Pene 10

Te ti‘aturiraa ma te haehaa i te Atua

E tae mai te puai mau na roto i te ti‘aturiraa ma te haehaa i te Atua

No roto mai i te Oraraa o Wilford Woodruff

Ua parau te peresideni Wilford Woodruff e « Te hoê noa ohipa maere tei fariihia e au i te taatoaraa o to‘u nei oraraa, o to te Fatu ïa ma‘itiraa mai ia‘u no te tahi ohipa, ei Aposetolo e ei peresideni ihoa râ. E ohipa râ te reira na’na; e ere na‘u »¹

Noa’tu e ua maere te peresideni Woodruff i to’na mau piiraa i roto i te Ekalesia, ua ite râ oia no te aha te Fatu i pii ai ia’na. Ua parau oia: « No te aha te Fatu i ma‘iti ai i te hoê taata paruparu mai ia Wilford Woodruff no te peresideni i Ta’na Ekalesia ? No te aha Oia i ma‘iti ai ia Iosepha Semita– te hoê tamaiti tei ore i ite i te tai‘o, a piihia ai oia ? No te aha Oia i ma‘iti ai i taua mau huru taata ra ? No te mea ua nehenehe Ia’na ia faatere ia ratou. Ua ma‘iti Oia i te mau taata o te ite i te rima o te Atua. »²

Ua ite tamau noa te peresideni Woodruff i te rima o te Atua i roto i to’na mau manuïaraa e i roto i te haereraa te Ekalesia i mua. I roto i te hoê a‘oraa ta’na i horo‘a i roto i te Fare Menemene no Roto Miti, ua parau oia: « Te haamauruuru nei au i te Fatu no to‘u ora. Te haamauruuru nei au Ia’na no Ta’na mau haamaitairaa e Ta’na mau aroha ia‘u nei. Te vai nei to‘u oaoa i roto i teie mau mea, e e ti‘a roa ia‘u ia faahanahana i te Atua no te mau mea atoa ta‘u i farii. Mai te mea ua rave au i te tahi ohipa maitai; mai te mea ua nehenehe ia‘u ia poro i te Evanelia e ia tamau i te hoê e‘a e faaitoito ai au i to‘u taata tupu, i te fare e i te fenua êê, e mea na roto ïa i te mana o te Atua… Tei ia tatou nei râ teie mana. No reira tatou i tae mai ai i ô nei i teie nei mahana. No reira teie Fare Menemene i ti‘a ai i ô nei i teie nei mahana, ei faatupuraa i te mau tohuraa a te mau peropheta a te Atua i mutaa iho ra. No reira te Ziona a te Atua i haamauhia’i i ô nei i roto i teie nei mau faa no te mau mou‘a. Ua tupu teie mau mea atoa na roto i te mana o te Atua, eiaha râ na roto i te mana o te taata.³

Te mau haapiiraa a Wilford Woodruff

Te ti‘aturi nei tatou i te Atua no te mau haamaitairaa pae varua e te pae tino atoa

Te ti‘aturi hope roa nei au i te Fatu. Ua na reira noa vau i roto i to‘u oraraa, e i roto i to‘u mau ratereraa e to‘u mau tere ohipa na te Atua, i te pororaa i te evanelia a te Mesia i to‘u mau taata tupu.⁴

E ti‘a ia tatou ia haamata i te taa e e mea teitei rahi roa a‘e te mau haerea o te Atua i to tatou iho, e noa’tu te titau nei te reira i te faatusiaraa, e mea maitai a‘e, e e mea papû a‘e ta’na mau a‘oraa no tatou ia haapa‘o e ia faaohipa. E nehenehe ta te mau tauatini e rave rahi i rotopu ia tatou ia faaite i te parau mau o teie nei ohipa na roto i te ohipa i itehia e te taata tata‘itahi… E ti‘a atoa ia tatou ia ite i teie nei parau mau faufaa rahi, e e farii te Atua i te hanahana e te tura no te haamauraa o Ta’na Ekalesia e to’na basileia i ni‘a i te fenua nei. Eita ta te taata e nehenehe e titau i te reira i roto i teie nei tau e aore râ i te tahi atu tau o te ao nei. Aita atu maori râ te mana o te Atua o te nehenehe e faatupu mai te îraa o te Evanelia, e faanahonaho i te Ekalesia, e haaputuputu i To’na nunaa i Ziona no te faatupuraa i te heheuraa e no te raveraa i te ohipa tei ti‘a ia rave-faaoti-hia.⁵

