savasava; oqo na ivakaro ni Kalou vei keda, me da tovolea me da vakayacora.¹¹

Me da vakabauta ka yaloqaqa me da rawata na noda ilesilesi ni daukaulotu.

E sa roro tiko mai na gauna vakadomobula kina veimatanitu e vuravura, … e ca cake sara mai na kena e rawa ni vakasamataka na tamata—ivalu, vakadavedra, veivakarusai kei na rarawa, mate dredre veitauvi, dausiga, kei na tavuki ni vanua, ia era sa tukuna oti na parifita na veileqa lelevu oqo ka ra yaco mai. … O keda na Yalododonu Edaidai, me da kila na noda itavi kei na noda ilesilesi e na gauna dredre o ya. …

… E tu na veika e vakadredretaka dina me so na tagane mera lesu i na kaulotu ka ra a cakava e na gauna e liu, e rairai me baleta na nodra yabaki ni bula, malumalumu vakayago, kei na so tale na ulubale. Ia e vakavuqa ni lutuki au na maduwa ni’u raica na veika era cakava na vuqa na veikuoramu ka’u sa cavuta, ni ra sureti mera lako e na kaulotu. E dua e solia e dua na ulubale, ka dua tale, dua tale. E a rawarawa e na ruasagavulu na yabaki sa oti mera kacivi e rua se tolu na drau na tagane me vakatautauvatataki edaidai ni da lewe ulolu na tagane lewe ni Lotu. Na cava e vuna? E vu vakatikina mai na vakawelewele e na keda maliwa.¹²

E levu na tagane qaqa ka bula vinaka ka rawa me ra, kevaka e levu walega vakalailai na nodra vakabauta na Kalou, mera kila na leqa vakaitamera ka na yaco mai i vuravura, kei na ilesilesi ni matabete ka a solia vei ira na Kalou, era na vakarau mera vakusakusa ka voroka na gauna ni vakatotolo ka kaya, O au oqo, talai au; au via qarava na matavuvale na kawatamata. Kevaka a lako mai o Jisu me vakasaqarai ira era sa yali, au vinakata me tiko talega vei au na yalo o ya.¹³

O au, vaka i au, au a kosova e drau na udolu na maile e na noqu vunautaka na kosipeli; ka a sega na ilavo se taga ivaqa, ia au vakabauta na Turaga. E a bau guilecavi au? Sega, sega vakadua. Au a dau qaravi e na gauna kece, ka’u a vakauqeti me’u vakavinavinaka vua na Kalou na Tamaqu Vakalomalagi. Au a vakayagataki e na nona cakacaka, ka a kaya vei au ni na tuberi au kina. E dina o koya e na nona vosa; kevaka au sega ni dina i na noqu vosa, au nuitaka ni na vosoti au ka vukei au me’u vinaka cake. Ia na Turaga e dina ka yalodei, au sega vakadua me’u leqa e na ka me’u kania se gunuva se daramaka, ka sega vakadua me’u tarovi e na noqu veitosoyaki e na vanua au via lako kina.¹⁴

Au vakabauta cake na tagane ka tucake mai na soqo oqo ka kila na nodra malumalumu kei na veika era sega ni rawata, mai vei ira era kila ni ra kilaka ka rawata me vakavulica na veika kece. Na vuna? E baleta o ira na tagane ka ra vakanuinui ga vakaiira era vakanuinui matewale; ia ni ra vakanuinui vua na Turaga era na sega ni cala. … Na Turaga e lewa na veika kece, e wadravi ira na nona tamata, kevaka o ira na itokani oqo era vakanuinui tikoga vua na Kalou …, na nona Yalo Tabu e na taqomaki ira, ka vakavukui ira, vakalevutaka na nodra rawaka ka solia vei ira na yalomatua ni vuravura e na gauna era guta kina. E sega ni dodonu mera leqataka na veika e baleta na vuku vakavuravura; ka ni sega na vuku e vuravura e tautauvata kei koya e solia na Turaga vei ira na Nona Yalododonu; me ra maroroi ira ga mai na ivalavala ca, bulataka na nodra lotu, kabita na Turaga e na nodra maroroya na Nona ivakaro, e sega ni taqayataki na veika e na yaco; oqo e na yaco vei ira kece na Yalododonu ka vaka kina vei ira na itokani oqo.¹⁵