Te hinaaro nei matou ia haamana‘o tatou e, to tatou puai, to tatou ti‘aturiraa e to tatou nei mana, tei roto ïa i te rima o te Atua, eiaha râ i roto i te taata. Ua Toro mai te Fatu iho i To’na rima no te haamau i teie nei Ekalesia, To’na basileia, Ta’na ohipa… Aita to tatou e mana i roto ia tatou iho. Aita tatou i farii noa‘e i te mana no te arata‘iraa e te faatereraa i teie nei basileia, na roto ana‘e râ i te tautururaa a te Atua Mana Hope.⁶

Te iteraa e, e nunaa to tatou, e Ziona to tatou, e basileia to tatou, e Ekalesia e e autahu‘araa to tatou tei tu‘atihia i te mau ra‘i e o te mau i te mana no te faatea i te mau ra‘i, e te iteraa e, te aparau nei to te mau ra‘i ia tatou, no te faatere i te raveraa i teie nei ohipa rahi o te mau mahana hopea nei o ta te Feia Mo‘a i te mau Mahana Hopea nei e haa nei, e ti‘a roa ïa i teie noa iteraa ia faaî i to tatou mau aau i te haehaa i mua i te Fatu to tatou Atua, e ia faahaamana- ‘o tamau noa ia tatou i roto i to tatou mau feruriraa e to tatou mau mana‘o te hopoi‘a e tei raro a‘e tatou Ia’na e i te tahi e te tahi, e o to tatou atoa ti‘aturiraa i ni‘a ia’na no te mau haamaitairaa atoa ta tatou e oaoa nei no te pae varua e no te pae tino atoa.⁷

To‘u mau mana‘o e to‘u nei hi‘oraa, maori râ, aita roa a‘e te fatu i farii i te hoê nunaa, mai te Metua Adamu mai â e ta‘e noa mai i teie nei mahana, ia piihia no te paturaa i To’na Basileia e no te haamauraa i Ta’na Ziona i roto i te ao nei, aore râ no te pororaa i te evanelia no te tatarahaparaa i te mau tamarii a te taata, tei ore roa i ti‘aturi i ni‘a i te Atua no te ra‘i no te tauturu ia ratou.⁸

Ua ite e ua taa maitai tatou e to tatou hopearaa, to tatou nei ti‘araa, e to tatou atoa mau haamaitairaa tei roto paatoa ïa i to’na rima.⁹

Te parau nei au i te mau taata atoa-te Ati Iuda e te Edene, tei rahi e tei iti, tei ona e tei vêvê-e e mana to te Fatu Mana Hope i roto ia’na iho, e aita oia e ti‘aturi nei i ni‘a i te tahi taata no te faahaere i ta’na ra ohipa; ia pii râ oia i te taata no te rave i ta’na ohipa e ti‘a ïa ia ratou ia ti‘aturi ia’na.¹⁰

E ma‘iti te Atua i te feia haehaa no te rave i Ta’na ra ohipa.

Ua ma‘iti te Fatu i te mau mea paruparu o te ao nei no te rave i Ta’na ra ohipa. Ua nehenehe râ ia’na ia haapii mai ia‘u aore râ te hoê o to‘u mau taea‘e, mai Ta’na i na reira i te mau tau atoa o te ao nei. Ua ma‘iti noa oia i te mau mea paruparu. A hi‘o na ia Mose i te arata‘iraa i te mau tamarii no Iseraela. Ua parau o Mose e e reo maromaro’â to’na, e ua mana‘o oia eita e nehenehe ia’na ia rave i te tahi mea. Ua parau râ te Fatu e faatupu oia i te hoê auvaha no’na. I to te Fatu hinaaroraa i te hoê arii no Iseraela, ua ma‘iti oia ia Davida, te tamaiti a Iese, o te tia‘i ra i te mamoe. Ua afa‘ihia mai te mau tamaroa atoa a Iese i mua i te peropheta, aita râ o Davida; aita râ o Samuela i ma‘iti i te [hoê noa‘e] o ratou. Ua ani oia ia Iese mai te mea te vai nei â te tahi atu mau tamaroa. Ua parau o Iese, Oia; te vai nei te hoê tamaiti iti e haapa‘o ra i te mamoe. Ua hinaaro te peropheta e farerei ia’na. I to’na taeraa mai, ua faatahinu Samuela ia’na ei Arii no Iseraela. Oia atoa i te tau o te mau Aposetolo. O vai ho‘i ratou ? E feia ravaa’i [ ite ore]. Oia atoa i teie nei mahana. Ua haamata mai na ni‘a ia Iosepha Semita e ia tatou paatoa e faatere nei i te Ekalesia. O vai ho‘i tatou ? E feia vêvê tatou, e mau to‘e paruparu no te repo. Ua ma- ‘iti râ te Fatu ia tatou no te mea ua mana‘o Oia e e nehenehe Ta’na e faarave ia tatou i te tahi mea. Te ti‘aturi nei au ua tano oia.

Te mana‘o nei au e ua mau maoro vau i te toro‘a Aposetolo hau atu i te tahi atu taata i ora i ni‘a i te fenua nei i teie mau mahana hopea nei. E ti‘a anei ia‘u ia faatietie ia‘u aore râ ia faate‘ote‘o e ia faateitei no te mea ua mau maoro vau i te Autahu‘araa ? Mai te mea e na reira vau, e taata maamaa mau ïa vau. Ua titauhia ia tatou ia faahanahana i te Atua; ua titauhia tatou ia ite i te rima o te Atua. Ua imi te diabolo ia haamou ia‘u mai te taime i fanauhia‘i au e tae noa mai i teie nei mahana. Ua vai noa râ te Fatu i to‘u rima atau e ua faaora oia ia‘u. I vai na e piti na mana tei rave i te ohipa– te hoê no te haamouraa ia‘u, te tahi no te faaoraraa ia‘u. E tei ô nei au i teie nei mahana, te hoê mauhaa paruparu i roto i te rima o te Atua. Tera râ, mai te Atua e ora ra, mai te mea e parau mai Oia eaha ta‘u ohipa, ua ineine ïa vau i te rave i te reira !

… Te pure nei au i te Atua ia horo‘a mai ia tatou te paari, e ia tauturu ia tatou ia vai haehaa, ia haapa‘o, ia vai te aau marû e te haehaa.¹¹

E hea rahiraa taime to‘u faarooraa i te mau taata i te parauraa i roto i to‘u mau tere-No te aha te Atua i ma‘iti ai ia Iosepha Semita, no te aha oia i ma‘iti ai i taua tamaiti iti no te iriti i teie nei tau tuuraa evanelia e no te haamau i te niu o teie nei Ekalesia ? no te aha oia i ore ai i ma‘iti i te tahi taata tuiroo… ? Hoê ana‘e ta‘u pahonoraa i roto i to‘u nei oraraa no te horo‘a i teie huru uiraa, oia ho‘i, eita ta te Fatu Mana Hope e nehenehe e rave i te tahi ohipa e o ratou, eita e nehenehe ta’na ia faahaehaa ia ratou. E ere ratou te pŭpŭ taata tei ma‘itihia no teie huru ohipa i te hoê tau no te ao nei. Ua ma‘iti te Fatu Mana Hope i te mau mea paruparu no teie nei ao. E nehenehe ta’na e faatere ia ratou. No reira oia i ma- ‘iti ai ia Iosepha Semita no te mea e taata paruparu oia, e ua ite oia i te reira.¹²

Ia te‘ote‘o ana‘e te taata, e hi‘a ratou.

Aore roa outou i ite i te hoê mahana, e ore roa outou e ite i te hoê mahana, i roto i teie nei oraraa aore ra i roto i te oraraa a muri atu, e nehenehe ai ia outou ia faafaufaa ore i te parururaa e te atuaturaa a te Atua. E hinaaro outou i te reira i te taatoaraa o to outou nei oraraa. Ia mana‘o ana‘e ta tatou feia apî tane, aore râ to tatou mau taata paari, aore râ ta tatou mau tamahine apî, e ua tae ratou i te hoê faito e aita ratou e hinaaro i te Fatu, e ite ïa ratou e ua hape roa ratou.¹³

Mai te mea e mana‘o te peresideni o te Ekalesia aore râ te hoê o to’na mau tauturu aore râ o te mau aposetolo aore râ te tahi noa’tu taata, i roto i to’na aau, e eita e nehenehe ta te Atua e rave i te ohipa e aita oia i reira no te tauturu, e mai te mea e, te mana‘ o atoa ra oia e mea faufaa rahi roa oia no te faahaereraa i te ohipa a te Fatu, te taahi râ ia oia i ni‘a i te e‘a no te taivaraa. Ua faaroo vau ia Iosepha Semita i te parauraa e ua parau Olive Kaudere ia’na, te piti o te aposetolo i roto i teie nei Ekalesia, « Mai te mea e faaru‘e vau i teie nei Ekalesia, e topa ïa te Ekalesia. »