E veitalia na nodra vakanananu, o ira na [daukaulotu] era lako me vaka na agolosi ni loloma ka ra kauta yani na sore ni kosipeli, era na vakavuna me ra kau mai e vuqa mai na butobuto i na rarama, mai na cala kei na raiqiqo vakatamata i na bula, rarama, dina, kei na vuku, ka yacova sara na bula vakalou e na matanitu selesitieli ni noda Kalou.

Ni ra lako na veitokani oqo, e na vaka na cakacaka vou vei ira. Era na valuta na veicala ka sa tu e vuravura e na dua na gauna balavu, sotava na veivakalewai ka ra na tukuna ga o ira vakaira ka veivesuki sara vakaukauwa vei ira; era na vunau talega vei ira ka vakamacala vei ira na tamata ka sega ni kauwaitaka na dina, ka beca talega na lotu eda sa lewena, ia o ira na italatala qase oqo era lako ni ra talai mai vua na Turaga o Jisu Karisito. Era lako mera kacivaka ni Kalou e sa tauyavutaka e vuravura na nona cakacaka, ni a sa vosa mai lomalagi, kei na raivotu ni Kalou Cecere e sa dolavi vei keda; na rarama tawamudu e sa vakaraitaki vei ira na italai ni Kalou Cecere, na butobuto ka a ologa tu na vuravura e na veiyabaki e sa vakatalai; kei ira na italatala qase digitaki ni Isireli era sa lako yani mera kacivaka na veitukutuku talei ni veivakabulai vei ira na veimatanitu butobuto ni vuravura. … Era lako yani ka ra na lesu mai e na yalomamarau, era na kauta mai na ibini curuvou i na lotu, era na vakalougatataka na yaca ni Kalou kei Isireli, era sa taura na itavi e na soli ivakasala vei ira na itabatamata oqo.¹⁶

Vakatutu ni Vuli kei na Veivosaki

E vukea vakacava na inaki ni Turaga na cakacaka ni daukaulotu? Me vaka e dua ka sa ciqoma na kosipeli, na itavi cava vakadaukaulotu e nomu e na inaki ni Turaga?
Na cava na vuna e vakauta kina na Lotu na itabagone ka ra se sega ni matau mera daukaulotu e na gauna taucoko?
Na cava e yaga bibi dina sara kina e na cakacaka vakaulotu na vakabauta na Turaga?
E vukea vakacava na noda guta me da italai yaga ni Turaga na noda vakarautaki keda vakaikeda kei na kilikili ni noda bula?
Me ikuri ni noda a vakayagataki keda e na daukaulotu gauna taucoko, na veiqaravi cava tale eda rawa wasea me baleta na kosipeli?
Na cava so na nodra iulubale na lewenilotu ka ra sega kina ni cakacaka vakaulotu? Na cava o ni rawa ni cakava mo ni walia kina na dredre oqo?
O ni sa bau raica na weni veivakalougatataki ni Turaga vei ira era solia na nodra gauna, taledi, igu, kei na nodra iyau me vukea na kosipeli?

Tiki ni iVolanikalou ka Veisemati: Alama 26:5–7; 3 Nifai 20:29–31; V&V 1:18–23; 4:1–7; 75:2–5; 133:7–9

missionaries — E kaya o Peresitedi Taylor me baleti ira na daukaulotu, “Ni ra lako na veitokani oqo, e na vaka na cakacaka vou vei ira. … ia o ira na italatala qase oqo era lako ni ra talai mai vua na Turaga o Jisu Karisito.”