Ua parau o Iosepha, « E Olive, a tamata na ». Ua tamata Olive. Ua topa oia; aita râ te basileia o te atua i topa. Ua matau vau i te tahi atu mau aposetolo i to‘u tau o tei mana‘o e eita ta te Fatu e nehenehe e rave i te ohipa e aita ratou; tera râ ua tere noa te ohipa a te Fatu e aita ratou.¹⁴

Ua ite au ia Olive Kaudere i te taime a mau ai oia i te mana o te Atua. Aitâ vau i faaroo a‘e nei i te hoê taata o tei faaite mai i te hoê iteraa puai a‘e mai ta’na i faaite i raro a‘e i te mana o te Varua. I te taime râ ua faaru‘e oia i te basileia o te Atua, ua mou to’na mana i taua taime ra… Ua ere oia i to’na puai, mai ia Samasona i ni‘a i te turi o Delila. Ua ere oia i te mana e te iteraa ta’na i oaoa na e aita roa oia i farii faahou i te îraa o te reira a ora‘i oia i te tino nei, noa’tu e ua pohe oia [ei melo no te Ekalesia].¹⁵

Hoê i ni‘a i te toru o te mau nuu o te ra‘i tei ti‘avaruhia i rapae au no to ratou orurehauraa… Tei roto ratou i te mau oire e te mau oire iti i reira te mau taata o te fenua nei e parahi ai, e i reira ihoa râ te Feia Mo‘a i te mau Mahana Hopea nei… Te mana‘o ra anei outou e te haati nei teie nei mau demoni ia tatou ma te tamata ore i te rave i te tahi mea ? Te taoto râ anei ratou ? Aita anei ta ratou e ohipa no te rave ? Te parau atu nei au i to‘u mau taea‘e o te mau nei i te Autahu‘araa, e tama‘i rahi ta tatou te aro nei e teie nei mau varua. Eita e nehenehe ia tatou ia ape i te reira. Eaha ïa ta ratou e rave i ni‘a ia outou ? E tamata ïa ratou i te faarave ia tatou i te tahi mea e te mau mea atoa e ere i te mea ti‘a. E oaoa roa teie nei mau demoni i te horo‘a i te mana‘o i roto ia‘u e i to‘u nei mau taea‘e e, e feia faahiahia rahi matou, e mea maramarama a‘e i te tahi atu mau taata; i te faaamahamaha ia tatou te tahi e te tahi, e i te tura‘i ia tatou ia imi i te faaite i te mau hara a to tatou mau taea‘e eiaha râ i ta tatou iho. No reira e ti‘a ia tatou ia ara maitai ia tatou iho. E ti‘a ia‘u ia na reira; e ti‘a i to‘u na tauturu e te mau Aposetolo ia na reira; e ti‘a ia tatou paatoa ia na reira… E mai te mea ua araara to tatou mau mata no te taa i te mau mea a te Atua, e nehenehe ïa ia tatou ia taa i ta tatou mau hopoi‘a; e nehenehe ta tatou e taa i te mau mana o te Autahu‘araa Mo‘a e te auraa ta tatou e tape‘a nei e te Atua. E ti‘a roa ia tatou ia faahaehaa ia tatou iho i mua i te Fatu.¹⁶

Ia vai haehaa noa outou, a ara, a pure. A ara râ i te te’ote’o oi marua outou mai vetahi ê.¹⁷

Ia ti‘aturi ana‘e tatou i te Fatu ma te haehaa, e paruru e e haapuai Oia ia tatou.

Te vai nei e piti viretu o te horo‘a i te taata te mana e te ra‘i-te parau-ti‘a e te mâ o te aau. Ia noaa i te taata teie na viretu, ia vai haapa‘o noa e ia vai aueue ore noa to’na ra aau, ia mâ to’na oraraa, e, mai te mea e amui atu tatou te haehaa i teie na viretu e piti, e [paruruhia] ïa oia i te mau rahiraa paruparu e e nehenehe ta’na e pato‘i atu i te mau faahemaraa e rave rahi. Te vai nei te mau paruparu ia tatou paatoa; ua faati‘a te Atua i teie mau paruparu ia vai mai no te haapii ia tatou i te haehaa i roto ia tatou iho e te aroha ia vetahi ê.

Aore roa te hoê o tatou e maitai a ora‘i i te tahuti nei; te taata râ, na roto i to’na haehaa, o te ti‘aturi i te Atua e ore oia e topa i roto i te aroraa no te ohipa ti‘a, e o te ore roa e haaparuparu i roto i ta’na fafauraa e te parau mau, e o te ore roa e ofati i ta’na mau fafauraa, o oia ïa o ta tatou e nehenehe e faahiahia, e na roto i te tautururaa no ô mai i te ra‘i ra, e tamata ia pee atu.¹⁸

Te hinaaro nei au e parau i to te Feia Mo‘a i te mau Mahana Hopea nei, e te mea ana‘e tei ti‘a ia tatou ia rave o te vai haapa‘onoa- raa ïa, te haapa‘oraa i Ta’na ra mau faaueraaa, ia vai haehaa, e ia imi Ia’na na roto i te pure u‘ana, e e maitai ïa tatou paatoa.¹⁹

Te vai nei te Atua i rotopu i teie nunaa. Ua titauhia râ ia tatou ia faaroo i To’na ra reo, ia haapa‘o i Ta’na ra mau faaueraa, e ia faahaehaa ia tatou iho i mua Ia’na…Te vai nei te hoê hau e vai nei i rotopu i te mau Momoni-mai ta te taata e pii nei ia tatou- o te hoê ohipa maere e te umerehia i to te ao… Te tumu no to tatou hau o teie ïa- o te Atua to tatou hoa, to tatou auvaha ture, to tatou faaora. Mai te mea eita e nehenehe i te Fatu ia paturu i Ta’na ohipa, e mea papû eita atoa ïa e nehenehe ia tatou. E nehenehe râ Ta’na. Ua na reira oia i te mau taime atoa, e e na reira oia e tae noa’tu i te hopea. No reira te parau atu nei au i to te Feia Mo‘a, eiaha e mata‘ u. A ti‘aturi i te Atua. Eiaha to outou aau ia paruparu. Ia tae ta outou mau tiaororaa i te tari‘a o te Fatu Sabaota ra i te mahana e te pô. A ani i te mea ta outou e hinaaro nei. Ia na reira outou, e pahono mai te Fatu i ta outou mau pure, mai te mea e ani outou i te mea ti‘a. I reira to tatou nei puai i te vairaa. I roto i te Atua ra.²⁰

Te mau mana‘o tauturu no te tuatapaparaa e te haapiiraa.

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

No te aha e mea faufaa rahi ia faaite i to tatou ti‘aturiraa i te Atua ? (A hi‘o i te mau api 111-13). Nahea teie nei iteraa e haamaitai ai i to tatou hi‘oraa i te oraraa ?
O vai ta te peresideni Woodruff e faahiti ra mai « te mau mea paruparu o te ao nei » ? (A hi‘o i te mau api 111, 113-14; a hi‘o atoa 1 Korinetia 1:25–28). No te aha te Fatu e ma‘iti ai i taua huru taata ra no te faatupu i Ta’na ohipa ? Eaha te taime i ite ai outou i te Fatu i te raveraa i te ohipa na roto i « te mau mea paruparu o te ao nei » ?
A tai‘o i te taatoaraa o te toru o te paratarafa i te api 114 e a feruri aore râ a aparau eaha râ ïa te huru o to outou oraraa mai te peu te ere ra i te parururaa e te aupururaa a te Atua. Eaha ta teie e haapii mai nei no ni‘a i te te‘ote‘o ? Eaha te tahi mau hotu o te te‘ote‘o ?
Eaha ta tatou e nehenehe e haapii mai na roto i te aamu no Olive Kaudere i te mau api 114-15 ?
A tai‘o i te taatoaraa o te piti o te paratarafa i te api 115. No te aha Satane e to’na mau nuu e hinaaro ai ia ‘mana‘o tatou e, e mea faahiahia [e] mea maramarama a‘e tatou i te tahi ê atu taata » ? No te aha ratou e hinaaro ai ia tatou ia « faaite i te mau hara a to tatou mau taea‘e eiaha râ i ta tatou iho mau hara » ? Nahea ta tatou e pato‘i ai i teie nei mau faahemaraa ?
A tai‘o faahou i te mau paratarafa hopea e maha o te pene, ma te tapa‘o i te mau ta‘o e te mau parau faufaa rahi no outou (te mau api 115-17). Eaha te mau haamaitairaa ta tatou e farii ia ti‘aturi ana‘e tatou i te Fatu ?

Te mau papa‘iraa mo‘a: Maseli 3:5–7; Luka 18:9–14; Iakoba 2:13–21; Alama 36:3; Helamana 3:35; PH&PF 112:10; 121:34–40

President Wilford Woodruff — Ua parau te peresideni Woodruff: « Ua titauhia ia‘u ia faahanahana i te Atua no te mau mea atoa ta‘u i farii. Mai te mea ua rave au i te tahi ohipa maitai… e mea na roto ïa i te mana o te Atua.